Kina sfidon SHBA: Jemi gati të përballemi me ju në çdo lloj lufte!

Kina ka paralajmëruar Shtetet e Bashkuara se është e gatshme të përballet me “çdo lloj” lufte, pasi tensionet tregtare midis dy vendeve janë përshkallëzuar ndjeshëm. Ky reagim i ashpër erdhi pasi presidenti Donald Trump vendosi tarifa të reja mbi të gjitha mallrat kineze, duke nxitur menjëherë kundërpërgjigjen e Pekinit me tarifa prej 10-15% mbi produktet bujqësore amerikane.
“Nëse SHBA dëshiron luftë, qoftë tregtare apo e çfarëdo lloji tjetër, ne jemi gati të luftojmë deri në fund,” deklaroi ambasada kineze në Uashington përmes një postimi në platformën X, duke cituar një deklaratë zyrtare të qeverisë kineze.
Kryeministri kinez, Li Qiang, njoftoi se vendi do të rrisë përsëri buxhetin e mbrojtjes me 7.2% këtë vit, duke paralajmëruar se “ndryshime të papara në një shekull po ndodhin me një ritëm më të shpejtë”.
Kina po përpiqet të përcjellë mesazhin se ekonomia e saj mund të vazhdojë të rritet pavarësisht kërcënimeve nga SHBA. Pekini zyrtar dëshiron të paraqitet si një vend i qëndrueshëm dhe paqësor, ndryshe nga Uashingtoni, të cilin e akuzon për përfshirje në luftëra në Lindjen e Mesme dhe Ukrainë.
Nga ana tjetër, qeveria kineze synon të shfrytëzojë tensionet e Trump me aleatët e tij, si Kanadaja dhe Meksika, të cilat gjithashtu janë prekur nga tarifat amerikane. Megjithatë, Pekini duket se nuk dëshiron të rrisë retorikën deri në pikën që të trembë partnerët e mundshëm globalë.
Kina ka dhënë shpesh sinjale të gatishmërisë për konflikt. Në tetor të vitit të kaluar, presidenti Xi Jinping i bëri thirrje ushtrisë të përgatitej për luftë, ndërsa Kina zhvilloi stërvitje ushtarake pranë Tajvanit. Por ekspertët theksojnë se ka një dallim mes përgatitjes ushtarake dhe një vendosmërie reale për të hyrë në luftë.
Në një tjetër deklaratë të fortë, Ministria e Jashtme kineze akuzoi SHBA-në për përdorimin e çështjes së trafikut të fentanilit si një justifikim të dobët për rritjen e tarifave mbi importet kineze. “Frikësimi nuk na tremb. Presioni dhe kërcënimet nuk janë mënyra e duhur për të trajtuar Kinën,” u shpreh zëdhënësi i ministrisë.
Tensionet mes dy superfuqive vazhdojnë të jenë një ndër çështjet më delikate në politikën globale.

FACT CHECK:
Synimi i JOQ Albania është t’i paraqesë lajmet në mënyrë të saktë dhe të drejtë. Nëse ju shikoni diçka që nuk shkon, jeni të lutur të na e
raportoni këtu.

JOQ Sondazh

KLIKO PËR TË VOTUAR
Burimi