Rrugët jo më ‘kazanë’, gjobë kush hedh mbeturina në akse! Për identifikimin e ndotësve do përdoren kamerat e trafikut

Kush hedh mbeturina në akset rrugore kombëtare, duke i kthyer shesh-pushimet e makinave apo bankinat e rrugës në vend-grumbullime mbetjesh, do të gjobitet. Qeveria njoftoi se për të identifikuar shoferët e papërgjegjshëm, do të përdoren kamerat e monitorimit të Trafikut. “Ekipet e mirëmbajtjes së ARRSH kanë pastruar akset rrugore të tejmbushura nga mbetjet të hedhura në vendpushime, por kjo nuk mjafton. Kamera të Qendrës së Monitorimit të Trafikut do të përdoren edhe për të gjobitur ndotësit të akseve tona kombëtare, deri në ndërgjegjësimin e plotë.”, thuhet në njoftimin e ministres së Infrastrukturës, por pa specifikuar vlerën e gjobës apo kohën se kur do të nisë aplikimi i saj.