Analisti politik Roland Bejko komentoi lëvizjet e fundit brenda Partisë Demokratike, duke u ndalur te vizita e mjekut dhe deputetit Ilir Alimehmeti në zyrën e Sali Berishës. Sipas Bejkos, pas këtij takimi fshihen dy arsye kryesore: frika për karrierën politike që sapo ka nisur dhe bindja se e ardhmja e Alimehmetit në PD varet ende nga Berisha.
Ai theksoi se kreu i opozitës po shfaq shqetësim nga zërat kritikë në parti, përfshirë Alimehmetin dhe Salianjin, ndërsa akuzoi Berishën se flet për statut, por e ka shkelur vetë atë duke mos u tërhequr pas humbjes së zgjedhjeve dhe duke penguar rritjen e figurave të reja në PD.
“Duhet të ketë disa arsye që Alimehmeti ka shkuar në zyrën e Berishës. Ka kuptuar që nuk mund të ketë lëvizje si Berisha. E para është çështja e frikës, sepse sa e ka nisur karrierën dhe është një nga njerëzit më të votuar. E dyta që Alimehmeti ka shkuar te Berisha është fakti që pa Berishën nuk mund të jetë të ardhme politike për të. Mendoj që këto kanë qenë dy arsyet. Berisha është ai që të prët karrierën, flet për statutin, por kurrë nuk e respektoi atë.
Statuti nuk ndalon një anëtar të Kryesisë që të takojë qytetarët. Berisha flet për statut, por e ka shkelur vetë atë, sepse pas humbjes së zgjedhjeve duhej që të largohej. Berisha është shqetësuar jo vetëm nga fjalimet e politikanëve, Salianjit dhe Alimehmetit në Durrës, por edhe të qytetarëve, sepse u thanë të gjitha dështimet e Berishës.
U premtua që do ketë demokraci dhe meritokraci në fitore, nuk ka, u premtua që do të fitonin zgjedhjet dhe nuk i fituan. Berisha është frikësuar, sepse është mësuar që të mos ketë kundërshtarë. Duke qenë se Berisha e ka mbyllur partinë dhe e kontrollon PD-në, kjo i duket si rrezik. Berisha nuk pranon që të ketë figura që rriten në PD”, tha Bejko
Category: Politikë
-
Trokitje në mesnatë/ Alimehmeti e ka kuptuar se e ardhmja e tij politike varet nga Berisha
-
Ilir Metën po e trajtojnë në mënyrë ç’njerëzore/ Erisa Xhixho e indinjuar, akuzon institucionet
Zëvendëspresidentja e Partisë së Lirisë, Erisa Xhixho, ka reaguar pas publikimit të raportit më të fundit të Avokatit të Popullit, duke deklaruar se dokumenti konfirmon shqetësimet që PL i ka ngritur prej më shumë se një viti mbi shkeljet e të drejtave të njeriut ndaj Presidentit Ilir Meta, i cili ndodhet në IEPV-në “Jordan Misja”.
Sipas Xhixhos, raporti evidenton kufizime të pajustifikuara dhe trajtim çnjerëzor ndaj Metës, të cilin ajo e konsideron “të burgosur politik”, ndërsa e gjithë çështja është “proces i montuar politikisht” dhe shoqëruar me abuzim pushteti.
Postimi i plotë i Erisa Xhixhos:
Raporti më i fundit i Avokatit të Popullit konfirmon zyrtarisht atë që Partia e Lirisë e ka denoncuar prej më shumë se një viti për shkeljen flagrante të Konventës Europiane të të Drejtave të Njeriut, të Kushtetutës dhe të ligjeve në fuqi, sa i përket mënyrës çnjerëzore të trajtimit të z. Meta në IEPV-në “Jordan Misja”, ku ai ndodhet i burgosur politik pa fakte dhe pa prova penale, prej më shumë se një viti.
I gjithë procesi është i montuar politikisht, i shoqëruar me abuzim pushteti dhe përdorim represiv të institucioneve të drejtësisë.
Gjetjet kryesore të raportit janë tronditëse:
-Avokati i Popullit ka konstatuar se kufizimi i takimeve të Z. Meta në vetëm katër takime në muaj si minimumi i parashikuar në ligj duke e kthyer në standard të ngurtë, pa marrë parasysh rrethanat individuale, statusin e tij shoqëror dhe politik, përbën kufizim të tepruar të së drejtës për jetë familjare dhe të së drejtës për t’u organizuar politikisht.
-Ndalimi i padrejtë i vizitave të deputetëve dhe eurodeputetëve, duke kërkuar autorizime që ligji nuk i parashikon – një shkelje flagrante e Kushtetutës dhe e standardeve ndërkombëtare.
Parashikimi në nenin 51 të ligjit për të drejtat e të paraburgosurve, shpreh qartë faktin se deputetët mund të marrin takim me të paraburgosurit pa autorizim me shkrim të prokurorit.
-Kufizimi i komunikimit politik dhe pengimi i kontakteve me drejtuesit e partisë, pa asnjë bazë ligjore por vetëm zbatim i urdhrit politik të Edi Ramës.
-Ndërhyrja dhe bllokimi i komunikimit me median, një shkelje e rëndë e lirisë së shprehjes dhe transparencës.
Raporti i Avokatit të Popullit thotë qartë se të paraburgosurit duhet të kenë një regjim më të lirë dhe më të gjerë për gëzimin e të drejtave, edhe për shkak të aplikimit të parimit të prezumimit të pafajësisë.
Të gjitha këto janë praktikë e një shteti represiv, që përdor burgjet dhe institucionet e drejtësisë si instrument politik për të ndërtuar një regjim arbitrar dhe policor.
Këto janë faktet që dëshmojnë për një sistem që shkel hapur të drejtat e njeriut dhe vepron mbi bazën e urdhrave politikë dhe jo mbi bazën e ligjit. -
Në 13 vite rinia u tkurr me 45%! Emigrimi shihet si zgjidhje, shkak papunësia e lartë
Më shumë se një e katërta e të rinjve shqiptarë gjenden në të 30-tat e tyre pa asnjë zanat, arsim profesional apo të lartë të përfunduar dhe për më tepër nuk janë në asnjë lloj pune.
Ky trend, që ka mbetur kokëfortë në dy dekadat e fundit, është pasqyra më e qartë se qeveritë dhe shoqëria nuk kanë arritur të edukojnë dhe formojnë të rinjtë së paku për të qenë të zotët e vetes.
Të gjendur në këtë situatë, shumica e të rinjve shqiptarë në grupmoshën 15–29 vjeç shohin emigrimin si zgjidhjen kryesore për jetën e tyre.
Megjithë përpjekjet, sistemi arsimor në vend nuk po mund të lidhet me nevojat e tregut të punës dhe cilësia e të nxënit ka pësuar ulje. Luhatjet në arsim dhe punësim e kanë çorientuar rininë, e cila, në vend që të reagojë dhe të kërkojë llogari, po zgjedh largimin.
Në 13 vite të rinjtë tkurren me 45%
Të dhënat e INSTAT tregojnë se në vitin 2024 në të gjithë vendin kishte vetëm 405 mijë të rinj të moshës 15–29 vjeç, ose 45 për qind më pak se në censin e vitit 2011.
Rënia e popullsisë së re në moshë më shumë sesa me lindjet më pak lidhet me emigracionin e lartë, që ka marrë përmasat e pandemisë në këtë grup-moshë. Numri i të rinjve ndërmjet dy censeve 2011–2023 ka rënë tre herë më shumë se popullsia e përgjithshme.
Në arsim, të dhënat e vitit 2024–2025 tregojnë se numri i nxënësve dhe studentëve po vazhdon të tkurret. Regjistrimet në sistemin parauniversitar kanë rënë, veçanërisht në arsimin 9-vjeçar, ndërsa edhe universitetet po përballen me më pak aplikime dhe më shumë braktisje.
Të dhënat zyrtare të INSTAT tregojnë se për periudhën 2020–2025, totali i nxënësve të regjistruar në të gjitha nivelet ka rënë me rreth 61 mijë, që përbën një tkurrje prej 10%. Ndërsa gjatë dekadës nga viti 2015 deri më 1 janar 2025, numri i nxënësve në arsimin parauniversitar ra me mbi 31%, ose 112 mijë më pak.
Kjo tkurrje demografike po bën që vendi të ketë gjithnjë e më pak të rinj që hyjnë në sistemin arsimor, më pak studentë që diplomohen dhe më pak fuqi punëtore të kualifikuar për të ardhmen.
Papunësi e lartë
Megjithatë, edhe ata që diplomohen ndeshen me sfida të mëdha në tregun e punës. Punësimi i të rinjve mbetet problematik, me nivele papunësie që luhaten rreth 22% për moshat 15–29 vjeç. Një tjetër fenomen shqetësues është papunësia mes të diplomuarve në universitet.
Pavarësisht viteve të studimit dhe investimeve të familjeve, rreth 15% e të rinjve me arsim të lartë rezultojnë të papunë. Kjo ndodh sepse universitetet prodhojnë më shumë specialistë në fusha si drejtësia, ekonomia dhe menaxhimi, ndërkohë që tregu kërkon profile teknike, inxhinierike, profesione të zanatit, turizëm dhe teknologji. Kjo mospërputhje shton nën-punësimin dhe detyron të rinjtë ose të punojnë jashtë profilit, ose të kërkojnë mundësi jashtë vendit.
Emigrimi si zgjidhje
Shqipëria kryeson me diferencë të madhe listën e 45 vendeve me përqindjen më të lartë të emigrantëve në raport me popullsinë në vitin 2023. Sipas vlerësimeve të Organizatës për Bashkëpunim Ekonomik dhe Zhvillim (OECD), për çdo një mijë banorë në Shqipëri 22.1 ishin emigrantë në 38 vendet e OECD-së, një tregues që e vendos Shqipërinë shumë përpara vendeve të tjera si Rumania (12.7 emigrantë për 1000 banorë), Bullgaria (11.9) apo Kuba (10.6).
Ky nivel i lartë emigrimi nënkupton se gati një në çdo 4 shqiptarë ka emigruar jashtë vendit, duke reflektuar përmasat e jashtëzakonshme të lëvizjes demografike që ka prekur vendin tonë gjatë dekadës së fundit. Shumica e këtyre emigrantëve, mbi 80%, janë të rinj. Niveli i lartë i emigrimit është ndoshta pasqyra e pakënaqësisë sociale dhe ekonomike të brezit të ri.
Shqipëria ka hyrë në periudhën e fortë të emigrimit që prej viteve ’90, fenomen që në vend që të zbutet vetëm forcohet. Çdo vit largohet një numër i madh i të rinjve, kryesisht të kualifikuar, duke krijuar një humbje të madhe të kapitalit njerëzor.
Sipas raportimeve dhe vlerësimeve të fundit, Shqipëria është ndër vendet e Europës me normën më të lartë të largimeve të të rinjve në raport me popullsinë. Popullsia e të rinjve 0–29 vjeç është përgjysmuar brenda më pak se dy dekadave, një rënie dramatike me ndikim të thellë në ekonominë dhe strukturën sociale të vendit. Shkaku kryesor mbetet mungesa e perspektivës, pagat e ulëta, mundësi të pakta zhvillimi profesional, mosbesimi tek institucionet dhe tek e ardhmja.
1 në 4 të rinj rri kot
Të rinjtë në Shqipëri që nuk punojnë, nuk arsimohen dhe nuk trajnohen (NEET) paraqesin sot një nga sfidat më të mëdha sociale të vendit. Në vitin 2024, mbi 22% e të rinjve 15–29 vjeç nuk ishin as në punë, as në shkollë dhe as në arsim.
Në grupmoshën 15–24 vjeç, norma e NEET arrin në 21.3 për qind. Në grupmoshën 25–29 vjeç, situata përkeqësohet ndjeshëm, norma e NEET ngjitet në 31.1 për qind dhe përqindja e të rinjve që janë tërësisht inaktivë rritet dukshëm, sidomos mes grave.
Gjysma e të rinjve me arsim të ulët rezultojnë NEET deri në moshën 29 vjeç, dhe shumica e tyre janë inaktivë, jo thjesht të papunë. Rreth një e pesta e të gjithë NEET-ëve me arsim të ulët ende deklarojnë se kërkojnë punë, por pjesa më e madhe, 40 deri në 50 për qind, kanë braktisur çdo lidhje me tregun e punës ose arsimin. Edhe pse norma e braktisjes së hershme të shkollës ka rënë nga 17.4% në vitin 2021 në 13.5% në vitin 2023, furnizimi me të rinj të pashkolluar mbetet i lartë.
Në Shkodër, niveli i NEET-ëve është 22%, më i ulëti ndër qarqet e krahasuara. Tirana shfaq një nivel më të lartë në rang vendi me rreth 27%.
Të gjitha rajonet karakterizohen nga një problem i përhapur i papunësisë afatgjatë. Rreth 69 deri në 75 për qind e të rinjve që kërkojnë punë kanë më shumë se gjashtë muaj të papunë, duke treguar një shkëputje të thellë nga tregu i punës dhe një risk të lartë për të kaluar në inaktivitet.
Universitetet të zhytura në korrupsion
Qëndresa Qytetare ka analizuar se gjatë viteve 2021–2025, sipas prokurorive, janë akuzuar për korrupsion 50 pedagogë të universiteteve publike. Nga analiza rastet e korrupsionit që përfshijnë personel akademik të universiteteve publike rezultojnë të shpërndara në disa qytete. Në Shkodër, 13 pedagogë (5 me hetime të pushuara, 3 të dërguar për gjykim dhe 5 të tjerë ende nën hetim), në Elbasan u përfshinë 9 pedagogë (1 në gjykim, 1 me vendim mosfillimi dhe 7 nën hetim, çështje e kaluar tek SPAK).
Në vitin 2025 SPAK përfundoi hetimet ndaj 27 zyrtarëve të Universitetit Bujqësor të Tiranës (pjesë e stafit akademik dhe administrativ).
Rreth 9 nga 10 studentë (89.98%) pranojnë ekzistencën e korrupsionit në tetë universitetet publike të marra në analizë. Nivele të larta të perceptimit (96%) janë raportuar në Universitetin Bujqësor të Tiranës, Universitetin e Mjekësisë dhe Universitetin “Fan S. Noli” në Korçë, ndërsa nivelet më të ulëta, ndonëse përsëri shqetësuese, janë raportuar në Universitetin “Aleksandër Xhuvani” në Elbasan (77.5%).
Përvoja personale është më e përhapur në Universitetin e Mjekësisë në Tiranë (26.25%) dhe Universitetin e Shkodrës “Luigj Gurakuqi” (25%).
Pagesa për nota është perceptuar si më e përhapur në Universitetin Bujqësor të Tiranës (59.62%) dhe Universitetin “Fan S. Noli” të Korçës (56.15%), ndërsa më e ulët në Universitetin e Shkodrës “Luigj Gurakuqi” (35.33%). Detyrimi për blerje librash dominohet nga Universiteti i Shkodrës (32.34%).
Pasojat
Është krijuar një cikël dobësish në vend që po dekurajon të rinjtë. Arsimi nuk po prodhon aftësi që kërkon ekonomia, ekonomia nuk po prodhon vende të mjaftueshme pune me kushte të pranueshme për të rinjtë. Mungesa e perspektivës ekonomike dhe sociale i shtyn të rinjtë drejt emigrimit.
Largimi i të rinjve rrudh më tej bazën e popullsisë së re, ul numrin e nxënësve dhe studentëve, dobëson tregun e punës dhe ndikon në cilësinë e zhvillimit ekonomik. Si pasojë e këtyre zhvillimeve, Shqipëria rrezikon të futet në një spirale të gjatë të plakjes së popullsisë, mungesës së fuqisë punëtore dhe pamundësisë për të zhvilluar një ekonomi konkurruese pa rininë.
Në këtë realitet, pyetja nuk është më “a po ikin të rinjtë?”, por “si të krijohet një klimë që i mban, i punëson dhe i zhvillon ata”. Sfida duket se është strukturore dhe kërkon reformë në arsimin profesional dhe universitar, politika punësimi të lidhura me sektorët prioritarë, si dhe programe konkrete që ndalojnë ose ngadalësojnë emigrimin.
Nëse këto procese nuk ndryshojnë, Shqipëria do të përballet me një të ardhme ku rinia do të jetë gjithnjë e më pak e pranishme dhe zhvillimi ekonomik do të jetë i paqëndrueshëm./Monitor
-
‘8 Dhjetori – Dita e Rinisë’/ Berisha: Nderojmë përjetë guximtarët e demokracisë, ejani në Qytetin Studenti…
Kryetari i PD, Sali Berisha u ka bërë thirrje qytetarëve dhe të rinjve, t’i bashkohen ‘8 Dhjetorit – Ditës së Rinisë’, të hënën në Qytetin Studenti.
Përmes një statusi në rrjetet sociale, Berisha shkruan se ‘Dita e Rinisë’, është një datë e bekuar, teksa i është rikthyer lëvizjes studentore të dhjetorit të 1990-ës.
Teksa i cilësoi studentët e parë të ’90-ës, si guximtarë, mes tyre edhe demokratin Azem Hajdari, Berisha thekson se ishin ata që rrëzuan komunizmin dhe sollën demokracinë në Shqipëri.
‘Nesër më 8 dhjetor, ora 11:00 tek Qyteti Studenti kremtojmë liderin e Dhjetorit, Azem Hajdarin, dhe studentët, pedagogët, punëtorët dhe të rinjtë që u vunë në krye të Lëvizjes për Ndryshim, Shpresë dhe Liri’, përmbyll thirrjen e tij për t’u tubuar në nder të guximtarëve të lirisë së lëvizjes studentore të dhjetorit 1990.
Statusi
8 Dhjetori-Dita e Rinisë është data e bekuar kur rinia studentore shqiptare nisi atë që u fut në histori si “Lëvizja e Dhjetorit”, që rrëzoi komunizmin dhe solli demokracinë. Nderime përjetë atyre të rinjve guximtarë.
Nesër më 8 dhjetor, ora 11:00 tek Qyteti Studenti kremtojmë liderin e Dhjetorit, Azem Hajdarin,
dhe studentët, pedagogët, punëtorët dhe të rinjtë që u vunë në krye të Lëvizjes për Ndryshim, Shpresë dhe Liri.
-
A po dështojnë protestat e PD? Ja si përgjigjet Luan Baçi
Luan Baçi, deputet i Partisë Demokratike, i ftuar në një emision televiziv, u shpreh se foltorja e PD-së po e bën punën e saj, pavarësisht shifrave të pjesëmarrjes.
“Nuk kemi thënë ne që ajo foltorja e orës 18:00 e çdo dite të hënë do të vihet atje dhe atë ditë që do vihet do rrëzohet Rama. Ajo u krijua si rezultat i një bllokade të vërtetë në Parlament, i ndërprerjeve të seancave parlamentare për ligje shumë të rëndësishme pa asnjë shkak dhe pa arsye, duke i kaluar në votim direkt dhe pa diskutim. U pa e arsyeshme që një foltore e tillë të ishte prezent si për deputetët, por pse jo, edhe për qytetarët për të denoncuar të gjitha problematikat dhe për të bërë publike shqetësimet e tyre. Për mua, kompleksi i numrave nuk ekziston. Masiviteti për mendimin tim është i bollshëm. Pavarësisht se janë 200, 500, 1000 apo 5 000, të njëjtin rezultat do ketë dhe të njëjtën punë bën”, deklaroi deputeti demokrat.
“Partia Demokratike ka treguar që kur do të tregojë forcën e numrave e ka treguar dhe të jeni të bindur që do jetë e shpejtë dita që do tregojmë forcën e numrave, por e dimë mirë që analistët përsëri në media do të mblidhen dhe do të thonë që “u mblodhën atje 50 mijë veta, por çfarë bënë? Nuk rrëzuan Ramën”. Nëqoftëse presin që ne të bëjmë 21 Janarin, unë nuk jam dakord. Ajo foltorja për mua është shumë e mirë që bëhet një herë në javë. Le të bëhet dhe dy herë në javë. Mund të bëhet dhe një herë në 15 ditë. Do vazhdojnë foltoret dhe takimet në gjithë vendin. Kryetari i Partisë Demokratike do t’i vazhdojë. Analiza ka filluar tashmë në të gjitha degët e Partisë Demokratike dhe do të vazhdojë hap pas hapi”, shtoi Baçi. -
Takimet e Salianjit, Baçi: Janë jashtë strukturave të Partisë Demokratike!
Deputeti i Partisë Demokratike, Luan Baçi komentoi takimet e ish deputetit Ervin Salianjit, të cilat i cilësoi si “jashtë strukturave të partisë”.
“A e përkrahin shumë (Ervin Salianjin), apo pak apo s’e përkrahin fare, kjo ha diskutim. Është çështje këndvështrimi. Përkrahja e demokratëve është për të gjithë eksponentët të Partisë Demokratike.
Kushdo të zbresë nga ne eksponentët e Partisë Demokratike, deputetë të Partisë Demokratike, më tepër akoma anëtarë të Kryesisë së Partisë Demokratike, të rinj të Partisë Demokratike, të garantoj që do të kenë mbështetje, do të kenë popullaritet, do të kenë masivitet, do të kenë takime me shumë qytetarë dhe demokratë”, tha Baçi në A2CNN.
“Demokratët janë të etur dhe duan që ne të zbresim në bazë, të fillojmë me takime. Takimet janë dashur gjithmonë të bëhen, por Partia Demokratike është një parti e organizuar me një statut, ku vepron me Kryesi, me Këshill Kombëtar, me udhëzime të dala nga Partia Demokratike dhe nuk mund të dal unë tani nëse më teket, me të njohurit e mi që i kam të shumtë në Vlorë, dhe të bëj një takim në Vlorë në emër të PD-së.
Patjetër që është takim jashtë strukturave të Partisë Demokratike. Kur themi jashtë strukturave të Partisë Demokratike, duhet të kuptojmë një gjë: nëqoftëse një takim bëhet në mënyrë të pavarur, në një zonë ku ti nuk e mbulon, nuk mund të shpalosësh mendimet e tua. Mendimet e mia unë i shpalos te Kryesia e PD-së, atje ku jam anëtar. Edhe zoti Salianji, të gjitha çfarë ka i thotë te Kryesia dhe ka folur te Kryesia”, shtoi deputeti demokrat.
-
Tabaku: Paqja fiskale, një aventurë me risk për integrimin
Pas ekspertëve, edhe opozita ka shprehur shqetësim lidhur me nismën për paqen fiskale. Deputetja e PD, Jorida Tabaku ka vënë në dijeni strukturat e Bashkimit Europian lidhur me rrezikun që mbart një nismë e tillë. Gjatë një interviste për emisionin “E-ZONE” në Vizion Plus, znj. Tabaku evidentoi dy rreziqet e këtij ligji.
“Dy janë rreziqet potenciale. Fillimisht do të fshihen detyrimet e papaguara për ata që kanë abuzuar me ligjin ndër vite. Kjo do të ndodhë duke mos ofruar transparencën e nevojshme se kush janë këto subjekte që do të përfitojnë. Ky rrezik krijon potencial për të dekurajuar dhe për të prodhuar pabarazi në treg. Ndërsa rreziku i dytë lidhet me potencialin për të pastruar para. Opsioni që u jepet biznesve për të deklaruar më shumë fitim apo për të riparë bilancet në korrigjim, dhe për t’i tatuar çdo para shtesë me një normë 5%, pa e shoqëruar me një dokumentacion, janë rrezik potencial për të legalizuar para informale, që vijnë nga korrupsioni apo krimi i organizuar”, – tha Jorida Tabaku.
Por cili do të jetë qëndrimi i opozitës ndaj kësaj nisme?“Ne do të presim edhe seancën e radhës parlamentare, ku pritet të miratohet nen për nen paketa dhe buxhetit i vitit 2026. Ajo që mund të them është se, ne do të ezaurojmë çdo hallkë ankimimi, përfshirë edhe Gjykatën Kushtetuese, sa i përket paqes fiskale”, – përfundoi Tabaku.
Në 11 dhjetor Kuvendi pritet t’i “vërë” vulën buxhetit dhe paketës fiskale. Edhe mes radhëve të mazhorancës ka debate lidhur me nismën e paqes fiskale. Ndaj mbetet për tu parë vendimi final në Kuvend lidhur me miratimin e kësaj nisme./vizionplus.tv -
Deputetja Vata denoncon braktisjen e zonave rurale në Mat: Fshati prodhon ushqimin e vendit, por pushteti e braktis
Në një reagim të fundit në rrjetet sociale, deputetja e opozitës Denisa Vata u shpreh se gjatë vizitës në fshatin Ketë, një nga zonat më të thella të rrethit të Matit, u përball me një realitet të dhimbshëm: braktisje totale nga pushteti.
Sipas Vatas, rruga kryesore është e amortizuar, kanali vaditës 9 km i gjatë hapet çdo pranverë nga vetë banorët pa asnjë mbështetje, ndërsa prodhimet e fermerëve nuk kanë treg dhe shpesh u konfiskohet malli.
“Kjo nuk është çështje gjeografie apo buxheti, por zgjedhje politike që varfëron një zonë të tërë,” thekson deputetja.
Postimi:
Sot isha në fshatin Ketë, një nga zonat më të thella të rrethit të Matit dhe realiteti është një dëshmi e qartë e braktisjes totale nga pushteti vendor dhe ai qendror.
1. Rruga është plotësisht e amortizuar.
Asnjë ndërhyrje nga Bashkia Klos. Asnjë plan. Asnjë investim minimal. Zonat që prodhojnë ushqimin e këtij vendi nuk mund të lëvizin dot vetë.2. Kanali vaditës, rreth 9 km i gjatë, hapet çdo pranverë nga vetë banorët.
Pa mjete, pa mbështetje, pa asnjë makineri nga bashkia. Në 2025, fshati vadit tokat me lopata dhe me krahë, ndërsa taksat që paguajnë shkojnë diku tjetër, jo për ta.3. Prodhimet nuk kanë treg ,madje edhe kur gjejnë një mënyrë për të shitur, u konfiskohet malli.
Keta dhe Xibri njihen prej vitesh për domaten cilësore, por sot fermerët mbeten me prodhimin në duar.Dhe kur përpiqen t’i shesin në Rrugën e Arbrit, mallin ua bllokojnë. Kjo s’është as ekonomi, as mbështetje ,është tallje dhe shkatërrim i mundit të njerëzve.
Kjo situatë s’ka lidhje as me gjeografinë, as me buxhetin: është zgjedhje politike që lë një zonë të tërë të varfërohet.
-
“I teket atij”, Baçi ‘godet’ Salianjin: Takimet jashtë strukturave nuk mund të quhen aktivitet i PD-së
Luan Baçi, deputet i Partisë Demokratike, i ftuar në një studio televizive, komentoi takimet e Ervin Salianjit, të cilat i cilësoi si “jashtë strukturave të partisë”.
“A e përkrahin shumë (Ervin Salianjin), apo pak apo s’e përkrahin fare, kjo ha diskutim. Është çështje këndvështrimi. Përkrahja e demokratëve është për të gjithë eksponentët të Partisë Demokratike. Kushdo të zbresë nga ne eksponentët e Partisë Demokratike, deputetë të Partisë Demokratike, më tepër akoma anëtarë të Kryesisë së Partisë Demokratike, të rinj të Partisë Demokratike, të garantoj që do të kenë mbështetje, do të kenë popullaritet, do të kenë masivitet, do të kenë takime me shumë qytetarë dhe demokratë”, tha Baçi.
“Demokratët janë të etur dhe duan që ne të zbresim në bazë, të fillojmë me takime. Takimet janë dashur gjithmonë të bëhen, por Partia Demokratike është një parti e organizuar me një statut, ku vepron me Kryesi, me Këshill Kombëtar, me udhëzime të dala nga Partia Demokratike dhe nuk mund të dal unë tani nëse më teket, me të njohurit e mi që i kam të shumtë në Vlorë, dhe të bëj një takim në Vlorë në emër të PD-së. Patjetër që është takim jashtë strukturave të Partisë Demokratike. Kur themi jashtë strukturave të Partisë Demokratike, duhet të kuptojmë një gjë: nëqoftëse një takim bëhet në mënyrë të pavarur, në një zonë ku ti nuk e mbulon, nuk mund të shpalosësh mendimet e tua. Mendimet e mia unë i shpalos te Kryesia e PD-së, atje ku jam anëtar. Edhe zoti Salianji, të gjitha çfarë ka i thotë te Kryesia dhe ka folur te Kryesia”, shtoi deputeti demokrat. -
Salianji kërkon karrigen e Berishës? Hasimja bën parashikimin: Takimet vunë në lëvizje PD-në, ja çfarë mund të sjellin
Pedagogu Ermal Hasimja deklaroi se Ervin Salianji e ka vënë në lëvizje Partinë Demokratike me takimet e tij.
Po ashtu Hasimja por nuk përjashtoi mundësinë që ambiciet e ish-deputetit demokrat të jenë edhe më të mëdha.
“Ka pasur pak kënaqësi në raport me aksionin e opozitës, që ndoshta disa mendojnë që duhet të ishte shumë më i zëshëm, më energjik dhe mendoj që në këtë aspekt, po të shikosh çfarë ka ndodhur në këto 2-3 ditët e shkuara, tregon që efekti është pozitiv. E para, Partia Demokratike menjëherë u vu në lëvizje ndoshta për të parandaluar çfarëdolloj interpretimi ose keqinterpretimi të kësaj që po ndodh, duke u angazhuar në një proces analize dhe kjo ndodhi menjëherë pas këtij takimi të Salianjit, ndërkohë që mund të ishte bërë dhe shumë më herët. Dhe nga ana tjetër mendoj që në një farë mënyre e ka vënë edhe Partinë Demokratike në një proces më të ngutshëm, më të nxitur vetanalize, por edhe vetëreflektimi në raport me rolin që do duhet të luante në këtë kohë edhe në atë procesin e krijimit të një besueshmërie më të lartë në raport me opinionin publik, sepse për të rrëzuar Ramën nuk e rrëzon dot thjesht duke i treguar shqiptarëve që qeverisja Rama është e korruptuar.
Çështja është çfarë opsioni ke, çfarë alternative ofron ti, sa i besueshëm je ti, sa i besueshëm si ide, por dhe sa i besueshëm je edhe si burime njerëzore. Një pjesë e këtyre gjërave që po them ka qenë në fakt edhe në atë çfarë thoshte Salianji. Kështu që, pavarësisht a biem apo s’biem dakort me çështjen e Salianjit dhe këtë shkeljen e vogël të faktit që ai shkon dhe organizon një takim në Durrës, jashtë zonës së vet. Pavarësisht kësaj, efekti i parë duket pozitiv. E ka zgjuar në një farë mënyre PD-në, e ka vënë në një lloj gjendje gatishmërie ose aktiviteti. Tani duhet parë se si do të shkojë në të ardhmen. Mund të jetë patjetër edhe ai komponenti, që zoti Salianji të ketë ambicie më të mëdha për ta çuar dhe më tej këtë çështje, por për momentin këtë e ka mohuar”, u shpreh Hasimja