OBSH ka publikuar raportin më të ri mbi gjendjen e shëndetit mendor të fëmijëve dhe të rinjve në Europë duke paraqitur një situatë serioze dhe gjithnjë e më shqetësuese.
Sipas të dhënave të raportit, 1 në 7 fëmijë dhe adoleshentë jeton me një çrregullim të shëndetit mendor, ndërsa vajzat e moshës 15–19 vjeç rezultojnë të jenë veçanërisht të prekura, me 1 në 4 prej tyre që përballen me probleme të tilla.
Raporti thekson gjithashtu se vetëvrasja mbetet shkaku kryesor i vdekjeve tek të rinjtë e moshës 15–29 vjeç, duke u kthyer në një ndër sfidat më të mëdha shëndetësore në kontinent.
Gjatë 15 viteve të fundit, prevalenca e çrregullimeve të shëndetit mendor tek fëmijët dhe të rinjtë është rritur me rreth 33%, por pavarësisht kësaj rritjeje të dukshme, shërbimet shëndetësore nuk kanë avancuar me të njëjtin ritëm.
Raporti vë në dukje se një në katër vende europiane nuk ofron shërbime komunitare të shëndetit mendor për fëmijët dhe adoleshentët, ndërsa një në pesë vende nuk ka politika të dedikuara për këtë grupmoshë.
Për më tepër, cilësia e shërbimeve ndryshon ndjeshëm mes shteteve dhe aktualisht ka vetëm një psikiatër për çdo 76 000 fëmijë dhe të rinj, një tregues i qartë i mungesës së theksuar të profesionistëve të fushës.
Për të adresuar këto boshllëqe, raporti rekomandon nëntë masa thelbësore që vendet duhet t’i zbatojnë urgjentisht, duke përfshirë hartimin e planeve kombëtare të shëndetit mendor, vendosjen e standardeve klinike, investimin në rritjen e kapaciteteve të stafit profesional, përmirësimin e vazhdueshëm të cilësisë së shërbimeve dhe fuqizimin e familjeve dhe komuniteteve në proceset vendimmarrëse.
Drejtuesit e OBSH-së e kanë cilësuar këtë raport si një thirrje alarmi për të gjithë Rajonin e Europësdhe një pikë kthese të rëndësishme për mënyrën se si vendet duhet t’i qasen shëndetit mendor të fëmijëve dhe të rinjve.
Sipas OBSH-së, veprimi i menjëhershëm dhe investimet e qëndrueshme janë të domosdoshme për të ndërtuar sisteme të forta dhe të afta për t’u ardhur në ndihmë gjeneratave të ardhshme.
Category: Bota
-
OBSH/ 1 në 7 fëmijë vuan nga probleme të shëndetit mendor
-
Ukraina arrin marrëveshje me Francën për aeroplanë luftarakë
Ukraina ka arritur një marrëveshje 10-vjeçare me Francën për furnizimin me 100 aeroplanë luftarakë Rafale për të forcuar mbrojtjen e saj, ndërsa Kremlini tha se shpreson për një samit të ri me Shtetet e Bashkuara për të diskutuar një zgjidhje të mundshme për t’i dhënë fund luftës në Ukrainë.
Presidenti ukrainas, Volodymyr Zelensky, u takua me homologun e tij francez, Emmanuel Macron, në Paris më 17 nëntor, ku udhëheqësit u pajtuan për marrëveshjen, teksa forcat ruse po intensifikojnë sulmet ajrore në mbarë Ukrainën dhe po bëjnë përparime në lindje.
“Do të jetë mbrojtja më e madhe ajrore, një nga më të mëdhatë në botë”, tha Zelensky pas arritjes së marrëveshjes për aeroplanët me dy motorë.
Pallati Elize njoftoi se marrëveshja përfshin gjithashtu sisteme të mbrojtjes ajrore, bomba dhe dronë, pajisje të reja që nuk vijnë nga rezervat aktuale të Forcave të Armatosura franceze.
Marrëveshja vjen pas një njoftimi më herët këtë muaj se Suedia dhe Ukraina janë afër finalizimit të financimit për një marrëveshjeje që mund t’i mundësojë Kievit të blejë deri në 150 aeroplanë luftarakë Gripen të gjeneratës së katërt.
Ukraina prej kohësh ka kërkuar që të forcojë sistemet e saj të mbrojtjes ajrore për të ulur superioritetin e Rusisë në konfliktin më të madh dhe më vdekjeprurës në Evropë që nga fundi i Luftës së Dytë Botërore.
Ndërsa Zelensky ishte në Paris për të nënshkruar marrëveshjen – ai do të udhëtojë drejt Spanjës më 18 nëntor – Kremlini përsëri tha se shpreson të organizojë një samit të dytë mes presidentit Vladimir Putin dhe liderit amerikan, Donald Trump.
Të dy u takuan në Alaska në gusht në përpjekje për të ringjallur negociatat e paqes, që kanë ngecur, për t’i dhënë fund luftës. Por, bisedimet nuk arritën të sillnin ndonjë përparim.
Sanksionet e SHBA-së ndaj gjigantëve energjetikë të Rusisë erdhën pas disa rundeve të pasuksesshme negociatash mes SHBA-së dhe Rusisë, të cilat në një moment pritej të diskutoheshin në një samit të propozuar në Budapest.
Pak pas një bisede midis sekretarit amerikan të Shtetit, Marco Rubio, dhe ministrit të Jashtëm rus, Sergei Lavrov, Trump tha se ai nuk do të “humbiste kohë” duke u takuar me Putinin nëse udhëheqësi i Kremlinit nuk ishte i gatshëm të arrinte një marrëveshje për t’i dhënë fund luftës së tij në Ukrainë.
Zëdhënësi i Kremlinit, Dmitry Peskov, u tha gazetarëve në Moskë më 17 nëntor se një samit mund të mbahej sapo të përfundonin përgatitjet e nevojshme, një qëndrim që ai e ka përsëritur disa herë së voni.
“Vështirë se mund të parashikojmë tani se kur do të krijohen këto kushte. Edhe pse, sigurisht, të gjithë jemi të interesuar që ato të krijohen sa më shpejt”, tha ai.
“Prandaj, sapo të përfundojë kjo përgatitje dhe të ekzistojnë kushtet për mbajtjen e samitit, shpresojmë që ai të zhvillohet”.
Mediat perëndimore kanë raportuar se ka pasur pak ndryshime në qëndrimin e Rusisë për t’i dhënë fund konfliktit që nga takimi i Trumpit me Putinin në Alaska në gusht, i cili nuk rezultoi me një marrëveshje armëpushimi.
Më 8 nëntor, Trump tha se ende nuk e sheh Rusinë të gatshme të ndalë luftimet, megjithatë ai u shpreh se vazhdon ta preferojë Budapestin si vend ku do të mbahej një samit paqeje, sapo të plotësoheshin kushtet për një takim të tillë.
Trump tha më 16 nëntor se është i hapur ndaj sanksioneve të reja nga Kongresi, të cilat do të shënjestronin “çdo vend që bën biznes me Rusinë”.
Ai nuk dha detaje të tjera./ REL/
-
Macron: Paqja mes Ukrainës dhe Rusisë e mundshme brenda 2027
Presidenti francez Emmanuel Macron dhe homologu ukrainas Volodymyr Zelensky kanë mbajtur dy fjalime të shkurtra në Pallatin Elysee.
Ata iu përgjigjën pyetjeve të gazetarëve dhe në një moment, udhëheqësi francez tha se shpreson të arrijë paqe midis Ukrainës dhe Rusisë deri në vitin 2027, raportojnë mediat franceze.
Kjo sipas tij do të ishte e mundur para zgjedhjeve të ardhshme presidenciale në Francë.Zelensky, gjatë fjalimit të tij të shkurtër, tha: “Marrëveshja me Francën forcon ndjeshëm aftësitë mbrojtëse të Ukrainës”.
Dy homologët diskutuan përshpejtimin e përpjekjeve diplomatike për t’i dhënë fund luftës. -
Tragjike/ Cilësoheshin si mbretëreshat e televizionit gjerman, gjenden të vdekura në shtëpi binjaket e “argëtimit”
Alice dhe Ellen Kessler, binjaket ikonike të botës së argëtimit, kanë ndërruar jetë në moshën 89-vjeçare.
Mediat gjermane raportojnë se dy motrat e famshme, të lindura më 20 gusht 1936 në Saksoni, kanë zgjedhur eutanazinë e asistuar, proces i lejuar në Gjermani vetëm në kushte të veçanta.
Të njohura në Itali dhe në gjithë Europën si këngëtare, valltare dhe artiste shumëplanëshe, Kessler u bënë të famshme që në vitin 1959, duke fituar pseudonimin “këmbët e kombit” falë paraqitjes së tyre të paharrueshme në skenë. Sipas “Bild”, motrat kishin shprehur prej kohësh dëshirën për të qenë “të pandashme edhe në vdekje”. Ato do të varrosen së bashku, në një urnë të vetme, pranë hirit të nënës së tyre, Elsa, dhe qenit të tyre, Yello.
“Bild” raporton se të hënën rreth mesditës një patrullë policie mbërriti në banesën e motrave Kessler. Oficerët e njësisë së specializuar K12 kryen ekzaminimin paraprak dhe konfirmuan vdekjen e tyre, duke përjashtuar elementet e një krimi.
Alice dhe Ellen Kessler kishin folur publikisht për eutanazinë në vitin 2012, duke deklaruar se nëse njëra prej tyre do të ishte në gjendje vegjetative, tjetra do ta ndihmonte për të mos vuajtur. Ligji gjerman kërkon që personi të veprojë vetë, me vullnet të lirë dhe në plotësinë e aftësive mendore, ndërsa “eutanazia aktive” mbetet e ndaluar.
Karriera e tyre njohu kulmin në Itali pas zhvendosjes në vitin 1961. Paraqitjet në programet “Giardino d’inverno” dhe më pas në “Studio Uno”, me këngën e famshme “Da-da-un-pa”, i shndërruan binjaket në një fenomen kulturor të viteve ‘60.
Në vitin 2006, dy motrat vendosën të dhuronin të gjithë pasurinë e tyre organizatës humanitare “Mjekët pa Kufij”, duke thënë: “Ka kaq shumë njerëz në botë që kanë nevojë për donacione”.
Vdekja e Alice dhe Ellen Kessler shënon fundin e epokës së dy prej ikonave më të mëdha të skenës europiane.Top Channel
-
Ulen biletat e avionit me Gjermaninë/ CDU kërkon çmime më të lira
Nga Gjermania mbërrijnë lajme për ulje të taksës së fluturimeve me avion vitin e ardhshëm, kërkesë kjo e CDU/CSU-së.
Politikani, njëherazi ekspert transporti nga ky union, Stephan Stracke, tha për Bild am Sonntag, se nga një lëvizje e tillë përfitojnë dhe qytetarët. Stracke flet çmime më të ulëta të biletave pas uljes së miratuar të taksave për sektorin e aviacionit në Gjermani.
“Çmimet e biletave duhet të ulen. Kjo është ajo që pres nga linjat ajrore tani, veçanërisht Lufthansa”, u shpreh ai. Më e mira, sipas ekspertit, do të ishte që ulja e çmimeve të niste që përpara uljes së taksave më 1 korrik 2026.
“Atëherë pushimet e verës së ardhshme do të ishin tashmë më të lira”, është komenti i tij. Një hap i tillë konsiderohet se jo vetëm që do t’u dërgonte një sinjal pozitiv familjeve për pushimet verore, por do të nxiste edhe udhëtimet ajrore.
Industria e aviacionit është ankuar prej kohësh për barrën e rëndë të taksave dhe tarifave. Prandaj, udhëheqësit e koalicionit qeverisës të CDU/CSU dhe SPD ranë dakord këtë javë të ofrojnë lehtësim. Taksa e trafikut ajror do të ulet në nivelin para rritjes në maj 2024 që nga 1 korriku 2026, gjë që duhet të ofrojë lehtësim prej rreth 350 milionë eurosh.
Për më tepër, vitin e ardhshëm nuk do të ketë rritje të mëtejshme të tarifave të kontrollit të trafikut ajror. Tarifat pritet të ulen me më shumë se dhjetë përqind në përgjithësi deri në vitin 2029, dhe kostot për kontrollet e sigurisë në aeroporte do të ulen përmes proceseve të përmirësuara dhe më efikase.Top Channel
-
“Publikoni dosjen Epstein”, Trump ndërron mendje: Nuk kam gjë për të fshehur
Deri tani e kishte bllokuar publikimin e dosjeve Epstein, por Donald Trump, duket ka ndërruar mendje.
Presidenti amerikan tani foli në favor të publikimit të të dhënave mbi abuzuesin e minoreneve, Jeffrey Epstein. Shefi i Shtëpisë së Bardhë insistoi se nuk ka asgjë për të fshehur dhe i bëri thirrje kolegëve republikanë të votojnë për publikimin e tyre.
“Republikanët e Dhomës së Përfaqësuesve duhet të votojnë për të publikuar dosjet e Epstein, sepse nuk kemi asgjë për të fshehur, dhe është koha të largohemi nga ky mashtrim demokrat i kryer ..me qëllim që të shmangim vëmendjen nga Suksesi i Madh i Partisë Republikane… Departamenti i Drejtësisë tashmë i ka dorëzuar publikut dhjetëra mijëra faqe mbi “Epstein”, po shqyrton operativë të ndryshëm demokratë (Bill Clinton, Reid Hoffman, Larry Summers, etj.) dhe marrëdhënien e tyre me Epstein, dhe Komiteti Mbikëqyrës i Dhomës së Përfaqësuesve mund të ketë çfarëdo që u takon ligjërisht, NUK MË INTERESON!”, deklaroi Trump.
Demokratët në opozitë, por edhe disa nga republikanët e Trumpit, e kishin kërkuar për muaj të tërë hapjen e dosjes. Multimilioneri amerikan me shumë influencë, Jeffrey Epstein, abuzonte me vajza të mitura për vite me radhë dhe i trafikonte ato tek persona të famshëm. Pas arrestimit dhe dënimit të tij, financieri i Nju Jorkut vdiq në qelinë e tij të burgut në vitin 2019 në moshën 66 vjeçare. Raporti i autopsisë renditi vetëvrasjen si shkak të vdekjes.
Vdekja e papritur e Epstein dhe lidhjet e tij të gjera me qarqe të larta amerikane sollën spekulime rreth përfshirjes së mundshme të qarqeve me ndikim. Përpara arrestimit të tij, persona të famshëm dhe miliarderë ishin vizitorë të shpeshtë në shtëpinë e tij – madje edhe Trump kalonte kohë me Epstein, siç demonstrojnë disa video festash. Ekzistojnë dosje të shumta për rastin Epstein, nga të cilat deri më tani janë bërë publike vetëm disa fragmente.
Top Channel
-
Moti i keq në veri të Italisë, shkatërrohen 3 banesa, disa persona të zhdukur
Vijon vala e motit të keq në veri të Italisë. Një rrëshqitje dheu shkaktoi shembjen e 3 banesave në rajonin e Friuli Venezia Giulia në zonën e Gorizia.
Një person u nxor i gjallë nga rrënojat, dhe dy të tjerë u shpallën të zhdukur, pas reshjeve të dendura që u regjistruan gjatë natës.
Dheu ra mbi Brazzano di Cormons, ku ndërhynë zjarrfikësit bashkë me vullnetarët e mbrojtjes civile. Si pasojë e daljes nga shtrati të lumit Torre 300 persona u evakuan nga shtëpitë e tyre po në Gorizia, ndërsa shumë vetë u ngjitën nëpër çati për te shpëtuar.
Rajoni i Friuli Venezia Giulia u godit nga stuhi të fuqishme të cilat sollën përmbytje masive dhe disa rrëshqitje dheu, veçanërisht rreth provincave të Udine dhe Gorizia.
Zjarrfikësit u erdhën në ndihmë disa personave, teksa lumenjtë përmbytën rrugët. Ekipe të posaçme nga Lombardia, Veneto dhe Emilia Romanja u mobilizuan për të përforcuar njësitë lokale.
-
Gjykata Supreme e Kosovës/ Shpall të paligjshëm ‘tregun e lirë të energjisë elektrike’
Oda Ekonomike e Kosovës ka fituar betejën ligjore ndaj Zyrës së Rregullatorit për Energji në Gjykatën Supreme, duke ndikuar drejtpërdrejtë në funksionimin dhe transparencën e tregut të energjisë elektrike në vend.
Gjykata Supreme e Kosovës ka anuluar sot dy dispozita kyçe të rregulloreve të Zyrës së Rregullatorit për Energji (ZRRE), duke i konsideruar ato të paligjshme në lidhje me liberalizimin e tregut të energjisë elektrike.
Vendimi vjen si goditje për procesin e implementuar në mënyrë të nxituar nga ZRRE-ja, pa konsultime me bizneset apo palët e interesuara, duke tejkaluar kompetencat ligjore dhe duke shkaktuar dëme të mëdha ekonomike.
Vendimi, i marrë në procedurën administrative P.A. nr. 18/2025, ka ardhur pas padisë së Oda Ekonomike e Kosovës (OEK), e cila argumentoi se masat e ZRRE-së kishin krijuar diskriminim dhe rritje të çmimeve deri në 200% për mbi 1.300 biznese private. Kolegji gjyqësor, i kryesuar nga gjyqtarja Delushe Halimi, me anëtarë Lumni Sallauka dhe Franciska Zhitija-Ymeri, miratoi pjesën kryesore të kërkesës së OEK-së.
Në aktgjykim, Gjykata shpalli të paligjshëm dhe e shfuqizoi nenit 8 të Udhëzuesit për Liberalizimin e Tregut të Energjisë Elektrike, të datës 18 janar 2017. Po ashtu, u anulua neni 2 i Udhëzuesit për Ndryshimin dhe Plotësimin e këtij udhëzuesi, i miratuar më 28 mars 2019, pas ndryshimeve të 13 qershorit dhe 30 tetorit 2018.
“Shpallet i paligjshëm dhe shfuqizohet neni 8 i Udhëzuesit për Liberalizimin e Tregut të Energjisë Elektrike, të datës 18 janar 2017”, thuhet qartë në dispozitën e dytë të aktgjykimit.
Gjykata hodhi poshtë kërkesat e tjera të OEK-së, duke i konsideruar të palejueshme shfuqizimin e Aktit të Njoftimit Publik për Liberalizimin e Tregut, të publikuar më 12 mars 2025, si dhe detyrimin e ZRRE-së për të udhëzuar KESCO-n të korrigjojë faturat e qershorit 2025 dhe të shfuqizojë kontratat individuale për konsumatorët jofamiljarë pas 1 qershorit.
“Hedhet poshtë kërkesëpadia e paditëses në pikën III të petitumit kërkesëpadisë”, specifikohet në vendim. Çdo palë mban shpenzimet e veta procedurale, ndërsa aktgjykimi merr formë të prerë menjëherë pas komunikimit dhe ZRRE-ja detyrohet ta publikojë atë si aktin origjinal.
Padia e OEK-së, e paraqitur më 19 gusht 2025, theksonte se ZRRE-ja kishte krijuar një “hendek ligjor” përmes interpretimit të gabuar të nenit 37, paragrafi 2, të Ligjit nr. 05/L-085 për Energjinë Elektrike.
Ky nen ndan konsumatorët familjarë nga jofamiljarët bazuar në qarkullim vjetor deri në 10 milionë euro ose numër punonjësish deri në 50, por OEK-ja argumentoi se kriteret ishin interpretuar njëanshëm, duke favorizuar KESCO-n dhe operatorët privatë.
“Të drejtën e furnizimit si shërbim universal e gëzojnë të gjithë konsumatorët familjarë dhe jofamiljarë që kanë qarkullim vjetor jo më shumë se dhjetë (10) milionë euro, ose jo më shumë se pesëdhjetë (50) punonjës”, citon padia ligjin, duke shtuar se interpretimi i ZRRE-së kishte detyruar biznese me numër të madh punonjësish – por jo konsum të lartë – të paguajnë çmime “prej së paku mbi 200% të çmimit të faturës së fundit”.
OEK-ja akuzoi ZRRE-në për shkelje të Ligjit për Procedurën e Përgjithshme Administrative (LPPA), duke mos publikuar vendime administrative dhe duke qasur të dhëna konfidenciale nga ATK-ja pa autorizim.
“Kjo ka shkaktuar efekte dhe dëme joproporcionale”, tha avokati Ekrem Hoxha në seancën e 5 nëntorit 2025, duke theksuar se masat kishin efekte “në rritjen e çmimeve (inflacionin), humbjen e mijëra vendeve të punës dhe tkurrjen e ekonomisë vendore”.
Oda Ekonomike e Kosovës (OEK) ka reaguar pas vendimit të Gjykatës Supreme se ka arritur një fitore të rëndësishme ligjore, me ndikim të drejtpërdrejtë në funksionimin dhe transparencën e tregut të energjisë elektrike në vend.
Sipas OEK, me aktgjykimin P.A.nr.18/2025, të datës 05.11.2025, Gjykata Supreme e Kosovës ka miratuar kërkesëpadinë e OEK-ut dhe ka konstatuar si të paligjshëm disa dispozita kyçe të akteve nënligjore të nxjerra nga Zyra e Rregullatorit për Energji (ZRRE).
“Gjykata Supreme ka vendosur të shfuqizojë Nenin 8 të Udhëzuesit për Liberalizimin e Tregut të Energjisë Elektrike të datës 18 janar 2017, si dhe Nenin 2 të Udhëzuesit për Ndryshimin dhe Plotësimin e këtij udhëzuesi, i ndryshuar dhe plotësuar në datat 13 qershor 2018 dhe 30 tetor 2018.Ky vendim përfaqëson një hap thelbësor drejt vendosjes së një kuadri ligjor dhe rregullator më transparent, të drejtë dhe të harmonizuar me interesin e konsumatorëve jo-familjarë. Ai njëkohësisht adreson shqetësimet e ngritura nga OEK lidhur me faturimin e muajit qershor 2025 dhe kontratat individuale pas datës 1 qershor 2025. Oda Ekonomike e Kosovës mbetet plotësisht e përkushtuar ndaj mbrojtjes së interesave të biznesit kosovar”, thuhet në reagim.
OEK thekson se do të vazhdojë të monitorojë zbatimin e këtij vendimi të Gjykatës Supreme dhe të angazhohet në procesin e hartimit të rregulloreve të reja që sigurojnë konkurrencë të ndershme dhe funksionim të rregullt të tregut të energjisë në përputhje me ligjin.
Pas këtij vendimi, ka reaguar edhe Aleanca Kosovare e Bizneseve duke e cilësuar rastin si dëshmi të qartë të “dështimit profesional dhe institucional të ZRRE-së dhe të Qeverisë në menaxhimin e sektorit energjetik”.
Sipas AKB-së, rregullatori ka vepruar për vite me akte nënligjore të paqëndrueshme, të hartuara jashtë standardeve evropiane dhe pa asnjë analizë të ndikimit ekonomik, duke e futur tregun e energjisë në kaos dhe duke cenuar të drejtat e konsumatorëve dhe bizneseve.
“ZRRE ka humbur funksionin e saj bazë-mbrojtjen e interesit publik. Në vend të rregullimit profesional, ajo ka prodhuar pasiguri juridike dhe përplasje me legjislacionin në fuqi”, thuhet në reagimin e AKB-së.
Organizata vlerëson se Qeveria mban përgjegjësi të drejtpërdrejtë, pasi ka lejuar zbatimin e akteve të paligjshme dhe ka dështuar në mbikëqyrjen profesionale të sektorit.
“Lejimi i akteve të paligjshme dhe mungesa e kontrollit profesional janë qasje të rrezikshme që dëmtojnë stabilitetin e sektorit energjetik dhe kredibilitetin e institucioneve të vendit”.
Vendimi nxjerr në pah mungesën e një faze tranzitore dhe konsultimeve, siç kërkohet nga standardet e BE-së. ZRRE-ja, sipas OEK-së, kishte shtyrë liberalizimin për shkak të pandemisë COVID-19 dhe krizës energjetike, por e kishte rifilluar pa bazë ligjore të plotë. “Procesi i liberalizimit ta kryejë duke siguruar dhe ofruar dobi domethënëse”, rikujton padia Direktivën 2009/72/EC të BE-së.
Ky vendim mund të ndikojë në qindra padi individuale kundër KESCO-së dhe ZRRE-së, duke hapur rrugë për rishqyrtim të kontratave dhe faturave. Bizneset presin tani një bazë të re rregullatore, ndërsa ZRRE-ja detyrohet ta zbatojë menjëherë. OEK-ja e vlerëson si fitorje për barazinë dhe proporcionalitetin, duke theksuar se “çdo akt administrativ duhet të jetë i ligjshëm, i arsyeshëm dhe i drejtë”, siç parashikon neni 5 i LPPA-së. -
Bedri Hamza zgjidhet kryetar i ri i Partisë Demokratike të Kosovës
Partia Demokratike e Kosovës ka ndryshuar udhëheqjen e saj këtë të hënë gjatë Konventës së 12-të duke zgjedhur si kryetar të ri, Bedri Hamzën.
Në fillim të Konventës, Memli Krasniqi njoftoi dorëheqjen e tij nga pozita e Kryetarit të PDK-së, një detyrë që e mbajti për 4 vjet e 4 muaj.
Para delegatëve, Krasniqi e cilësoi detyrën e kryetarit si “nderin më të madh” të jetës së tij politike, duke theksuar se po largohet “me mirënjohje, me krenari, me paqe.”
Duke argumentuar vendimin, ai theksoi se PDK-ja ka nevojë për një “energji dhe momentum të ri” dhe për një udhëheqës që njëkohësisht do të jetë kandidat për kryeministër në zgjedhjet e ardhshme nacionale.
“Nuk po largohem prej lodhjes apo zhgënjimit. Po e bëj këtë nga përgjegjësia… sepse besoj që shtëpia jonë është mjaftueshëm e fortë për t’u ngritur në lartësi të reja,” tha Krasniqi, duke shtuar se e lë partinë “më të fortë se sa e kishte gjetur.”
Ai vlerësoi arritjet gjatë mandatit të tij, duke përmendur ringritjen e PDK-së me fitore në disa komuna kyçe dhe rikthimin në rolin e forcës kryesore opozitare.
Pas njoftimit të dorëheqjes, delegatët e partisë zgjodhën Bedri Hamzën, i cili tani pritet të udhëheqë PDK-në drejt sfidave të reja zgjedhore.
Në fjalimin para zgjedhjes së tij, Hamza tha se vota për kryetarin e ri nënkupton votë për qeverinë dhe kryeministrin e ardhshëm.
“Kosova meriton qeverisje të mirë, institucione të qëndrueshme, drejtësi të pavarur dhe investime në siguri. Këto janë detyrime për ne. Dhe sot, përveç një kandidature, ju votoni për një vizion qeverisës. Sot votoni më shumë sesa për një kryetar — votoni për një qeveri të punës. Sot votoni për një ekonomi që zhvillon prodhimin vendor, rrit pagat, pensionet dhe krijon partneritet të plotë me bizneset….Po lind kapitulli i ri i PDK-së, i bashkimit, i hapjes dhe i unitetit të brendshëm. PDK është gati, Kosova është gati dhe kemi besimin e njerëzve”, tha ai.
Ai kërkoi unifikim dhe bashkim të secilit anëtarë të PDK-së.
“Kemi pasur mendime të ndryshme dhe momente që na kanë larguar, dhe kjo është normale në një parti politike. Është e rëndësishme që sot jemi këtu me vullnet për të dëgjuar dhe për t’u bashkuar. Forca jonë është aftësia për t’i kthyer çdo dallim në përbashkësi. Bashkimi nuk kërkon të mendojmë njësoj, por të punojmë me njëri-tjetrin, me përgjegjësi, për të ecur përpara. Sot, më shumë se kurrë, kemi nevojë për njëri-tjetrin që të mos humbim askund nga rruga jonë. Ata që kanë dhënë shumë për partinë Hashim Thaçi, Kadri Veseli presin prej nesh të jemi të bashkuar dhe të ecim përpara si ekip”, tha ai. -
“Sulmet serbe në Kosovë ishin në rritje”, Clark tregon si lindi plani për ndërhyrje
Ish-komandanti suprem i NATO-s, Wesley Clark, dëshmoi këtë të hënë për rastin e ish-krerëve të UÇK-së para Dhomave të Specializuara të Kosovës në Hagë.
Clark ka treguar se sulmet serbe ndaj popullsisë në Kosovë ishin në rritje dhe situata ishte duke u përshkallëzuar deri në atë pikë sa që ministri i Jashtëm i SHBA-së nisi të diskutonte problemin drejtpërdrejt me sekretarin amerikan të shtetit.
“Unë mendova se e dija se çfarë duhej bërë në këto kushte, por sipas procedurave të NATO-s, nuk kishim asnjë autoritet, udhëzime politike dhe nuk kishte as një planë konkret. Fola me sekretarin amerikan të shtetit për këtë, nuk kam folur me asnjë ministër të jashtëm tjetër për këtë çështje, sepse më udhëzuan Shtetet e Bashkuara të mos flas me askënd tjetër”, u shpreh ai.
Clark ka kujtuar gjithashtu se në pranverën e vitit 1998 iu kërkua të përgatisë një plan, pa ditur nëse ministritë e jashtme apo të mbrojtjes ishin të përfshira.
“Aty lindi nevoja që të përgatitet një plan”, theksoi ai.
Gjenerali që bombardoi Beogradin, Clark në Hagë: Serbia e kishte frikë UÇK-në
Gjenerali amerikan, Wesley Clark, në pjesën e parë të dëshmisë së tij në Hagë, deklaroi se Ushtria Çlirimtare e Kosovës, UÇK, ishte një ushtri e përbërë nga persona të vetorganizuar dhe të motivuar, por pa komandë dhe kontroll të qartë.
Pos tjerash, ai theksoi se ushtria serbe e kishte frikën UÇK-në.
“Ne gjithmonë themi komandë dhe kontroll, sepse komanda është kompetenca, autoriteti, por kontrolli është mënyra për ta mbikëqyrur. Me aq sa pamë ne, ajo nuk kishte asnjërën prej këtyre elementeve. Ne kishim disa vëzhgues në kufirin mes Shqipërisë dhe Kosovës, por as ata nuk patën mundësi të mblidhnin informacione të besueshme. Ishte e qartë që ishte grup i motivuar për të luftuar, ndonjëherë ata kapnin ndokënd, në një pikë e kishin kapur një rus, dhe unë nuk isha i interesuar për këtë. Ishin thjesht njerëz të vetorganizuar”, tha Clark duke shtuar se “Unë nuk kisha asnjë dyshim se ushtria serbe ishte e frikësuar prej tyre”.