VIDEO/ Përplasje në parlamentin e ri të Izraelit, Netanyahu përballet me opozitën mes britmave dhe akuzave

Seanca e parë e parlamentit të ri izraelit, Knesetit, u shoqërua me tensione të forta politike, britma dhe përplasje mes deputetëve, vetëm pak minuta pasi ligjvënësit u betuan për marrjen e detyrës. Ndërprerjet e njëpasnjëshme dhe debatet e ashpra nxorën në pah përçarjet mes kampeve politike, duke sinjalizuar vështirësitë që pritet të shoqërojnë negociatat për formimin e qeverisë së re. Presidenti i Izraelit, Isaac Herzog, i cili hapi seancën inauguruese, u bëri thirrje partive të lënë mënjanë mosmarrëveshjet dhe të bashkëpunojnë për krijimin e qeverisë. Megjithatë, apeli për kompromis nuk i ndali përplasjet, të cilat nisën që në minutat e para të seancës.