Lajmidites.com

Tag: konkurrencës

  • “Punonjësit si sardele”/ Kreu i Autoritetit të Konkurrencës: Duam ambjente, 35 zonja shkojnë në një tualet

    “Punonjësit si sardele”/ Kreu i Autoritetit të Konkurrencës: Duam ambjente, 35 zonja shkojnë në një tualet

    Denar Biba

    TIRANË-Komisionet parlamentare vijojnë sot diskutimet mbi projektligjin e buxhetit 2026. Projektbuxheti i vitit 2026 është programuar në vlerën 8.8 miliardë lekë shifër e cila do të ndahet. Në Komisionin për Nismat Qytetare për buxhetin, Denar Biba, kreu i Autoritetit të Konkurrencës ka ngritur shqetësimet në lidhje me higjenën në institucionin që ai drejton.
    Biba u shpreh se në institucion nuk ka tualete dhe 35 gratë që punojnë aty shkojnë në një tualet të përbashkët. Ndër të tjera ai tha se mungon një ambjent për arkivat dhe dosjet janë në mure.
    “Më duhet ta rithem se aktualisht ekspertët e Autoritetit të Konkurrencës aktualisht ju kërkoj ndjesë për krahasimin por janë si sardele, 7 vetë në një ambjen. Ky institucion është krijuar në 2004, në momentin e krijimit ka pasur 13 punonjës dhe është zhvendosur në ambientet aktuale ku ka edhe sot pas 21 vitesh. E ka nisur punën me 13 punonjës sot jemi 49, jemi në po të njëjtat ambiente. Ne jemi në kushtet edhe të problematikave të higjienës. 35 zonja që shkojnë në një tualet, është banale që po e them, por ka ardhur momenti për ta thënë se nuk mban më. Nuk ka arkiva, në ambientet ku bëjmë mbledhje përdoret për arkivë. Muret janë plot me dosje, që nuk duhen mbajtur ashtu, por nuk kemi ku ti mbajmë”, tha Biba.

  • Autoriteti francez i konkurrencës vendos një gjobë prej 4.6 milionë eurosh për aplikacionin e tele-shëndetësisë Doctolib për praktika të padrejta

    Autoriteti francez i konkurrencës vendos një gjobë prej 4.6 milionë eurosh për aplikacionin e tele-shëndetësisë Doctolib për praktika të padrejta

    Autoriteti francez i konkurrencës i vendosi një gjobë prej 4.6 milionë eurosh firmës së tele-shëndetësisë Doctolib për atë që e quajti sjellje antikonkurruese.

    Autoriteti francez i konkurrencës ka lëshuar një gjobë prej më shumë se 4.6 milionë eurosh kundër kompanisë së teknologjisë shëndetësore Doctolib për “abuzim me pozicionin e saj dominues” në sektorët e tele-shëndetësisë dhe rezervimit të takimeve mjekësore online.

    Doctolib është një nga yjet që shkëlqejnë në teknologjinë franceze, me të ardhura vjetore që raportohen se arritën në 348 milionë euro vitin e kaluar dhe me operacione në të gjithë Francën, Italinë dhe Gjermaninë.

    Autoriteti i Konkurrencës tha në një deklaratë se Doctolib “zbatoi qëllimisht disa praktika antikonkurruese … si pjesë e një strategjie të përgjithshme, të strukturuar dhe koherente antikonkurruese”.

    Në zemër të çështjes janë dy nga shërbimet dixhitale të kompanisë, Doctolib Patient dhe Doctolib Téléconsultation, të cilat u lejojnë pacientëve të rezervojnë takime mjekësore në internet dhe të flasin drejtpërdrejt me profesionistët mjekësorë përmes aplikacionit.

    Autorité thotë se Doctolib i detyron abonentët profesionistë të hyjnë në klauzola ekskluziviteti dhe nuk i lejon ata të abonohen veçmas në të dy shërbimet, duke eliminuar çdo konkurrencë të mundshme në këta dy sektorë kryesorë të tele-shëndetësisë.

    “Dokumente të shumta të brendshme vërtetojnë se Doctolib donte t’u impononte ekskluzivitet profesionistëve të kujdesit shëndetësor, me menaxhmentin që deklaroi se Doctolib duhet të bëhej ‘një ndërfaqe thelbësore dhe strategjike midis mjekut dhe pacientit, me qëllim që të siguronte angazhimin e të dyja palëve’”, tha Autorité.

    Gjithashtu, ajo përmendi blerjen nga Doctolib të konkurrentit të saj kryesor, MonDocteur, në vitin 2018, kur tregu i tele-shëndetësisë ishte ende në fazat e tij të hershme.

    Çështja rrjedh nga një ankesë e vitit 2019 nga Cegedim Santé, një nga konkurrentët e Doctolib në Francë.

    Doctolib tha në një deklaratë se do ta apelojë vendimin dhe se kompania “nuk është në asnjë mënyrë në një pozicion dominues”.

    “Pavarësisht përdorimit tonë të gjerë nga publiku, Doctolib është një lojtar i kohëve të fundit në ofrimin e softuerëve për profesionistët e kujdesit shëndetësor”, tha kompania.

    Doctolib tha se është tre herë më i vogël se konkurrentët evropianë dhe se përdoret nga 30 përqind e punonjësve shëndetësorë francezë, nga 10 përqind në vitin 2019.

    “Jemi të sigurt dhe po fillojmë me qetësi hapat e mëtejshëm të procedurës, të cilat do të na lejojnë të marrim një vendim të drejtë pas apelimit”, tha kompania.

  • Ndryshimet në ligjin për konkurrencën mbajnë peng hetimin e marrëveshjeve në prokurime

    Ndryshimet në ligjin për konkurrencën mbajnë peng hetimin e marrëveshjeve në prokurime

    Mosmiratimi i ndryshimeve ligjore po pengon rolin e Autoritetit të Konkurrencës në evidentimin dhe ndëshkimin e marrëveshjeve të ndaluara të firmave në procedurat e prokurimit publik.Kryetari i Komisionit të Konkurrencës u shpreh në Kuvend se ligji aktual “Për mbrojtjen e konkurrencës” nuk përmban parashikime specifike për këtë fushë, ndërsa ndryshimet e propozuara nga ky institucion në ligj kanë ngelur pezull prej dy vjetësh.Sipas ndryshimeve të propozuara nga Autoriteti i Konkurrencës në variantin e fundit të konsultuar publikisht prej tij, projektligji shton përkufizimin e marrëveshjes në oferta, kur ndërmarrjet gjatë procedurave të prokurimit publik, nuk konkurrojnë midis tyre, por bien dakord fshehurazi për të caktuar çmimet ose për të ulur cilësinë e mallrave, punëve ose shërbimeve për blerësit që dëshirojnë të prokurojnë produkte, shërbime ose punë nëpërmjet një procedure prokurimi apo kur bien dakord të koordinojnë ofertat e tyre në prokurimet publike.Format e marrëveshjes në oferta mund të jenë: ofertat e mbuluara, kur konkurrentët pranojnë të paraqesin ofertë më të lartë sesa oferta e fituesit të përcaktuar, kur njëri nga konkurrentët pranon të ofertojë me një shumë e cila është shumë e madhe për t’u pranuar si ofertë, si edhe kur njëri nga konkurrentët paraqet një ofertë e cila përmban terma specifike të cilat janë të papranueshme nga Autoriteti Kontraktor; ofertat e përmbajtura, në rastet kur konkurrentët bien dakord që të mos ofertojnë apo të tërhiqen nga një ofertë e paraqitur në mënyrë që oferta e përcaktuar fituese në marrëveshje të pranohet si e tillë; ofertat në rotacion, kur konkurrentët merren vesh të ofertojnë, duke rënë dakord paraprakisht që fituesi të jetë njëri prej tyre sipas një radhe të caktuar; ndarja e tregut, fenomen i cili ndodh kur konkurrentët ndajnë në pjesë tregun dhe bien dakord që të mos konkurrojnë për një pjesë të caktuar konsumatorësh, ose një pjesë të caktuar gjeografike.Projektligji i shton shprehimisht edhe kategoritë e marrëveshjeve në oferta në procedurat e prokurimit si marrëveshje të ndaluara.Projektligji parashikon edhe ngritjen e sistemit të menaxhimit të informacionit të Autoritetit të Konkurrencës, që do të ndërveprojë me bazat e të dhënave të Drejtorisë së Përgjithshme të Tatimeve, Drejtorisë së Përgjithshme të Doganave, Qendrës Kombëtare të Biznesit dhe Agjencisë së Prokurimit Publik.Tregu i prokurimeve publike është bërë në disa raste objekt i hetimeve të Autoritetit të Konkurrencës.Disa prej formave të marrëveshjes në oferta, të përkufizuara më lart, janë bërë objekt dyshimesh nga opozita dhe media në vitet e fundit, veçanërisht në tenderat e infrastrukturës rrugore, kur ndodh që disa kompani ndajnë me njëra-tjetrën lotet e punimeve, duke konkurruar në mënyrë fiktive me njëra-tjetrën.Në përmbajtjen e ligjit në fjalë do të shtohet gjithashtu koncepti i praktikës së bashkërenduar, që përkufizohet se koordinimi ndërmjet ndërmarrjeve të cilat, pa arritur në fazën e lidhjes së një marrëveshjeje formale, bashkëpunojnë me vetëdije në praktikë duke kufizuar, deformuar ose shtrembëruar konkurrencën në treg.Projektligji parashikon zgjatjen e afatit që subjektet kanë për të ankimuar në gjykatë vendimet e Autoritetit të Konkurrencës, nga 30 në 45 ditë. Por, në ndryshim nga ligji aktual, projektligji përcakton se subjektet nuk do të kenë të drejtë për të ankimuar në gjykatë vendimet e Komisionit të Konkurrencës për hapjen e hetimit paraprak.Ndërkohë, projektligji përmban për herë të parë edhe parashikime të qarta për afatet e parashkrimit për vendosjen e gjobave.Afatet e parashkrimit për vendosjen e gjobave do të jenë 3 vjet në rastin e shkeljeve të dispozitave në lidhje me kërkesat për informacion ose me zhvillimin e inspektimeve dhe 5 vjet në rastin e të gjitha shkeljeve të tjera.Afati i parashkrimit llogaritet që nga dita në të cilën është kryer shkelja. Në rastin e shkeljeve të vazhdueshme ose të përsëritura, parashkrimi duhet të fillojë të llogaritet nga dita në të cilën shkelja ndërpritet.Projektligji propozon gjithashtu një ndryshim të rëndësishëm në pavarësinë financiare të Autoritetit të Konkurrencës. Me ligjin aktual, të gjitha të ardhurat e siguruara nga ky institucion duhet të derdhen në Buxhetin e Shtetit.Sipas projektligjit të propozuar, në buxhetin e shtetit do të vazhdojnë të derdhen vetëm të ardhurat nga gjobat.Ndërkohë, të ardhurat që krijohen nga procedurat e kontrollit të përqendrimeve, tarifat administrative për kontrollin e përqendrimeve dhe autorizimet e përqendrimeve, do të mbahen në llogarinë e Autoritetit të Konkurrencës dhe do të përdoren për qëllime investimi dhe shpenzime operative, të cilat kontribuojnë në përmbushjen e misionit të institucionit, sipas rregullave dhe procedurave të përcaktuara me udhëzim të përbashkët të Ministrit të Financave dhe Kryetarit të Autoritetit të Konkurrencës. / E.Shehu  Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.

  • Autoriteti i Konkurrencës do të hapë hetim të thelluar për tregun celular

    Autoriteti i Konkurrencës do të hapë hetim të thelluar për tregun celular

    Autoriteti i Konkurrencës do të hapë ditët në vazhdim një hetim të thelluar për tregun me pakicë të shërbimeve celulare. Kryetari i Komisionit të Konkurrencës, Denar Biba, u shpreh në Kuvendin e Shqipërisë se, nga të dhënat e hetimit paraprak, janë evidentuar të dhëna që justifikojnë hapjen e një hetimi të thelluar.Hetimi paraprak në këtë treg u hap në muajin janar të këtij viti, pas monitorimit të tregut, të kryer vitin e kaluar. Ky hetim përfshiu periudhën kohore nga 1 janar 2022 deri në 31 dhjetor 2024.Procedura nisi nga disa ankesa të paraqitura pranë Autoritetit të Konkurrencës mbi rritjen e çmimit të paketave me parapagesë nga ndërmarrjet Vodafone Albania dhe One Albania.Nga vlerësimi i informacionit gjatë monitorimit, u konstatua se sjellja e ndërmarrjeve Vodafone Albania dhe One Albania në tregun me pakicë të shërbimeve celulare mund të përbëjë kufizim të konkurrencës në kuptim të nenit nenit 4 dhe nenit 9 të Ligjit nr. 9121, datë 27.03.2003 “Për mbrojtjen e konkurrencës”.Sipas këtij institucioni, tregu i telefonisë celulare ka qenë dhe mbetet një treg në fokus të veçantë të Autoritetit të Konkurrencës, me qëllim mbrojtjen e konkurrencës dhe të konsumatorit.Të dhënat nga Autoriteti i Komunikimeve Elektronike dhe Postare (AKEP) treguan se shpenzimi mesatar i shqiptarëve për shërbimet celulare u rrit për të katërtin vit radhazi vitin e kaluar.Një përdorues shpenzoi vitin e kaluar mesatarisht pothuajse 9200 lekë për shërbime të komunikimeve celulare, 16% më shumë krahasuar me një vit më parë. Kjo vlerë mbështetet në treguesin e të ardhurave mesatare për përdorues të operatorëve celulare (ARPU) dhe llogaritet si raport i të ardhurave nga shërbimet me pakicë me numrin total të përdoruesve aktivë.Gjithashtu, shpenzimi mesatar i shqiptarëve për çdo minutë thirrje celulare vitin e kaluar u rrit në 5.54 lekë për minutë, në rritje me 16% krahasuar me një vit më parë. Kjo vlerë bazohet në treguesin e të ardhurave mesatare për minutë (ARPM), që llogaritet si raport i të ardhurave nga shërbimet me pakicë me sasinë e minutave dalëse dhe tregon të ardhurat e sipërmarrësit për një minutë.Ulja e numrit të operatorëve celularë në vend ka ndikuar në shtrenjtimin e paketave të komunikimit. Operatorët celularë kanë rritur çmimet për paketat bazë të komunikimit, si me parapagesë, ashtu edhe me kontratë, por ndërkohë kanë ulur edhe njësitë e përfshira të komunikimit në to, duke sjellë si rezultat një shtrenjtim edhe më të lartë të shprehur për njësi.Ndërkohë, në fillim të vitit 2024, të dy operatorët celularë, kanë përcaktuar në kushtet e përgjithshme të kontratës të drejtën e tyre për të indeksuar çdo vit çmimin e paketës me inflacionin mesatar vjetor.Sipas informacionit të raportuar në Autoritetin e Komunikimeve Elektronike dhe Postare (AKEP), dy operatorët celularë fituan afërsisht 1.68 miliardë lekë për 2024, ndërsa viti 2023 ishte mbyllur me një fitim neto në vlerën e 370 milionë lekëve.Vodafone Albania arriti një fitim neto në vlerën e rreth 1.2 miliardë lekëve, ndërkohë që një vit më parë kishte realizuar një fitim neto prej rreth 300 milionë lekësh.Një fitim më të vogël ka raportuar operatori i dytë One Albania, por që gjithashtu e ka përmirësuar ndjeshëm rezultatin krahasuar me një vit më parë. Sipas AKEP, One Albania e mbylli vitin 2024 me një fitim neto në vlerën e 476 milionë lekëve, nga 70 milionë lekë që kishte qenë rezultati i raportuar një vit më parë.Dy operatorët e rrjeteve celulare, Vodafone Albania dhe One Albania, vitin e kaluar raportuan të ardhura prej komunikimeve elektronike në vlerën 27.93 miliardë lekë, në rritje me 8.9% krahasuar me një vit më parë./ E.ShehuKy është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.

  • Tregjet nën monitorim për abuzime/ Autoriteti i Konkurrencës kërkon të bëjë përgjime si SPAK

    Tregjet nën monitorim për abuzime/ Autoriteti i Konkurrencës kërkon të bëjë përgjime si SPAK

    Shtatë tregje problematike u diskutuan në një seancë që zgjati gati 4 orë në Komisionin e Ekonomisë, ku për të prezantuar raportin vjetor ishte Autoriteti i Konkurrencës. Nga tregu i spitaleve private, tek sigurimet, karburantet, telefonia celulare, tregjet agro-ushqimore, tregu i çimentos e deri tek bankat, të gjithë sektorë me jetikë, për të cilët hetime janë kryer probleme janë konstatuar, e për një pjesë hetimet fillojnë. 
    Përpara ligjvënësve kryetari i Autoritetit të Konkurrencës Denar Biba, kërkoi më shumë hapësira ligjore për të kryer hetime në këto tregje sensitive, pasi verifikimi i të dhënave për të faktuar se ka abuzime, në shumicën e rasateve është i pamundur, dhe si rezultat edhe masa apo ndëshkime nuk ka. Përveç kontrolleve, verifikimeve në zyrat e kompanive të ndryshme, apo mbledhjes së dëshmive, Biba sheh si zgjidhje kryerjen e një hetimi të saktë, ndërhyrjen në telefonat e kompanive që janë nën hetim nga Konkurrenca. 
    “Homologët tanë ju marrin celularët. Ky (celulari) është tradhtari më i madh për çdo lloj gjëje. Nëse do realisht të bësh punë skrupuloze hetimore, kjo është. Edhe ata zotërinjtë e SPAK-ut apo të prokurorisë në Shqipëri shumicën e sukseseve të tyre e kanë pasur nga sky nga Encrochat. Ne nuk e kemi këtë mundësi. Polakët e kanë, turqit e kanë, italianët, gjermane, të gjithë vendet e BE-së i kanë”, tha Denar Biba. 
    Kjo kërkesë për të pasur akses edhe në telefonat e sipërmarrjeve që janë nën monitorim nga Autoriteti i Konkurrencës, erdhi për shkak se në tregun e grumbullimit të qumështit, të fruta-perimeve dhe atë të spitaleve private, hetimet nuk kanë rezultuar të suksesshme për mungesë të provave. 
    “Kur flet me ta kështu Of Records, të gjithë nxjerrin shpirtin edhe t’i thonë të gjitha. Kur vjen puna për të ofruar një mesazh WhatsApp-i që e ka pasur me grumbulluesin përkatës, thotë mos na merrni në qafë. Ju themi nuk do t’ju nxjerrim, ore kemi detyrim ndaj ligji. Nëse ne ju nxjerrim, ju shkojmë për shpërdorim e tyre, nuk pranojnë në asnjë lloj rrethane. Fenomeni nuk është vetëm shqiptar”, tha Biba. 
    Ndërsa për tregun e fruta-perimeve, Biba paralajmëroi përfundim të hetimit së shpejti, por pa bërë detaje mbi vendimmarrjen, duke kërkuar nga deputetët, “ju lutem mos e paragjykoni këtë hetimin e Fruta Perime”. 
    Por për deputetin e PS-së Erion Braçe deformimi në bujqësi, ku fermerët po humbasin, e ka gjenezën tek skema e TVSH-së, e cila ka bërë që grumbulluesit tua marrin produktet pa fature bujqve dhe me çmim të ulët. 
    “Atje në Ministrinë e Bujqësisë dhe në Ministrinë e Financave nuk i kupton kush. S’ kupton kush se ka një element atje shumë të rëndësishëm që është fatura që nuk e pret bujku, nuk e pret blegtori, e pret grumbulluesi. Po që ta presë grumbulluesi, duhet të ketë minimumi, minimumi, një TVSH, tatim mbi vlerën e shtuar që të jetë i barabartë në hyrje dhe në ndalje edhe në blerje. në shitje nuk mund të jetë zero në blerje dhe 20% në shitje. Prandaj nuk formalizohet ai tregu dhe prandaj goditja e amortizatorit po bie mbi kurriz të fermerit. Mbi kurriz të fermerit. Nuk po bie mbi kurriz të fabrikës. Nuk po bie mbi kurrize të fabrikës”, tha Braçe. 
    Kurse tregu i spitaleve private, pas një hetimi 2-vjeçar u mbyll pa masa dhe ndëshkime edhe pse disa nga shërbimet e ofruara nga spitalet private janë ekskluzive dhe tejet të kushtueshme. 
    “Disa prej shërbimeve shumë të rëndësishme, jepen pothuajse ekskluzivisht nga disa spitale private në vendin tonë me çmime të caktuara, definitivisht jo të përballueshme nga të gjithë qytetarët. Kemi dërguar me dhjetëra pyetje në të gjitha autoritetet homologe në rajon. Nuk na erdhi pothuajse asnjë përgjigje. Filluam të kërkonim të hulumtonim në internet për çmime në spitale të ngjashme në Turqi apo Maqedoni apo Kosovë. Në këtë pikë paradoksale ose jo, ne ju drejtuam vetë të hetuarve dhe i thamë na bëni analizën tuaj të kostos dhe na e sollën. Analiza e tyre e kostos tani unë nuk i paragjykoj ishte që fitimi i tyre ishte diku te 3%. Me fitime me fitime për të qarë për të qeshur, me fitime 3% nuk ka abuzim me pozitën dominuese”, tha Biba. 
    Një shërbim spitalor e merr më lirë se këtu nëse shkon në Turqi tha deputeti socialist Erion Braçe përfshirë biletën dhe akomodimin atje. 
    “Ky është shqetësimi dhe shifrat që dëgjohen nga njerëz që shkojnë paguajnë, shkojnë paguajnë, janë marramendëse. Të kushton më lirë të blesh një biletë, të marrësh një hotel dhe të shkosh në Stamboll sesa aty atje. Kushton më lirë”, tha deputeti i PS-së Erion Braçe. 
     

  • “Hetoni spitalin amerikan”/ Deputeti Erion Braçe, kritika Autoritetit të Konkurrencës: Shtrin ndikimin me paratë publike

    “Hetoni spitalin amerikan”/ Deputeti Erion Braçe, kritika Autoritetit të Konkurrencës: Shtrin ndikimin me paratë publike

    Në komisionin e ekonomisë dhe financave deputetët e opozitës dhe mazhorancës akuzuan autoritetin e konkurrencës për mosdhënien e një vendimi përfundimtar të saktë për hetimet e kryera ndaj paketave që ofrojnë spitalet private për shërbimet e kryera.

    Teksa shigjetoi spitalin amerikan për monopol në shëndetësi, socialisti Erion Brace tha se ky subjekt tashmë po hyn dhe në koncesione duke e shtrirë ndikimin dhe në paratë publike.
    “Për tregun e shërbimeve shëndetësore private. Ka kirurgji në spitale private. Shërbim me këtë produkt. Është e mundur për tu hetuar abuzim me pozitën dominuese në treg. Këtë shërbim e dominon një operator i vetëm i cili po integrohet për shkak të parave që akumulon dhe në shërbime të tjera.
    Edhe në koncesione dhe në PPP dhe në farmaceutikë. Po zgjerohet edhe akoma më shumë. Dhe shifrat që dëgjohen nga njerëz që shkojnë paguajnë janë marramendëse. Më mirë shkon në Stamboll sesa të ikësh atje”, u shpreh deputeti i PS, Erion Brace.
    Kryetari i AK pranon se hetimi nuk ka qenë i plotë për shkak të mungesës së informacionit, duke mos gjetur dot kështu një shkelje, ndonëse çmimet konfirmon se janë tepër të larta për qytetarët që kanë nevojë për shërbimet.
    “Disa prej shërbimeve shumë të rëndësishme jepen ekskluzivisht nga disa spitale private, definitivisht jo të përpabullueshme. Dërguam pyetje edhe në rajon për të krahasuar çmimet, nuk na kthyen përgjigje, më pas arritëm të gjenim disa benchmarke për çmimet, por jo për kostot. Në këtë pikë ju drejtuam të hetuarve: na bëni analiza të kostos. Analiza e tyre e kostos ishte që fitimi i tyre ishte 3%. Me fitime të tilla, s’ka abuzime me pozitën dominuese”, u shpreh drejtuesi i AK, Denar Biba.
    Jo vetëm në tregun spitalor, deputetë të PS dhe PD ngritën shqetësime për mungesën e konkurrencës dhe abuzime edhe për pikat e grumbullimit, kompanitë telefonike apo edhe karburantet.
    “Këtë klimë kaq të rëndë të gjendjes së konkurrencës e ka përcaktuar dhe departamenti amerikan i shtetit, ku përcakton mjedisin ekonomik si të korruptuar dhe problematik.”
    “80 milionë euro janë prokurime publike që kanë përfunduar me flamur të kuq dhe me një ofertues të vetëm”, deklaroi Eno Bozdo.
    “Hetimi i tregut të produkteve është shumë i rëndësishëm. Sa kohë keni për të përmbushur këtë hetim, qoftë dhe inflacioni apo mbiçmimi i elkut ka ndikim në këtë treg. E rëndësishme është koha e përfundimit të hetimit tuaj”, u shpreh Brace.
    “Telefonia celulare, kemi tarifa jashtëzakonisht të larta. Kemi kërkuar dhe nga vetë autoriteti juaj është ai që duhet të ndërhynte.
    Ne prodhojmë karburant, jemi favorizuar për shkak të portit, por ne vazhdojmë të kemi çmimin më të shtrenjtë edhe në raport me rajonin”, deklaroi Xhelal Mziu.
    “Fenomeni në dukje është vetëm në Shqipëri. Anglia nga 4 në 3 kompani telefonike”, tha Biba.
    Por ndërsa deputetët flasin për monopol e mospërgjegjshmëri, Autoriteti i Konkurencës premton vendime të shpejta.
    “Le të shpresojmë se kemi nxjerrë disa leksione, vendimet do të jenë të shpejta.”

    Top Channel

  • Autoriteti i Konkurrencës kërkesë Kuvendit, kërkon të bëjë përgjime si SPAK

    Autoriteti i Konkurrencës kërkesë Kuvendit, kërkon të bëjë përgjime si SPAK

    Nga tregu i spitaleve private, tek sigurimet, karburantet, telefonia celulare, tregjet agro-ushqimore, tregu i çimentos e deri tek bankat, të gjithë sektorë me jetikë, për të cilët hetime janë kryer probleme janë konstatuar, e për një pjesë hetimet fillojnë.
    Përpara ligjvënësve kryetari i Autoritetit të Konkurrencës Denar Biba, kërkoi më shumë hapësira ligjore për të kryer hetime në këto tregje sensitive, pasi verifikimi i të dhënave për të faktuar se ka abuzime, në shumicën e rasateve është i pamundur, dhe si rezultat edhe masa apo ndëshkime nuk ka, shkruan A2 CNN.
    Përveç kontrolleve, verifikimeve në zyrat e kompanive të ndryshme, apo mbledhjes së dëshmive, Biba sheh si zgjidhje kryerjen e një hetimi të saktë, ndërhyrjen në telefonat e kompanive që janë nën hetim nga Konkurrenca.

  • Braçe “shpërthen” me kritika për tregun e sigurimeve: Ka marrëveshje të paligjshme, AMF ja hedh topin Konkurrencës! Bonus-Malusi favorizon..

    Braçe “shpërthen” me kritika për tregun e sigurimeve: Ka marrëveshje të paligjshme, AMF ja hedh topin Konkurrencës! Bonus-Malusi favorizon..

    Në Komisonin e Ekonomisë deputeti i PS Erion Braçe tha se tregu i sigurimeve ka mungesë konkurrence dhe se kompanitë kanë bërë një marrëveshje të jashtëligjshme duke fiksuar çmimet dhe shërbimet në kurriz të qytetarëve. Kjo sipas tij është e pranuar edhe nga vetë institucionet si AMF apo Autoriteti i Konkurrencës që bëjnë ping-pong me kompetencat e tyre. 
    “Nuk ndryshon asnjë gjë në këtë treg në harkun e këtyre viteve, të njëjtët operator, të njëjtat tarifa dhe të njëjtat probleme dhe barriera. Barriera kryesore në atë treg vjen nga operatorët, është ajo që kemi diskutuar këtu dhe ju e hodhët topin tek Autoriteti i Konkurrencës, nesër do të vijë Konkurrenca këtu dhe do e kalojë topin tek ju, se është top i nxehtë ai. Ndaj ikin investitorët e huaj, sepse ky treg nuk ka treg të lirë por një marrëveshje të paligjshme që është pranuar nga ju, nga autoriteti i Konkurrencës dhe pastaj edhe nga qytetarët”,- tha Braçe. 
    Po ashtu Braçe kritikoi skemën e re të bonus-malus për sigurimin e makinave, duke thënë se favorizon kompanitë dhe jo qytetarët. 
    “Aplikimi i sistemit bonus-malus prisja të prishte këtë marrëveshje të paligjshme. 3 vite e shënuar në ligj, 3 vite nuk u bë, se ju la në dorë kompanive zbatimi i bonus malus. Nuk e bëtë as ju, në një marrëveshje shumë të qartë me njëri tjetrin, ndërsa qytetarët vazhdojnë e paguajnë shtrenjtë. Akti që nuk keni nxjerrë nuk është model evropian, modeli italian është me 18 klasa jo me 3. Modeli italian si në bonus dhe në malus është shumë i shpejtë, për një vit pa aksidente ngjitesh një shkallë më lartë, ndërsa për një aksident bie dy më poshtë. Ku përputhet modeli jonë me Italinë, Spanjën apo Finlandën? 
    Bonusi është nga 0.95-0.98, pra nëse unë sillem mirë nga niveli bazë 1% përsëri përfitimi do të jetë nga 0.95-0.98, kurse të gjithë ato që përmenda bonusin e kanë për stimulim për tu sjellë mirë në rrugë, ndërsa malusin e kanë ndëshkim. 
    Si mund të ndahet Shqipëria në Berat, Dibër dhe Kukës e gjithë pjesa tjetër pastaj. Unë jam nga Tirana s’kam bërë asnjë dëm, pse duhet të penalizohem unë me këtë? E ku është bonusi këtu, apo të shkoj të bëj pasaportizimin në Berat, Dibër dhe Kukës që të përfitoj? Nuk është normale, dhe është në interes të kompanive. 
    Unë bonusin e marr se jam deputet jo se sillem unë paguaj 180 mijë lekë, dhe ai gangsteri që ka makinën e bukur merr bonus paguan po 180 mijë lekë. Ja këtu është katandisur tregu”,- tha Braçe. 
     

  • Kontrolli në 4 kompani, Konkurrenca jep alarmin për qumështin: Rrezikohet SHËNDETI i konsumatorëve, AKU të rrisë KONTROLLET!

    Kontrolli në 4 kompani, Konkurrenca jep alarmin për qumështin: Rrezikohet SHËNDETI i konsumatorëve, AKU të rrisë KONTROLLET!

    Autoriteti i Konkurrencës mbylli në fund të vitit 2024 hetimin e thelluar ndaj katër prej kompanive më të mëdha të përpunimit të qumështit në vend si Erzeni sh.p.k., Adg shpk (Lufra), Gjirofarm dhe Shaka Boboshticë, pas raportimeve mediatike dhe dyshimeve për koordinim në përcaktimin e çmimit të blerjes nga fermerët.
    Komisioni i Konkurrencës ka arritur në përfundimin se nuk ekziston një marrëveshje e drejtpërdrejtë mes kompanive për uljen e çmimit, pasi këto operojnë në zona të ndryshme dhe furnizohen nga rrjete të ndara fermerësh.
    Inspektorët kanë shqyrtuar librat e blerjeve dhe kanë konstatuar se nuk ka prova për një koordinim të ndaluar nga ligji i konkurrencës.
    Megjithatë, raporti zyrtar ngre shqetësim për faktin se gjatë vitit 2024 kompanitë kanë ulur ndjeshëm çmimin e blerjes së qumështit nga fermerët, krahasuar me vitin 2022, ndërkohë që çmimi përfundimtar në tregun me pakicë është rritur ndjeshëm.
    Kjo përmbysje e raporteve midis prodhuesve dhe konsumatorëve shihet si “kartoni i parë i kuq” për tregun e qumështit në Shqipëri, pasi tregon një disbalancë serioze midis atyre që prodhojnë dhe atyre që paguajnë më shumë për produktin në treg.
    Gjatë hetimit, Autoriteti ka evidentuar edhe një rritje të madhe të importeve të qumështit, sidomos nga kompania Erzeni sh.p.k., e cila ka shtuar ndjeshëm sasinë e importuar gjatë vitit 2024, ndërsa Lufra ka ndjekur të njëjtin trend, por në një shkallë më të ulët.
    Sipas dokumenteve që ka siguruar Skyweb.al, problemi më serioz që del nga raporti nuk lidhet vetëm me çmimet apo importet, por me cilësinë e qumështit që arrin në tregun shqiptar.
    Skyweb.al mëson se Autoriteti i Konkurrencës i ka kërkuar Autoritetit Kombëtar të Ushqimit (AKU) të rrisë kapacitetet kontrolluese ndaj kompanive përpunuese dhe të verifikojë treguesit mikrobiologjikë të lëndës së parë.
    “Forcimi i strukturave dhe rolit të AKU-së për zbatimin me rigorozitet të kontrolleve përsa i përket cilësisë dhe parametrave mikrobiologjikë të qumështit lëndë e parë që përdorin kompanitë e përpunimit të qumështit, të cilat të ndodhura përballë presionit të mungesës së qumështit cilësor në treg, detyrohen të pranojnë qumësht jashtë parametrave të përcaktuar nga legjislacioni shqiptar në fuqi, duke rrezikuar në këtë mënyrë shëndetin e konsumatorit“, citohet në dokumentin e siguruar nga Skyweb.al.

    Redaksia mësoi se gjatë verifikimeve në terren, inspektorët kanë konstatuar raste ku qumështi nuk përmbush standardet minimale higjieno-sanitare.
    /skyweb.al/

  • Autoriteti i Konkurrencës nis hetimin për tregun e telefonisë celulare

    Autoriteti i Konkurrencës nis hetimin për tregun e telefonisë celulare

    Autoriteti i Konkurrencës ka hapur një hetim paraprak në tregun me pakicë të shërbimeve celulare, që përfshin ndërmarrjet Vodafone Albania SHA dhe One Albania SHA, për periudhën 1 janar 2022 – 25 korrik 2025. Sipas Autoritetit të Konkurrencës, ky hetim synon të mbrojë interesat e konsumatorëve shqiptarë, duke garantuar një treg sa më të lirë dhe konkurrent, ku secili përdorues të ketë mundësinë të zgjedhë shërbimin që i përshtatet më shumë, me cilësi dhe me çmime të drejta. Për këtë arsye, Autoriteti i Konkurrencës fton të gjithë përdoruesit e shërbimeve celulare që dëshirojnë të ndajnë ankesat, problematikat apo shqetësimet e tyre lidhur me këtë treg, t’i adresojnë pranë këtij institucioni.
    Qytetarët mund të paraqiten fizikisht pranë Autoritetit të Konkurrencës ose të kontaktojnë në mënyrë elektronike në adresën zyrtare elektronike: [email protected]. “Ky hetim është pjesë e angazhimit të Autoritetit për të siguruar një treg të ndershëm, të hapur dhe konkurrues, me cilësi të lartë dhe çmime të arsyeshme”, thuhet në njoftimin e Autoritetit të Konkurrencës. Referuar të dhënave të fundit të Autoritetit të Komunikimeve Elektronike dhe Postare (AKEP), numri i përdoruesve aktivë të telefonisë celulare gjatë tremujorit të parë 2025 arriti në rreth 2,4 milionë.