Projekti iu prezantua vite më parë nga Rama dhe Balluku, ironizojnë protestuesit: Ku është treni, Ursula?

Protestuesit që ndodhen pranë Kryeministrisë, në kohën kur presidentja e Komisionit Europian, Ursula von der Leyen, po zhvillon vizitën e saj në Tiranë, kanë zgjedhur ironinë për të përcjellë mesazhet e tyre. Një prej pankartave të shfaqura gjatë protestës i drejtohet drejtpërdrejt Von der Leyen dhe rikthen në vëmendje projektin hekurudhor Durrës-Rrogozhinë, i prezantuar vite më parë nga kryeministri Edi Rama dhe ministrja e Infrastrukturës, Belinda Balluku. ‘Ku është treni, Ursula?’, shkruhet në pankartën e protestuesve. Me këtë mesazh, protestuesit kanë zgjedhur të rikujtojnë premtimet dhe deklaratat e bëra më herët për projektin hekurudhor, duke e kthyer atë në një nga temat e protestës gjatë vizitës së presidentes së Komisionit Europian në Tiranë.