Presidenti serb Aleksandar Vuçiç i kërkoi qeverisë në mbledhjen e kabinetit që të shqyrtojë të gjitha opsionet e mundshme përpara se të marrë vendimin përfundimtar për kompaninë e naftës dhe gazit NIS.
Asnjë vendim nuk do të merret menjëherë në takimin aktual, por në fakt nuk ka kohë për shqyrtime, tha udhëheqësi serb. “Nuk ka asnjë vendim për momentin, por mund ta marrim vendimin nesër, pasnesër, dy ditë pasnesër. Jemi të detyruar të vendosim përfundimisht para javës tjetër”, vuri në dukje ai.
Kreu i shtetit konfirmoi gatishmërinë për të vazhduar komunikimet me palën ruse. Serbia mund të bëjë një ofertë nëse Moska dhe pala e tretë nuk bien dakord për çmimin, tha ai. “Nëse rusët nuk arrijnë të bien dakord për çmimin me një palë të tretë, propozimi im është të shqyrtojmë një mundësi që ne të ofrojmë çmimin më të mirë”, tha Vuçiç.
Beogradi kërkon të shmangë çdo hap radikal, theksoi ai. “Dua të shmang konfiskimin, shtetëzimin dhe sekuestrimin e pronës me çdo kusht. Dua që e gjithë bota ta shohë: ne nuk duam t’i heqim askujt asgjë”, vuri në dukje Vuçiç.
Zyra e Kontabilitetit të SHBA-së (OFAC) i njoftoi Beogradit më parë për kërkesën për të përjashtuar plotësisht aksionarët rusë nga NIS. SHBA-të thanë me shkrim se nuk pranojnë asnjë vendim për ndryshimin e kontrollit pa ndryshimin e pronarit dhe përjashtuan mundësinë që pjesëmarrja ruse të mbahet nëpërmjet degëve të Gazprom ose sektorit qeveritar rus.
Category: Rajoni
-
Serbia përballë krizës energjetike pas sanksioneve të SHBA, Vuçiç: Dua të shmang hapat radikalë, por…
-
Ministri i Jashtëm gjerman tur vizitash në Ballkan, DW: Ja çfarë do të thotë për Shqipërinë, Kosovën dhe rajonin
Kur ministri i Jashtëm i Gjermanisë Johann Wadephul të dielën (16.11.2025) zbret në Sarajevë për fillimin e vizitës së tij katërditore në rajon, ai hyn në një ekuilibër të brishtë. Rajonin e njeh mirë – për vite me radhë ai ka drejtuar Grupin e Ballkanit Perëndimor të CDU/CSU në Bundestag. Kësaj radhe Wadephul nuk udhëton si politikan specialist, por si drejtues i një ministrie, kursi i së cilës ndaj vendeve të këtij rajoni perceptohet gjithnjë e më i paqartë.
Nga Podgorica, ku të hënën (17.11.2025) nisin bisedimet politike, vjen një kërkesë me kortezi, por e drejtpërdrejtë për orientim. Në një aktivitet të DGAP në Berlin më 13 nëntor, ministrja e Integrimit të Malit të Zi, Biljana Papovic, tha për DW se shpreson për “më shumë angazhim nga Berlini dhe më shumë qartësi se Ballkani Perëndimor mbetet prioritet i qeverisë gjermane”.
Për Podgoricën, drejtimi energjik i Gjermanisë mbetet thelbësor – jo vetëm për marrëdhëniet dypalëshe, por për gjithë dinamikën e procesit të zgjerimit në BE.
Një sinjal i rëndësishëm politik
Në Tiranë, roli i Gjermanisë shihet ende pozitivisht. Por analistja politike Alba Cela nga AIIS paralajmëron, se mbështetja e Berlinit “nuk është aspak e vetëkuptueshme”. Barometri i fundit i BE-së tregon se vetëm 49 për qind e gjermanëve mbështesin zgjerimin. Prandaj, vizita e Wadephul për Tiranën është një sinjal politik me peshë.
Mbështetja për BE-në në Shqipëri është ndër më të lartat në rajon: mbi 80 për qind e qytetarëve janë pro anëtarësimit. Megjithatë, eksperti i DGAP-it, Milan Nic, kujton se Shqipëria “ndodhet ende në fillimin e një rruge të vështirë”. Vendi nuk ka mbyllur ende asnjë kapitull negociues dhe, sipas tij, sfidat më të mëdha do të shfaqen në fushat themelore: çështjet e pronësisë, rregullimi dhe mjedisi. “Aty fillon dhembja e vërtetë”, thotë Nic. Po ashtu, lufta kundër korrupsionit mbetet një temë e përhershme.
Serbia: ndalesa më delikate
Pika më e ndjeshme e turit është Beogradi. Mbështetja për BE-në në Serbi është rreth 38 për qind, ndërsa ndikimi i Rusisë mbetet i fortë. CDU ka lidhje të ngushta politike me partinë e presidentit Aleksandar Vuçiq – por Serbia është vendi më i dobët në raportin e progresit të Komisionit.
Deputeti i Bundestagut Boris Mijatovic (Bündnis 90/Die Grünen), i cili gjendet njëkohësisht në Ballkan së bashku me kolegun e tij Anton Hofreiter, kujton zgjedhjet e vitit 2023 në Serbi. OSBE dokumentoi manipulime dhe parregullsi – Mijatovic pret që Wadephul ta ngrejë këtë çështje në Beograd.
Ai paralajmëron edhe për një boshllëk të ri gjeopolitik: tërheqja e USAID-it nga programet e medias dhe demokracisë “krijon një problem të madh”, sepse liron më shumë hapësirë për ndikim rus.
Po me Kosovën dhe Bosnjën?
Kosova, shteti më i ri i Evropës, para tre vjetësh paraqiti kërkesën për anëtarësim në BE. Sot vendi ndodhet në krizë politike: tetë muaj pas zgjedhjeve parlamentare nuk ka ende qeveri funksionale, dhe zgjedhjet e reja duken të pashmangshme. Politologia Njomza Arifi shpreson që vizita e Wadephul “të japë një sinjal ndaj krizës dhe t’i nxisë përgjegjësit të gjejnë një zgjidhje”.
Në Sarajevë, ministri gjerman do të takohet me Presidencën e Bosnjë-Hercegovinësdhe Përfaqësuesin e Lartë ndërkombëtar, Christian Schmidt. Bosnja paraqiti kërkesën për anëtarësim në dhjetor 2022.
Mos harroni Maqedoninë e Veriut
Mijatovic thekson, se Maqedonia e Veriut nuk duhet lënë në hije. Vendi ndryshoi emrin në vitin 2019 për të zgjidhur konfliktin me Greqinë dhe bëri reforma thelbësore. Megjithatë tani kërkohet sërish ndryshim kushtetues për të futur pakicën bullgare. Pasiguria është e madhe. “Ne e kemi ndryshuar emrin… por çfarë vjen pas kësaj?”, pyet ai. Kjo pyetje përmbledh humbjen e besimit ndaj procesit të zgjerimit.
Shkupi është kandidat që nga viti 2005. Në 2022 nisi negociatat, por që prej atëherë ka pak lëvizje. Në kryeqytet Wadephul do të takohet me homologun e tij Timco Mucunski.
Shpejtim apo frenim?
Pritjet ndaj Wadephul janë të qarta: Berlini duhet të pozicionohet. Paraardhësja e tij, Annalena Baerbock, e kishte shpallur integrimin e Ballkanit Perëndimor si një nga tri prioritetet kryesore. Sot, thotë Mijatovic, dëgjohen “herë tre, herë pesë prioritete – dhe ndonjëherë Ballkani Perëndimor nuk është aty”.
Edhe heqja e postit të të Dërguarit të Posaçëm për Ballkanin Perëndimor shihet si sinjal negativ. Ky post së fundit mbahej nga Manuel Sarrazin. Qeveria aktuale e hoqi pozicionin për të ulur numrin e të dërguarve të posaçëm.
Sipas ekspertit Nic, përgjigjja më e qartë për kursin e qeverisë gjermane do të shfaqet vetëm më vonë: “Në vitin 2026 do të shihet nëse Gjermania do ta përshpejtojë zgjerimin – apo nëse ai do të mbetet sërish viktimë e prioriteteve që konkurrojnë mes tyre.”/DW/
-
Gjyqi ndaj ish-krerëve të UÇK-së, sot protestë para Asamblesë Parlamentare të KiE në Strasbur
Rreth 6 mijë protestues nga gjitha trojet shqiptare priten të marrin pjesë sot në protestën e paralajmëruar nga Organizata e Veteranëve të Luftës së UÇK-së (OVL-UÇK) në Strasburg, përballë Asamblesë së Përgjithshme të Këshillit të Evropës.
Protesta do të mbahet në shenjë mbështetje të ish-krerëve të UÇK-së që po gjykohen në Hagë.
Protesta të ngjashme janë mbajtur më herët në Prishtinë, Hagë dhe Tiranë. Një protestë tjetër është paralajmëruar të zhvillohet edhe në Maqedoninë e Veriut.
Hashim Thaçi, Kadri Veseli, Jakup Krasniqi dhe Rexhep Selimi, figura qendrore të ish Ushtrisë Çlirimtare të Kosovës ndodhen prej 5 vitesh të arrestuar në Gjykatën Speciale në Hagë, ndërsa procesi ndaj tyre nisi vetëm në vitin 2023.
Thaçi ishte udhëheqës politik i UÇK-së para dhe gjatë luftës së viteve 1998–1999, Veseli drejtoi shërbimin e inteligjencës, Krasniqi ishte zëdhënës. ndërsa Selimi anëtar i shtabit të përgjithshëm.
Ndërsa gjithçka nisi nën pretendimet për trafik organesh, që nuk u vërtetuan kurrë, ndaj të katërve u ngritën akuza për burgosje të paligjshme, torturë, vrasje, krime kundër njerëzimit, zhdukje me forcë dhe persekutim të qindra civilëve dhe personave që nuk morën pjesë në luftime.
Krime të cilat dyshohet se ndodhën midis marsit 1998 dhe shtatorit 1999 në vende të ndryshme në Kosovë, por edhe në veri të Shqipërisë. Sipas Dhomave të Specializuara, Thaçi, Veseli, Krasniqi dhe Selimi mbajnë përgjegjësi penale personale për këto krime, por të gjithë ata janë deklaruar të pafajshëm.
Avokatët mbrojtës kanë deklaruar se UÇK-ja nuk do të kishte fituar mbështetjen e bashkësisë ndërkombëtare nëse do të kishte ekzistuar një plan kriminal, siç pretendojnë prokurorët.Sipas tyre, aktakuza bazohet në një keqinterpretim selektiv të ngjarjeve. -
Ministrja serbe: SHBA-ja nuk miratoi vazhdimin e punës së Industrisë së Naftës
Ministrja e Minierave dhe Energjetikës së Serbisë, Dubravka Gjedomiq Handanoviq, deklaroi më 15 nëntor se Shtetet e Bashkuara të Amerikës, që kanë vendosur sanksione ndaj Industrisë së Naftës së Serbisë (NIS) për shkak të pronësisë pjesërisht ruse, nuk i kanë dhënë NIS-it “asnjë ditë që të mund të vazhdojë të punojë”.
Ajo në një konferencë të jashtëzakonshme për media tha se është marrë miratim vetëm për negociata mbi pronësinë, por, siç u shpreh, “jo edhe që NIS dhe rafineria të vazhdojnë të operojnë”, transmeton Beta.
Administrata amerikane ka qenë e qartë dhe ka thënë se dëshiron ndryshim të plotë të pronësisë së NIS-it dhe kërkon tërheqjen e plotë të pronësisë ruse nga kompania, tha Gjedomiq Handanoviq, transmeton RTS.
“Është e qartë se as për shtatë ditë nuk është e mundur të ndryshohet pronësia. Si ministre e energjetikës do të them se na presin vendime të vështira se a duhet të merret kompania, e pastaj të kompensohet dëmi”, tha ajo.
Ajo shtoi gjithashtu se e di që “presidenti Vuçiq ka thënë se është kundër nacionalizimit”, por “nuk do të lejojmë që vendi ynë dhe qytetarët të jenë të rrezikuar”.
Pronaret rusë të NIS-it më 11 nëntor i kanë dërguar kërkesë Zyrës së Departamentit të Thesarit të SHBA-së për kontrollin e pronës së huaj (OFAC), me të cilën kërkonin zgjatjen e licencës së punës, në bazë të negociatave me një “palë të tretë”.
Për shkak të sanksioneve të Shteteve të Bashkuara të Amerikës, të drejtuara ndaj NIS-it për shkak të pronësisë pjesërisht ruse, është pamundësuar furnizimi me naftë të papërpunuar në Serbi.
SHBA-ja vendosi sanksionet për të pamundësuar financimin e pushtimit që Moska nisi në Ukrainë në shkurt të vitit 2022.
Negociatat rreth fatit të NIS-it ende po vazhdojnë, me Rusinë si pronare shumicëshe dhe me SHBA-të që kanë vendosur sanksione.
Vuçiq qysh në janar e ka hedhur poshtë mundësinë e nacionalizimit të NIS-it, pra që kompania më e madhe e naftës në Serbi të rikthehet nën ombrellën e shtetit, por në një deklaratë për RTS më 23 tetor tha se shteti do të ndërmarrë hapa kur të shfaqen probleme me furnizimin.
SHBA-ja shpalli sanksione ndaj NIS-it më 9 tetor, dhe ato janë shtyrë tetë herë./REL
-
Huliganëve rumunë u merren të gjitha simbolet e Serbisë
Huliganët rumunë janë ndalur rreth 60 kilometra larg nga Zenica, qyteti në Bosnjë-Hercegovinë, ku po zhvillohet ndeshja mes Bosnjë-Hercegovinës dhe Rumanisë.
Gjatë ditës ata u ndalën në Beograd dhe shpalosën një flamur provokues si dhe bënë thirrje në përkrahje të kriminelit të luftës, Ratko Mladiç.
Të gjithë huliganët rumunë janë kontrolluar detajisht nga policia e Bosnjë-Hercegovinës si dhe u morën të gjitha fanellat në të cilat ishte shfaqur flamuri apo emri i Serbisë, njoftojnë mediumet rumune.
Bëhet fjalë për huliganët e njëjtë që shkaktuan tensione në ndeshjet e Rumanisë me Kosovën. Mediat rumune bënë apel për të ndaluar huliganët rumunë me pankarta ku bëhej thirrje në përkrahje të kriminelit të luftës, Ratko Mlladiç Tribunali i Hagës e ka dënuar Ratko Mladiçin me burgim të përjetshëm.
Mlladiçi u shpall fajtor dhe u dënua me burgim të përjetshëm në qershor të vitit 2021 me vendim përfundimtar për gjenocidin ndaj boshnjakëve të Srebrenicës, përndjekjen e boshnjakëve dhe kroatëve në gjithë vendin gjatë luftës, terrorizimin e popullsisë së Sarajevës me një fushatë bombardimesh dhe sulmesh me snajper gjatë rrethimit të qytetit, si dhe marrjen peng të paqeruajtësve të OKB-së.
-
Në kujtim të viktimave/ Tragjedia e marsit në lokalin e natës ku humbën jetën 63 persona, protestë: Kërkojmë drejtësi
Mijëra qytetarë marshuan sot në Shkup duke kërkuar drejtësi për tragjedinë e 16 marsit në Koçani, ku nga një zjarr në një lokal nate humbën jetën 63 persona, kryesisht të rinj, ndërsa rreth 200 të tjerë u plagosën.
Protesta nisi nga sheshi qendror dhe përfundoi para Gjykatës së Shkupit. Familjarët e viktimave kryesonin marshimin, duke mbajtur një pankartë gjigante me fytyrat e 63 të rinjve që humbën jetën. Në pankartë shkruhej: “63 hije do t’ju ndjekin — çdo shikim kërkon drejtësi”.
“Nuk kërkojmë mëshirë, por të vërtetën dhe drejtësinë. Dhimbja është e jona, por beteja është për të gjithë. Na duhet mbështetja juaj”, deklaruan familjet në thirrjen e tyre publike.
Protesta u zhvillua pak ditë para nisjes së gjyqit për zjarrin tragjik, i cili do të hapet më 19 nëntor në sallën gjyqësore të burgut të Idrizovës. Në total, 37 persona do të dalin në gjyq, mes tyre pronari i lokalit, tre ish-kryetarë bashkie të Koçanit, dy ish-ministra të Ekonomisë dhe zyrtarë të tjerë të lartë që akuzohen se me veprimet ose mosveprimet e tyre kanë ndikuar në tragjedi.
Hetimet zbuluan se zjarri u shkaktua nga fishekzjarrët e përdorur gjatë një koncerti, ndërsa lokali nuk plotësonte kushtet minimale të sigurisë dhe funksiononte me leje të falsifikuar – elemente që kanë ndezur zemërimin e opinionit publik.
Tragjedia e Koçanit ka tronditur Maqedoninë e Veriut, ndërsa familjarët dhe qytetarët e Koçanit vijojnë protestat duke kërkuar përgjegjësi dhe transparencë. -
FOTO/ Greqi, aksidentohet autobusi me 30 pelegrinë, ka të lënduar
Një autobus me 30 pelegrinë doli nga rruga dhe u përmbys në afërsi të Athinës.
Sipas raportimeve të mediave greke, 12 persona u plagosën lehtë dhe u dërguan në spitalin e Volosit.
Autobusi turistik po udhëtonte nga Larisa drejt një manastiri në Kanalia, Magnezi.
Forcat e policisë, tre automjete të zjarrfikësve dhe katër ambulanca ndodhen në vendngjarje, ndërsa drejtuesit e automjeteve të tjera, që kalonin ndaluan dhe nxituan për të ndihmuar.
Rrethanat e aksidenti mbeten të paqarta. Grupi hetimor po punon për sqarimin e tyre.
-
Me kushte dhe nevoja të veçanta/ Përfundon numërimi i votave nga diaspora, ja si paraqiten rezultatet
Komisioni Qendror i Zgjedhjeve ka publikuar rezultatet përfundimtare të votave me postë, votave me kusht dhe atyre të personave me nevoja të veçanta për disa komuna të Kosovës në kuadër të procesit zgjedhor.
Këto rezultate kanë ndikuar në balancimin e garës zgjedhore në disa prej komunave, duke nxjerrë në pah konkurrencën e ngushtë ndërmjet kandidatëve, veçanërisht në balotazhet e mbajtura.
KQZ ka njoftuar se të hënën procesi i numërimit do të vazhdojë për një pjesë të pakove që janë tërhequr nga kutitë postare në ShBA dhe Australi.
Më poshtë paraqiten të dhënat e detajuara për komunat Prishtinë, Fushë Kosovë, Pejë, Mitrovicë e Jugut dhe Viti, sipas të dhënave zyrtare të KQZ-së.
Votat e diasporës, kryeson në Pristinë kandidati i VVKomisioni Qendror i Zgjedhjeve në faqen zyrtare të saj ka publikuar edhe rezultatin e votave me postë për Komunën e Prishtinës. Votat nga diaspora më së shumti i ka marrë kandidati i Vetëvendosjes.
Hajrulla Çeku ka marrë gjithsej 395 vota, ndërsa Përparim Rama ka marrë 168 vota.
Votat e diasporës, kryeson në Fushë Kosovë kandidati i VVKa përfunduar procesi i numërimit të votave me kusht dhe atyre me nevoja të veçanta në Komunën e Fushë Kosovës.
Valon Prebreza i VV-së prin me votat me kusht dhe ka siguruar 70.18% të tyre, ndërsa Besnik Osmani i LDK-së ka marrë 29.82%. Kurse, te votat me nevoja të veçanta kryeson Osmani me 51.61%, ndërsa Prebreza ka marrë 48.39% të këtyre votave.
Votat e diasporës, kryeson në Pejë kandidati i LDKNë faqen e Komisionit Qendror të Zgjedhjeve tashmë janë publikuar rezultatet e numërimit të votave me kusht dhe të atyre të personave me nevoja të veçanta për balotazhin e 9 nëntorit në Komunën e Pejës.
Sa i përket votave me nevoja të veçanta, Gazmend Muhaxheri ka marrë 107 vota, ndërsa kandidati i VV-së, Taulant Kelmendi, vetëm 38. Ndërsa te votat me kusht, Kelmendi ka marrë 14 vota, ndërsa Muhaxheri vetëm 8.
Votat e diasporës, kryeson në Mitrovicën e Jugut kandidati i VV
Në faqen e KQZ-së tashmë janë publikuar votat me postë për Komunën e Mitrovicës së Jugut.
Fitore edhe me votat e diasporës ka shënuar kandidati i Vetëvendosjes.
Faton Peci i VV-së ka marrë gjithsej 298 vota, ndërsa Arian Tahiri i PDK-së ka marrë 125 vota.
Votat e diasporës, kryeson në Viti kandidati i VV
Komisioni Qendror i Zgjedhjeve ka publikuar rezultatin e votave me postë për Komunën e Vitisë, ku rezultati mes Sokol Halitit të LDK-së dhe Arsim Ademit të VV-së ka qenë shumë i ngushtë.
Edhe pas numërimit të votave me postë, nga të cilat Ademi ka marrë 317 dhe Sokol Haliti 234, LDK ka arritur të mbajë primatin e partisë fituese të balotazhit, me një dallim prej vetëm 136 votash në rezultatin përfundimtar.Sipas faqes së KQZ-së, Sokol Haliti ka gjithsej 8,622 vota, ndërsa Arsim Ademi 8,486. -
‘Qartë e paekuivok!’ SHBA-ja i kërkon Serbisë që Rusia të tërhiqet plotësisht nga pronësia e Industrisë së Naftës
Ministrja e Minierave dhe Energjisë së Serbisë, Dubravka Dedoviq-Handanoviq, ka bërë të ditur se kanë marrë njoftim nga Qeveria e Shteteve të Bashkuara të Amerikës, ku kërkohet largimi i pronësisë ruse nga Industria e Naftës e Serbisë (NIS).
“Sipas kërkesës së NIS-it, për herë të parë është thënë qartë dhe pa ekuivok se duam një ndryshim të plotë të aksionarëve rusë, që do të thotë se kërkohet tërheqja e tyre nga pronësia”, ka bërë të ditur ministrja serbe.
Ministrja theksoi se Serbia po përballet me vendime të jashtëzakonshme në një situatë gjeopolitike shumë të ndërlikuar. Ajo shtoi se vendi, pa qenë fajtor ose i detyruar, është përfshirë në një konflikt politik dhe gjeopolitik dhe tani po përballet me pasojat, duke theksuar se qeveria synon të veprojë drejtësisht ndaj të gjithë partnerëve dhe miqve të saj, përfshirë Rusinë.
Qeveria e Serbisë do të mbajë mbledhje nesër në Pallatin e Serbisë, ku janë ftuar të gjithë drejtorët e ndërmarrjeve publike. Seanca do të fillojë në orën 11:00, njoftoi qeveria.Shtetet e Bashkuara kanë vendosur sanksione ndaj NIS-it për shkak të pronësisë shumicë ruse në këtë kompani. /Koha.net/
Lexo dhe: Serbia në krizë nafte për shkak të sanksioneve të SHBA kundër kompanisë NIS, REL: Çmimet mund të rriten, rezervat zgjasin vetëm 10 ditë
-
‘Qartë e paekuivok!’ SHBA-ja i kërkon Serbisë që Rusia të tërhiqet plotësisht nga pronësia e Industris së Naftës
Ministrja e Minierave dhe Energjisë së Serbisë, Dubravka Dedoviq-Handanoviq, ka bërë të ditur se kanë marrë njoftim nga Qeveria e Shteteve të Bashkuara të Amerikës, ku kërkohet largimi i pronësisë ruse nga Industria e Naftës e Serbisë (NIS).
“Sipas kërkesës së NIS-it, për herë të parë është thënë qartë dhe pa ekuivok se duam një ndryshim të plotë të aksionarëve rusë, që do të thotë se kërkohet tërheqja e tyre nga pronësia”, ka bërë të ditur ministrja serbe.
Ministrja theksoi se Serbia po përballet me vendime të jashtëzakonshme në një situatë gjeopolitike shumë të ndërlikuar. Ajo shtoi se vendi, pa qenë fajtor ose i detyruar, është përfshirë në një konflikt politik dhe gjeopolitik dhe tani po përballet me pasojat, duke theksuar se qeveria synon të veprojë drejtësisht ndaj të gjithë partnerëve dhe miqve të saj, përfshirë Rusinë.
Qeveria e Serbisë do të mbajë mbledhje nesër në Pallatin e Serbisë, ku janë ftuar të gjithë drejtorët e ndërmarrjeve publike. Seanca do të fillojë në orën 11:00, njoftoi qeveria.Shtetet e Bashkuara kanë vendosur sanksione ndaj NIS-it për shkak të pronësisë shumicë ruse në këtë kompani. /Koha.net/