Një furtunë e re politike ka shpërthyer brenda Partisë Demokratike, teksa një demokrat, papritur duket se po e vë kreun e PD, Sali Berisha me “shpatulla pas murit”. Juristja e njohur, Brizida Gjikondi ka zbërthyer kulisat brenda selisë bli, duke zbuluar se ish-deputeti demokrat, Ervin Salianji është njeriu që po i prish qetësinë kryedemokratit Berisha. Sipas saj, foltorja (takimet me demokratët në bazë ) e Salianjit po merr përmasa më energjike se ajo e Berishës, duke krijuar një tronditje të fortë brenda strukturave të Partisë Demokratike. Gjatë një interviste për “Abc News”, juristja Gjikondi deklaroi se Berisha nuk e do ecjen përpara të PD-së, pasi e konsideron partinë si pronën e tij personale. Por sipas saj, “epoka e re” që po sjell Salianji ka nisur t’i frikësojë të gjithë ata që janë mësuar me status quo-në.
Ndërkaq ajo thekson se Bardhi nuk rrezikon të dalë hapur, sepse preferon të bashkohet me fituesin vetëm pasi betejat mbyllen. Ndërkohë momenti kur Salianji doli nga burgu dhe askush nuk e priti në selinë blu, sipas Gjikondit, tregoi qartë mentalitetin e garnizonit të krijuar nga Berisha. Pra e gjithë kjo panoramë tregon se tani, skema e vjetër duket se po i shembet nën këmbë liderit të PD-së. Salianji, me lëvizjet e tij të papritura, ka çarë murin e heshtjes dhe ka thyer rehatinë e Berishës. Madje strategjia e tij, sipas zonjës Gjikondit, po rrezikon ta rrëzojë Sali Berishën nga karrigia e kreut të Partisë Demokratike. Dhe beteja që po vjen duket të jetë më e forta që ka përjetuar ndonjëherë opozita shqiptare. Më poshtë po pasqyrojmë një pjesë të intervistë së znj. Gjikondi.
Pjesë nga intervista e juristes Brizida Gjikondi
-Zonja Gjikondi, një kafe me shokët, siç në fakt e ka cilësuar Gazment Bardhi, por nga ana tjetër edhe një foltore e Salianjit, duket se ka shkaktuar një tërmet brenda Partisë Demokratike, por edhe vetë te Sali Berisha. Nuk e di si i keni parë ju këto dy foltore paralele brenda Partisë Demokratike?
Më realja dhe më energjikja besoj se është foltorja e Salianjit, sepse Partia Demokratike me në krye Berishën ishte kthyer në një kënetë, në një moçal me ujë të ndenjur. Kënetë e cila ishte me dashje nga Berisha në atë standart – e them me ironi – dhe patjetër që është prishur rehatia. Sa për katër miq, ose për çka thotë Gazment Bardhi, mendoj që përgjithësisht kjo është qasja që ka Bardhi. Ne e dimë shumë mirë që Bardhi rri dhe pastaj bëhet gjithmonë me fitimtarët. Nuk ka kurajën që të shkruajë ai historinë, por gjithmonë është numri dy. Militanti është ‘bush i topit’, si themi ne në gjuhën popullore. Asnjëherë nuk merr iniciativën të jetë ai që shkruan historinë, por është ai që kur është çarë rruga dhe kur është fituar beteja, bashkëngjitet me fitimtarin. Kështu bëri atëherë: nga Lulzim Basha vajti te Berisha. Kështu bën dhe tani, që përpiqet ta mbajë mirë me të dy krahët dhe mos pozicionohet hapur, (edhe pse) shpirti do të jetë me Salianjin, por interesi e bën të rrijë me Berishën.
-Berisha ka sulmuar drejtpërdrejt Ervin Salianjin. Përveç se ai e ka konsideruar atë një mashtrues, tha se foltoren e ka organizuar me tradhtarë. Por pse një reagim i tillë i Berishës, kur ka qenë vetë Berisha i cili e ka cilësuar Salianjin si hero kur ai ka qenë në burg?
Nuk besoj, pavarësisht se e ka quajtur hero. Nuk besoj se ne e kemi parë që kur doli Salianji nga burgu – besoj se dhe ju e aprovoni zoti Miliana – që askush nuk e priti në selinë e Partisë Demokratike. Ai besoj edhe sot që e ka sulmuar, e ka sulmuar sepse Salianji i ka prishur status quo-në, i ka prishur rehatinë, parazitizmin, atë që Berisha ka dashur ta mbajë në këtë standard. Berisha me dashje ka dashur ta mbajë Partinë Demokratike një garnizon të tij, në funksion të problemeve që ka ai me SPAK-un dhe me Drejtësinë shqiptare. Nuk do ai që Partia Demokratike të ecë përpara, të shkëputet nga interesat e Berishës dhe të ketë interesat e veta. Kjo është e gjithë urrejtja, inati dhe ligjërimi i Berishës kundër Salianjit. Është pikërisht sepse i prishet komplet skema që ai kishte përgatitur, që PD-ja të ishte në funksion, të ishte avokati i tij politik në funksion të problemeve që ka ai me drejtësinë. Mendoj që totalisht kjo gjë është prishur.
–Zonja Gjikondi, duket se tashmë kartat janë hapur, dhe në momentin kur Berisha del kaq hapur kundër Salianjit, duhet të ketë frikë Salianji nga Berisha apo Berisha nga Salianji?
Kuptohet që ka Berisha frikë nga Salianji. Salianji nuk ka më çfarë frike të ketë nga Berisha. Nuk ka më interes tek Berisha. E di shumë mirë që deri aty që ka çarë në atë parti, ka çarë nga meritat e tij personale, sepse ai është një parti që i vret talentet politikë, i mbyt zërat që janë ndryshe nga tufa. Ka gjetur momentin e duhur dhe çastin e duhur për të bërë lëvizjen e duhur dhe kjo lëvizje do kurajo. Ne pamë që edhe heshtja e deputetëve tregoi pikërisht që ata – e thashë edhe që parë si puna e zotit Bardhi – janë me shpirt me Salianjin, por interesi i bën të rrinë me një kalbësirë, ose në një moçal që është Partia Demokratike e Nokës, Berishës dhe Vokshit, që gjithmonë i mbyt personazhet e spikatur dhe nuk do lejojë kurrë që ata të ecin përpara, por duan që këta, mbas vdekjes politike të Berishës, automatikisht të hyjnë në krye të partisë, si Bokshiedhe Noka. Dhe e them dhe një herë që gjithë kjo urrejtje dhe gjithë ky sulm ndaj Salianjit është pikërisht sepse e druajnë, ia dinë peshën, e dinë që po sjell një epokë të re në Partinë Demokratike. Epokë që këta nuk e duan, sepse këta nuk kanë hallin e Partisë Demokratike, opozitarizmit dhe ndryshimit në Shqipëri. Ata kanë vetëm hallin të ruajnë këtë status që kanë të gjithë ata, secili në raport me Partinë Demokratike.
-Po të shohim Ervin Salianjin apo edhe të tjerët që janë bashkuar me të, ende nuk janë pozicionuar qartë, teksa nuk e konsiderojnë si një lëvizje vetë ata brenda Partisë Demokratike, po thonë: “është thjesht një takim me bazën”. Unë për këtë kam një pyetje të drejtpërdrejtë për ju: A tenton Salianji t’ia marrë partinë Berishës?
Këtu e kemi shumë të drejtë si pyetje, sepse sot në darkë kanë qenë të ftuar në emisione edhe zoti Ali Mehmeti dhe zoti Salianji, dhe mendoj që zoti Salianji ka pasur më integritet dhe më dinjitet në përgjigjet e tij. Zoti Ali Mehmeti jo. Nuk kam pse të fshihem mbrapa gishtit. Në qoftë se janë burra me dy “R”, ata detyrimisht duhet të dalin hapur dhe të thonë që ata duan që, jo të marrin Partinë Demokratike – sepse kjo fjala “e marrë” është shumë e ngushtë për një vizion të madh politik – por duan ta rivitalizojnë që të marrin pushtetin. Por me Berishën, Nokën, Vokshin dhe ujëra të tjerë të ndenjur, kurrë nuk mund të merret më opozita, dhe aq më tepër pastaj dhe pushteti. Po nuk pati një kontakt të afërt me bazën, ku baza të jetë direkt pjesëmarrëse në çdo vendimmarrje, por dhe në një rivitalizim, pasi ne shikojmë të gjithë që opozita shqiptare ka hyrë në një gjumë të thellë.
Zoti Ali Mehmeti tha: “jo, po e duam Berishën në krye”, kurse zoti Salianji tha që unë e kam me idetë, duam të ndryshojmë, dua të lidhemi me bazën. Evitoi marrjen e emrit të zotit Berisha, që për mendimin tim ka qenë një taktikë konstruktive, sepse Shqipëria është shumë e ngopur me urrejtje, me përçmime, me sharje, me përçarje. Një politikan vizionar vërtetë shikon lart dhe përpiqet t’i bashkojë copat, jo t’i ndajë, dhe jo të gjejë armik, as të jetë oportunist si zoti Ali Mehmeti. Një njeri duhet të ketë integritetin, dinjitetin, kurajën që në momente të caktuara vërtetë të tregojë atë që ai po bën realisht dhe që ne po e shohim. Nuk mund të fshihet që “ne e duam Berishën”, por “ne thjesht po bëjmë analiza”. Sepse sikur t’i duan ata, ata nuk i do Berisha. Berisha ka bërë karrierë elitare në përzënien dhe dobësimin e personave që i dalin kundër, ose që mendojnë ndryshe – se fjala “kundër” është fjalë e madhe.
Kush mendon ndryshe nga Berisha, detyrimisht është shpallur armik i popullit, se asaj mendësie i takon, atë lloj mendësie ka. Gjithmonë tjetrin e shikon si një kundërshtar që duhet asgjësuar, jo vetëm politikisht, por edhe fizikisht. Prandaj edhe sikur zoti Ali Mehmeti të dojë të vazhdojë të bëjë balet, një herë majtas, një herë djathtas, asnjëherë në qendër, Berisha nuk do pranojë më ta ketë në gjirin e tij, sepse mund të bëhet një model frymëzues për shumë të tjerë. Ai duhet t’ia presë kokën pulës që në fillim, nuk do e lejojë që të shtohen radhët e Salianjëve dhe të personave të tjerë që janë në krahët e tij.
-Por a mendoni, apo a dyshoni se e gjitha kjo lëvizje, le ta quajmë të tillë, mund të përfundojë sërish me Berishën kryetar, apo Salianjin, Ali Mehmetin apo kushdo tjetër, me një post të rëndësishëm brenda Partisë Demokratike?
Nuk e besoj. Besoj se Saliani është i qartë në ambiciet që ka. Është – e thashë edhe në fillim – që ka dalluar nga personazhet e tjerë të Partisë Demokratike. Nuk besoj se mund të kënaqet të ketë një si Noka dhe si Vokshi mbi kokën e tij. Ai e di vlerën e vetes, është i vetëdijshëm. Mendoj që mund të ketë marrë edhe garanci ndërkombëtare. Nuk besoj se i ka hyrë detit në këmbë, kur thotë populli. Besoj se edhe si person i ri në moshë, edhe në ide, edhe në qasje, edhe në ligjërim, besoj se është i qartë se ku do të arrijë. Nuk besoj se ai do të jetë në një PD me Berishën. Ai nuk do të ketë konflikt me Berishën, por nuk varet nga ai, sepse gjithmonë një marrëdhënie është e dyanshme. Aq më tepër kur pala tjetër është Berisha. Është Berisha pastaj që nuk do e dojë më zotin Salianji.
Nuk e do që tani ta ketë aty, sepse i prish komplet moçalin dhe kënetën që Berishën e ka mbajtur në ngrohtë deri tani, dhe që ka qenë kënetë që ai ka qenë në funksion të Berishës vetëm për marrëdhënien e tij me drejtësinë shqiptare, me SPAK-un dhe me dy gjyqet që ka ai, që nuk janë gjyqe të dorës së dytë, por janë gjyqe të rëndësishme. Dhe jo vetëm me SPAK-un, por edhe me Non Grata-n, që pavarësisht se pritej me javë dhe me ditë, po shkojnë vite dhe ajo damkë nuk po hiqet dhe nuk ka për t’u hequr, çka penalizon gjithë Partinë Demokratike.
