Këtë të dielë, 30 Nëntor, një dollar amerikan do të blihet me 82.9 lekë dhe shitet me 84 lekë.
Euro blihet me 96.2 lekë dhe do shitet me 97 lekë.
Franga zvicerane blihet me 103 lekë dhe shitet me 104 lekë.
Paundi britanik blihet me 109.2 lekë dhe shitet me 110.3 lekë.
Dollari kanadez këmbehet me 59.1 lekë në blerje dhe me 60.4 lekë në shitje.
Category: Ekonomi
-
Euro dhe paundi në pikiatë/ Mësoni si këmbehen monedhat e huaja sot, më 30 Nëntor
-
Euroja “ngec” në 96.70 lekë/ BSH: Fiksohet në këtë nivel. Kursi i këmbimit, pa luhatje të mëdha gjatë muajve të fundit
Prej disa muajsh, kursi i këmbimit nuk po përjeton luhatje të mëdha. Sipas Bankës së Shqipërisë, 1 euro po këmbehet aktualisht me 96.70 lekë.
Në muajt e parë të 2025, 1 euro këmbehej me 98 ose 99 lekë, por shenjat e parë të rënies së tij u shfaqën në muajin maj për t’u thelluar në qershor. Pra, thyerja e madhe nisi në fillim të sezonit veror. Në muajin korrik dhe gusht, euro u fiksua pranë nivelit të 97 lekëve, ndërsa nga shtatori e deri më tani, monedha evropiane po këmbehet me 96 lekë.
Nga nisja e vitit e deri më tani, euroja ka përjetuar rënien më të madhe në 21 tetor ku zbriti për herë të parë në nivelin e 96.60 lekëve.
Leku është forcuar, për shkak të sasisë së madhe të eurove në vend. Kjo sasi vjen nga prurjet e mëdha të emigrantëve, të ardhurat nga turizimi, investimet e huaja direkte, si dhe paraja informale.
Duke marrë parasysh faktin që importi i mallrave kryhet në monedhën euro, forcimi i lekut i ka bërë më të lira mallrat dhe shërbimet që blihen jashtë vendit, por ka dëmtuar sektorët eksportues të ekonomisë shqiptare. Të dhënat nga INSTAT tregojnë se në këtë dhjetëmujor, eksportet e mallrave arritën vlerën 291 mld lekë, duke u ulur me 7%. Megjithatë, edhe importet rezultojnë me rënie për këtë periudhë. Deficiti tregtar arriti vlerën 445 mld lekë, duke u rritur me 3.8%, krahasuar me të njëjtën periudhë të 2024.
Krahas të ardhurave nga turizmi, të cilat arritën në 1.9 miliardë euro në gjysmën e parë të vitit, edhe prurjet valutore të emigrantëve u rritën në 531 milionë euro.
Shqipëria ka një kurs këmbimi të lirë dhe jo të fiksuar, që nënkupton se Banka Qendrore e lejon kursin të vetërregullohet dhe nuk ndërhyn përveçse në raste të jashtëzakonshme. Edhe pse euro ka pësuar një rënie drastike në raport me lekun, Banka ka ndërhyrë në mënyrë të rezervuar në blerjen e valutës për të rregulluar kursin e këmbimit. -
Pronat “në mëshirë të fatit”/ Përmbytjet, zjarret e tërmetet nuk i nxisin mjaftueshëm shqiptarët të sigurojnë
Nuk mjaftoi as tërmeti i vitit 2019 apo lëkundjet e tjera sizmike në vazhdim, e as situata alarmante me zjarret gjatë verës, që shqiptarët të ndërgjegjësohen për të siguruar pronën e tyre. Pavarësisht se vendi ynë është shumë i ekspozuar ndaj fatkeqësive natyrore, në radhë të parë nga përmbytjet, pastaj zjarret dhe tërmetet, vijon të ekzistojë një tolerancë e lartë për mbrojtjen e pronës.
Sipas një raporti të shtëpisë publikuese Xprimm për gjashtëmujorin e parë të vitit, Shqipëria është i vetmi vend në Evropën Qendrore dhe Juglindore që ka pasur një rënie të primeve të sigurimit të pronës në krahasim me gjashtëmujorin e parë të 2024. Megjithatë, raporti i këtij produkti në krahasim me produktet e tjera të sigurimit nuk është aq i thellë se ai në vendet e tjera të rajonit.
Konkretisht, prona përbën 13% të tregut të sigurimeve në Shqipëri, ndërsa mesatarja e shteteve të Evropës Qendrore dhe Juglindore është 16% referuar shifrave nga Xprimm vetëm për gjashtëmujorin e parë të vitit.
Mali i Zi dhe Shqipëria raportojnë vlerën më të ulët të primeve të shkruara bruto për sigurimin e pronës, ndërsa për Kosovën nuk ka asnjë të dhënë.
Nga ana tjetër, të dhënat më të fundit nga Autoriteti i Mbikëqyrjes Financiare për periudhën janar-tetor tregojnë një rikthim në rritje me 4% të primeve të sigurimit të pronës, duke kapur kështu një shifër prej 2.4 miliardë lekësh.
Pavarësisht se çmimi i primeve nuk është shumë i lartë, në një ekonomi të vogël si kjo e jona, të paguash në mënyrë të detyrueshme për sigurimin e makinës dhe më pas për atë të pronës, krahas shumë shpenzimeve të tjera, rëndon shumë në xhepin e gjithsecilit. Shteti shihet si i vetmi shpëtim.
Para pak muajsh, Ministria e Financave nxori për konsultim publik një projektligj që e bënte të detyrueshëm sigurimin e banesave nga tërmetet. Ai synon që të përmirësojë sistemin e menaxhimit të riskut në Shqipëri, duke siguruar një mbrojtje më të mirë financiare për qytetarët dhe reduktuar barrën fiskale mbi buxhetin e shtetit pas ngjarjeve katastrofike./scan/ -
Shirat mbushën Fierzën/ Niveli i ujit në liqen rritet 11 metra në 10 ditë
Reshjet intensive të shiut që përfshinë vendin përgjatë dy javëve të fundit kanë ndikuar në rritjen e rezervës hidrike në Kaskadën e Drinit. Nga të dhënat rezulton se niveli i ujit në Fierzë është 276.3 metra duke pësuar një rritje me gati 11 metra vetëm në 10 ditë. Rritja e nivelit të ujit është një sinjal pozitiv për sektorin energjetik, duke qenë se Fierza mbetet një burim kyç për prodhimin e energjisë elektrike në vend.
Ndërkohë që niveli maksimal i ujit në një prej liqeneve më të mëdhenj ujëmbledhës është 296 metra.
Përmirësimi i situatës hidrike nënkupton rritjen e prodhimit të energjisë elektrike në vendin tonë. Hidrocentrali i Fierzës, nuk ishte në punë për prodhimin e energjisë elektrike një masë kjo për të përmirësuar rezervën energjetike në vend.
Për shkak të situatës së mirë hidrike gjatë ditëve të fundit korporata elektroenergjetike Shqiptare ka realizuar edhe një procedurë për shitjen e energjisë elektrike për periudhën 17- 23 nëntor.
Në total Korporata elektroenergjetike ka përfituar rreth 4.5 milion euro nga shitja e energjisë elektrike.
Ndërkohë të dhënat e fundit tregojnë se ka pasur një shtim të energjisë elektrike të prodhuar nga dielli gjatë këtij viti. Të dhënat e INASTA për periudhën korrik-gusht -shtator të këtij viti tregojnë se sasia e energjisë elektrike e prodhuar nga impiantet diellore arriti në rreth 29 % të totalit për të cilën ka nevojë vendi.
Gjatë vitit të fundit në Shqipëri janë futur në prodhim një numër i konsiderueshëm impiantesh fotovoltaike të cilat kanë shtuar prodhimin e energjisë elektrike.
Po ashtu tregues mjaft optimist për sektorin energjetik është edhe ulja e humbjeve në rrjet. Sipas INSTAT humbjet në rrjet kanë arritur vlerën 323 Gëh në tremujorin e tretë të vitit 2025 nga 344 Gëh në tremujorin e tretë të vitit 2024, duke shënuar një rënie me 5,9 %. -
Në Lushnjë ulliri rrit fitimet, fermerët zëvendësuan drithërat me ullishte, por ankohen se nuk kanë punëtorë
Tokat bujqësore në Matjan të Lushnjës janë mbjellë të gjitha me ullinj. Problematikat ndër vite me shitjen e perimeve dhe drithërave, sollën zëvendësimin e tyre me ullishte.
Banorët pohojnë se kanë bërë zgjedhjen e duhur pasi vaji i ullirit jo vetëm që u shitet por kanë fitime të mira ekonomike. Por në këtë pikë, fermerët e kanë të vështirë të gjejnë krah pune.
Shtimi i ullishteve nga ana tjetër solli nevojën për ndërtimin e fabrikave të vajit. Një emigrant banor i zonës, hapi fabrikë vaji ne fshatin e tij te lindjes.
Sokoli ndan jetën e tij mes Shqipërisë dhe Italisë. Ai thotë se 9 muaj punon ne Itali dhe tre muaj ne Matjan. Zgjedhja që ka bërë nëntë vite më parë ndihmon jo vetëm banorët e fshatit, por edhe i sjell familjes së tij të ardhura të mira ekonomike.
Me qindra hektarë ullishte janë shtuar në 5 vitet e fundit në Matjan të Lushnjës, një zonë kodrinore klima e së cilës favorizon rritjen e kësaj kulture.
Deri tani nuk eksportohet vaji i ullirit, por shitja e tij është e garantuar nga prodhuesit me çmimin 7 deri 8 mijë lekë të vjetra për një litër.
Top Channel
-
Shtohen vreshtat në Myzeqe, fermerët shfrytëzojnë teknologjinë për të përballuar pasojat e ndryshimit të klimës
Në zonën e Myzeqesë është vënë re një shtim i ndjeshëm i sipërfaqeve të mbjella me vreshta në sera, si rezultat i kërkesës së lartë për rrush cilësor dhe i kushteve të favorshme të tokës dhe klimës.
Fermerët po shfrytëzojnë teknologjinë e serave për të përmirësuar prodhimin, duke siguruar kontroll të plotë mbi faktorët klimatikë dhe mbrojtje nga sëmundjet dhe dëmtuesit.
Kjo mënyrë po sjell përfitime ekonomike, duke rritur rendimentin dhe cilësinë e rrushit të tryezës apo atij për verë.
Ekspertët e bujqësisë e shohin këtë zhvillim si një hap të rëndësishëm drejt modernizimit të sektorit dhe forcimit të pozitës së fermerëve të Myzeqesë në tregjet vendase dhe të huaja.
Mbi 100 hektarë vreshta në sera mbillen në Lushnje e Fier. Specialistët thonë se rrushi i serës kërkon më pak spërkatje se ai i fushës pasi është më i mbrojtur.Top Channel
-
Mandatet e institucioneve të pavarura, si punë e ‘dorës së dytë’
Mandatet e më shumë se gjysmës së anëtarëve të Këshillit Mbikëqyrës të Bankës së Shqipërisë përfundojnë në dhjetor të këtij viti. Megjithatë, procedurat për zëvendësimin e tyre kanë nisur me vonesë, njëlloj siç ndodhi në vitin 2018.
Fundi i këtij viti shënon një moment të rëndësishëm për Këshillin Mbikëqyrës të Bankës së Shqipërisë, organin më të lartë drejtues të këtij institucioni.
Mandati i gjashtë anëtarëve të këtij Këshilli përfundon në muajin dhjetor. Kjo do të thotë se më shumë se gjysma e anëtarëve të Këshillit Mbikëqyrës do të ndryshojnë ose do të rinovohen.
Anëtarët e Këshillit Mbikëqyrës nuk mund të vazhdojnë të ushtrojnë funksionet e tyre pas përfundimit të mandatit dhe mungesa e tyre do të paralizonte vendimmarrjen e këtij organi.
Ligji “Për Bankën e Shqipërisë” kërkon që mbledhja e Këshillit Mbikëqyrës zhvillohet me praninë e më shumë se gjysmës së anëtarëve të emëruar, duke përfshirë praninë e kryetarit ose zëvendëskryetarit të Këshillit Mbikëqyrës.
Kjo nënkupton që, në rast se anëtarët e rinj nuk zgjidhen në kohë, Këshilli Mbikëqyrës i Bankës së Shqipërisë nuk do të ketë më kuorum për të marrë vendime. Pavarësisht këtij rreziku, procedurat për përtëritjen e Këshillit Mbikëqyrës dhe zgjedhjes së anëtarëve të rinj janë me vonesë.
Kuvendi i Shqipërisë, vetëm javën e kaluar, i shpalli zyrtarisht vendet e lira për tre prej mandateve që propozohen prej këtij institucioni. Ndërsa Këshilli i Ministrave ende nuk ka njoftuar zyrtarisht shpalljen e tre vendeve të lira.
Për më tepër, nuk është as hera e parë që procesi i plotësimit të vendeve të lira në institucionet rregullatore të tregut ka vonesa.
Këshilli Mbikëqyrës i Bankës së Shqipërisë u përball me një situatë të tillë pikërisht në vitin 2018, para zgjedhjes së anëtarëve që së afërmi u përfundon mandati.
Edhe në atë rast, numri i mandateve të përfunduara ishte gjashtë. Mosplotësimi në kohë i vendeve të lira e bllokoi për një kohë të shkurtër vendimmarrjen në Këshillin Mbikëqyrës.
Në disa periudha gjatë viteve të fundit, edhe Autoriteti i Mbikëqyrjes Financiare (AMF) ka vepruar pa një numër të plotë të anëtarëve të Bordit, madje në disa raste, edhe të anëtarëve ekzekutivë të tij.
BSH, përtërihet më shumë se gjysma e Këshillit Mbikëqyrës
Sipas ligjit “Për Bankën e Shqipërisë”, të gjithë anëtarët e Këshillit Mbikëqyrës zgjidhen dhe emërohen nga Kuvendi i Republikës së Shqipërisë.
Pesë anëtarë propozohen nga vetë Kuvendi, tre anëtarë propozohen nga Këshilli i Ministrave, ndërsa një anëtar propozohet nga Këshilli Mbikëqyrës.
Në muajin dhjetor përfundojnë mandatet shtatëvjeçare të gjashtë anëtarëve të Këshillit Mbikëqyrës, të zgjedhur në fund të vitit 2018. Pranë përfundimit të mandatit janë Zëvendësguvernatorja e Parë, Luljeta Minxhozi, dhe anëtarët jo ekzekutivë të Këshillit, Artan Hoxha, Edlira Luçi, Ridvan Bode dhe Suela Popa.
Në frymën e ligjit dhe në përputhje me vendimin për zgjedhjen e saj, është shpallur si i përfunduar edhe mandati i anëtares Violeta Staka.
Ligji “Për Bankën e Shqipërisë”, në nenin 48, pika 3, parashikon se “çdo vend vakant në Këshillin Mbikëqyrës do të plotësohet me emërimin e anëtarit të ri të Këshillit Mbikëqyrës… i cili e ushtron këtë funksion brenda afatit të mbetur të anëtarit që ka zëvendësuar”.
Violeta Staka u zgjodh në Këshillin Mbikëqyrës në dhjetor 2020, duke zëvendësuar anëtarin e shkarkuar nga Kuvendi, Arben Malaj.
Duke qenë se mandati i Arben Malajt duhet të përfundonte pikërisht në dhjetor 2025, sipas këtij interpretimi, edhe mandati i Violeta Stakës është vlerësuar i përfunduar.
Megjithatë, në këtë rast ekziston një precedent ku Kuvendi ka bërë një interpretim të ndryshëm dhe që i takon pikërisht Guvernatorit Gent Sejko.
Ai u zgjodh në Këshillin Mbikëqyrës në vitin 2015, në vend të ish-Guvernatorit, Ardian Fullani. Megjithëse mandati i Fullanit përfundonte në vitin 2018, Sejko u lejua të përmbushte një mandat të plotë 7-vjeçar, deri në vitin 2022, kur u rizgjodh për një mandat të dytë.
Luljeta Minxhozi, Artan Hoxha dhe Violeta Staka janë kandidatë të propozuar nga Kuvendi i Shqipërisë, ndërsa Edlira Luçi, Ridvan Bode dhe Suela Popa janë kandidatë të propozuar nga Këshilli i Ministrave.
Rrjedhimisht, Kryeministria dhe Kuvendi duhet të kryejnë edhe procedurat për përzgjedhjen dhe propozimin e anëtarëve të rinj.
Para përfundimit të mandatit të anëtarëve ekzistues, institucionet përkatëse duhet të shpallin vakancën dhe njoftimin publik për aplikime nga kandidatët e interesuar për postet e lira.
Një procedurë serioze e shpalljes, përzgjedhjes së kandidatëve, shqyrtimit dhe emërimit të tyre nga Kuvendi idealisht duhet kryhej në afate disamujore. Por, Kuvendi vetëm në datë 19 nëntor e shpalli vakancën, ndërsa Këshilli i Ministrave ende nuk e ka bërë diçka të tillë.
Rrjedhimisht, ekziston qartë rreziku që afatet për zgjedhjen e anëtarëve të Këshillit Mbikëqyrës të shkelen, ose i gjithë procesi të kryhet në mënyrë të nxituar dhe pa u dhënë hapësirat e duhura të gjithë profesionistëve të interesuar për të marrë pjesë në garë.
Ligji parashikon që kandidatët për anëtarë të Këshillit Mbikëqyrës duhet të jenë persona që gëzojnë ndershmërinë dhe pastërtinë morale, si dhe që kanë arsimin e lartë ekonomik ose juridik; përvojë profesionale në çështje financiare dhe bankare; kualifikime profesionale të profilit; përvojë pune mbi pesë vjet në administratën publike ose në institucionet financiare dhe bankare.
Sipas ligjit, funksioni i anëtarit të Këshillit Mbikëqyrës është i papajtueshëm me funksionin e punonjësit, administratorit dhe aksionarit, me pjesëmarrje ndikuese në bankën e nivelit të dytë ose në subjektet që licencohen nga Banka e Shqipërisë.
Afati i qëndrimit në detyrë për çdo anëtar të Këshillit Mbikëqyrës është shtatë vjet.
Njëkohësisht, Komisioni Kuvendor për Ekonominë, Punësimin dhe Financat ka shpallur edhe vendin e lirë për pozicionin e Inspektorit të Përgjithshëm të Bankës së Shqipërisë. Ky pozicion mbahet aktualisht nga Merita Bejtja, e cila e mori mandatin e saj pesëvjeçar në dhjetor 2020.
Inspektori i Përgjithshëm duhet të jetë ekonomist me arsim të lartë dhe të ketë punuar në sistemin bankar jo më pak se shtatë vjet.
Inspektori i Përgjithshëm drejton Departamentin e Kontrollit të Bankës së Shqipërisë, që ka për detyrë të ushtrojnë kontroll kontabël të brendshëm, si dhe të kryejnë kontrolle të brendshme periodike për administrimin dhe operacionet e Bankës së Shqipërisë, me qëllim që të sigurojnë mbarëvajtjen e zbatimit të ligjeve dhe të akteve nënligjore.
AMF, boshllëqe në Bord dhe “luftë” e brendshme
Një precedent i ngjashëm i vonesave në adresimin në kohën e duhur të përtëritjes së përbërjes së organeve drejtuese të institucioneve të pavarura ndodhi këtë vit edhe me Autoritetin e Mbikëqyrjes Financiare (AMF).
Këtë vit, institucioni shpalli të përfunduar mandatet e dy anëtarëve ekzekutivë të Bordit, Drejtorit të Përgjithshëm Ekzekutiv, Mimoza Kaçi, dhe nëndrejtorit, Merita Gurabardhi. Vetë përfundimi i mandateve ishte një proces që u shoqërua me disa paqartësi dhe kontradikta brenda institucionit.
Ligji “Për Autoritetin e Mbikëqyrjes Financiare” parashikon që, në rastin kur një anëtar i Bordit lirohet nga detyra para përfundimit të mandatit të tij ligjor, anëtari zëvendësues nuk mund të marrë një mandat të plotë, por duhet të përfundojë mandatin e nisur nga paraardhësi.
Në rastin konkret, zëvendësdrejtori i përgjithshëm, Merita Gurabardhi, e cila u emërua në Bord në korrik 2024, duhet të përfundonte mandatin e anëtarit që zëvendësoi, konkretisht Mimoza Kaçi (që, nga ana e saj, mori detyrën e Drejtorit të Përgjithshëm Ekzekutiv, duke përfunduar mandatin e ish-drejtorit, Ervin Mete).
Por, znj. Gurabardhi nuk e ka pranuar interpretimin e ligjit nga AMF-ja dhe ndërprerjen e mandatit të saj, duke u ankuar në Kuvendin e Shqipërisë.
Komisioni i Kuvendit për Ekonominë, Punësimin dhe Financat duket se i ka dhënë të drejtë dhe në rezolutën për veprimtarinë e AMF-së ka kërkuar nga Bordi i institucionit të marrë masat e nevojshme ligjore për konstatimin e pavlefshmërisë të veprimeve të kryera lidhur me mandatin e një prej anëtarëve të tij, duke respektuar pa asnjë pengesë, deri në fund mandatin e përcaktuar nga Kuvendi.
Vetë zëvendësimi i anëtarit të Bordit që mban detyrën e Drejtorit të Përgjithshëm Ekzekutiv pati vonesa dhe zvarritje.
Këshilli i Ministrave e shpalli njoftimin për vakancën e pozicionit që në muajin korrik, ndërsa në muajin shtator miratoi vendimin për propozimin në këtë detyrë të ish-zëvendësministres së Financave, Adela Xhemali.
Por, ky vendim nuk iu përcoll Kuvendit për miratim deri në fillim të muajit nëntor. Pritet që kandidatura e saj të shqyrtohet brenda fundit të këtij viti.
Megjithatë, situata e krijuar në AMF gjatë këtij viti ishte edhe rezultat i veprimit të vonuar të institucioneve që kanë përgjegjësinë të interpretojnë dhe qartësojnë mandatet ligjore të anëtarëve të organeve drejtuese të rregullatorëve të tregut, si dhe të zhvillojnë në kohë procedurat ligjore për rinovimin e këtyre mandateve.
Kjo nuk është hera e parë që ndodhin vonesa të tilla, megjithëse në rastin konkret, vonesat mund të justifikohen pjesërisht me zgjedhjet e përgjithshme dhe kohën e nevojshme për konstituimin e Kuvendit të dalë prej këtyre zgjedhjeve.
Edhe ASD pa drejtor
Një tjetër institucion i rëndësishëm që gjendet në kushtet e boshllëkut në drejtimin e tij, për shkak të përfundimit të mandatit të titullarit ekzistues, është edhe Agjencia e Sigurimit të Depozitave (ASD).
Mandati i drejtorit të mëparshëm ekzekutiv, Genci Mamani, përfundoi në korrik të këtij viti.
Duke qenë se për të ishte mandati i dytë drejtues 5-vjeçar, ai nuk kishte më të drejtë ligjore për rizgjedhje në krye të këtij institucioni. Në mungesë të një drejtori të zgjedhur, raportimi i ASD në Kuvendin e Shqipërisë këtë vit u krye nga zëvendësdrejtori i përgjithshëm, Martin Blushi.
Megjithëse kanë kaluar katër muaj nga përfundimi i mandatit të drejtorit të mëparshëm, drejtori i ri ende nuk është emëruar.
Sipas ligjit, Drejtori i Përgjithshëm i Agjencisë emërohet dhe shkarkohet nga Autoriteti Mbikëqyrës (Banka e Shqipërisë), me propozim të këshillit drejtues, për një mandat prej pesë vitesh, me të drejtë rizgjedhjeje jo më shumë se një herë, në bazë të treguesve të performancës në administrimin e Agjencisë.
-
Çfarë do të ndodhë me pronat në 2026-ën dhe sa do të paguajnë qytetarët për rivlerësimin e pasurive të paluajtshme…
Prej janari deri në dhjetor të vitit 2026, i gjithë vendi do të përfshihet në fushatën e rivlerësimit të pasurive të paluajtshme. Ky proces do të bëhet përmes një norme tatimore prej 5%, ndryshe nga sa është aktualisht prej 15% nëse shitet prona. Kjo është norma më e lartë tatimore e aplikuar ndonjëherë për këtë proces, që prej kur ka ndodhur rivlerësimi i parë, që është e njëjtë si për bizneset dhe për individët. Tatimi paguhet për diferencën e vlerës mes asaj të regjistruar në kadastër dhe asaj me të cilën shitet. Konkretisht nëse një person ka blerë një pronë 100 mijë euro dhe sot e shet 120 mijë euro, ai do të duhet të paguaj 15% tatimin për këtë diferencë prej 20 mijë eurosh qytetari i detyrohet shtetit 3 mijë euro, ndërsa me këtë ndryshim ligjor kur bëhet përafrimi i çmimit me vlerën e tregut tatimi zbret në 5%, dhe paguan 1000 euro. “
Do të jetë tërheqëse për ata që kanë më shumë se një pronë të paluajtshme. Ulja me 3 herë e tatimit, sepse tani është 15% është pozitive. Por për ne që kemi të ardhura të mesme është e lartë norma 5%. Dakord për biznesin 5% sepse është i konsoliduar por për qytetarët është e lartë, dhe duhet të jetë 3%. E para qytetari që nuk ka ndërmend ta shesë, por duhet ta rivlerësojë pasi do të marrë një kredi, dhe është mirë ti rritet kolaterali. Por kur ke të ardhura të pakta 5% është normë e lartë”, deklaroi dje eksperti Fatos Çoçoli në një media. Pas procesit të rivlerësimit tregu sipas ekspertëve do të ndryshojë. Më shumë prona do të hidhen në treg për tu shitur, dhe më shumë mundësi do të ketë nga qytetarët për të blerë, pasi përfitojnë si nga tatimi i reduktuar, po ashtu edhe nga fakti që vlera e pronës është e njëjtë me atë të tregut.
“Mendoj se në tregun imobiliar do të futet një numër i lartë apartamentesh, nga ata që nuk e kanë pasur prioritet shitjen por edhe për ata që nuk e kanë pasur prioritet blerjen. Tregu është frenuar deri më tani duke pritur rivlerësimin”, tha dje në një media eksperti i Pasurive të Paluajtshme, Orgest Beti. Rivlerësimi do të kryhet me dy procedura. E para përmes një vlerësuesi të pasurive të paluajtshme, i cili e vlerëson pronën duke e përafruar me çmimet në treg, dhe së dyti përmes Agjencisë Shtetërore të Kadastrës, por këtë herë vlera e pronës afrohet vetëm me referencat që ka zona.
Rivlerësimi, për herë të parë do njihet vjetërsia e pronës
Por për herë të parë në rivlerësimin e pasurive të paluajtshme do të njihet edhe amortizimi i pronave, pra vjetërsia e pronës, sa më e vjetër të jetë prona aq më pak do të paguhet tatim pas procesit të rivlerësimit. Në rast se keni një banesë me vjetërsi 10-vjeçare do t’ju zbritet nga çmimi pas rivlerësimit 10% e vlerës që ka dalë dhe më pas do të paguhet tatimi. “Është lehtësi dhe është drejtësi. Pse drejtësi? Sepse deri tani qytetarët që e kanë shitur me 15%, po edhe me 3% kur ka qenë më përpara gjithnjë ishin të trajtuar në mënyrë jo të barabartë. Në rast se ti ke një banesë që e ke të vjetër, e ke të periudhës së komunizmit, edhe pse çmimi tregut për metër katror aty është shumë i rritur dhe çmimi i referencës për zonën ku banon qytetari është prapë shumë i rritur nuk mund ta çosh ti duke patur 20-30 vjet amortizim.
Ka qenë një padrejtësi që i bëhej qytetarit sepse nuk i zbritej në momentin që e shiste atë”, u shpreh eksperti Fatos Çoçoli.Ndërkohë edhe eksperti i Pasurive të Paluajtshme, Orgest Beti, i ftuar në të njëjtën media, ku ishte prezent edhe z. Çoçoli, tha se përfshirja e elementit të amortizimit në rivlerësimin e një objekti është një kriter i logjikshëm dhe që duhej përfshirë më herët. “Në fakt kjo është një gjë shumë e mirë pasi në rast se marrim një apartament le të themi që në një pallat të para viteve ’90 dhe një apartament i cili është pas 2020, nuk mund të kemi të njëjtin çmim. Logjika është shumë e saktë. Duhej të ishte bërë më përpara por nuk është vonë”, u shpreh Beti. Ndërsa Çoçoli shtoi se tatimi aktual prej 15% ka ulur ndjeshëm transaksionet dhe si rrjedhojë ka rritur informalitetin.“
Shoqatat e kanë ngritur disa herë që 15% është një taksë shumë e lartë. Në momentin që ti e vendos 15%, e ke detyruar qytetarin të tkurret për ta shitur pronën, të mos ketë interes ta shesë, sepse 15% nuk është pak. Janë ndrojtur, dhe kemi pasur më pak transaksione. Edhe të ardhura më pak në buxhet sepse kemi pasur më pak tjetërsime, sepse kemi patur më pak blerje të pasurive të patundshme, nga ana tjetër dhe qytetarët janë tkurrur. Kjo nuk do të ndodhte nëse do kishim 3% e normës tatimore që kemi pasur në 2019-2022”, nënvizoi Çoçoli.
A do ketë në Shqipëri rënie të çmimeve të apartamenteve?
Nga ana tjetër, eksperti i Pasurive të Paluajtshme Orgest Beti thotë se pavarësisht shpresës së qytetarëve blerës, çmimi i apartamenteve në Shqipëri do të vazhdojë të rritet, ndikuar nga interesi i shtuar i huajve dhe shqiptarëve të diasporës për të blerë në vendin tonë, si dhe nga anëtarësimi i mundshëm dhe i pritshëm i vendit në Bashkimin Europian. “Fakti që së shpejti do të jemi pjesë e familjes europiane, këtu do të ndodhë një proces që unë e kam thënë shpesh, që u kanë ndodhur dhe vendeve të tjera që janë bërë anëtarë të Bashkimit Europian, dhe atje ka patur një rritje me 20% apo 30%, edhe më shumë. Shqipëria tashmë ne shikojmë se ka një interes të shtuar nga të huajt, madje sipas statistikave që ne kemi 20 apo 30% e blerësve në bregdet janë të huaj dhe shqiptarë të diasporës”, nënvizoi Beti. Po ashtu në vitin 2026, me përjashtim të Tiranës, vlera e pronës në të gjithë vendin do të rritet, pasi hyjnë në fuqi çmimet e reja të referencës, që janë konsultuar gjatë këtij viti.
Çfarë ka ndodhur?
Ndërkaq kujtojmë se gati në çdo tre vjet Shqipëria është përfshirë nga fushata të rivlerësimit të pasurive të paluajtshme, ose ndryshe afrim i vlerës së pronës me çmimet aktuale në treg. Në vitet 2011-2013 u rivlerësuan më shumë se 95 mijë prona, me një normë tatimore 1%, dhe buxheti i shtetit fitoi 39.8 milionë euro të ardhura, si rezultat i pagesës që bënë qytetar e biznese për diferencën midis vlerës që kishte prona e tyre dhe asaj që doli pas rivlerësimit. Tre vite më vonë në vitet 2016-2017 u realizua fushata e dytë rivlerësuese. Këtë herë interesi ishte më i ulët pasi interesi u dyfishua, nga 1 në 2%. Në total ju nënshtruan këtij procesi 64 mijë e 686 pasuri të patundshme, ndërsa buxheti i shtetit përfitoi më shumë 56.9 milionë euro si rezultat i tatimit më të lartë. I fundit rivlerësim u bë në periudhën 2020-2022, që pati normë tatimore 3%, dhe në total u afruan me çmimet e tregut 94 mijë pasuri të paluajtshme, të qytetarëve shqiptar apo bizneseve.Nga kjo fushatë e fundit buxheti i shtetit përfitoi 138.6 milionë euro, pasi edhe tatimi ishte më i lartë, por për shkak se edhe çmimet në treg ishin rritur ndjeshëm. -
Shqipëria përballet me një krizë të thellë pensionesh, si 30 vite keqmenaxhim dhe mungesë formalizimi kanë lënë…
Eksperti dhe pedagogu i ekonomisë, Azmi Stringa, ka ngritur alarmin për krizën e skemës së pensioneve në Shqipëri, duke theksuar se vendi po përballet sot me pasojat e 30 viteve keqmenaxhim dhe mungesë formalizimi. Sipas tij, formula e llogaritjes së pensioneve ka nxjerrë në pah një realitet të ashpër, shumë qytetarë që sot kanë arritur moshën e tretë, nuk kanë paguar ose nuk iu janë hedhur kontributet, duke mbetur me pensione minimaliste.
Në një intervistë për “Vizion Plus”, ai theksoi se pavarësisht rritjeve të shpallura, pensionet në terma realë kanë mbetur thuajse 0%, ndërsa skema si e tillë është në vështirësi serioze. Po ashtu, eksperti i ekonomisë, Azmi Stringa, gjatë intervistës me moderatoren Pranvera Borakaj ka ngritur alarmin për nivelin e lartë të çmimeve në Shqipëri, të cilat sot kanë arritur mesatarisht 100% të nivelit të Bashkimit Europian, ndërkohë që të ardhurat për frymë në vend mbeten më pak se një e treta e mesatares së BE-së. A. Stringa theksoi se shqiptarët përballen me çmime më të larta se vende si Spanja dhe Holanda, ndërkohë që rritja e kostove vijon prej vitesh, edhe para pandemisë.
Sipas tij, Shqipëria ndjek në mënyrë “perfekte” trendin e rritjes së çmimeve në BE, por çdo rritje europiane reflektohet edhe më fort në tregun vendas. Shkaku, sipas ekspertit, lidhet me problemet strukturore të ekonomisë, përfshirë shkatërrimin e bujqësisë dhe mungesën e një tregu të qëndrueshëm. Ndërkohë, kursi i këmbimit ka rënë me 35%, duke e bërë situatën edhe më të rëndë për konsumatorin shqiptar.
Pjesë nga biseda për çështjen e pensioneve:
Stringa: Për shkak të formulës së llogaritjes që u zhvillua, shqiptarët po vuajnë tani një pasojë, s’kanë paguar sigurimet këto 30 vjet. Pra, pasojat që ne po shohim sot, një pjesë e tyre nuk janë më gabimet që janë bërë gjatë kohës së komunizmit. Tani Shqipëria po sheh pasojat e keqqeverisjes dhe keqmenaxhimit gjatë këtyre 30 vjetëve. Ai që ishte 25 vjeç në ’90-ën, tani ka kapur moshën e pensionit dhe ka një periudhë të tërë që nuk është interesuar se çfarë ka ndodhur
Borakaj: Ose ka punuar dhe kontributet nuk janë hedhur, se kjo ka ndodhur.
Stringa: Tani, mund të thuash ti diçka tjetër, që ky është faj që kanë qytetarët.
Borakaj: Po…
Stringa: Por, faji është pastaj pse qeveria nuk ka pasur mundësi ta rrisë më shumë pensionin, atë bazën, që të paktën këta të ishin në një pension relativisht të lartë ose të mirëqenë. Kjo del pastaj si arsye e reformave, të cilat edhe ato fatkeqësisht, në një farë mënyre, nuk kanë ecur me atë progresin që duhet, sa i përket edhe formalizimit. Po ashtu, dhe sa i përket edhe transferimit të rritjes ekonomike në rritje pagash, rritje rrogash dhe në rritje mirëqenie për qytetarët
Borakaj: Pra, Shqipërisë i rriten pensionistët dhe pensionistët paguhen pak.
Stringa: Pensioni dhe skema janë në një problem shumë të madh, megjithëse qeveria nuk e pranon. Pensionistëve i është rritur skema… i është rritur pensioni në terma realë gati zero %.
Pjesë nga biseda për çmimet:
Stringa: Shqipëria ka kapur nivelin e çmimeve sot sa 100% e BE-së. Pra, çmimet e shportës së ushqimeve janë sa 100% e Bashkimit Europian. Ndërkohë, ne të ardhurat për frymë s’i kemi aq. S’kemi asnjë të tretën e atyre.
Borakaj: Pra, ne kemi 1/3-ën e të ardhurave të BE-së për frymë, dhe kemi çmimet njësoj.
Stringa: Kemi shkuar më shtrenjtë se Spanja, më shtrenjtë se Holanda. Kjo tregon një fenomen shumë interesant. Ne e ndjekim trendin e BE-së në mënyrë perfekte. Në mënyrë perfekte. Po ama, kur rritet atje me një lek, ne e kemi rritur me dy lekë këtu. Pra, gjithmonë shqiptari mban atë diferencë që tregon edhe problemet tona të brendshme të tregut tonë. Kjo mund të vijë nga fakti që kemi shkatërruar bujqësinë dhe produktet, sepse dhe ajo na mban.
Borakaj: Dua të ndalem edhe tek bujqësia.
Stringa: Dhe e dyta, ka një gjë tjetër që duhet ta theksoj rritja e çmimeve në Shqipëri nuk ka ndodhur vetëm në fazën e pandemisë, ka ndodhur edhe përpara pandemisë. Pra, kjo tregon që ne kemi pasur një rritje çmimesh konstante, ndryshe nga vendet e tjera të rajonit. Dhe mbani parasysh që, paralelisht, kursi i këmbimit ka rënë me 35%. -
Kursi i këmbimit, 29 nëntor 2025
Këtë të shtunë, një dollar amerikan do të blihet me 82.8 lekë dhe shitet me 84 lekë.
Euro blihet me 96.3 lekë dhe do shitet me 97 lekë
Franga zvicerane blihet me 103 lekë dhe shitet me 104 lekë.
Paundi britanik blihet me 109.3 lekë dhe shitet me 110.3 lekë.
Dollari kanadez këmbehet me 59.1 lekë në blerje dhe me 60.4 lekë në shitje.
Për kursin e monedhave të tjera shihni tabelën e mëposhtme.