Lajmidites.com

Author: Zeri.ai

  • Manovrat me Avokatin e Popullit, deputetët e PD tërhoqën firmat, Manja çon në Kuvend emrat e 6 kandidatëve: ‘Topi’ te Peleshi

    Manovrat me Avokatin e Popullit, deputetët e PD tërhoqën firmat, Manja çon në Kuvend emrat e 6 kandidatëve: ‘Topi’ te Peleshi

    6 KANDIDATET NE GARE

    TIRANË- Pas pothuajse 4 vitesh, ku avokatja e popullit Erinda Ballanca vazhdon detyrën e saj përtej mandatit, zgjedhja e pasuesit të saj është zhytur në një përplasje mes socialistëve dhe demokratëve. Mazhoranca është shprehur që në krye të herës që emri i ri i Avokatit të Popullit do të zgjidhet nga kandidatët e mbështetur nga opozita, mirëpo tashmë procesi është futur në një amulli të re, pas tërheqjes së deputetëve të PD nga firmat që kanë dhënë për kandidatët.
    Shkak për këtë është bërë jozyrtarisht, indicia se PS do të votonte emrin e Endri Shabanit për postin e Avokatit të Popullit, i cili në procesin paraprak ka mundur që të sigurojë më shumë se 28 firma deputetësh. Sipas deputetëve të opozitës, në Komisionin e Ligjeve, procesi duhet të kthehet në pikën zero, sa kohë që asnjë prej kandidatëve në garë tashmë nuk ka firmat e tyre. Por drejtuesi i Komisionit të Ligjeve, Ulsi Manja, me shumicë votash 9 me 3, vendosi që lista me 6 kandidatët që plotësojnë kriteret të dërgohet në seancën plenare, dhe të jetë më pas Niko Peleshi, ai që të marrë një vendim në lidhje me garën, si dhe me pretendimin e deputetëve të PD për tërheqjen nga firmat e tyre për kandidatët.
    Edhe pse u shpreh kundër kolegëve të tij për tërheqjen e firmave, që e quajti një akt paburrërie, deputeti Arjan Ndoja tha se procesi i garës nuk mund të vazhdojë, sa kohë që kandidatët tashmë nuk kanë mbështetjen e ligjvënësve të opozitës.
    “Të gjithë anëtarët e grupit të PD-së kanë tërhequr nënshkrimet për të gjithë kandidaturat. Po e them publikisht, nga pikëpamja morale ky nuk është akt as burrëror as juridik. Mbaj përgjegjësi për këtë që po them. Nga pikëpamja juridike ndodhemi para një fakti: imagjinoni kodin e procedurës civile kur një palë që ka bërë ankimin heq dorë nga e drejta ankimit brenda afatit. Çfarë ndodh në gjykata? Ankimi nuk ka vlerë. Po e njëjta gjykatë vendos moskalimin në seancë dhe e bën me deklarim që ky ankim nuk ekziston më”, u shpreh Ndoja.
    Ndërkohë që deputeti Gent Strazimiri tha se sa kohë që deputetët e PD janë tërhequr nga firmat për kandidatët, atëherë asnjë prej tyre nuk plotëson kushtin ligjor për të vijuar garën.
    “Është e vërtetë që firmat sjellin pasoja juridike. Siç e sjell pasojën e parë, sjell dhe pasojën e dytë. Është e vjetër sa firma, është latine. ‘Novissima voluntas servatur’. Firma më e fundit është vullneti. Meqenëse do me doktrinë juridike. Doktrina është kjo: E ke firmën, kam tërhequr, ky është vullneti im i fundit. Ti nuk mund të bësh sikur nuk ekziston. Pastaj, kush duhet të skuqet e ku di unë se çfarë për atë punë, ai është muhabet tjetër. Ke të drejtë shumë, ke të drejtë shumë, kur thua që nuk është rregull.
    S’ka qenë, nuk është rregull i shkruar. Është një zakon që ne e kemi respektuar kur kemi qenë në pushtet. Dhe e kemi respektuar ne që ta dish ti. Kur u zgjodh Igli Totozani, nuk është bërë në kuvend dëgjesa? Është bërë tek Partia Socialiste. Vinin të tëra atje, live me kamera, kishte një komision deputetësh socialistë që i shikonte dhe në fund fare nxorrën një kandidaturë, thanë, këtë duam ne, atë kemi votuar. Kjo është tradita e mirë e parlamentit mendoj unë. Keni vendosur ta shkelni? Po. Vendosni një tjetër, por nuk mund ta bësh ti këtë kurrë. Kurrë. Duke thënë, ky është i joti. Në momentin kur unë, dhe kjo është pra çështja. Ti merre, zgjidhe, nuk është problem. Nuk po të themi mos e zgjidhni. Shkeleni dhe këtë traditë të mirë, sigurisht që nuk është ligjore.
    Por ti nuk mund të thuash, e kam zgjedhur filanin, kishte dhe mbështetjen e grupit parlamentar të Partisë Demokratike apo grupit parlamentar të LSI-së, sepse kjo nuk është e vërtetë. Edhe nëse ti nuk e verifikon dot kur e ka marrë firmën ai, edhe sikur të ishte kështu, ne po të themi sot. Vullneti i fundit është ky që kemi sot. Nuk e mbështesim. Me firmë, me vulë, me shkresë. Me argument. Këtë, ti kësaj ti nuk mund t’i ikësh. Ti mund t’i ikësh faktit po, që nuk e di kur ja dhe, ja dhe dje, ja dhe pardje, ja dhe mbrëmë në darkë, nuk ka rëndësi. Unë sot të kam sjellë letrën, të kam thënë me firmën time, unë nuk e mbështes. Ta marrësh ta fusësh në seancë dhe të thuash ky ka mbështetjen dhe të këtyre se këtu është firma e këtij, ky është mashtrim i opinionit publik, është mashtrim i ligjit, është mashtrim dhe i seancës. Nuk ka lidhje me zakonin e mirë të parlamentit. Vullneti i shprehur me votë i deputetëve të opozitës të organizuar në grupet e tyre parlamentare, emër për emër, është nuk i mbështesim. Merrni zgjidhni një, mbështetni një tuajin, s’ka problem. Të gjeni një Igli Totozan tjetër nuk është problem ajo punë, nuk po ju themi këtë.
    Po të marrësh të zgjedhësh një njeri që ne nuk e mbështesim dhe të thuash po për zotin ju e mbështesni, ky është mashtrim. Ashtu. Të thashë dhe njëherë, në qoftë se flet juridikisht, juridikisht vullneti i fundit është ai që kemi paraqitur me firmat tona. Nuk i mbështesim. Pastaj doni të nxirrni një nga celulat e Partisë Socialiste, mirë e bëni. Nuk është problem. Vazhdoni fitoni zgjedhje dhe fitoni përkrahje me këto raporte të zeza që ju sjell OSBE-ODIHR-i, ku thotë nuk ka demokraci, nuk ka media, nuk ka gazetarë, është narkoshtet. Vazhdoni bëjeni, nuk është problem, ju vazhdoni me fitore nga fitorja në fitore. Çështja është këtu ku flasim me këtë punë dhe po flasim juridikisht, jo politikisht. Juridikisht nuk i ke firmat tona, nuk e kanë mbështetjen tonë, ti nuk mund të thuash që vullneti i përparmë, kudo sido që të ketë qenë, është përpara kësaj. Nuk ka krijuar pasoja, pasoja krijon kjo tani.
    Ta shpjegoj nga çdo pikëpamje dhe zotit Ndoj, dhe më vjen keq në qoftë se formimin e ke juridik. Është ta thashë, është e vjetër, është latine qysh kur ka dalë firma, koncepti i firmës. Vullneti i fundit, është ai që merret parasysh. Edhe sikur të kishim vdekur ne të gjithë, kanë sjellë këtë shkresën në fund fare. Jemi gjallë dhe po të themi nuk e mbështesim. Dakord? Edhe sikur të mos ta kishim bërë me shkrim. Po të themi nuk i mbështesim, jemi këtu ne. Dhe ti nuk mund ta bësh këtë që bën, nuk gjen dot argument as juridik, as njerëzor, as logjik, që të thuash po ju i mbështesni. Ne jemi këtu dhe prandaj ta thashë dhe faktin tjetër. Mund të mos kishte qenë fare vendim politik i grupeve parlamentare. Thjesht deputeti Gent Strazimiri, sot këtu tash të thoshte, shiko e di ç’është problemi? Po shkoj po e shkruaj dy minuta, por unë nuk e mbështes filan kandidat. Sa firma ka? 28. Ka 27 sot, nuk e plotëson kriterin. Dhe ti nuk më fut dot jo ti s’e bën dot këtë punë. S’e bën dot, kaq, kaq e thjeshtë është. Jo më të jetë vendim”, u shpreh Strazimiri.
    6 emrat që Komisioni i Ligjeve dërgoi në seancën plenare, ku më pas do të ketë edhe një vendimmarrje për kërkesën e PD, që deputetët janë tërhequr nga firmat:
    Adriana Kalaja – 44 firma
    Aranita Brahaj – 35 firma
    Besim Ndregjoni – 34 firma
    Endrit Shabani – 35 firma
    Skënder Haluci – 30 firma
    Tartar Bazaj – 28 firma
    Mbetet për t’u parë nëse palët politike, do të kenë negociata për zgjidhjen e këtij ngërçi të ri juridik, apo vendimmarrja do të lihet tërësisht në dorën e Peleshit, në seancën e radhës plenare./ZËRI 

  • Joni Keta në krye të “FBI”-së shqiptare, KLP e voton në mënyrë unanime

    Joni Keta në krye të “FBI”-së shqiptare, KLP e voton në mënyrë unanime

    joni keta

    TIRANË- Këshilli i Lartë i Prokurorisë ka votuar me 11 vota pro, emrin e Joni Ketës në krye të Byrosë Kombëtare të Hetimit. Vendimi u mor në mënyrë unanime, pas leximit të relacionit të SPAK, që përzgjidhte Ketën si kandidatin e duhur, mes 6 të tjerëve në garë.  
    Në mbledhjen e sotme të Këshillit të Lartë të prokurorisë ishin të pranishëm dhe përfaqësues të ambasadës amerikani, si dhe vendeve të BE. Disa ditë më vonë, KLP do të jetë përballë një tjetër zgjedhje të vështirë, atë për kreun e ri të SPAK, që do të zëvendësojë në krye të Prokurorisë së Posaçme Altin Dumanin.
    Mandati i Ketës në krye të BKH-së do të jetë 5-vjeçar, pa të drejtë rikandidimi.

    Joni Keta u përzgjodh nga SPAK mes një liste prej shtatë kandidatësh, ku përfshiheshin edhe Andi Pogaçe, Artur Beu, Elton Kërluku, Gentian Ndoi, Gentjan Shehaj dhe Gledis Nano. Aktualisht, Keta mban postin e zv. Drejtor të Byrosë Kombëtare të Hetimit. Emri i tij u porpozua nga treshja Altin Dumani, Arben Kraja dhe Behar Dibra. 
    Kush është Joni Keta
    Joni Keta është aktualisht zv. Drejtor i Byrosë Kombëtare të Hetimit. Ai ka shërbyer si Oficer i Policisë Gjyqësore në Prokurorinë për Krimet e Rënda ndërsa pas shkrirjes së kësaj prokurorie dhe marrjen e kompetencave nga Prokuroria e Posaçme, e njohur si SPAK, Joni Keta u përfshi në radhët e Byrosë Kombëtare të Hetimit. Ai është djali i prokurorit Hysen Keta dhe i profesoreshës së njohur Majlinda Keta, Nga ana e babait, Joni Keta është dhe nipi i Myslym Ketës, i cili për kontributin e tij të shquar në Luftën Antifashiste Nacional-Çlirimtare është nderuar me titullin “Hero i Popullit”./ZËRI

  • Kush janë 6 kandidatët që plotësojnë kushtet për Avokatin e Popullit, Adriana Kalaja mbledh më shumë firma deputetësh

    Kush janë 6 kandidatët që plotësojnë kushtet për Avokatin e Popullit, Adriana Kalaja mbledh më shumë firma deputetësh

    adriana kalaja me e mbeshtetura nga deputetet

    TIRANË- Gara për Avokatin e Popullit, vijon të jetë në ‘korridoret’ e Kuvendit, me PS dhe PD që nuk kanë arritur dot të gjejnë dakordësinë për një emër konsensual. Në Komisionin e Ligjeve, janë lexuar emrat e kandidatëve që plotësojnë kushtet për vijimin e garës, ndërkohë që Adriana Kalaja rezulton që të jetë më e mbëshetura nga deputetët, duke marrë 44 firma.
    Kandidatët që kanë kaluar pragun ligjor me shume se 28 firma
    Adriana Kalaja – 44 firma
    Aranita Brahaj – 35 firma
    Besim Ndregjoni – 34 firma
    Endrit Shabani – 35 firma
    Skënder Haluci – 30 firma
    Tartar Bazaj – 28 firma
    Këta gjashtë emra konsiderohen tashmë si kandidatë që plotësojnë kriteret ligjore dhe vijojnë garën për postin e Avokatit të Popullit.
    Kandidatët që nuk kanë plotësuar kriteret
    Dardan Mustafaj – 38 firma, por të depozituara jashtë afatit
    Jola Hysaj – 27 firma, nën kufirin minimal
    Shkëlqim Sulo – 19 firma, nën kufi
    Saimir Vishaj – 26 firma, nën kufi
    Këta kandidatë nuk do të vijojnë më tej procesin, për shkak të mungesës së firmave të mjaftueshme ose mosrespektimit të afatit të paraqitjes. 
    Ndërkohë që Partia Socialiste ka deklaruar edhe sot se do të mbështesë një prej emrave të propozuar nga opozita për Avokatin e Popullit, edhe pse deri tani nuk është dalë në një kandidatyrë të vetme.
    Pak ditë më parë, Partia Demokratike ka vendosur që të tërheqë firmaT për kandidaturën e Avokatit të Popullit. Vendimi i PD për tërheqjen e firmave erdhi pas mbështetjes që PS i dha kandidaturës së Endri Shabanit, që përflitet dhe si një nga emrat potenciale për të qenë në krye të institucionit. /ZËRI 

  • Analiza e DW- Strategjia e SHBA-së për sigurinë, fyerje për BE-në

    Analiza e DW- Strategjia e SHBA-së për sigurinë, fyerje për BE-në

    DONALD TRUMP

    SHBA- “Ne nuk mund të pranojmë kërcënimin, për ndërhyrje në jetën politike të Europës”, tha António Costa të hënën (08.12..2025) në Bruksel. Presidenti i Këshillit Europian gjatë një diskutimi në Institutin Jacques-Delors u shpreh i alarmuar dhe theksoi sovranitetin europian. Sfondi ka të bëjë me strategjinë e re kombëtare të SHBA-së për sigurinë, që në pjesën më të madhe konsiderohet si një fyerje e rëndë ndaj Europës.
    Qeveria e SHBA-së rregullisht në periudha të ndryshme publikon një plan, se si dëshiron ta konceptojë në të ardhmen politikën e vet të sigurisë. Versioni më i fundit kritikon institucionet europiane dhe mund të konsiderohet si udhërrëfyes lidhur me atë se çfarë mund të presë Europa në të ardhmen nga SHBA-ja.
    Strategjia e SHBA-së: Demokracia në Europë e rrezikuar
    Presidenti i SHBA-së Donald Trump vendos theksin në fjalën hyrëse të strategjisë kombëtare të sigurisë: “Amerika duhet të mbetet kombi më i madh dhe më i suksesshëm i historisë.” Strategjia ndjek doktrinën e MAGA dhe thekson “Amerika në plan të parë”. Qeveria e SHBA-së bën të qartë, se në radhë të parë ndjek interesat kombëtare. Europa mbetet një partner strategjik, megjithatë ajo kritikohet.
    Rënie ekonomike, liria politike e shtypur dhe një politikë e gabuar migracioni: Europa, sipas këndvështrimit të SHBA-së, është duke ecur në drejtimin e gabuar. Kritikat janë të shumta. Institucionet europiane po kufizojnë lirinë e mendimit dhe po shtypin opozitën, identiteti kombëtar po humbet. “Nëse nuk ndryshon gjë, kontinenti në 20 vjet apo edhe më pak nuk do të njihet më”, thuhet në strategjinë e re të SHBA-së. Në mbarë botën duhet të ndalet migracioni masiv.
    Dokumenti i strategjisë vazhdon të ndjekë doktrinën MAGA
    Judy Dempsey nga institutit “Carnegie Europe” e konsideron këtë dokument si një vazhdim të politikës MAGA: “Ne e dimë tani, se ku ndodhet administrata Trump”, thotë ajo në bisedë telefonike për DW, “kjo është mirë.” Dokumenti i strategjisë tregon qartë, që SHBA ndjek një politikë transkionale. Gjithçka ka një çmim dhe duhet t’u shërbejë interesave amerikane, shpjegon Dempsey. Tani është e zezë në të bardhë, ajo që është deklaruar prej kohësh.
    Qeveria e SHBA-së në të ardhmen do të jetë vet aktive dhe do të “ndihmojë”, për të korrigjuar kursin aktual. Një qëllim është “të mbështesë rezistencën e kombeve europiane kundër kursit aktual të Europës.” Qeveria e SHBA-se e konsideron pozitive influencën e “partive patriotike europiane”. Në këtë mënyrë p.sh. mund kihet parasysh Alternativa për Gjermaninë (AfD), e cila mban lidhje me republikanë drejtues.
    Se çfarë do të thotë kjo konkretisht, kuptohet prej udhëzimeve të Marco Rubios. Ministri i Jashtëm i SHBA-së i ka udhëzuar diplomatët e SHBA-së në Europë, që të ndikojnë ndaj qeverive kombëtare, për të kufizuar ndjeshëm migracionin.
    Strategjia e SHBA-së: Lëvdata nga Moska, habi në Bruksel
    Për të stabilizuar ekonominë europiane, është në interesin e SHBA-së, që të zgjidhet lufta në Ukrainë. Qeveria Trump megjithatë është në kundërshtim me politikanët europianë, të cilët kanë pritshmëri jo realiste lidhur me luftën”.
    Ian Lesser konstaton një dallim fundamental, sikurse i tha në bisedë gazetarit të DW-së Teri Schultz. Lesser drejton zyrën e Brukselit të German Marshall Funds, një Think Tank transatlantik. Ndërsa qeveria e SHBA-së luftën e Ukrainës e konsideron si “një problem të pakëndshëm, që duhet zgjidhur dhe shmangur”, thotë Lesser, Europa ndodhet përballë sfidës “si do të duhet të jetojë në të ardhmen me një Rusi agresive”.
    Kaja Kallas: “Disa gjëra edhe janë të vërteta”
    Ndërohë që shumë vëzhgues shohin me shqetësim ndaj këtyre sinjaleve nga SHBA-ja, politikanë drejtues nëBE i përmbahen partneritetit transatlantik. E ngarkuara e BE-së për Politikën e Jashtme Kaja Kallas gjatë forumit në Doha të shtunën (06.12.2025) u përpoq ta zbusë situatën. “Disa gjëra edhe janë të vërteta”, tha ajo në një podium në kryeqytetin e Katarit, “Europa faktikisht po e nënvleftëson fuqinë e saj.” Ajo bëri thirrje për më shumë vetëdije dhe njëkohësisht theksoi partneritetin me SHBA-në. “Ne duhet të qendrojmë të bashkuar.”
    Anitta Hipper, zëdhënëse e Komisionit të BE për politikën e sigurisë, në një konferencë shtypi të hënën (08.12.2025) e plotësoi deklaratën: “Vendimet, që kanë të bëjnë me Bashkimin Europian, do të merren nga Bashkimi Europian për Bashkimin Europian, duke përfshirë edhe ato vendime, që kanë të bëjnë me autonominë tonë rregulative dhe mbrojtjen e lisirsë së mendimit.”
    Presidenti i Këshillit të BE-së Costa: “SHBA nuk mund të vendosë”
    Edhe presidenti i Këshillit Europian António Costa thekson partneritetin transatlantik. SHBA mbetet një partnere transatlantike. SHBA mbentet një partnere e rëndësishme, por ai nënvizon, se lidhur me strategjinë e re të sigurisë se: “SHBA nuk mund të vendosë në vend të qytetareve dhe qytetarëve europianë, se cilat parti janë të duhurat dhe cilat janë të gabuarat”, tha ai të hënën në një konferencë shtypi në Bruksel.
    Edhe pse SHBA-ja vazhdon të jetë një partnere e rëndësishme, Costa thekson sovranitetin e Europës. “Për t’u mbrojtur jo vetëm nga kundërshtarët, por edhe nga aleatët tanë, ne duhet të forcojmë Europën.
    Ende nuk ka shenja për një strategjie europiane
    Judy Dempsey nga Carnegie Europe tërheq vëmendjen, se nuk sheh të ketë një strategji unike nga Brukseli. Strategjia e re kombëtare e SHBA-së “është një goditje e fortë në shpinë nga SHBA-ja”, thotë ajo, “por Europa nuk do të reagojë ndaj saj.” Europa është në disavantazh kundrejt SHBA-së, sepse nuk ka një strategji të përbashkët të shteteve anëtare.
    Presidentja e Komisionit të BE-së Ursula von der Leyenende nuk ka reaguar publikisht ndaj strategjisë së re nga Uashingtoni./DW

  • I dënuar nga GJKKO për grup kriminal, arrestohet 35-vjeçari në Krujë (emri)

    I dënuar nga GJKKO për grup kriminal, arrestohet 35-vjeçari në Krujë (emri)

    armand dervishi, momenti i arrestimit

    TIRANË- Policia e Krujës ka vënë në pranga shtetasin Armand Dervishi, i cili ishte shpallur në kërkim pasi është dënuar me mbi 6 vjet e gjysmë burgim, në vitin 2024, nga GjKKO-ja, për pjesëmarrje në një grup të strukturuar kriminal në fushën e narkotikëve.
    Në vitin 2024, ky shtetas është dënuar nga GjKKO-ja, me 6 vjet e 8 muaj burgim, për veprat penale “Kultivimi i bimëve narkotike”, kryer në bashëkpunim, dhe “Prodhimi dhe shitja e narkotikëve”, kryer në kuadrin e grupit të strukturuar kriminal, vendim i cili është lënë në fuqi nga Gjykata e Apelit kundër Korrupsionit dhe Krimit të Organizuar.
    NJOFTIMI I POLICISË
    Finalizohet operacioni policor i koduar “Pjesëtari”, për kapjen e një shtetasi të shpallur në kërkim.
    I dënuar me mbi 6 vjet e gjysmë burgim, në vitin 2024, nga GjKKO-ja, për pjesëmarrje në një grup të strukturuar kriminal në fushën e narkotikëve, kapet 35-vjeçari.
    Në të njëjtin vit, ky shtetas është dënuar me burgim dhe për ndërtim të paligjshëm.
    Si rezultat i administrimit të shpejtë të informacioneve të siguruara në rrugë operative, mbi vendndodhjen e një shtetasi të shpallur në kërkim, shërbimet e Komisariatit të Policisë Krujë, në kuadër të operacionit “Pjesëtari”, kapën dhe ndaluan shtetasin Armand Dervishi, 35 vjeç.
    Në vitin 2024, ky shtetas është dënuar nga GjKKO-ja, me 6 vjet e 8 muaj burgim, për veprat penale “Kultivimi i bimëve narkotike”, kryer në bashëkpunim, dhe “Prodhimi dhe shitja e narkotikëve”, kryer në kuadrin e grupit të strukturuar kriminal, vendim i cili është lënë në fuqi nga Gjykata e Apelit kundër Korrupsionit dhe Krimit të Organizuar.
    Në të njëjtin vit, Gjykata e Krujës e ka dënuar me 9 muaj burgim, për veprën penale “Ndërtimi i paligjshëm”.
    Materialet procedurale iu referuan Prokurorisë së Tiranës, për veprime të mëtejshme.

  • Korrupsion dhe pastrim parash, SPAK mbyll hetimet për Evis Berberin, çon dosjen në Gjykatë

    Korrupsion dhe pastrim parash, SPAK mbyll hetimet për Evis Berberin, çon dosjen në Gjykatë

    evis berberi

    TIRANË- Prokuroria e Posaçme (SPAK) ka mbyllur hetimet, dhe ka dërguar për gjykim dosjen në ngarkim të ish-kreut të ARRSH-së Evis Berberi, i cili është arrestuar prej më shumë se një viti, i dyshuar për abuzime me tenderat e institucionit që ai drejtonte. Beberi akuzohet për korrupsion dhe pastrim parash, ndërsa biznesmeni Valter Begaj akuzohet për korrupsion aktiv, mashtrim me pasoja dhe pastrim parash.
    Gentian Gjyli akuzohet për shkelje të barazisë në tendera dy herë në bashkëpunim. Edhe kreu i KESH, Erald Elezi akuzohet për shkelje të barazisë në tendera dy herë në bashkëpunim. Pesë ditë më parë Berberi kërkoi gjykim të shkurtuar, si dhe kthimin e sendeve të sekuestruara, ndërsa sipas tij komunikimet në celularin e tij nuk duhet të merreshin si provë.  Berberi u arrestua më 13 Mars 2024 me urdhër të Gjykatës së Posaçme pasi ndaj tij janë ngritur akuzat për pastrim parash dhe korrupsion.
    Skema 
    SPAK ka dyshime se Berberi, fillimisht si Drejtor i Efiçencës së Energjisë ka zhvilluar tre procedura prokurimi me vlerë rreth 1.2 milionë euro që janë fituar nga kompania DAAM që drejtohej nga Valter Begaj, por që defakto sipas SPAK, kompania zotërohej prej Berberit.
    Po kështu SPAK dyshon se në kohën që Berberi drejtonte ARSH, e njjëta kompani ka fituar tre tendera të tjerë më vlerë rreth 1 milionë euro.
    Hetimet kanë zbuluar se kjo kompani është përdorur për kalimin drejt saj të sasive të mëdha të parave, nga kompania tjetër, “Net Group”, e sipërmarrësit Begaj, përmes transaksioneve të ndryshme.
    Paratë e kaluara në favor të kompanisë “Daam”, janë përdorur për të blerë prona të patundshme në emër të kësaj shoqërie. Këto veprime kanë ngritur dyshime për Prokurorët, se gjenden përballë një veprimtarie të pastrimit të parave.
    Transaksionet nga “Net Group” drejt shoqërisë “Daam”, në zotërim indirekt nga zoti Berberi, përkojnë, sipas hetimeve, me kohën kur shoqëria “Net Group” rezultoi fituese e disa tenderave të të shpallur nga Agjencia për Efiçencën e energjisë dhe Autoritetit Rrugor, nën drejtimin e zotit Berberi. Bëhet fjalë për prokurime publike me një vlerë totale prej mbi 2.7 milion euro me tvsh./ZËRI 

  • E rëndë në Vlorë, gruaja ndërron jetë pas operacionit, nisin hetimet

    E rëndë në Vlorë, gruaja ndërron jetë pas operacionit, nisin hetimet

    spitali i vlores, foto ilustruese

    VLORË- Një ngjarje e rëndë ka ndodhur në Vlorë, ku një 57-vjeçare është gjetur e vdekur në banesën e saj, pasi i ishte nënshtruar një ndërhyrje kirurgjikale.
    Policia bën me dije se viktima, shtetasja me iniciale M. B., kishte kryer më herët një operacion, ndërsa po hetohen rrethanat dhe shkaqet që çuan në vdekjen e saj.
    Specialistët për Hetimin e Krimeve kanë referuar materialet në Prokurori, ndërsa vijon puna për përcaktimin e saktë të shkakut të vdekjes.
    Njoftimi i policisë:
    Specialistët për Hetimin e Krimeve në Komisariatin e Policisë Vlorë referuan materiale për vlerësim, pasi pas një ndërhyrjeje kirurgjikale të kryer më herët, ka ndërruar jetë në banesën e saj shtetasja M. B., 57 vjeçe. Vijon puna për përcaktimin e saktë të shkakut të vdekjes.
    Materialet iu referuan Prokurorisë, për veprime të mëtejshme.

  • Vrasja e gjyqtarit/ Tha se nuk kishte dijeni për planet e nipit të tij, Apeli merr vendimin për Gjon Shkambin

    Vrasja e gjyqtarit/ Tha se nuk kishte dijeni për planet e nipit të tij, Apeli merr vendimin për Gjon Shkambin

    Astrit Kalaja, elvis dhe gjon shkambi

    TIRANË- Gjykata e Apelit të Juridiksionit të Përgjithshëm ka rrëzuar kërkesën e Gjon Shkambit për lirimin e tij nga qelia, pas vrasjes së gjyqtarit Astrit Kalaja, nga nipi i tij Elvis Shkambi. Gjon Shkambi ka kërkuar një masë më të butë sigurie, me pretendimin se nuk ka qenë në dijeni të faktit se nipi i tij mbante armë në sallën e gjyqit, si dhe për planet e tij për vrasjen e gjyqtarit Kalaja.
    Ndërkohë, dy ditë më parë Gjykata e Apelit liroi nga qelia Banush Koxhajn, i cili shërbente si punonjës sigurie pranë kësaj gjykate, ditën kur u ekzekutua me armë në sallën e gjyqit, gjyqtari Astrit Kalaja. Koxhaj ishte punonjësi i sigurisë në Gjykatën e Apelit Tiranë dhe menjëherë pasi u vra gjyqtari Kalaja, ai u arrestua nga policia e Tiranës, për akuzën e “Shpërdorimit të detyrës”, pasi nuk kishte ushtruar kontroll fizik ndaj Elvis dhe Gjon Shkambit, të cilët hynë të armatosur në sallën e gjyqit.
    Akuzat
    Elvis Shkambi 30-vjeç, si i dyshuar për veprat penale të “Vrasja e funksionarëve publikë” e kryer në bashkëpunim, “Vrasja në rrethana të tjera cilësuese kundër dy ose më shumë personave” e mbetur në tentativë dhe e kryer në bashkëpunim, dhe “Mbajtja pa leje dhe prodhimi i armëve, armëve shpërthyese dhe i municionit”;
    Gjon Shkambi 56-vjeç, si i dyshuar për veprat penale të “Vrasja e funksionarëve publikë” e kryer në bashkëpunim dhe “Vrasja në rrethana të tjera cilësuese kundër dy ose më shumë personave” e mbetur në tentativë dhe e kryer në bashkëpunim;
    Banush Koxhaj 63-vjeç, si i dyshuar për veprën penale të “Shpërdorimit të detyrës”;
    Si ndodhi ngjarja?
    Gjyqtari Astrit Kalaja humbi jetën më 6 tetor, gjatë një seanca gjyqësore. Ai po shyrtonte një çështje që kishte të bënte me një rast pronësie në qarkun e Shkodrës. Autori, Elvis Shkambi, ka pretenduar se ka qenë palë e dëmtuar në çështjen e pronësisë. Momenti fatal i të shtënave është regjistruar sapo gjyqtari Astrit Kalaja është çuar për të dhënë vendimin. Në atë moment, Shkambi ka nxjerrë pistoletën dhe e ka qëlluar gjyqtarin me 3 plumba në gjoks. Gjyqtari Astrit Kalaja nuk arriti t’i mbijetonte 3 plumbave në gjoks dhe humbi jetën rrugës për në spital. Ndërkohë, si pasojë e plumbave kanë mbetur të plagosur edhe 2 persona të tjerë (babë e bir) Rakip dhe Ervis Kurtaj. Në pranga kanë rënë autori, xhaxhai i tij Gjon Shkambi dhe roja e sigurisë, Banush Koxhaj, që e lejoi hyrjen e armatosur të autorit në ambientet e gjykatës, ku ndodhi krimi./ZËRI

  • Emri+foto/ Gjermania kërkon ndihmë për të kapur shqiptarin e rrezikshëm: Mos i flisni se mund të jetë i armatosur

    Emri+foto/ Gjermania kërkon ndihmë për të kapur shqiptarin e rrezikshëm: Mos i flisni se mund të jetë i armatosur

    QAZIM HODOLLARI

    GJERMANI- 40-vjeçari Qazim Hodollari është shpallur në kërkim për tentativë vrasje nga autoritetet gjermane, ndërsa konsiderohet i rrezikshëm.
    BILD raporton se skena dramatike u zhvilluan më 26 nëntor rreth orës 11:20 në rrugën Elisabeth-Selbert në Mülheim të Gjermanisë. Një person 37 vjeç nga Gelsenkirchen u plagos rëndë nga një goditje me thikë në bark.
    Policia po heton që prej asaj kohe për tentativë vrasjeje. Një komision special për hetimin e vrasjeve, nën drejtimin e Prokurorisë së Duisburgut, është angazhuar në këtë rast.
    Autori i dyshuar vjen nga Shqipëria
    Policia po e kërkon publikisht të dyshuarin Qazim Hodollari, një shtetas shqiptar 40 vjeç, pa vendbanim të përhershëm në Gjermani. Hetuesit kanë publikuar fotografitë dhe të dhënat e tij personale. Dyshohet se pas ngjarjes ai është në arrati në Mülheim (rajoni i Ruhrit) dhe konsiderohet si potencialisht i armatosur dhe i rrezikshëm.
    Sfondi i mundshëm i sulmit
    Sipas të dhënave të para, shkak i ngjarjes mund të ketë qenë një konflikt i lidhur me një marrëdhënie personale. 37-vjeçari shkoi ditën e ngjarjes në banesën e ish-partneres së tij. Aty u përball me partnerin e saj të ri – të dyshuarin që po kërkohet aktualisht. Mes tyre shpërtheu një konflikt, i cili përshkallëzoi në dhunë. 40-vjeçari dyshohet se e goditi viktimën një herë me një armë të ftohtë.
    I plagosuri nga Gelsenkirchen ndodhej në atë moment me një të afërm. Pas sulmit, ai hipi në makinën e tij dhe u largua nga vendi i ngjarjes. Sipas hetuesve, gjatë udhëtimit ai vuri re plagën në pjesën e poshtme të barkut dhe njoftoi menjëherë policinë.
    37-vjeçari mori ndihmë mjekësore urgjente dhe u dërgua në spital. Sipas policisë, jeta e tij nuk është në rrezik.
    Hetuesit kërkojnë ndihmën e qytetarëve
    Komisioni i hetimeve për vrasje po punon prej ditësh intensivisht për këtë rast dhe tani shpreson tek informacionet nga qytetarët. Kush e sheh personin e kërkuar ose mund të japë të dhëna për vendndodhjen e tij, duhet të telefonojë menjëherë numrin e emergjencës 110. E rëndësishme: Në asnjë rast të mos i flitet personit të kërkuar – ai mund të jetë i armatosur./ZËRI 

  • “Balluku”/ Shoqata e gjyqtarëve-Ramës: Po i bën presion drejtësisë, nuk është qëllimi ynë t’i pëlqejmë publikut, por të zbatojmë ligjin

    “Balluku”/ Shoqata e gjyqtarëve-Ramës: Po i bën presion drejtësisë, nuk është qëllimi ynë t’i pëlqejmë publikut, por të zbatojmë ligjin

    edi rama dhe belinda balluku

    TIRANË- Shoqata e gjyqtarëve ka dënuar sulmet e kryeministrit Edi Rama, në drejtim të prokurorëve dhe gjyqtarëve, që kanë vendosur pezullimin nga detyra të zëvendëskryeministres Belinda Balluku. Në njoftimin për mediat të shoqatës së gjyqtarëve, thuhet se qëndrimi i Ramës është një presion ndaj drejtësisë, dhe një ndërhyrje në sistem, në një kohë që çështja është ende duke u trajtuar nga gjykatat. Shoqata rithekson se ndarja dhe balancimi i pushteteve është një nga parimet themelore të demokracisë, prandaj pavarësia e pushtetit gjyqësor, arbitrit final për zgjidhjen e të gjitha mosmarrëveshjeve, përbën një gur themeli për ndërtimin e shtetit të së drejtës.
    DEKLARATA E PLOTË
    Shoqata Kombëtare e Gjyqtarëve të Republikës së Shqipërisë ka ndjekur me vëmendje prej disa ditësh komunikimin publik të Kryeministrit të vendit lidhur me çështjen gjyqësore në ngarkim të Zëvendëskryeministres dhe njëkohësisht Ministres së Infrastrukturës dhe Energjisë, e cila është duke u shqyrtuar në të njëjtën kohë nga Gjykata Kushtetuese, si dhe nga gjykatat e posaçme. Shoqata shpreh shqetësimin dhe indinjatën lidhur me qasjen që kreu i pushtetit ekzekutiv ka zgjedhur të bëjë për këtë problematikë, e cila është pjesë e juridiksionit të pushtetit gjyqësor. Nën petkun e ankesës për uzurpimin e pushteteve ekzekutiv dhe legjislativ nga ai gjyqësor në të vërtetë fshihet një mesazh presioni ndaj organeve të drejtësisë që kanë për shqyrtim çështjen në fjalë. Gjithashtu, mesazhe të tilla të përditshme të ushqyera ndaj publikut të gjerë synojnë të krijojnë një klimë mosbesimi ndaj pushtetit gjyqësor dhe mund të përdoren më tej si pretekst për marrjen e masave erozive ndaj këtij të fundit.
    Shoqata rithekson se ndarja dhe balancimi i pushteteve është një nga parimet themelore të demokracisë, prandaj pavarësia e pushtetit gjyqësor, arbitrit final për zgjidhjen e të gjitha mosmarrëveshjeve, përbën një gur themeli për ndërtimin e shtetit të së drejtës. Kjo pavarësi vihet në rrezik jo vetëm nga veprime konkrete që synojnë kufizimin e sferës së kompetencave të këtij pushteti, por edhe nga çdo akt ose deklaratë që perceptohet si kërcënim ose presion politik ndaj veprimtarisë gjyqësore apo që ul reputacionin e organeve të drejtësisë në sytë e publikut dhe, në këtë mënyrë, minon besimin e tij tek këto organe. Komisioni Evropian ne raportet për Shqipërisë ka adresuar si shqetësim vazhdimin e përpjekjeve te ndërhyrjes dhe presionit ndaj sistemit gjyqësor nga zyrtarë të lartë publikë dhe politikanë.
    Gjyqtarët janë të pavarur dhe i nënshtrohen vetëm Kushtetutës dhe ligjeve e si të tillë qëllimi i misionit të tyre nuk është fitimi i pëlqimit të shumicës së publikut apo një pjese të tij, por zbatimi me fanatizëm i vullnetit të sovranit të shprehur në këto akte. Vendimet gjyqësore mund të jenë të papëlqyeshme për disa subjekte, por kjo nuk i bën ato ilegjitime, pasi sistemi demokratik i qeverisjes vepron brenda kufijve që i përcaktohen nga standardet e shtetit të së drejtës dhe zbatuesit finalë të këtyre standardeve janë gjyqtarët. Në këtë kuadër, Shoqata Kombëtare e Gjyqtarëve të Republikës së Shqipërisë fton dhe i kërkon secilit zyrtar të lartë të dy pushteteve të tjera që të respektojë pavarësinë e gjyqtarëve në vendimmarrjen e tyre dhe të distancohet nga çdo sjellje që e cenon atë. Ndërhyrja në veprimtarinë e gjyqtarëve gjatë zhvillimit të procedurave gjyqësore përbën formën më të rrezikshme në shkeljen e parimit të ndarjes së pushteteve, pasi ka si qëllim deformimin e vendimmarrjes nëpërmjet formave të ndryshme të presionit.
    Në disa reagime të njëpasnjëshme, kryeministri Edi Rama e ka cilësuar vendimin e Gjykatës së Posaçme, për pezullimin nga detyra të Belinda Ballukut, si një ndërhyrje të drejtësisë në kompetencat e qeverisë.
    Jo më larg se këtë të dielë, në podcastin e tij “Flasim”, Rama u shpreh se qeveria ka dërguar çështjen Balluku në Gjykatën Kushtetuese, për të mos lejuar që kompetencat e ekzekutivit të cenohen nga vendime të një gjyqtari apo prokurori. Sipas kryeministrit, situata krijon një precedent të rrezikshëm për funksionimin e institucioneve demokratike. Gjithashtu ai theksoi se nuk është thjesht pezullim por nënshtrim i ekzekutivit.
    “Edhe njëherë, dua ta theksoj, se ankimimi që kam bërë në Gjykatën Kushtetuese nuk është një betejë politike, nuk është as një kundërvenie ndaj drejtësisë, nuk është as një presion mbi këdo qoftë, përfshirë edhe këto shpjegime, të cilat janë të domosdoshme për ata që më kanë besuar privilegjin e udhëheqjes së këtij vendi, por është një betejë institucionale, një betejë themelore për mbrojtjen e kufijve mes pushteteve dhe për moslejimin e marrjes së kompetencave ekskluzive të kryeministrit, qeverisë dhe parlamentit nga një prokuror e një gjykates, një precedent kërcënues për demokracinë, në kuptimin më të drejtëpërdrejtë të fjalës dhe krejt i panjohur në Europë dhe në krejt botën demokratike. Ky veprim, që “de jure” quhet pezullim, por “de facto” është nënshtrim brutal i ekzekutivit, sjell përditë pasoja pas pasojash”, tha Rama.

    Ndërkohë Gjykata Kushtetuese ka shtyrë seancën ku do të shqyrtohet ankimimi i qeverisë për pezullimin nga detyra të Belinda Ballukut si ministre dhe zëvendës kryeministre me vendim të GJKKO. Pasi treshja e gjyqtarëve, Sandër Beci (relatori), Sonila Bejtja dhe Marsida Xhaferllari, nuk arriti të dilte me një vendim unanim, çështja kaloi në mbledhjen me tetë gjyqtarë të Kushtetueses, e cila do të zhvillohet më 12 dhjetor. Në kërkesën drejtuar Kushtetueses, qeveria kërkon pezullimin e vendimit të GJKKO vetëm për pjesën e pezullimit nga detyra të Belinda Balluku, teksa argumenton se ky vendim sjell pasoja të rënda të interesit shtetëror e shoqëror.
    Gjykata e Posaçme kundër Krimit dhe Korrupsionit vendosi për pezullim nga detyra të zëvendës kryeministres dhe ministres së Infrastrukturës dhe Energjisë, Belinda Balluku dhe ndalim daljeje jashtë vendit. Gjykata arsyetoi se vendimi erdhi pasi Balluku mund të prishë provat dhe të intimidojë dëshmitarët, në sajë të detyrës që mban. Balluku me vartësit e saj akuzohen se kanë paracaktuar fituesit në dy tenderë me vlerë 210 mln euro, atë të Tunelit të Llogarasë 190 mln euro dhe loti 4 i Unazës së Madhe 20 mln euro. GJKKO ka caktuar edhe arrest shtëpie për kreun e ARRSH-së, Gentian Gjyli dhe Erald Elezin, aktualisht drejtor i KESH. Kushtetuesja është ajo që do të vendosë për ‘fatin’ e Ballukut, ndërsa kryeministri Edi Rama ka deklaruar se zëvendësimi i Ballukut në qeveri nuk do të ndodhë./ZËRI