Lajmidites.com

Tag: shqipëri

  • Forumi Ekonomik i Delfit: Tirana në qendër të dialogut rajonal, ekonomik e politik

    Forumi Ekonomik i Delfit: Tirana në qendër të dialogut rajonal, ekonomik e politik

    Forumi Ekonomik i Delfit, zhvilloi më 10 dhjetor, në Tiranë, edicionin e saj të 5- të, për të nxjerrë në pah rolin gjithnjë e më të rëndësishëm të Shqipërisë, si një qendër ndërkombëtare, për dialogun ekonomik dhe politik në Evropën Juglindore.

    Për të pestin vit radhazi në Tiranë, Forumi bëri bashkë përfaqësues të nivelit të lartë nga politika, biznesi dhe akademia në Shqipëri dhe komuniteti ndërkombëtar.

    Forumi Ekonomik i Delfit zhvillohet çdo vit në kryeqytete strategjike si Brukseli, Parisi, Berlini, Uashingtoni, Toronto, Bukureshti dhe Sofja, duke forcuar dialogun ndërkombëtar, mbi zhvillimin dhe bashkëpunimin rajonal.

    Pas fjalës së hapjes, mbajtur nga Symeon G. Tsomokos, i Forumit Ekonomik,  Delfi, Greqi,  Kryeministri i Republikës së Shqipërisë, Edi Rama, foli për perspektivat e ekonomisë shqiptare, në një mjedis ndërkombëtar që ndryshon me shpejtësi. Kryeministri vuri theksin tek përparimi i shpejtë i Shqipërisë drejt integrimit në BE si edhe në disa sektorë si ekonomia, turizmi apo industria ushtarake.

    Të pranishëm ishin edhe Delina Ibrahimaj, Ministre e Ekonomisë dhe Inovacionit, Republika e Shqipërisë; Elisa Spiropali, Ministre për Europën dhe Punët e Jashtme, Republika e Shqipërisë; Edona Bilali, Zëvendësministre e Infrastrukturës dhe Energjisë, Republika e Shqipërisë; Anastas Angjeli, Anëtar i Akademisë së Shkencave të Shqipërisë dhe i Këshillit Mbikëqyrës të Bankës së Shqipërisë; Silvio Gonzato, Ambasador, Delegacioni i Bashkimit Europian në Shqipëri etj.

    Temat e diskutimeve, gjatë punimeve të këtij forumi prekën çështje që nga rritja e gjelbër,  tek inovacioni social dhe mundësitë e reja të investimeve në Shqipëri,

    Forumi Ekonomik i Tiranës vijon të shërbejë si një pikë referimi për ata që kristalizojnë një të ardhme ekonomike të fortë dhe të qëndrueshme për Evropën Juglindore.

     

     

  • “Republikë Prokurorësh” në Shqipëri? Braho: S’e njoh këtë term!

    “Republikë Prokurorësh” në Shqipëri? Braho: S’e njoh këtë term!

    klodian braho

    TIRANË- Kandidati i fundit në garë për kreun e ri të SPAK, Klodian Braho ka vijuar me intervistimin përballë prokurorëve të KLP-së. Platforma e tij konsiton në luftën kundër korrupsionit dhe krimit të organizuar, pasi e shikon si situatën më problematike në vend. 
    I pyetur për përkufizimin e termit “Republikë e Prokurorëve”, ai tha se nuk e njeh këtë term dhe se nuk ka një Republikë të Prokurorisë në Shqipëri.
    Pyetje: “Mund të më përkufizoni termin republikë e prokurorëve?”
    Braho: “Nuk më shkon dhe nuk e njoh këtë term. Nuk besoj se ka një Republikë të Prokurorisë në Shqipëri. Prokurorët kanë detyrën të zbatojnë atë që thotë Kodi i Procedurës Penale”.

  • “Në Shqipëri nuk ka republikë prokurorësh!”, Braho: Hetimi i çështjeve nuk destabilizon vendin

    “Në Shqipëri nuk ka republikë prokurorësh!”, Braho: Hetimi i çështjeve nuk destabilizon vendin

    Kandidati për kreun e SPAK, Klodian Braho, tha se në Shqipëri nuk ka republikë prokurorësh, një term i përdorur në komunikimet publike për të nënkuptuar pushtetin e madh të institucionit që ai kërkon të drejtojë.
    “Unë nuk e njoh si term. Nuk ka republikë prokurorësh në Shqipëri”, tha Braho.
    I pyetur nëse dikush do t’i thoshte që stabiliteti i vendit ka më shumë rëndësi se dosja që ka në duar, Braho u përgjigj: “Kam pasur çështje që kanë shkaktuar efekte, por nuk mendoj se hetimi i një çështjeje mund të sjellë destabilizimin e vendit. Pastaj, nëse kjo ndodh, stabiliteti i vendit nuk zgjidhet me këshilla, por mblidhet Këshilli i Sigurisë Kombëtare.
    I pyetur lidhur me përmirësimin e bashkëpunimit mes prokurorëve në SPAK, Braho tha se në cilësinë e drejtuesit, do t’u jepte më shumë kompetencë drejtuesve të seksioneve. “Kjo do të ulte ngarkesën e kreut. Duke shpërndarë disa kompetenca dhe duke mbajtir kontakt me seksionet, kjo besoj do të rrisë bashkëpunimin”.
    Sipas Brahos, sfida më e madhe e SPAK është të maturohet dhe të krijojë standard. “Të mos ketë më rendësi kush shkon prokuror dhe drejtues, por të ketë standard”, tha ai.

  • Shqipëria dhe Italia nisin bashkëpunimin për shërbimin neonatal, Sala: Standarde europiane në kujdesin ndaj nënës dhe fëmijës

    Shqipëria dhe Italia nisin bashkëpunimin për shërbimin neonatal, Sala: Standarde europiane në kujdesin ndaj nënës dhe fëmijës

    Ministria e Shëndetësisë dhe e Mirëqenies Sociale, në bashkëpunim me qeverinë italiane, nisën zbatimin e projektit “Përmirësimi i shëndetit të nënës dhe të porsalindurit në Shqipëri – MATHERNA”, një nismë strategjike që synon transformimin e shërbimeve neonatale dhe të kujdesit për nënat në Shqipëri.
    Projekti vjen pak javë pas marrëveshjes së nënshkruar në Romë, gjatë mbledhjes së përbashkët të dy qeverive.
    Falë një financimi prej 6 milionë eurosh nga qeveria italiane dhe mbështetjes tekniko–shkencore të ASST Fatebenefratelli Sacco, MATHERNA përfaqëson një model të ri partneriteti ndërinstitucional të orientuar drejt ofrimit të shërbimeve cilësore në struktura spitalore moderne, të sigurta dhe të pajisura sipas standardeve ndërkombëtare.
    Gjatë fjalës në takimin prezantues, ministrja e Shëndetësisë dhe Mirëqenies Sociale, Evis Sala, theksoi rëndësinë thelbësore të investimeve në periudhën neonatale (0-28 ditë), një fazë vendimtare për zhvillimin dhe shëndetin gjatë gjithë jetës.
    “Përmes bashkëpunimit me qeverinë italiane nuk po hapim thjesht një fazë të re pune, por po përcaktojmë një standard të ri në kujdesin neonatal dhe atë maternal në Shqipëri. Ky investim do të ketë ndikim të drejtpërdrejtë në jetën e familjeve të reja dhe do të na afrojë më shumë me standardet e Bashkimit Evropian”, u shpreh Sala.
    Ambasadori i Italisë në Shqipëri, Marco Alberti, theksoi se “shëndeti dhe Shërbimet Shëndetësore janë përparësi të bashkëpunimit dypalësh, siç parashikohet në Marrëveshjen G2G”.
    “ASST Fatebenefratelli Sacco është një institucion zbatues i shkëlqyer së bashku me Rajonin Lombardia sjellim në Shqipëri jo vetëm burime, por edhe kompetenca të avancuara klinike, dije organizative dhe praktika shëndetësore të përafruara me ato evropiane”, theksoi Alberti.
    Drejtoresha e Agjencisë Italiane për Bashkëpunim dhe Zhvillim (AICS) në Tiranë, Letizia Fischioni, theksoi se “bashkëpunimi italian prej vitesh qëndron krah Shqipërisë me ndërhyrje që integrojnë forcimin e infrastrukturave, zhvillimin e aftësive profesionale dhe përmirësimin e shërbimeve shëndetësore.
    Sektori i shëndetësisë mbetet një shtyllë e angazhimit tonë tridhjetëvjeçar në vend, përmes nismave që synojnë të përmirësojnë ofertën shëndetësore.
    Gjithashtu, drejtoresha e përgjithshme e ASSTFatebenefratelli Sacco, Maria Grazia Colombo, nënvizoi se “është një nder për ASST Fatebenefratelli Sacco (Spitali Buzzi dhe M. Melloni i Milanos) që është përzgjedhur nga Assessorato al Welfare i Rajonit Lombardia si institucioni udhëheqës i projektit të Shëndetit Materno-Fëmijor në Shqipëri”.
    Projekti do të zbatohet në dy spitale universitare dhe tre spitale rajonale dhe parashikon modernizimin e terapive intensive neonatale, futjen e teknologjive të avancuara, standardizimin e protokolleve klinike si dhe forcimin e rrjetit referues kombëtar.
    MATHERNA është plotësisht në përputhje me prioritetet e Strategjisë Kombëtare të Shëndetit dhe me objektivat e reformave të qeverisë shqiptare, të cilat synojnë uljen e mortalitetit neonatal dhe atij maternal në nivelet e vendeve të Bashkimit Europian.

  • Paratë që emigrantët sollën në shtëpi arritën rekordin e 817 milionë eurove në janar-shtator

    Paratë që emigrantët sollën në shtëpi arritën rekordin e 817 milionë eurove në janar-shtator

    Paratë që emigrantët sjellin tek familjet e tyre në Shqipëria po vijojnë të kenë një tendencë rritjeje, duke reflektuar ciklin e ri të emigracionit në vend.
    Të dhënat e Bankës së Shqipërisë në bilancin e pagesave bënë të ditur se të ardhurat nga emigrantët ishin 817 milionë euro në janar-shtator 2025, me një rritje prej 5.9% në krahasim me të njëjtën periudhë të një viti më parë.
    Ritmet e rritjes u përshpejtuan në tremujorin e tretë, që tradicionalisht ka flukse më të larta hyrjeve për shkak se emigrantët vijnë në Shqipëri gjatë pushimeve të verës. Për korrik-shtator 2025, emigrantët sollën tek të afërmit në vendlindje 285 milionë euro, ose 8.8% më shumë në krahasim me të njëjtën periudhë të një viti më parë.
    Që nga viti 2013, paratë që emigrantët sjellin në Shqipëri janë rritur vazhdimisht (shiko grafikun), duke reflektuar një cikël të ri emigracioni, që nisi kryesisht pas vitit 2015.

    Pas një rënieje në vitin 2020, si efekt i pandemisë, tendenca rritëse u përshpejtua dukshëm. Në 9 muajt e parë të 2024-s, për herë të parë u tejkalua kufiri prej 800 milionë eurosh. Me këto ritme viti mund të mbyllet me nivele rekord prej mbi 1 miliardë euro. (në tremujorin e fundit 2024 prurjet ishin 273 milionë euro).
    Emigrantët e rinj duket se nuk ikin pa e kthyer kokën pas, duke u kujdesur për të afërmit që lënë në Shqipëri.
    Sipas të dhënave të Eurostat, vetëm në 2022-2023 u dhanë gjithsej 154 mijë leje qëndrimi për herë të parë. Që nga viti 2008, kur Eurostat raporton të dhënat kanë marrë leje qëndrimi për herë të parë rreth 920 mijë shtetas shqiptarë, të cilët janë një potencial për të dërguar para tek të afërmit që kanë lënë në Shqipëri.
    Aktorët e tregut pohojnë se kanalet kryesore vijojnë të mbeten vendet tradicionale ku ka emigracione, si Greqia e Italia, por vitet e fundit ka pasur rritje dhe nga destinacionet e reja si Anglia dhe Gjermania.
    Remitancat llogariten nga Banka e Shqipërisë si pjesë e llogarisë korrente në bilancin e pagesave, sipas standardeve të FMN-së (BPM6).
    Ato përfshijnë të gjitha prurjet monetare që emigrantët dërgojnë drejt familjeve dhe individëve rezidentë në Shqipëri, si përmes kanaleve formale (bankat, institucionet financiare dhe operatorët e transfertave), ashtu edhe përmes vlerësimeve të prurjeve informale.
    Për këtë qëllim, Banka përdor të dhënat e sistemit bankar, raportimet periodike të subjekteve të licencuara dhe anketa specifike tek familjet përfituese, duke synuar të kapë tërësinë e flukseve reale të remitancave në ekonomi./Marrë nga Monitor.al

  • Rekord i ri në turizëm: Shqipëria përfiton 2.1 miliardë euro neto nga udhëtimet

    Rekord i ri në turizëm: Shqipëria përfiton 2.1 miliardë euro neto nga udhëtimet

    Si shpenzimet e të huajve që vijnë për udhëtime në Shqipëri, ashtu dhe paratë që shqiptarët nxjerrin nga xhepi kur dalin jashtë vendit janë rritur ndjeshëm përgjatë 9 muajve të këtij viti.
    Banka e Shqipërisë bëri të ditur se për periudhën janar-shtator, shpenzimet e të huajve në Shqipëri kanë arritur rekordin e 4.4 miliardë eurove, duke u rritur me 14.5% në krahasim me të njëjtën periudhë të një viti më parë.
    Niveli më i lartë i shpenzimeve ishte në tremujorin e tretë të vitit, që përkon me kulmin e sezonit turistik. Për muajt e verës, të huajt që vijnë në Shqipëri për turizëm, apo qëllime të tjera shpenzuan një rekord prej 2.3 miliardë eurosh, me një rritje prej 21.6% në krahasim me të njëjtën periudhë të një viti më parë.
    Shifrat e rritjes së ndjeshme të publikuara nga banka e Shqipërisë nuk janë në linjë me deklarimet e operatorëve turistikë, që thonë se turistët që vijnë në Shqipëri po shpenzojnë gjithnjë e më pak, apo me kompanitë e mëdha shpërndarëse dhe prodhuese që thanë se u mbeti malli stok për shkak se prodhuan shumë në pritje të konsumit të lartë nga turizmi, por u zhgënjyen.
    Edhe të dhënat e tjera të INSTAT treguan se për janar- shtator, në vend hynë 10.2 milionë shtetas të huaj, me një rritje prej 5.7%. Për periudhën korrik-shtator hynë 5.4 milionë shtetas të huaj, ose 6.2% më shumë se e njëjta periudhë e një viti më parë.
    Sipas të dhënave të kombinuara rezulton se shpenzimi mesatar për turist është rritur në 431 euro për 9 mujorin, nga 398 euro në janar-shtator 2024.
    Edhe shqiptarët nuk kursehen jashtë, përmirësohet bilanci
    Edhe shpenzimet e shqiptarëve jashtë kanë arritur një nvel rekord, në 2.1 miliardë euro, me një rritje prej gati 20% në krahasim me janar-shtator 2024.
    Rritja e fortë e të hyrave nga të huajt ka bërë që bilanci i udhëtimeve, që mat diferencën mes shpenzimeve të të huajve në Shqipëri dhe të shqiptarëve jashtë të përmirësohet, duke arritur në 2.1 miliardë euro për 9 mujorin 2025, që është praktikisht shuma neto që i mbetet vendit.

  • Kapja e kamionit me miliona euro në Shqipëri, tronditet sistemi juridik në Bruksel/ Gjykata Penale shpall veten të paaftë për çështjen “Toyota”

    Kapja e kamionit me miliona euro në Shqipëri, tronditet sistemi juridik në Bruksel/ Gjykata Penale shpall veten të paaftë për çështjen “Toyota”

    Dhomë e 46-të e Gjykatës Penale, në Gjykatën e Brukselit, shpalli të mërkurën një vendim që ka tronditur sistemin juridik, duke u shpallur të paaftë territorialisht për të gjykuar çështjen “Toyota”.

    Ky vendim ka të bëjë me një hetim ndërkombëtar që lidh krimin e organizuar dhe politikanë të lartë shqiptarë dhe belgë, një çështje që mund të ndikojë edhe në procesin e pranimit të Shqipërisë në Bashkimin Evropian.
    Çështja ka të bëjë me një kamion që u sekuestrua në portin e Shqipërisë në korrik 2019. Kamioni transportonte Toyota të blera në Belgjikë dhe në ndarjet e fshehura të automjeteve u gjetën 3.5 milionë euro dhe 100,000 franga zvicerane, para që dyshohet se vijnë nga krimi i organizuar belg-shqiptar.
    Zyra e Prokurorit Federal të Belgjikës është angazhuar në hetime, dhe në proces janë gjithsej 13 persona të akuzuar.
    Gjykata ka argumentuar se dosja e çështjes nuk përcakton qartë se kur ose ku janë vendosur paratë e fshehura, duke sjellë konfuzion për autoritetet juridike që duhet të gjykojnë çështjen.
    Kamioni kaloi nëpër disa vende para se të sekuestrohej në Shqipëri, gjë që ka nxitur pretendime për paaftësinë territoriale të gjykatës shqiptare. Ky vendim ka hapur dyshime se mund të ndikohet procesi i drejtësisë.
    Vendimi ka shkaktuar shqetësime të mëdha për integritetin e sistemit të drejtësisë në Shqipëri, pasi çështja është një test për pranimin e vendit në Bashkimin Evropian.
    Avokatët e të pandehurve kanë konfirmuar vendimin e gjykatës, ndërsa Zyra e Prokurorit Federal ka theksuar se ka mundësi për apelim të këtij vendimi, duke kërkuar shqyrtim të mëtejshëm nga autoritetet belge.

    Top Channel

  • 35 vite nga Dhjetori ‘90, Neritan Ceka: Mungesa e një projekti bëri që gabimet të ishin fatale

    35 vite nga Dhjetori ‘90, Neritan Ceka: Mungesa e një projekti bëri që gabimet të ishin fatale

    Një nga themeluesit e Partisë Demokratike, Neritan Ceka, ka bërë një prej analizave më të drejtpërdrejta mbi gabimet historike të viteve ’90 dhe rolin që PD pati në procesin e tranzicionit politik. Në emisionin “Trialog” në RTSH, Neritan Ceka pranoi se mungesa e një projekti të qartë dhe përgatitjes së duhur e çoi forcën e parë opozitare në vend drejt gabimeve të mëdha që kanë ndikuar edhe në realitetin e sotëm politik.
    “Ne nuk patëm projekt. Ishte hedhur projekti për liri dhe demokraci, por jo një projekt i imtësishëm. Nuk dinim si do të krijoheshin institucionet dhe ishim më të mbushur me iluzione sesa me realitet. Nuk mund të justifikohemi për faktin që e ndërtuam projektin tonë mbi iluzione. Nuk ishim të përgatitur,” tha Ceka.
    Ai theksoi se mungesa e përgatitjes politike bëri që PD të bënte gabime serioze, që sipas tij nuk janë rregulluar ende as sot.
    “Politika është profesion, kërkon përgatitje dhe lobim, dhe ne ramë viktimë e kësaj mospërgatitjeje, duke bërë gabime jo të vogla në jetën tonë politike. Duhej të kishim ruajtur frymën intelektuale dhe gjithëpërfshirëse që kishte PD-ja në fillim, frymë që solli shumë personalitete me ide të reja. Ky imazh u shkatërrua shumë shpejt dhe kjo ka qenë fatale, pa shenja rregullimi deri sot.
    Partia, nga një mjet progresi që çon para shoqërinë, mund të kthehet në pengesë nëse ndërhyn në ekzekutiv, dhe ne nuk kemi qenë të kujdesshëm në këtë drejtim. Në vitin 1991, kur morëm një pjesë të pushtetit, nuk treguam kujdesin e duhur për të përgatitur një Shqipëri që të mos ishte më “Shqipëria e Punës”. Ne bëmë gabimin e ndërtimit të Shqipërisë së Partisë Demokratike dhe jo Shqipërisë së shqiptarëve dhe qytetarëve. Kërkuam një Shqipëri normale, por ne sot nuk kemi një Shqipëri normale”, tha Ceka.

  • Skandali ‘Toyota Yaris’, i permendur dhe Basha/ Gjykata e Brukselit merr vendimin e bujshëm, mediat belge: Rasti, test për integrimin në BE

    Skandali ‘Toyota Yaris’, i permendur dhe Basha/ Gjykata e Brukselit merr vendimin e bujshëm, mediat belge: Rasti, test për integrimin në BE

    Skandali ‘Toyota Yaris’, i permendur dhe Basha/ Gjykata e Brukselit merr vendimin e bujshëm, mediat belge: Rasti, test për integrimin në BE
    Skandali i miliona eurove të fshehura në makinat Toyota ngec në instancën e parë gjyqësore në Bruksel. Çështja shkaktoi shumë bujë në vitin 2018. Pothuajse 3.5 milionë euro u zbuluan në Shqipëri, të fshehura në makinat e blera në Belgjikë. Një skandal ku përfshihen qarqet politike dhe kriminale
    Nga Tony Chalot, DH NET
    Këtë të mërkurë, Gjykata Penale e Brukselit ka dhënë një vendim që pritet të shkaktojë bujë të madhe.
    Ajo ka shpallur moskompetencën për të gjykuar dosjen ‘Toyota’, një skandal që përfshin botën kriminale dhe atë politike në Shqipëri.
    Lajmi konfirmohet nga avokatët mbrojtës të të pandehurve, mes tyre av. Kamran Najib, av. Quentin dhe Jean-Philippe Mayence, av. Olivier Martins, av. Sven Mary, av. Dimitri de Béco dhe av. Johan Heymans.
    Dosja ishte ndjekur nga Prokuroria Federale pasi në korrik 2019 një kamion që transportonte automjete Toyota, të blera në Belgjikë, u sekuestrua në një port në Shqipëri.
    Në dy prej automjeteve ishin fshehur 3.5 milionë euro dhe 100 mijë franga zvicerane, para që me shumë gjasë vinin nga veprimtari kriminale e rrjeteve belgo-shqiptare.
    Prokuroria federale kishte shkuar në vendngjarje
    Një delegacion i Prokurorisë Federale kishte udhëtuar në Shqipëri për të marrë në pyetje disa persona të përfshirë në këtë çështje, mes tyre edhe ish-ministrin shqiptar të Punëve të Jashtme, Lulzim Basha. Ky i fundit nuk është marrë i pandehur në procedurën belge. Në Belgjikë janë akuzuar 13 persona, të cilët janë nxjerrë përpara drejtësisë në Bruksel.
    Çështja konsiderohet jashtëzakonisht e ndjeshme, pasi shihet si një provë paraprake për anëtarësimin e Shqipërisë në Bashkimin Evropian, një vend i goditur nga korrupsioni.
    Ky skandal ka njollosur gjithashtu edhe gjyqësorin shqiptar.
    Gjykata Penale vlerëson, ndër të tjera, se dosja nuk lejon të përcaktohet as koha, as vendi se ku janë futur paratë e dyshimta në skutat e automjeteve.
    Kamioni, në fakt, ka kaluar nëpër disa shtete para se të sekuestrohej nga autoritetet shqiptare.
    Prokuroria Federale ka ende mundësinë të bëjë apel kundër këtij vendimi.

  • Italia përgatitet të rihapë kampet në Shqipëri, vendimi mund të hyjë në fuqi në pranverë

    Italia përgatitet të rihapë kampet në Shqipëri, vendimi mund të hyjë në fuqi në pranverë

    Ministria e Brendshme e Italisë ka hartuar një plan për rihapjen e qendrave të pritjes në Shqipëri. Rihapja mund të bëhet e mundur që në pranverë, nëse më 17 dhjetor miratohen pa pengesa tre rregulloret e reja të aprovuar të hënën nga Këshilli i BE-së. Sipas La Repubblica, hapi i fundit do të jetë miratimi nga Parlamenti Evropian, madje edhe para se Pakti i ri për Azilin dhe Migracionin të hyjë në fuqi më 12 qershor.
    Sipas planit të ministrit të Brendshëm italian, Matteo Piantedosi, qendra në Gjadër do të rihapet për të pritur azilkërkues nga vende të konsideruara të sigurta, ndërkohë që ata presin përfundimin e procedurave të përshpejtuara kufitare. Në ndryshim nga më parë, migrantët nuk do të transportohen më direkt nga deti nëpërmjet anijeve të Marinës, por do të dërgohen në Shqipëri nga qendrat e para-pritjes në Itali menjëherë pas mbërritjes.
    Qendra shqiptare do të funksionojë si një strukturë e pasme në një vend të tretë të sigurt. Rregulloret e reja evropiane do t’i lejojnë autoritetet italiane të ndalojnë migrantët nga “vend të sigurta” dhe t’i trajtojnë kërkesat e tyre përmes procedurave të përshpejtuara kufitare. Kjo pritet të shtojë ndjeshëm numrin e personave të dërguar drejt Shqipërisë, veçanërisht migrantëve nga Bangladeshi dhe Egjipti, të cilët kanë përbërë mbi 28,000 mbërritje, si dhe atyre nga Tunizia dhe Maroku.
    Ministria italiane e Brendshme parashikon se qendra e Gjadrit, me rreth 1,100 vende, mund të mbushet shpejt, duke pasur parasysh që procedurat e përshpejtuara kufitare kërkojnë riatdhesimin brenda 30 ditësh. Këtë herë, migrantët nuk do të kenë mundësi të shmangin paraburgimin përmes një apelimi që pezullon kthimin në Itali, siç ka ndodhur më parë.
    Një ndër dispozitat e reja të aprovuar nga Këshilli i BE-së parashikon heqjen e pezullimit automatik të riatdhesimit për ata që ankimojnë vendimet. Kjo do të thotë se një migrant mund të bëjë apel, por riatdhesimi do të kryhet normalisht nëse gjykata nuk urdhëron posaçërisht pezullimin.
    Ministri i Drejtësisë, Carlo Nordio, deklaroi se “situata mbetet në pritje të zgjidhjes përfundimtare të trilogut, por jemi shumë afër një zgjidhjeje që do të sjellë qartësi si në aspektin jurisprudencial, ashtu edhe në atë gjyqësor. Nuk do të ketë më hapësirë për hezitim gjyqësor.”
    Qeveria italiane po përgatitet të rifillojë mekanizmin e transferimit drejt Shqipërisë, e bindur se lista e re evropiane e vendeve të sigurta do të kapërcejë kundërshtimet e deritanishme të gjykatave italiane. Sipas autoriteteve, qendra e Gjadrit, ka mbetur pothuajse e zbrazët dhe është gati të vihet në funksion.