Seanca parlamentare e ditës së sotme u tensionua nga një ndërhyrje procedurale e deputetit të opozitës, Bardh Spahia, i cili ngriti shqetësimin për përdorimin e gjuhës së papërshtatshme nga ana e deputetëve të mazhorancës.
Ai akuzoi drejtpërdrejt se përfaqësues të shumicës parlamentare kanë përdorur termin fyes “lehin” në drejtim të deputetëve opozitarë, pa hasur në asnjë masë ndëshkimore nga drejtuesi i seancës.
“Nuk ndërmerret një masë kur nga ana e mazhorancës përdoren terma ‘lehin’ për deputetët e opozitës. U përdor disa herë ky term dhe ju ju hyn në një vesh dhe ju del nga tjetri,” deklaroi Spahia, duke kërkuar me forcë paanshmëri në drejtimin e punimeve të Kuvendit.
Ai vuri në dukje një standard të dyfishtë, duke theksuar se merren masa “krejt qesharake” ndaj deputetëve për çështje minore, ndërkohë që ofendimet e rënda kalojnë pa u vënë re.
Në përgjigjen e tij, Kryetari i seancës pranoi se mund të mos dëgjojë çdo fjalë që thuhet në sallë, por theksoi se përgjegjësia nuk bie vetëm mbi të. Peleshi sqaroi se deputetët kanë të drejtën dhe mekanizmin për t’iu drejtuar Sekretariatit të Etikës për të kërkuar marrjen e masave disiplinore.
Ky incident nxjerr në pah edhe një herë klimën e tensionuar dhe debatin e vazhdueshëm mbi etikën dhe gjuhën e përdorur në parlamentin shqiptar.
Deklarata e deputetit Spahia:
Kryetar, kam në radhën. Dhe nuk ndërmerret një masë kur nga ana e mazhorancës, përfaqësuesit të mazhorancës, përdoren terma lehin për deputetët e opozitës.
U përdor disa herë ky term dhe ju ju hyn në një vesh dhe ju del nga tjetri.
Ju lutem, duam paanësinë në drejtimin e seancës. Dhe jo të merren ato masa krejt qesharake për një deputet që nuk ka lëvizur nga karrigia e vet tek e fundit. Ndërkohë që këtej flasin ofendimet për opozitën dhe ju nuk ju bëjnë aspak përshtypje. Faleminderit.
