Zbardhen të tjera detajet nga rritja e pensioneve dhe pagave për administratën, nga mjekët, mësuesit, policët, ushtarakët, te sanitarët, shoferët, teknikët, protokollistët, arkivistët dhe magazinierët, ja kategoritë që përfitojnë dhe si bëhet ndarja në lekë
Zbardhen detaje të reja nga rritja e pensioneve dhe pagave në projektbuxhetin 2026, ku përfitues janë mjekët, mësuesit, policët, ushtarakët, si edhe punonjësit e shërbimeve mbështetëse. Kryeministri Edi Rama deklaroi dje në Kuvend se paga minimale do të bëhet 500 euro nga janari dhe se rritjet e pagave në administratë do të përfshijnë mbi 10 mijë punonjës shërbimi, si dhe mjekë, infermierë e mësues. Ministrja Albana Koçiu njoftoi se buxheti i Ministrisë së Brendshme është më i larti në histori, duke garantuar rritje pagash për policinë, Gardën dhe Zjarrfikësen. Ndërsa ministrja Adea Pirdeni theksoi se indeksimi dhe rritja e pagës minimale do të çojnë në rritje prej 25% për kategoritë me paga më të ulëta në administratë. Ajo sqaroi se të gjitha profesionet nga sanitaret te arkivistët do të përfitojnë rritje nga 3 deri në 10 mijë lekë, ndërsa në shëndetësi dhe polici futet për herë të parë llogaritja e vjetërsisë në pagë. Ndërkaq ministri i Mbrojtjes, Pirro Vengu bëri me dije se buxheti rritet me 12%, duke garantuar paga më të larta për ushtarakët dhe financimin për herë të parë të statusit të ri të ushtarakut. Më poshtë po pasqyrojmë pjesë nga deklarata e kryeministrit Rama dhe anëtarëve të qeverisë.
Rama zbardh detajet
Fillimisht ka qenë kryeministri Edi Rama prezantoi në seancën plenare të Kuvendit projektbuxhetin për vitin 2026, ku sipas tij, në fokus do të jetë rritja e pensioneve, pagave të punonjësve të administratës dhe rritja e pagës minimale. “Një tjetër zotim i dhënë në pranverë dhe që mbahet në këtë buxhet, është rritja e pagës minimale që qysh prej janarit do të jetë 500 euro dhe do të jetë një pagë që do të vazhdojë të rritet brenda mandatit të katërt me objektivin ambicioz që deri në fund të këtij mandati, paga minimale në Shqipëri të jetë 700 euro”. Kryeministri u ndal edhe te politika e rritjes së pagave, ku efekti financiar llogaritet 100 mln euro. “Për herë të parë do të fusim edhe indeksimin periodik të pagës çdo dy vjet për administratën publike, në mënyrë që të vazhdojmë të fuqizojmë familjen dhe të mbështesim rritjen e standardit të jetesës. Gjithashtu kemi parashikuar përsëri për herë të parë dhe rritjen e diferencuar pagash për të mbështetur më shumë punonjësit me paga më të ulëta dhe për të siguruar një shpërndarje më të drejtë të kompensimit të gjithë administratës. Kështu si më poshtë 10 mijë e 600 punonjës shërbimi, sanitare, shoferë, teknikë, aktivistë, arkivistë, magazinier, protokollistë do të përfitojnë nga rritja e pagës minimale me 10 mijë lek të reja në muaj. Specialistët e administratës publike do të përfitojnë 5 mijë lek të reja në muaj. Mësuesit do të përfitojnë 3 mijë lek të reja në muaj. Dhe në shëndetësi për herë të parë përveç indeksimit vjetor do të fillojë dhe llogaritja e vjetërsisë në punë, gjë që pagën e mjekut të përgjithshëm për shembull do ta çojë nga 131 mijë e 700 lekë në 143 mijë e 500 lekë. Ndërsa pagën e infermiereve do ta çojë nga 87 mijë lekë, në 92 mijë e 500 lekë. Të njëjtën gjë, përveç indeksimit me rritjen për vjetërsinë në punë do të bëjmë dhe për punonjësit e policisë së shtetit që për gradat më të ulëta do të ketë një rritje mesatare prej 5000 lekësh të reja në muaj dhe pastaj sipas vjetërsisë në punë për inspektoret nga 80 mijë e 500, paga do të shkojë në 84 mijë e 500 ndërsa shtesa do të shkojë në 100 mijë lekë. Nën komisarët, 95 mijë e 500 do të shkojnë në 100 mijë lek, me shtesa do të shkojnë në 116 mijë lekë. Komisarët sot janë në 105 mijë dhe në total do të shkojnë në 125 mijë. Drejtuesit e thjeshtë sot janë 130 mijë, do të shkojnë në 156 mijë e 540 lek të reja pagën. Kostoja totale e këtyre masave për sa i përket administratës është 100 milionë euro”. Po ashtu, pensionistët do të jenë kryefjala e këtij buxheti dhe mandati, por pa harruar personat me aftësi të veçanta dhe ata që janë pjesë e skemës së ndihmës sociale. “Vijojmë me mbrojtjen. Mbrojtja shoqërore arrin sot me këtë buxhet në 257 miliard lekë. Ose me një rritje prej 11.6 miliardësh që janë 116 milionë euro. Kjo shumë për mbrojtjen sociale ndërkohë që nga një anë varfëria ulet, nga ana tjetër papunësia ulet, është më shumë se sa dyfishi i mbrojtjes që kishin shqiptarët kur ne morëm detyrën. Pensionistët janë kryefjala e këtij buxheti dhe do të jenë kryefjala e këtij mandati por pa harruar edhe ata që vazhdojnë të jenë në skemën e ndihmës ekonomike, personat me aftësi të veçanta dhe domosdoshmërinë për një qasje të re në aspektin e strehimit dhe duke mbetur besnikërisht pranë të gjitha familjeve të reja me bonusin e bebes”, theksoi dje Rama.
Koçiu jep detajet
Ndërkohë ministrja për Punët dhe Çështjet e Brendshme, Albana Koçiu, në fjalën e saj dje në Kuvend, tha se “kemi buxhetin më të lartë historik për ministrinë e Punëve të Brendshme”. Koçiu nënvizoi se “buxheti i vitit 2026 ka lajmë të mira edhe për efektivët dhe punonjësit në varësi të Ministrisë së Punëve të Brendshme”. “Për 12 432 punonjës të Policisë së Shtetit, për 1491 punonjës të Gardës së Republikës, 1 389 punonjës të Shërbimit Zjarrfikës, 181 punonjës Ministrisë së Punëve të Brendshme, dhe të gjithë ata punonjëse të institucioneve të varësisë, lajmi i mirë është rritja e pagave që ky buxhet parashikon. Një inspektor i thjeshtë, nga një pagë 80,500 lekë që paguhet sot, me të gjitha shtesat, paga do të shkojë në 100,000 lekë. Për një nënkomisar, paga nga 95,500 lekë do të shkojë në 116,000 lekë; për një komisar, me të gjitha shtesat, nga 105,000 shkon në 125,600 lekë dhe për një kryekomisar, nga 115,500 lekë në 136,000 lekë”, deklaroi Koçiu.
Pirdeni jep detajet
Ndërsa ministrja e Shtetit për Administratën Publike dhe Antikorrupsionin, Adea Pirdeni deklaroi dje se, buxheti 2026 është angazhim i drejtpërdrejt i qeverisë për të çuar përpara reformat e nisura drejt Shqipërisë 2030. Në fjalën e tij në seancën plenare në Kuvend ministrja theksoi se “indeksimi i pagave të administratës publike që nga janari 2026 si dhe rritja e pagës minimale me 10 mijë lekë të reja duke e çuar atë në 50 mijë lekë të reja do të përkthehet në një rritje prej 25% për një kategori të konsiderueshme të punonjësve të administratës publike me paga aktualisht më të ulta”. Pirdeni shtoi se, “10 600 punonjës shërbimi, sanitarë, shoferë, teknikë, protokollistë, arkivistë, magazinierë do të përfitojnë nga rritja e pagës minimale me 10 mijë lekë të reja në muaj, me një vlerë në rritje gati 25%”.“Për specialistë të administratës publike rritja do të jetë 5 mijë lekë të reja. Mësuesit do të përfitojnë pagë 3 mijë lekë të reja më shumë në muaj. Dhe për herë të parë në sektorin e shëndetësisë, përveç indeksimit do të fillojë dhe llogaritja e vjetërsisë në punë”, tha Pirdeni. Kjo do të thotë se si mesatare për mjekët e përgjithshëm nga 131 700 lekë, paga do të shkojë në 143 500 lekë në muaj. Për mjekët në spitale nga 174 mijë lekë në 186 mijë lekë në muaj. Për infermierët nga 87 mijë lekë në 92.500 lekë në muaj”, tha Pirdeni. Po ashtu, Pirdeni theksoi se, “edhe për punonjësit e Policisë së Shtetit, përveç indeksimit, do të ketë rritje për vjetërsinë në punë, e cila për gradat më të ulëta përkthehet në një rritje mesatare me 5 mijë lekë të reja në muaj”. “E thënë ndryshe, për një punonjës me vjetërsi mesatare 15 vjet, sipas gradave, pagat rriten si më poshtë: Për inspektorët e thjeshtë nga 80.500 lekë të reja në 84.500 lekë të reja, plus shtesa për kushtet e punës dhe ushqimit, që e çon pagën mesatarisht në 100 mijë lekë të reja. Për komisarët nga 105 mijë në 110.600. Dhe për drejtuesit e thjeshtë, nga 130.500, paga do të shkojë 141.450 lekë të reja, që me shtesën dhe me ushqimin bëhet mesatarisht 156.450 lekë”, nënvizoi Pirdeni.
Vengu jep detajet
Ndërkohë ministri i Mbrojtjes, Pirro Vengu deklaroi dje se, buxheti i mbrojtjes për vitin 2026 synon rritjen e pagave të ushtarakëve Në fjalën e tij në seancën plenare në Kuvend, ku u diskutua pr/buxheti 2026 dhe Paketa Fiskale, vëngu tha se, “buxheti i mbrojtës 2026 do të mundësojë modernizimin e Forcave të Armatosura, ri ngritjen e industrisë ushtarake, forcimin e emergjencave civile dhe rritjen e kontributit tonë në NATO, sikundër dhe në sigurinë rajonale”. Vengu tha se, ky buxhet ka një rritje me 12% në krahasim me buxhetin e vitit pararendës, duke arritur 58.9 miliardë lekë ose 2.12% të prodhimit të brendshëm Bruto. Ai theksoi se në zemër të pr/buxhetit janë njerëzit në uniformë. “Plot 13 miliardë lekë që shkojnë për ta për paga më të larta. Siç rrisim pagat minimale, pagat e administratës, vijojmë rritjen e pagave të ushtarakëve për të kapur mesataren e NATO-s sipas projeksionit tonë në 2029-ën”, tha ai. Sakaq Vengu u shpreh se, për herë të parë financohet statusi i ri të ushtarakut. “Siç rrisim pensionet, financojmë gjithashtu për herë të parë statusin e ri të ushtarakut, një kërkesë prej më shumë se 2 dekadash nga të gjithë ushtarakët në rezervë apo në lirim”, theksoi Vengu.
