Deputeti socialist Erion Braçe ka dhënë një qëndrim të rezervuar për kandidaturën e Ogerta Manastirliut në zgjedhjet e parakohshme për Bashkinë e Tiranës, duke sinjalizuar një mungesë entuziazmi edhe brenda vetë radhëve të Partisë Socialiste.
Në një intervistë televizive, Braçe shmangu mbështetjen e drejtpërdrejtë për Manastirliun, duke u shprehur se nuk i interesojnë emrat, por mënyra se si qeveriset qyteti.
“Nuk dua të flas për emra. Me të thënë të drejtën, edhe në rastin e qeverisë, po edhe në rastin e çdo pozicioni tjetër që është me emërim apo me zgjedhje, nuk dua të merrem me emra,” tha ai.
I pyetur konkretisht nëse Manastirliu është zgjidhja që i duhet Tiranës, Braçe nuk e mohoi, por as nuk e mbështeti hapur.
“Dua të shikoj çfarë bëjnë dhe çfarë do të bëjnë. Qeveria si emra mua nuk më thotë asgjë. Ama si qeverisje patjetër që më thotë. Më thotë për mirë apo për të reaguar. E njëjta gjë është edhe te bashkia e Tiranës. Kam parë shumë. Dua të shikoj si qeveriset qyteti, nuk më intereson kush është,” shtoi deputeti.
Kjo deklaratë e Braçes vjen në një kohë kur PS ka zyrtarizuar emrin e Manastirliut si kandidate për zgjedhjet e parakohshme në Tiranë, të cilat janë pezulluar përkohësisht nga Gjykata Kushtetuese, por mbetet në fuqi përgatitja politike në terren.
Qëndrimi i tij është parë si një sinjal i pakënaqësive të brendshme në radhët e socialistëve për mënyrën si është përzgjedhur kandidatura dhe për performancën në drejtimin e kryeqytetit.
