Tag: paguar

Dita e djeshme ishte afati i fundit për dorëzimin e raporteve financiare në Komisionin Qendror të Zgjedhjeve (KQZ) për zgjedhjet e 11 majit.  Sipas raportit financiar të PD të depozituar në KQZ shuma totale që është derdhur në llogarinë e kompanisë Advancing Strategies te Chris LaCivita është plot 1 milionë e 670 mijë dollarë. Pagesat janë kryer në data 11 shkurt 2025, 16 mars 2025, 24 mars 2025, 26 maj 2025. Pagesa e fundit për LaCivitan ishte 15 ditë pas zgjedhjeve. LaCivita ishte angazhuar nga PD për fushatën e zgjedhjeve parlamentare të 11 majit, ku ka ofruar konsulencë strategjike dhe menaxhim të aktivitetit elektoral.
1.100 euro akomodim dhe masazh për Chris LaCivita
Nga raporti për shpenzimet dhe të ardhurat që kreu i Partisë Republikane, Fatmir Mediu dorëzoi në KQZ, u vu re se ishin paguar 1100 euro akomodim e masazhe indiane për Chris LaCivita. Partia Republikane reagoi dje në lidhje me këto shërbime. Në njoftim sqarohet se lajmet e shpërndara kanë qenë për qëllime manipulative politike. PR-ja thekson se ka paguar, sipas marrëveshjes së koalicionit opozitar, për akomodimin e LaCivita për 3 netë qëndrimi në Tiranë. Më tej PR-ja sqaron se çdo shpenzim e ka deklaruar sipas parashikimeve ligjore. “Masazhatorët mediatikë, të korrupsionit të qeverisë, kanë raportuar sot se Fatmir Mediu ka paguar një masazh në hotelin ku ka ndenjur strategu i fushatës së Trump dhe të koalicionit tonë ‘Shqipëria Madhështore”, Chris LaCivita, sikur të bësh masazh me vlerën 5900 lekë ishte krim, turp, apo “shfaqje e huaj”. Kjo bëhet për qëllime manipulative politike, nga shërbëtorëve të bindur të pushtetit. Sqarojmë opinionin publik se: Partia Republikane konform detyrimeve dhe marrëveshjes së koalicionit opozitar, ka paguar konform ligjit, shpenzimet e akomodimin në hotel Xheko Imperial në Tiranë, për akomodimin e ekipit Amerikan të fushatës z. Chriss LaCivtta, Paul Manaford dhe Lord Stewart Jackson nga Parlamenti Britanik për 3 netë qëndrimi në këtë hotel, pronë e një biznesmeni të respektuar shqiptar, me vlerën 27,300 lekë nata. Këto shpenzime nuk janë paguar nga Fatmir Mediu, por nga Partia Republikane. Të gjitha këto shpenzime janë deklaruar nga PR sipas ligjit”, thuhet në njoftimin e PR-së. Kujtojmë se LaCivita u prezantua më 10 shkurt nga Berisha dhe ka marrë pjesë në disa mitingje të Partisë Demokratike gjatë 11 majit, por shfaqjet e tij ishin të rralla. LaCivita ka marrë pjesë në disa mitingje të Partisë Demokratike gjatë 11 majit. Por, teksa për LaCivitan do të zbulohet kontrata, e paqartë është ende se si Berisha solli në Tiranë për fushatë Paul Manafort, një njeri i akuzuar në SHBA për lidhjet me Kremlinin, që ka bërë evazion fiskal, që ka pastruar para, ka bërë mashtrime bankare, ka kërcënuar dëshmitarë, ka gënjyer në dëshmi apo edhe krime të tjera federale. Në shkrimet e mediave amerikane flitet se Manafort u rekrutua nga LaCivita për fushatën e PD-së.
SPAK dhe FBI në lojë
Përveç kontratës me LaCivitën, ekziston edhe një tjetër marrëveshje lobimi në Shtetet e Bashkuara, me një vlerë që arrin në 6 milionë dollarë, e lidhur me përpjekjet për heqjen e “non gratës” së shpallur nga Departamenti Amerikan i Shtetit. Këtu është futur në lojë SPAK dhe drejtësia amerikane, të cilat kanë thelluar hetimet. Berisha është përpjekur ta paraqesë si një “dhuratë” nga atdhetarët shqiptarë që jetojnë në Amerikë. Berisha ka deklaruar se Partia Demokratike nuk ka asnjë detyrim financiar ndaj kësaj kontrate dhe se pagesat do të mbulohen nga fondacioni “Make Albania Great Again”, një strukturë që ai e ka paraqitur si nismë private e mbështetësve të tij jashtë vendit. Qëllimi i këtij interpretimi është i qartë: shmangia e nenit 92/1 të Kodit Zgjedhor, i cili ndalon kontributet mbi 1 milion lekë dhe detyron çdo subjekt politik të raportojë çdo burim financimi dhe çdo shpenzim të kryer gjatë dhe përpara fushatës zgjedhore. Por edhe nëse Berisha ia del të zbatojë këtë skemë, do të jetë e vështirë që të deklarojë saktësisht burimin e të ardhurave, pasi Partia Demokratike nuk ka dhënë asnjë detaj mbi Make Albania Great Again, por nga kërkimet del se në fakt, ajo është krijuar vetëm 7 ditë para se Flamur Noka të vendoste firmën e tij, në kontratën marramendëse me kompaninë CONTINENTAL, e zotëruar dhe drejtuar nga njerëz pranë presidentit Donald Trump.  Dokumentet vërtetojnë se “Make Albania Great Again”, është regjistruar si Organizatë Jofitimprurëse më 27 mars 2025. Themeluesi i saj është shqiptaro amerikani Nuredin Seci, i cili do të jete dhe garantori i kontratës. Fondacioni, qartazi duket të jetë krijuar për të mbuluar marrëveshjen e lobimit. Kërkesa drejtuar pikërisht kompanisë “Continental Strategy LLC”, ka pasuar menjëherë aktin e krijimit të fondacionit. Sepse vetëm 3 ditë më pas, Seci, mori përgjigjen nga kompania e lobimit se ishte e gatshme të angazhohej në shërbime për Partinë Demokratike të Shqipërisë. Dhe 5 ditë më pas, më 4 prill Flamur Noka firmos si përfaqësuesi i Aleancës për Shqipërinë Madhështore. Nga dokumentet, përveç emrit të Nuredin Secit, nuk ka asnjë emër tjetër si themelues. Ndërkohë që duhet rikujtuar se nga momenti që një fondacion financon një forcë politike, edhe përmes një kontratë lobimi, janë të detyruar të deklarojnë anëtarët dhe donatorët sipas ligjeve edhe në Shtetet e Bashkuara por edhe në Shqipëri. Pra, mbetet e errët fakti se kush e financon dhe ku i gjen paratë një fondacion, i cili tre ditë pas themelimit ka arritur të mbledhë një shifër të tillë, të jashtëzakonshme.