Partia Demokratike duket se po shkon drejt shpërbërjes, teksa krahu luftarak i kreut të PD, Sali Berisha ka nisur sulmet ndaj Flamur Nokës, Ervin Salianjit dhe Ilir Alimehmetit. Noka që aktualisht mban postin e sekretarit të Përgjithshëm të Partisë Demorkatike dhe dyshja Salinji-Alimehmeti që kanë nisur një tur takimesh me bazën demokrate shihen nga z. Berisha dhe besnikët e tij si “armiq”. Për këtë arsye Berisha ka hedhur në veprim planin B, duke nxjerrë grupin e ri armiqësor, të cilin e ka linçuar publikisht përmes dy njerëzve të tij më besnik dyshes Peka-Gjokutaj. Kështu i pari që ka reaguar ka qenë gazetari dhe drejtuesi i televizionit të Sali Berishës, Çim Peka, i njohur si krahu i djathtë i kreut të PD-së. Përmes një shënimi në rrjetet sociale, ai ka sulmuar Salianjin, Nokën dhe Alimehmetin. Sipas tij, “Djemtë e Mulit” dhe “Djemtë e Grida-s” nuk po luftojnë për karrige, por secila palë është e bindur se po vepron për të mirën e PD-së.
Ai madje ironizon edhe “doktorët” e Nokës e Alimehmetit, duke i krahasuar me avokatin Ngjela, ndërsa vë në shënjestër përpjekjen e Salianjit për t’u paraqitur si Arbnori. Për Pekën, PD-ja e sotme nuk ka më disidentët, intelektualët dhe figurat e vërteta të viteve ’90, sepse siç thekson ai, ata janë larguar. “Berisha përballë apo krah “Matildizimit”! “Djemtë e Mulit” dhe “Djemtë e Grida-s” nuk po luftojnë njëri-tjetrin për karrige. Të dyja palët me të vërtetë besojnë se po e bëjnë për PD-në: njëra anë mendon se po e shpëton, ndërsa tjetra se po e ringre. Mbështetësit e “Doktor Nokës” nga njëra anë dhe adhuruesit e “Doktor Alimehmetit” nga ana tjetër janë përballë për të mirën e PD-së, dhe më besoni që kështu e mendojnë. Ashtu siç besojnë me shpirt se janë “doktorë”.
Alimehmeti dhe Noka janë po aq doktorë sa është Ngjela avokat. Pastaj kemi dhe Salianjin, të cilit i ka nisur t’i duket vetja si Arbnori. Por Pjetri hyri në burg sepse krijoi parti politike në komunizëm dhe doli prej andej si disident; ndërsa Ervini hyri në burg për një denoncim ndaj një trafikanti droge dhe doli—dyshoj, me gjithë respektin për atë lloj rruge—me respektin e atyre që kishte pranë në burgun e Fierit, jo me status disidenti. Arbnori në Burrel kishte disidentë të tjerë përkrah. Uroj që Ervini të ketë hyrë si i burgosur politik e të mos ketë dalë si i burgosur ordiner. Kur Sali Berisha udhëhiqte PD-në në vitet e para, në krah kishte vërtet “doktorë”, “studiues”, “historianë”, “ekonomistë”, “juristë”, “disidentë” e të tjerë. Të tillë sot mezi i gjen në Shqipëri, e jo më në PD. Kanë ikur…”, shkroi Peka në rrjetet sociale.
Reagimi Gjokutaj
Ndërkohë avokati i Sali Berishës, Genc Gjokutaj, ka publikuar listat me firmat e deputetëve demokratë që pretendohet se kanë shprehur mbështetje për kandidaturën e Endrit Shabanit për postin e Avokatit të Popullit. Dokumentet, ku shfaqen emrat dhe firmat e një grupi deputetësh të opozitës, nga Ina Zhupa te Elda Hoti, janë bërë publike në një moment kur Berisha ka akuzuar hapur se Shabani është në një linjë me kryeministrin Edi Rama dhe se ky i fundit po lobon që ai të marrë postin.
Në llogarinë e tij në “Facebook”, Gjokutaj krah dy listave i ka bërë thirrje personave që shfaqen në te duke i ftuar që të konfirmojnë nëse kanë firmosur vërtet për Shabanin, apo nëse bëhet fjalë për një manipulim. “Personat që shohin emrin në këto lista janë të ftuar të konfirmojnë nëse kanë firmosur vërtetë apo kjo është një lojë! Jo për gjë por ikja e Edi Ramës do të marrë me vete jo vetëm PS por edhe agjentët e tij jashtë PS! Ndjesë atyre që nuk kanë firmosur apo kanë firmosur pa mendje dhe gjenden aksidentalisht në këtë liste të mallkuar! Kjo thirrje bëhet nga unë Genci Gjokutaj personalisht dhe i pa autorizuar apo i shtyrë nga askush! Me përgjegjësi ligjore dhe morale”, shkruan Gjokutaj.
Ndërkaq ish-kryeministri Sali Berisha njoftoi se opozita nuk do të marrë pjesë në procesin e zgjedhjes së Avokatit të Popullit, duke e cilësuar atë si një lojë të turpshme të “narko-mazhorancës”. Berisha theksoi se opozita ka tërhequr firmat për të gjitha kandidaturat e tjera, duke lënë vetëm emrat e propozuar nga vetë opozita, ndër të cilët Besim Ndregjoni, Adriana Kalaja, Jola Hysaj, Aranita Brahaj, Haluci dhe Dardan Mustafa.
“Ne kemi kandidatura të cilave u besojmë dhe që plotësojnë të gjitha kriteret, por nuk do të marrim pjesë në një votim farsë. Është një akt primitiv dhe i ulët i qeverisë që tregon tolerancën e saj zero,” tha Berisha, duke e cilësuar vendimin e Edi Ramës si një mënyrë për të vendosur një person që nuk ka lidhje me opozitën, i cili, sipas tij është Endrit Shabani. Komisioni i Ligjeve u mblodh këtë të martë, ku kryetari Ulsi Manja bëri të ditur se gjashtë kandidatë kanë plotësuar kriterin ligjor të sigurimit të të paktën 28 firmave të deputetëve. Bëhet fjalë për Adriana Kalanë, e cila ka marrë 44 firma; Aranita Brahajn me 35 firma; Besim Ndregjonin me 34 firma; Endrit Shabanin me 35 firma; Skënder Halucin me 30 firma dhe Tartar Bazajn me 28 firma, të cilët u vendos që të votohen në seancën plenare të sotme.
