avioni del nga pista
TURQI- Pasagjerët e fluturimit Prishtinë-Stamboll kanë përjetuar momente paniku mbrëmjen e së dielës, pasi avioni me të cilin do të udhëtonin doli nga pista. Ngjarja ka ndodhur në aeroportin “Sabiha Gokçen” në Stambolli ndërsa lajmin e ka konfirmuar ambasada e Kosovës në Turqi.
Fatmirësisht nga ngjarja nuk ka të lënduar dhe të gjithë pasagjerët u evakuuan të sigurt. Ambasada theksoi se pas incidentit pasagjerët kanë udhëtuar drejt destinacioneve të tyre. Më tej bëhet me dije se dalja nga pista e avionit ka ardhur si pasojë e reshjeve të dendura të shiut
“Ambasada e Republikës së Kosovës në Turqi njofton se sot, në Aeroportin Sabiha Gökçen, një aeroplan i operuar nga kompania AJet, i tipit Boeing 737-800, i cili realizoi fluturimin Prishtinë-Stamboll me numër TKJ76Q / VF102, pas aterrimit ka dalë nga rruga e taksimit dhe është ndalur në skajin e pistës.
Sipas informacioneve zyrtare, të gjithë pasagjerët janë evakuuar në mënyrë të sigurt përmes shkallëve të jashtme, pa qenë e nevojshme përdorimi i rrëshqitësve emergjentë.
Nuk ka raportime për persona të lënduar dhe udhëtarët janë larguar në mënyrë të rregullt nga aeroporti drejt destinacioneve të tyre.
Në deklaratën e saj, kompania AJet ka bërë të ditur se aeroplani ka kryer një aterrim të rregullt dhe se gjatë lëvizjes në rrugën e taksimit ka dalë në terren të butë, si pasojë e reshjeve të dendura të shiut” njofton ambasada.
Si pasojë e incidentit, kompania që menaxhon aeroportin e Stambollit njoftoi mbylljen e përkohshme të pistës. Mbyllja e njërës prej pistave kryesore gjatë orëve të ngarkuara të operimit ka shkaktuar vonesa të konsiderueshme, ndërsa disa avionë janë detyruar të kryejnë spostime të orareve të uljes. Ekipet emergjente dhe ato teknike të aeroportit janë dërguar menjëherë në vendngjarje./ZËRI
