Lajmidites.com

Category: Bota

  • Ukraina kërkon rifillimin e shkëmbimit të 1.200 të burgosurve të luftës me Rusinë

    Ukraina kërkon rifillimin e shkëmbimit të 1.200 të burgosurve të luftës me Rusinë

    Ukraina po punon për rifillimin e shkëmbimit të të burgosurve të luftës me Rusinë, me synimin që të lirohen rreth 1.200 ukrainas, deklaruan Presidenti Volodymyr Zelensky dhe kreu i Këshillit të Sigurisë, Rustem Umerov.
    “Po mbështetemi te rifillimi i shkëmbimeve”, tha Zelensky në një video të publikuar sot në Telegram, duke shtuar se po zhvillohen shumë takime, negociata dhe telefonata për këtë çështje.
    Rustem Umerov njoftoi të shtunën se ka zhvilluar bisedime në Turqi dhe Emiratet e Bashkuara Arabe, me mbështetjen e partnerëve të Ukrainës, për të ringritur procesin e shkëmbimit të të burgosurve të luftës. “Si rezultat i negociatave, palët ranë dakord të rikthehen te marrëveshjet e Stambollit, që parashikojnë lirimin e 1.200 ukrainasve”, tha ai në një postim në Telegram.

    Nga Moska nuk ka pasur ende reagim zyrtar.
    Marrëveshjet e Stambollit, të ndërmjetësuara nga Turqia në vitin 2022, përcaktojnë rregullat për shkëmbime të mëdha dhe të koordinuara të të burgosurve të luftës mes Rusisë dhe Ukrainës. Që atëherë, dy vendet kanë shkëmbyer mijëra të burgosur, edhe pse procesi ka qenë i paqëndrueshëm dhe shpesh është ndalur për shkak të intensifikimit të luftimeve.
    Umerov tha se në ditët në vijim do të zhvillohen diskutime për detajet organizative dhe procedurale të rifillimit të shkëmbimeve. “Po punojmë pa ndërprerje që ukrainasit e mbajtur peng të kthehen në shtëpi dhe të festojnë Vitin e Ri dhe Krishtlindjet me familjet e tyre”, deklaroi ai.
    Shkëmbimi i fundit mes Rusisë dhe Ukrainës u zhvillua më 2 tetor.
    /vizionplus.tv

  • Pse Rusia po godet trenat? Trefishohen sulmet në infrastrukturën hekurudhore për të paralizuar Ukrainën

    Pse Rusia po godet trenat? Trefishohen sulmet në infrastrukturën hekurudhore për të paralizuar Ukrainën

    Ukraina po përballet me rritje të sulmeve ruse ndaj infrastrukturës së saj hekurudhore. Numri i sulmeve është trefishuar muajt e fundit dhe dëmet kapin 1 miliard dollarë.

    Moska në këtë mënyrë po përpiqet të shkatërrojë një nga sistemet kyçe logjistike të Kievit.
    “Që nga fillimi i vitit ka pasur 800 sulme mbi infrastrukturën hekurudhore, dhe më shumë se 3.000 objekte hekurudhore janë dëmtuar. Ajo që po shohim në këto sulme të përshkallëzuara është se ata synojnë trenat, duke u përpjekur veçanërisht të vrasin drejtuesit e tyre”, ka thënë Oleksei Kuleba, zëvendëskryeministër i Ukrainës.
    Në një vend të madh sa Ukraina, hekurudhat janë kritike. Rrjeti hekurudhor shfrytëzohet për transportin e më shumë se 63 për qind të mallrave, përfshirë edhe eksportet e grurit dhe 37% të trafikut të pasagjerëve. Edhe ndihma ushtarake nga vendet e huaja shpesh mbërrin me tren.
    Asnjë aeroport civil nuk ka funksionuar që nga pushtimi i plotë i Rusisë, kështu që shumica e njerëzve udhëtojnë brenda dhe jashtë vendit, përfshirë vizitat e liderëve botërorë, me tren.
    “Nuk është vetëm çështje sasie sulmesh, është edhe mënyra e veprimit e forcave armike”, ka thënë Oleksandr Pertsovski, kreu i hekurudhave shtetërore ukrainase. “Tani Moska po sulmon me me dronët e saktë “Shahed”, të cilët synojnë lokomotivat individuale”.

    Top Channel

  • Ukraina kërkon shkëmbimin e 1.200 të burgosurve me Rusinë

    Ukraina kërkon shkëmbimin e 1.200 të burgosurve me Rusinë

    Ukraina po punon për të rifilluar procesin e shkëmbimit të të burgosurve me Rusinë, me shpresën për lirimin e 1,200 qytetarëve ukrainas, konfirmuan presidenti Volodymyr Zelensky dhe kreu i Këshillit të Sigurisë, Rustem Umerov.

    “Ne po llogarisim në rifillimin e shkëmbimeve,” tha Zelensky. “Shumë takime, negociata dhe telefonata po i kushtohen kësaj çështjeje.”

    Kryetari i Këshillit të Sigurisë, Rustem Umerov, bëri të ditur se ka zhvilluar konsultime në Turqi dhe Emiratet e Bashkuara Arabe, me mbështetjen e partnerëve të Kievit, për të ringjallur procesin e shkëmbimeve.

    “Si rezultat i këtyre negociatave, palët ranë dakord të kthehen te marrëveshjet e Stambollit,” tha ai. “Bëhet fjalë për lirimin e 1,200 ukrainasve.”

    Deri tani nuk ka pasur reagim nga Moska mbi deklaratat e Kievit.

    Marrëveshjet e Stambollit, të ndërmjetësuara nga Turqia në vitin 2022, përcaktojnë rregullat për shkëmbime të mëdha e të koordinuara të të burgosurve mes Rusisë dhe Ukrainës. Që atëherë, të dyja palët kanë kryer mijëra shkëmbime, ndonëse shpesh të ndërprera për shkak të përshkallëzimeve në vijën e frontit të luftës së nisur nga Rusia në shkurt 2022.

    Umerov tha se në ditët në vijim do të zhvillohen konsultime për të rënë dakord mbi detajet procedurale dhe organizative të procesit.

    “Ne po punojmë pa pushim që ata ukrainas që duhet të kthehen nga robëria të mund të festojnë Vitin e Ri dhe Krishtlindjet në shtëpi – pranë tryezës familjare dhe me të dashurit e tyre,” u shpreh ai. 

     

  • Shpërthejnë protestat kundër presidentes në Meksikë, përleshjet lënë 120 të plagosur

    Shpërthejnë protestat kundër presidentes në Meksikë, përleshjet lënë 120 të plagosur

    meksike

    MEKSIKË- Të paktën 120 persona, 100 prej tyre oficerë policie, janë plagosur në përleshjet gjatë protestave antiqeveritare në Mexico City, raporton BBC. 
    Mijëra demonstrues marshuan në kryeqytetin meksikan të shtunën për të protestuar kundër krimit të dhunshëm dhe qeverisë së presidentes Claudia Sheinbaum. Presidentja tha se marshimet, të cilat u zhvilluan edhe në qytete të tjera, ishin financuar nga politikanë të krahut të djathtë që kundërshtojnë qeverinë e saj.
    Tubimi u organizua nga grupet rinore të Gjeneratës Z, duke marrë mbështetje nga qytetarët që protestonin kundër vrasjeve të profilit të lartë, përfshirë vrasjen vetëm disa javë më parë të kryetarit të bashkisë së Uruapan, Carlos Manzo, i cili kishte bërë thirrje për veprime të ashpra kundër karteleve.
    Demonstruesit çmontuan pjesë të një barriere që mbronte Pallatin Kombëtar, ku jeton Sheinbaum. Policia që mbronte kompleksin përdori gaz lotsjellës ndaj turmave.
    Autoritetet kanë arrestuar 20 persona për krime, përfshirë grabitje dhe sulme, u tha gazetarëve shefi i sigurisë së Meksikos, Pablo Vazquez. Protestuesit valëvitnin banderola me mesazhe si “Ne të gjithë jemi Carlos Manzo”, ndërsa të tjerë mbanin kapele kaubojsh në nder të tij.
    Manzo u qëllua më 1 nëntor ndërsa po merrte pjesë në festivalin e Ditës së të Vdekurve. Ai njihej për të folur hapur rreth bandave të trafikut të drogës në qytetin e tij dhe dhunës së karteleve. Ai kishte kërkuar veprime të ashpra kundër anëtarëve të armatosur të kartelit që terrorizojnë vendin.
    Presidentja Sheinbaum ka vepruar kundër karteleve, por i ka rezistuar thirrjeve për një luftë tjetër të përgjithshme kundër drogës. Përpjekjet e mëparshme nga paraardhësit e saj kanë përfunduar me rezultate të përgjakshme. Disa ditë para se të zhvillohej marshimi, presidentja tha se demonstrata po promovohej nga robotë në internet.
    “Ne pajtohemi me lirinë e shprehjes dhe lirinë e demonstratave nëse ka të rinj që kanë kërkesa, por çështja këtu është se kush po e promovon demonstratën”, tha ajo në një konferencë për shtyp. “Njerëzit duhet ta dinë se si u organizua kjo demonstratë në mënyrë që të mos përdoret askush.”
    Presidentja është kritikuar për dështimin në ndalimin e dhunës që ka përfshirë vendin dhe po përballet me armiqësi në rritje nga vendet fqinje. Më herët këtë muaj, Kongresi i Perusë votoi për ta shpallur Sheinbaum person non grata – ose të padëshiruar në vend. Vendimi erdhi disa ditë pasi Peruja ndërpreu marrëdhëniet diplomatike me Meksikën, pasi qeveria meksikane i dha azil një ish-kryeministri peruan që përballej me akuza për një përpjekje për grusht shteti në vitin 2022./ZËRI

  • Vizita e Zelenskyt në Greqi nën masa të rrepta sigurie, çfarë do t’i kërkojë presidenti ukrainas Athinës zyrtare?

    Vizita e Zelenskyt në Greqi nën masa të rrepta sigurie, çfarë do t’i kërkojë presidenti ukrainas Athinës zyrtare?

    Nën masa të rrepta sigurie dhe sekret ekstrem, Presidenti ukrainas Volodymyr Zelensky do të vizitojë Athinën nesër, raportojnë mediat greke.
    Në axhendën e vizitës së tij janë energjia dhe korridori vertikal për transportin e LNG-së amerikane. Vizita e Zelenskyt zhvillohet pas rreth dy vitesh, pas asaj në gusht 2023.
    Oraret e takimeve të presidentit ukrainas në Athinë nuk janë njoftuar për arsye sigurie, siç ndodh me çdo udhëtim të Zelenskyt, shkruajnë mediat fqinje.
    Raportohet se Zelensky do të takohet me radhë me Presidentin Konstantinos Tasoulas, pastaj me Kryeministrin Kyriakos Mitsotakis, dhe takimet e tij do të përfundojnë me Kryetarin e Parlamentit Nikitas Kaklamanis.
    Energjia është tema më e nxehtë e diskutimit në këto takime, megjithëse Volodymyr Zelensky do të ngrejë edhe çështje të mbrojtjes, një çështje në të cilën Greqia e ka bërë të qartë se nuk mund të ndihmojë.
    “Po lidhim një marrëveshje me Greqinë, në sektorin e energjisë, për të maksimizuar mundësitë për furnizimin me gaz natyror të Ukrainës, si për këtë dimër ashtu edhe në planin strategjik, në planin afatgjatë. Marrëveshjet me vende të ndryshme evropiane, nga Norvegjia në Greqi, do të sigurojnë garanci për furnizimin me gaz natyror të vendit tonë. I falënderoj të gjithë partnerët që po ndihmojnë”, tha ai Zelensky më herët.

  • ‘Bisedimet e paqes për Ukrainën janë të pashmangshme’, Turqia: Mund të ndodhë në vendin tonë

    ‘Bisedimet e paqes për Ukrainën janë të pashmangshme’, Turqia: Mund të ndodhë në vendin tonë

    Perspektiva e negociatave të paqes për Ukrainën tashmë po merr formë dhe është e mundur që ato të zhvillohen në Turqi, tha Ministri i Jashtëm turk Hakan Fidan në një intervistë me kanalin televiziv A Haber.

    “A do të shtrohet një tryezë për bisedime paqeje [për Ukrainën] në Turqi në të ardhmen e afërt? Ne tani besojmë se po. Unë besoj se do të ndodhë në Turqi. Mund të zhvillohet diku tjetër, por jam i bindur se koha për paqe ka ardhur tashmë dhe do të vijë”, tha ministri.

    Ministri i Jashtëm beson se konflikti në Ukrainë është aktualisht në pikën më të afërt me përfundimin. “Sipas mendimit tim, kjo luftë është tani në pikën më të afërt me ndalimin. Ne shohim se të gjitha kushtet për një armëpushim janë pjekur tashmë”, tha ai.

    Fidan deklaroi se është e nevojshme “të zhvillohen negociatat e nevojshme dhe të bëhet një hap përpara”. “Ne kemi propozime në këtë drejtim. Shpresoj që ato do të zbatohen”, shtoi ministri i jashtëm.

  • Britani/ Refugjatët do të përballen me 20 vjet pritje për të aplikuar për leje qëndrimi të përhershme

    Britani/ Refugjatët do të përballen me 20 vjet pritje për të aplikuar për leje qëndrimi të përhershme

    Personat që marrin azil në Mbretërinë e Bashkuar do të duhet të presin deri në 20 vjet për të aplikuar për leje qëndrimi të përhershme, sipas një pakete të re masash që pritet të zyrtarizohet të hënën nga Ministrja e Brendshme, Shabana Mahmood, raporton BBC.

    Kjo reformë e thellë vjen në një kohë kur qeveria kërkon të frenojë kalimet me gomone dhe rritjen e kërkesave për azil.

    Sipas planit, të gjithë personat që fitojnë statusin e azilit do të lejohen të qëndrojnë në Britani vetëm përkohësisht, ndërsa statusi i tyre do të rishikohet në mënyrë periodike. Nëse vendet e tyre të origjinës do të konsiderohen më pas të sigurta, ata do të detyrohen të kthehen.

    Aktualisht, statusi i refugjatit zgjat pesë vjet, pas të cilëve personat mund të aplikojnë për qëndrim të pacaktuar. Mahmood synon ta përgjysmojë këtë periudhë fillestare në dy vjet e gjysmë, ndërsa koha për të fituar rezidencë të përhershme do të shtrihet nga pesë në 20 vjet.

    Në një intervistë për Sunday Times, ministrja theksoi se masat “janë krijuar për t’u dërguar një mesazh të qartë njerëzve: mos vini në këtë vend në mënyrë të paligjshme, mos hipni nëpër varka”.

    Ajo shtoi se “migracioni i paligjshëm po e përçan vendin”, dhe se qeveria ka detyrimin “ta bashkojë shoqërinë”.

  • Ministrja serbe: SHBA-ja nuk miratoi vazhdimin e punës së Industrisë së Naftës

    Ministrja serbe: SHBA-ja nuk miratoi vazhdimin e punës së Industrisë së Naftës

    Ministrja e Minierave dhe Energjetikës së Serbisë, Dubravka Gjedomiq Handanoviq, deklaroi më 15 nëntor se Shtetet e Bashkuara të Amerikës, që kanë vendosur sanksione ndaj Industrisë së Naftës së Serbisë (NIS) për shkak të pronësisë pjesërisht ruse, nuk i kanë dhënë NIS-it “asnjë ditë që të mund të vazhdojë të punojë”.

    Ajo në një konferencë të jashtëzakonshme për media tha se është marrë miratim vetëm për negociata mbi pronësinë, por, siç u shpreh, “jo edhe që NIS dhe rafineria të vazhdojnë të operojnë”, transmeton Beta.

    Administrata amerikane ka qenë e qartë dhe ka thënë se dëshiron ndryshim të plotë të pronësisë së NIS-it dhe kërkon tërheqjen e plotë të pronësisë ruse nga kompania, tha Gjedomiq Handanoviq, transmeton RTS.

    “Është e qartë se as për shtatë ditë nuk është e mundur të ndryshohet pronësia. Si ministre e energjetikës do të them se na presin vendime të vështira se a duhet të merret kompania, e pastaj të kompensohet dëmi”, tha ajo.

    Ajo shtoi gjithashtu se e di që “presidenti Vuçiq ka thënë se është kundër nacionalizimit”, por “nuk do të lejojmë që vendi ynë dhe qytetarët të jenë të rrezikuar”.

    Pronaret rusë të NIS-it më 11 nëntor i kanë dërguar kërkesë Zyrës së Departamentit të Thesarit të SHBA-së për kontrollin e pronës së huaj (OFAC), me të cilën kërkonin zgjatjen e licencës së punës, në bazë të negociatave me një “palë të tretë”.

    Për shkak të sanksioneve të Shteteve të Bashkuara të Amerikës, të drejtuara ndaj NIS-it për shkak të pronësisë pjesërisht ruse, është pamundësuar furnizimi me naftë të papërpunuar në Serbi.

    SHBA-ja vendosi sanksionet për të pamundësuar financimin e pushtimit që Moska nisi në Ukrainë në shkurt të vitit 2022.

    Negociatat rreth fatit të NIS-it ende po vazhdojnë, me Rusinë si pronare shumicëshe dhe me SHBA-të që kanë vendosur sanksione.

    Vuçiq qysh në janar e ka hedhur poshtë mundësinë e nacionalizimit të NIS-it, pra që kompania më e madhe e naftës në Serbi të rikthehet nën ombrellën e shtetit, por në një deklaratë për RTS më 23 tetor tha se shteti do të ndërmarrë hapa kur të shfaqen probleme me furnizimin.

    SHBA-ja shpalli sanksione ndaj NIS-it më 9 tetor, dhe ato janë shtyrë tetë herë./REL

     

  • Vatikani i kthen Kanadasë 62 objekte indigjene

    Vatikani i kthen Kanadasë 62 objekte indigjene

    Artefakte nga popujt indigjenë të Kanadasë janë kthyer nga Vatikani në “një shenjë të prekshme dialogu, respekti dhe vëllazërie”, tha Kisha Katolike Romake.

    Papa Leo XIV i dhuroi 62 objektet Konferencës Kanadeze të Ipeshkvijve Katolikë pas takimit me përfaqësuesit e saj, përfshirë presidentin e saj, Ipeshkvin Pierre Goudreau.
    Misionarët katolikë i kishin dërguar objektet në Romë mes viteve 1923 dhe 1925 me rastin e një ekspozite të organizuar nga Papa Piu XI, e cila ekspozoi më shumë se 100,000 objekte. Pothuajse gjysma e këtyre u përfshinë më vonë në një Muze të ri Etnologjik Misionar dhe u transferuan në Muzetë e Vatikanit në vitet 1970.
    Në vitin 2022, Papa Françesku u kërkoi falje popujve indigjenë të Kanadasë përpara vizitës së tij në vend për rolin e Kishës Katolike në shkollat ​​me konvikt ku shumë fëmijë u abuzuan dhe u varrosën në varre të pashënuara.
    Gjatë atij udhëtimi, komunitetet indigjene i kishin kërkuar Vatikanit të kthente këto objekte me rëndësi kulturore.
    Ministrja e Jashtme kanadeze Anita Anand e përshëndeti veprimin e Vatikanit sot.
    “Është një hap i rëndësishëm që nderon trashëgiminë e larmishme kulturore të popujve indigjenë dhe mbështet përpjekjet e vazhdueshme për të vërtetën, drejtësinë dhe pajtimin”, tha ajo në një postim në X.

    Top Channel

  • “Amerika nuk është gati për një presidente femër”, Michelle Obama: Mos më shikoni mua si kandidate

    “Amerika nuk është gati për një presidente femër”, Michelle Obama: Mos më shikoni mua si kandidate

    Ish-zonja e parë e SHBA-së, Michelle Obama, tha se SHBA-të nuk janë gati për një presidente femër, duke iu referuar përpjekjes së dështuar të Kamala Harris për të fituar zgjedhjet presidenciale të vitit të kaluar.

    “Siç e pamë në zgjedhjet e fundit, për fat të keq, ne nuk jemi gati “, tha Obama në përgjigje të një pyetjeje nga aktorja Tracee Ellis Ross nëse është krijuar “hapësirë” e mjaftueshme për një presidente femër.
    “Prandaj them, mos më shikoni fare duke ‘vrapuar’, sepse të gjithë po gënjeni. Nuk jeni gati për një grua”, i tha Obama Ellis Ross.
    “Kemi një rrugë të gjatë për të bërë dhe ende ka… shumë burra që nuk ndihen sikur mund të sundohen nga një grua dhe e kemi parë këtë. Mendoj se kemi ende një rrugë të gjatë për të bërë në këtë drejtim”, shtoi ajo.
    Biseda e Obamës me Ellis Ross u zhvillua në Brooklyn, New York, për të promovuar librin e saj të ri, “The Look”, i cili flet për qasjen e saj ndaj modës dhe politikës gjatë kohës së ish-Presidentit Barack Obama në Shtëpinë e Bardhë.

    Top Channel