Lajmidites.com

Author: Zeri.ai

  • Mashtronte dhe zhvaste klientët, Prokuroria Fier dërgon në gjyq avokaten (EMRIN)

    Mashtronte dhe zhvaste klientët, Prokuroria Fier dërgon në gjyq avokaten (EMRIN)

    prokuroria fier

    TIRANË- Avokatja Alma Bala është marrë nën akuzë dhe është dërguar për gjykim nga Prokuroria e Fierit. Avokatja akuzohet për mashtrim ndaj klientëve, ndërsa hetimet për të nisën pas kallëzimeve të shtetasve të ndryshëm. Sipas hetimeve rezulton se avokatja Bala u ka marrë shuma monetare qytetarëve, me pretendimin se kjo vlerë i duhej për përfaqësimin si avokate, ndërkohë që nga ana tjetër nuk është hapur asnjë proces gjyqësor. Madje, në raste të caktuara, ajo iu ka dorëzuar shtetasve akte që përmbajtja e tyre nuk përfaqësonte realitetin.
    Njoftimi i Prokurorisë
    Prokuroria pranë Gjykatës së Shkallë së Parë të Juridiksionit të Përgjithshëm Fier, përfundoi hetimet dhe dërgon në gjyq shtetasen A.B. për veprën penale ‘Mashtrimi’ më shumë se një herë parashikuar nga neni 143/2 i Kodit Penal.
    Nisur nga fakti që për këtë shtetase janë bërë edhe kallëzime të tjera nga shtetas të ndryshëm, me këtë procedim janë bashkuar edhe kallëzimi penal nr. 246/2021, procedimet nr. 724 i vitit 2019, nr. 734 i vitit 2019, nr. 95 i vitit 2020, nr. 111/2020, nr. 728 vitit 2019 dhe nr. 512 i vitit 2020.
    Nga hetimet, mbi procedimin penal nr.181, datë 16.03.2018, pas denoncimeve të bëra nga shtetas të ndryshëm, rezultoi se e pandehura A.B. në cilësinë e avokates nëpërmjet gënjeshtrës i ka përvetësuar personave të ndryshëm, shuma të ndryshme monetare me pretendime se kjo vlerë i duhej për përfaqësimin si avokate, por në fakt, nga ana e të pandehurës, nuk është hapur asnjë proces gjyqësor apo nuk janë kryer veprimet aministrative apo procedurale të pretenduara prej saj.
    Për ta bërë të besueshme pretendimin e saj, në raste të caktuara, ajo i ka dorëzuar shtetasve akte që përmbajtja e tyre nuk përfaqësonte realitetin. Kjo mënyrë veprimi nga e pandehura është përdorur edhe në raste të tjera dhe përgjithësisht të dëmtuarit identifikoheshin shtetas të cilët jetonin jashtë territorit dhe nuk kishin mundësi të ishin prezent në çdo kohë në Shqipëri dhe nuk kishin informacione në lidhje me procedurat gjyqësore apo administrative që pretendonte që ndiqte avokatja në emër të tyre.
    Në përfundim të hetimeve, organi i akuzës ka dërguar për gjykim të pandehurën A.B për veprën penale “Mashtrimi” më shumë se njëherë, në dëm të viktimave A.S, K.S, O.Sh dhe D.L, parashikuar nga neni 143/2 i Kodit Penal dhe të veprës penale “Mashtrimi”, me pasoja të rënda, në dëm të viktimës M.Sh, parashikuar nga neni 143/3 i Kodit Penal dhe për veprën penale “Falsfikimi i dokumentave”, parashikuar nga neni 186 pg.3 i Kodit Penal.
    Në vijim, Prokuroria pranë Gjykatës së Shkallës së Parë Juridiksionit të Përgjithshëm Fier, shpreh angazhimin e plotë për hetimin dhe vënien para përgjegjësisë ligjore të personave që kryejnë vepra penale që prekin pasurinë dhe të drejtat ekonomike të subjekteve të dëmtuar.

  • Arrestohet Federica Mogherini/ Pjesë e një skeme mashtrimi me fondet e BE. Policia i bastis zyrën

    Arrestohet Federica Mogherini/ Pjesë e një skeme mashtrimi me fondet e BE. Policia i bastis zyrën

    federica mogherini

    BELGJIKË- Policia belge bastisi shërbimin diplomatik të BE-së në Bruksel të martën, së bashku me Kolegjin e Evropës në Bruges dhe shtëpi private, si pjesë e një hetimi mbi keqpërdorimin e dyshuar të fondeve të BE-së, sipas njerëzve të njohur me hetimin dhe dëshmitarëve.
    Bastisje u zhvilluan në të gjithë Belgjikën në orët e para të mëngjesit, me policinë që sekuestroi dokumente dhe arrestoi tre persona për t’i marrë në pyetje nën dyshimin për mashtrim me prokurimin, korrupsion dhe konflikt interesi. Në mesin e personave të arrestuar është dhe Federica Mogherini, rektore e Kolegjit të Europës. Ish-nënkryetarja e Komisionit Evropian është aktualisht në paraburgim policor, mësoi Le Soir. 
    Kontrollet
    Rreth 10 oficerë të veshur me rroba civile hynë në selinë e Shërbimit Evropian të Veprimit të Jashtëm (EEAS) në orën 7:30 të mëngjesit të së martës, tha një dëshmitar okular. Një zyrtar tjetër i BE-së nga shërbimi diplomatik i BE-së konfirmoi bastisjen, raportin Euroactiv.
    Hetimi penal filloi pas akuzave se EEAS dhe Kolegji i Evropës – shkolla prestigjioze e trajnimit pasuniversitar për eurokratët – keqpërdorën paratë publike të BE-së në vitet 2021 dhe 2022, sipas katër personave me njohuri për hetimin.
    Bastisjet janë skandali i fundit i madh që godet institucionet e BE-së dhe do të shtojnë presionin mbi Kolegjin e Evropës dhe rektoren e tij, Federica Mogherini, e cila dikur drejtonte EEAS-in dhe filloi një mandat të dytë pesëvjeçar në Bruges këtë vit.
    Policia federale belge nga Flandria Perëndimore dhe zyra e BE-së kundër mashtrimit, OLAF, morën pjesë në operacion si pjesë e një hetimi penal të udhëhequr nga Zyra e Prokurorit Publik të BE-së (EPPO).
    Hetuesit po shqyrtojnë nëse Kolegji i Evropës ose përfaqësuesit e tij kishin dijeni paraprake për një tender publik për të financuar Akademinë e re Diplomatike të BE-së, një program trajnimi vjetor për diplomatët evropianë në Bruges i cili financohet nga EEAS.
    Kolegji i Evropës, i themeluar në vitin 1949, konsiderohet si shkolla përfundimtare e BE-së për diplomatë dhe nëpunës civilë, me ish-studentë që përfshijnë politikanë dhe zyrtarë të lartë në institucionet evropiane.
    Hetuesit janë përqendruar në rrethanat e blerjes prej 3.2 milionë eurosh të një ndërtese në Spanjaardstraat në Bruges nga kolegji, e cila strehon diplomatë që ndjekin akademinë, thanë katër personat me njohuri për hetimin.
    Konkursi për të pritur akademinë kërkonte që aplikantët të siguronin akomodim.
    Kolegji i Evropës e bleu ndërtesën në vitin 2022 gjatë një periudhe vështirësish financiare dhe pak para se EEAS të lëshonte një tender që më vonë i dha institucionit 654,000 euro financim, thanë dy persona me njohuri për hetimin.
    Hetuesit shqyrtuan pretendimet se Kolegji i Evropës dhe përfaqësuesit e tij kishin qasje në informacione konfidenciale në lidhje me tenderin, i cili supozohej të mbetej konfidencial për të lejuar konkurrencë të drejtë midis institucioneve që konkurronin për të pritur akademinë e re.
    OLAF, e cila ka kompetenca administrative për të ndjekur dyshimet për mashtrim që përfshijnë paratë e BE-së, intervistoi disa individë përpara se t’ia kalonte gjetjet e saj EPPO-së, e cila është e ngarkuar me hetimin dhe ndjekjen penale të krimeve të rënda kundër interesave të BE-së.
    Nuk ka asnjë tregues se OLAF ose EPPO kanë arritur në përfundime për shkelje dhe askush nuk është akuzuar zyrtarisht ende.
    Kolegji i Evropës dhe Akademia e re Diplomatike e BE-së drejtohen të dyja nga Mogherini, ish-ministrja e jashtme socialiste italiane, e cila drejtoi EEAS-in si përfaqësuese e lartë për punët e jashtme midis viteve 2014 dhe 2019. Ajo u bë rektore e Kolegjit në vitin 2020 dhe drejtoreshë e akademisë në hapjen e saj në vitin 2022.
    Gjatë periudhës nën shqyrtim, EEAS u drejtua nga një tjetër ish-ministër i jashtëm socialist, Josep Borrell i Spanjës./ZËRI 

  • “Balluku” në Kushtetuese, Berisha: Gjykata të mbajë seancë publike, gjyqtarët janë nën presionin e Ramës!

    sali berisha

    TIRANË- Kryedemokrati Sali Berisha ka kërkuar nga Gjykata Kushteuese që të zhvillojë seanca publike në lidhje me çështjen e Belinda Ballukut. Në konferencën për mediat, Berisha thotë se Kushtetuesja është nën presionin e kryeministrit Rama dhe për këtë arsye, Gjykata sipas tij, vendosi ta kalojë në seancë plenare ankimin e qeverisë. Lidhur me këtë, kreu i demokratëve i bëri thirrje gjykatave dhe gjyqtarëve që të denoncojnë çdo ndërhyrje në punën dhe veprimtarinë e tyre. . 
    “Ndërkohë që në Gjykatën Kushtetuese të vendit zhvillohet një betejë e pashembullt në historinë e një vendi, midis institucionit të dorëheqjes dhe institucionit të vjedhjes, të përfaqësuar nga qeveria, mësohet se gjykata në një presion të tmerrshëm vendosi të shqyrtojë çështjen e përfaqësuar nga avokati i vjedhjeve qeveritare, Edvin Kristaq Rama. Duke mos komentuar më tej, në këtë çështje, i bëj thirrje Gjykatës Kushtetuese të parashikojë seancë publike në gjykimin e kësaj çështje pasi është çështja më e nxirë në historinë e jurisprudencës evropiane dhe botërore. Kurrë ndonjëherë, një kryetar qeverie, një kryeministër, shef ekzekutivi, president qoftë ai, nuk ka shkuar në Gjykatë Kushtetuese për të mbrojtur masat që gjykatat e tjera kanë marrë për vjedhje klamoroze të dokumentuara në të gjitha aspektet. I kërkoj parlamentit të bëjë të gjitha demarshet që Gjykata Kushtetuese të zhvillojë seancë plenare të hapur për publikun, në të cilën shqiptarët të shohin me sytë e tyre, të dëgjojnë me veshët e tyre se si Edi Rama ka zëvendësuar institucionin e dorëheqjes dhe shkarkimit me institucionin e vjedhjes qeveritare. U bëj thirrje gjykatësve të denoncojnë në format që i gjykojnë të përshtatshme çdo lloj ndërhyrje në punën dhe veprimtarinë e tyre dhe të hedhin në kosh mashtrimet dyditore të Edi Ramës, duke cituar Komisionin e Venecias për gjëra që ai nuk i ka thënë kurrë, nuk i ka shkruar kurrë.”, tha Berisha. 

    Ndërkohë, çështje e Ballukut ka kaluar te trupa gjyqësore e Gjykatës Kushtetuese, ndërsa ende nuk diht nëse mbledhja e 8 gjyqtarëve do të jetë publike. Në rast se trupa e gjyqtarëve nuk gjen një dakordësi 5-3 për të pranuar kërkesën e kryeministrisë, atëherë mbetet në fuqi vendimi i Gjykatës së Posaçme për pezullimin e Ballukut./ZËRI

  • “Fjalët e shumta janë fukarallëk”! Kushtuesja kaloi “Ballukun” për shqyrtim, Rama: Vendimi i GJKKO-së, si rrëzimi i fëmijës…

    “Fjalët e shumta janë fukarallëk”! Kushtuesja kaloi “Ballukun” për shqyrtim, Rama: Vendimi i GJKKO-së, si rrëzimi i fëmijës…

    edi rama

    TIRANË- Kryeministri Edi Rama ka bërë një tjetër reagim në lidhje me pezullimin e Belinda Ballukut nga GJKKO. Përmes një postimi në platformën ‘X’, Rama përsërit deklaratën se ky është një rast unikal në botë dhe në asnjë vend nuk është parë që një prokuror dhe një gjykatës të pezullojnë nga detyra një anëtar qeverie. Kreu i qeverisë thekson se ai do të vazhdojë të jetë mbështetësi më i madh i Reformës dhe Pavarësisë së Drejtësisë, ndërsa vendimin e GJKKO-së e krahasoi si një nga ato rrëzimet e fëmijës kur sapo kanë mësuar të ecin.
    Postimi i plotë i Ramës:
    Fjalët e shumta janë fukarallëk, gjeni një rast të dytë në botë ku një prokuror dhe një gjykatës – për më tepër edhe i shkallës së parë fare – pezullojnë nga detyra një anëtar qeverie! Se të më thoni që kjo qenka kaq normale, paçka se s’është parë kurrë, askund, në botën demokratike, është njësoj si të më thoni se drejtësia qenka normale vetëm në Shqipëri!
    E pra, pavarësisht se nga dita 1 kam qenë, jam e do të jem mbështetësi më i paepur i Reformës dhe Pavarësisë së Drejtësisë, këtë risi botërore të drejtësisë sonë të re, unë nuk e quaj dot asgjë tjetër përveçse një nga ato rrëzimet e fëmijës kur sapo ka mësuar të eci. Me ndryshimin që kur fëmija i vërtetë rrëzohet, lëndon vetëm vetveten, ndërsa kur drejtësia rrëshqet kështu si këtë herë, cënon parimet kushtetuese, prish balancën mes pushteteve të pavarura dhe ndërhyn brutalisht në procesin qeverisës.
    Le të jemi të qartë: Qëllimi i lartë i luftës kundër korrupsionit nuk e justifikon përdorimin e asnjë mjeti të gabuar dhe historia e vendeve që kanë kaluar më parë nga kjo rrugë e domosdoshme, na mëson se justifikimi i mjeteve të gabuara për hir të qëllimit madhor, e kthen kurën me mjete të tilla, në një të keqe edhe më të madhe se sa vetë sëmundja që thuhet se këto mjete po kurojnë. Ky mësim nuk duhet harruar kurrësesi. Nga askush.

    Reagimi i Ramës ka pësuar pak orë pasi Gjykata Kushtetuese mori vendimin dhe kaloi për shqyrtim çështjen e pezullimit të Ballukut. Megjithatë, ende nuk dihet nëse Kushtetuesja do të dalë më një vendim përfundimtar sot, ndërsa çështja ka kaluar në Mbledhjen e Gjyqtarëve për të vlerësuar nëse plotësohen bashkërisht të gjitha kriteret e pranueshmërisë së saj për shqyrtim në seancë plenare./ZËRI

  • EKSKLUZIVE- Kush është Marselo Arani, 32-vjeçari me të shkuar kriminale që dyshohet se vrau biznesmenin Mëhalla

    EKSKLUZIVE- Kush është Marselo Arani, 32-vjeçari me të shkuar kriminale që dyshohet se vrau biznesmenin Mëhalla

    marselo arani dhe mondi mehalla

    ELBASAN- Marselo Arani, është një prej autorëve të dyshuar për vrasjen e ndodhur të dielën, të biznesmenit Mondi Mëhalla. 32-vjeçari, i cili ishte nën masën e arrestit të shtëpisë për akuzën e pastrimit të parave, ka qenë një emër i njohur për autoritetet shqiptare. Në muajin Qershor të këtij viti, Aranit iu sekuestruan 14 pasuri, për shkak se dyshohet se janë produkt i veprimtarisë së tij kriminale.
    Arani rezulton i dënuar me vendim të formës së prerë në Itali, për veprën penale të shfrytëzimit të prostitucionit. Gjatë hetimeve është provuar se ai ka kryer veprimtari kriminale në territorin italian. Edhe pse do të duhej të ishte nën masën e arrestit të shtëpisë, në rrethana që nuk dihen ende, Arani i ka shpëtuar mbikëqyrjes policore, duke u bërë një prej të dyshuarve kryesorë për vrasjen e biznesmenit Mëhalla. Personi tjetër që dyshohet si bashkëpunëtor, është shtetasi Amarildo Kola me banim në qytetin e Laçit. Ndërkohë që dy persona janë arrestuar si të përfshirë në këtë vrasjen e biznesmenit 43-vjeçar.
    Shtetasi Xhino Ago, tashmë i vënë në pranga, dyshohet se iu ka vënë në dispozicion autorëve makinën që u përdor për vrasjen e Mëhallës. Ndërsa në pranga është vënë dhe roja e karburantit Kujtim Pisha, i cili akuzohet për moskallëzim krimi. Grupi i posaçëm hetimor, nën drejtimin e Prokurorisë, vijon veprimet intensive hetimore për identifikimin dhe kapjen e personave të tjerë të përfshirë në këtë ngjarje. Ndërkohë që në njoftimin e policisë nuk thuhet ende shkaku që ka çuar në vrasjen e biznesmenit, dhe nëse dy autorët e kanë kryer krimin kundrejt pagesës, apo kanë pasur konflikte personale me viktimën. Paraprakisht dyshohet se shkak për vrasjen janë bërë konfliktet që ka pasur në biznes 43-vjeçari Mëhalla.

    Mondi Mëhalla u ekzekutua mbrëmen e të dielës (30 Nëntor) në mjetin e tij Range Rover, i cili gjendej i parkuar pranë karburantit “Xhaxhi Oil” në pronësi të tij. Hetimet janë përqendruar në konfliktet e mundshme që 43 vjeçari Mëhalla ka pasur kohët e fundit, pasi disa prej te shoqëruarve dhe të afërm të viktimës kanë dhënë deklarimet e tyre para grupit hetimor. Mëhalla ka qenë i skeduar më herët për shpërndarjen e lëndëve narkotike dhe armëmbajtje pa leje, ndërkohë që në vitin 2020, Prokuroria e Elbasanit ka nisur një hetim pasuror ndaj tij për pastrim parash.
    Mëhalla, ishte pronari i club lounge “Hollyvood Lounge Bar”, i cili njëherësh zotëronte dhe një pikë karburanti të quajtur “Xhaxhi Oil” si dhe një kompani taksish me emrin “El Taxi”. Ngjarja e rëndë ka ndodhur në lagjen “Emin Matraxhiu” në Elbasan, 50 metra larg vendit ku ndodhi masakra e 4 shkurtit 2016, ku mbetën të vrarë 3 persona dhe 8 të tjerë u plagosën rëndë. /ZËRI

  • “A ka SPAK listë të zezë të gazetarëve?”, deklarata e Dumanit nxit debat! Manjani: Skandaloze! Hoxha: Uro mos të jesh nga kreu…

    “A ka SPAK listë të zezë të gazetarëve?”, deklarata e Dumanit nxit debat! Manjani: Skandaloze! Hoxha: Uro mos të jesh nga kreu…

    altin dumani ne takimin jozyrtar me gazetaret

    TIRANË- Në një takim takim jozyrtar që kryeprokurori Altin Dumani ka zhvilluar me gazetarët pak ditë më parë, ka folur dhe për nxjerrjen e sekreteve hetimore, apo lajmet e pavërteta që janë bërë me qëllim intimidimin e prokurorëve, duke bërë fajtor për këtë një pjesë të gazetarëve, që sipas tij janë evidentuar nga stafi.
    “E ndan një vijë shumë e hollë transparencën me ruajtjen e sekretit hetimor. Natyra e hetimeve që ne kryejmë, nevoja e publikut për tu informuar është shumë e madhe, sekreti i hetimit dhe të drejtat e palëve në proces duhen ruajtur. Ne jemi përpjekur që ta gjejmë këtë ekuilibër”, është shprehur Dumani, cituar nga gazetari i Ora News, Isa Myzyraj, ndërsa më tej ka vijuar me deklaratën që është komentuar gjerësisht edhe në rrjetet sociale.
    “Ka gazetarë të papërgjegjshëm që për disa klikime më shumë publikojne lajme të rreme ose një pjesë të të vërtetës. Dëmtojnë reputacionin e SPAK. Kanë ardhur kërcënime në drejtim të prokurorëve dhe institucionit. Është dhe dëmtimi që i bëhet nga media e papërgjegjshme. Stafi im ka evidentuar që gazetar të caktuar bullizojnë apo kërcënojnë prokurorë të prokurorisë së posaçme”, ka vijuar deklaratën e tij Dumani, e cila ka shkaktuar një sërë reagimesh në rrjetet sociale. Për Ylli Manjanin, nëse deklarata e Dumanit, që në disa portale është interpretuar si gazetarë që futen në listën e zezë të SPAK, do të ishte e vërtetë, ajo do të përbënte një situatë dhune skandaloze, në drejtim të punës së medias. Sipas Manjanit, SPAK ka ndërhyrë më shumë se njëherë në punën e medias, duke përmendur kështu kontrollet në redaksinë e LAPSI.AL apo hetimet ndaj Elton Qynos dhe Artam Hoxhës.
    “Në qoftë e vërtetë se Altin Dumani ka thënë se “po mbikqyrim kritikët publikë të tij dhe të SPAK”, atëhere jemi përpara në situate dhune skandaloze të lirive dhe të drejtave kushtetuese. Kështu të paktën raportojnë disa media online.
    Në fakt, SPAK i drejtuar nga zoti Dumani ka ndërhyrë më shumë sesa herë të tjera ndaj medias. Ju kujtij rastet: LAPSi.AL, Elton Qyno dhe Artan Hoxha.
    SPAK nuk ka asnjë mandat të mbikqyrë ata që kritikojnë!!! Aq më pak të nisë proçedime të stisura e të motivuara nga inati për kritikën. Gjithnjë, nëse kjo është e vërtetë, situata është alarmante!!!  Ky është është fundi i sistemit demokratik të drejtësisë dhe, shndërrim i saj në polici sekrete, e cila përdor ligjin dhe ndjekjen penale kundër kujtdo që rrefuzon të gëlltisë propagandë dhe të pranojë si normalitet hetimin e gjykimin penal për arsye (mos)bindje.
    Ky nuk është më dështim, por shkatërrim total i drejtësisë, i cdo principi të shtetit demokratik.
    Tani, pavarësisht se çmund të ketë thënë zoti Dumani për kritikët në atë takim të mbyllur, fakt është se:
    1.SPAK rregjistron procedime penale pa fakte e ngjarje penale të konstatuara;
    2. mbledh të dhëna për persona, pa i marrë persona nën hetim;
    3. kriminalizon njerëz me narrativa publike të stisura e të shpifura;
    4. bën transparencë me takime të mbyllura;
    5. fjalën/përgjimin/deklaratën publike e quan provë;
    6. shet në publik arrestime për të nxitur talebaniznim social.
    Këto fakte dalin nga sjellja zyrtare e SPAk dhe nuk janë pjellë e kritikëve.  Aq të vërteta janë këto fakte sa edhe gjykata e Strasburg ka përdorur proçedurë emergjence, e cila përdoret shumë rrallë për shtete autoritare, për të ndaluar sulmin brutal ndaj serverave të LAPSI.AL. Në çështjen Thoma Gëllçi kundër Shqipërisë, u godit në themel sjellja e harbute e SPAK, kundër proçesit të rregullt ligjor.
    Hapini sytë o njerëz se faktet ulërasin! Dhe këto fakte nuk po i stis kritika.
    Nëse këto devijime të rënda nga roli kushtetues e ligjor i SPAK shiten si normalitet, personalisht rrefuzoj ta pranoj!
    Kam qenë, jam dhe do jem rrefuzues për këto gjëra sa të kem frymë e zë.
    Dhe nuk ngushëllohem aspak me faktin se ata që sjanë dakord me mua më japin të drejtë me vonesë…
    Jam në krah të çdo kritike që sjell në vemendjen publike një realitet që fshihet pas ndezjes së qëllimshme të turmave, kundër lirisë, drejtësisë dhe demokracisë”, shkruan Manjani në postimin e tij.
    Dhe si për të mbështetur komentin e ish-ministrit të drejtësisë, Artan Hoxha pretendon se SPAK ka një listë me gazetarë që sipas Dumanit, njollosin punën e prokurorisë.
    “Mos ki dyshime që punohet me listë konkrete ndaj gazetarëve apo zërave publik, të cilët janë kritikë, publikojnë të vërteta, të cilat i prishin Spakut perceptimin e mirë publik, që kanë skepticizëm për punën e SPAK apo statistikat me përqindje të institucionit.
    Duhet “besim dhe vetëm besim” te mrekullia e reformës për të cilën Rama rreh gjoksin. Por si çdo listë edhe kjo listë ka hierarki dhe top-renditje. Thjesht uro të mos jesh nga kreu i listës, se mbase kur të vjen radha në mos ke ndryshuar ti, do kenë ndryshuar kriteret për tu shpallur armik….”, shkruan Hoxha në komentin e tij./ZËRI 

  • Hapen 210 kuti votimi, KQZ nis verifikimin e plotë të numërimit të votave të 11 majit

    Hapen 210 kuti votimi, KQZ nis verifikimin e plotë të numërimit të votave të 11 majit

    pamje nga kqz

    TIRANË- Komisioni Qendror i Zgjedhjeve (KQZ) ka nisur verifikimin paszgjedhor të 210 kutive të votimit të 11 majit, për të kontrolluar nëse ka pasur shkelje të numëruesve. Këtë të martë, KQZ ka hapur kutitë e votave brenda dhe jashtë vendit, ku do të rinumërohen fletët e votimit për të verifikuar nëse ka mospërputhje në materialet zgjedhore. Të hënën, Komisioni Qendror i Zgjedhjeve në një seancë të publike, hodhi shortin për përcaktimin në mënyrë rastësore të qendrave të votimit dhe kutive të votimit nga jashtë që do t’i nënshtrohen verifikimit paszgjedhor.

    “Qëllimi i këqyrjes së mëpasshme e fletëve të votimit dhe e materialit zgjedhor është verifikimi i rregullsisë dhe saktësisë së veprimtarisë së administratës zgjedhore përgjatë administrimit të procesit dhe vlerësimit e numërimit të votave”, thuhet në njoftimin e KQZ-së. 
    Nuk do të rihapen kuti në qarqet Tiranë, Fier dhe Durrës, ku rinumërim u bë nga KAS menjëherë pas zgjedhjeve me kërkesë të opozitës. Po ashtu nuk do të përfshihen as kutitë e diasporës së qarkut Durrës. Ky proces verifikimi nuk prek rezultatin e zgjjedhjeve, por synon te nxjerr zbuluar numëruesit apo komisonerët të cilët mund kenë shkelur ligjin. /ZËRI

  • Pezullimi i Ballukut, PD kërkon interpelancë me Ramën: Po i bën presion drejtësisë, mos bëj avokatin e të pandehurës

    Pezullimi i Ballukut, PD kërkon interpelancë me Ramën: Po i bën presion drejtësisë, mos bëj avokatin e të pandehurës

    BELINDA BALLUKU, EDI RAMA DHE GAZMENT BARDHI

    TIRANË- Partia Demokratike ka dorëzuar në Kuvend kërkesën për interpelancë me kryeministrin Edi Rama, pas vendimit të këtij të fundit për të ankimuar në Gjykatën Kushtetuese pezullimin e Belinda Ballukut. Në kerkesen që mban firmën e kreut të grupit parlamentar të PD, Gazment Bardhi, thuhet se kryeministri po vepron si “avokat” i Ballukut, duke paraqitur pretendime në emër të Kuvendit të Shqipërisë pa marrë asnjëherë një mandat apo qëndrim nga vetë Kuvendi. Opozita i referohet kërkesës së Ramës në Gjykatën Kushtetuese, të cilën e cilëson të paprecedentë.
    “Një kërkesë e tillë e kryeministrit të Shqipërisë jo vetëm që është e pabazuar në Kushtetutë, por gjithashtu përbën një ndërhyrje të papërshtatshme në pavarësinë e sistemit të drejtësisë dhe synon çimentimin e kulturës së pandëshkueshmërisë në vend. Në një sjellje normale, në një vend anëtar të NATO-s dhe vend kandidat për anëtarësim në Bashkimin Europian, Kryeministri duhej të kishte propozuar menjëherë shkarkimin nga detyra të një ministri që është marrë i pandehur për abuzime në disa procedura prokurimi publik, me vlerë miliona euro, dhe kurrsesi nuk mund të sillet si zyrë avokatie për një të pandehur”.
    Grupi Parlamentar i PD-së argumenton më tej se veprimi i kryeministrit përbën ndërhyrje të hapur në pavarësinë e sistemit të drejtësisë dhe synon të forcojë kulturën e pandëshkueshmërisë. Opozita thekson se, në çdo standard europian, një ministër i marrë i pandehur për abuzime me fonde publike duhej të shkarkohej menjëherë, e jo të mbrohej nga Rama.
    “Ai kërkon t’i bëjë presion drejtësisë, me shpresën se do të nxjerrë jashtë binarëve kushtetues vetë Gjykatën Kushtetuese, që ekziston si garanci për kushtetutshmërinë dhe kurrsesi për pandëshkueshmërinë. Është e qartë që kjo lëvizje ka vetëm efekte politike; më saktë është mjet presioni/mesazhi politik dhe nuk synon zgjidhje juridike. Ne, deputetët e opozitës, vlerësojmë se kërkesa e Kryeministrit Edi Rama, që synon vetëm të japë mesazhin për organet e drejtësisë se e pandehura Belinda Balluku nuk është si të gjithë të pandehurit e tjerë, por gëzon mbrojtje të posaçme politike/institucionale nga Kryeministri/Këshilli i Ministrave, meriton vetëm përbuzje, si një akt antidemokratik dhe antikushtetues, veçanërisht nga vetë organet e drejtësisë, përfshirë Gjykatën Kushtetuese, e cila është përpara sprovës për të mbrojtur të drejtën për hetim të plotë, të pacenueshëm, të gjithanshëm e të papenguar nga organet hetimore.”

    Gjykata e Posaçme kundër Krimit dhe Korrupsionit vendosi për pezullim nga detyra të zëvendës kryeministres dhe ministres së Infrastrukturës dhe Energjisë, Belinda Balluku dhe ndalim daljeje jashtë vendit. Gjykata arsyetoi se vendimi erdhi pasi Balluku mund të prishë provat dhe të intimidojë dëshmitarët, në sajë të detyrës që mban. Balluku me vartësit e saj akuzohen se kanë paracaktuar fituesit në dy tenderë me vlerë 210 mln euro, atë të Tunelit të Llogarasë 190 mln euro dhe loti 4 i Unazës së Madhe 20 mln euro. GJKKO ka caktuar edhe arrest shtëpie për kreun e ARRSH-së, Gentian Gjyli dhe Erald Elezin, aktualisht drejtor i KESH./ZËRI 

  • Ligji i ri për konfliktin e interesit, Gjiknuri dhe Bylykbashi kundër: Do ishte vrastare, si mjeku ndalohet të bëjë pedagogun

    Ligji i ri për konfliktin e interesit, Gjiknuri dhe Bylykbashi kundër: Do ishte vrastare, si mjeku ndalohet të bëjë pedagogun

    damian gjiknuri

    TIRANË- Një ligj i ri për konfliktin e interesit, që është hartuar nga ILDKPI, dhe është dërguar në Kuvend nga dy deputetë të Partisë Socialiste, ka shtuar skepticizmin e kolegëve të tyre në Komisionin e Ligjeve.
    Deputeti i PS-së, Damian Gjiknuri tha se me ligjin e ri, çdo punonjës publik, do të ndalohet të ushtrojë profesione në fusha të tjera. Duke marrë si shembull rastin e mjekëve, Gjiknuri u shpreh se kufizimi i tyre për të ushtruar dhe profesionin e pedagogut do të ishte vrastare.
    “Zyrtari do ndalohet të ushtrojë profesionin e tij në fusha të tjera. Kjo për mendimin tim në shumë sektorë të vendit do jetë vrastare. Si mund të vëmë ne kufizime që një pedagog të mos ushtrojë profesionin e mjekut, si të kufizojmë një pedagog që të mos ushtrojë detyrën e konsulentit, që të mos jetë në bordin e një ndërmarrje. Kaq është Shqipëria, kaq pak njerëz ka me nivel intelektual. Sot po do të kesh zhvillim e progres, nëse nuk është i lidhur institucioni shtetëror me atë privat, ka mbaruar. Janë si dituria e makinave që mësonim ne në shkollë, kur nuk kishim makina”, tha Gjiknuri.
    “Kjo duhet parë se mund të dalë me probleme më vonë. Ka një kufizim aty që nuk u lejohen të ushtrojnë profesionin e licencuar. Një ekspert ekonomie si mund të mos jetë edhe pedagog edhe audit. Është tjetër gjë kufizimi me vendimmarrjen e institucionit publik. Si mund ti them një avokati që të jesh pedagog duhet të lësh licencën e avokatit. Kjo është absurde”, vijoi më tej deputeti socialist.
    Në të njëjtën linjë ishte edhe nënkryetari demokrat i Komisionit të Ligjeve, Oerd Bylykbashi, i cili tha se përpara miratimit të ligjit, duhet të dëgjohen edhe grupet e interesit.

  • PD propozon formulën për zgjedhjen e Avokatit të Popullit: Ne propozojmë 6 emra, PS zgjedh 3, nga këta njëri shkon për votim

    PD propozon formulën për zgjedhjen e Avokatit të Popullit: Ne propozojmë 6 emra, PS zgjedh 3, nga këta njëri shkon për votim

    partia demokratike

    TIRANË- Grupit parlamentar i Partisë Demokratike ka propozuar formulën e zgjedhjes së Avokatit të Popullit. Në kërkesën e firmosur nga kreu i grupit Gazment Bardhi, dërguar kryeparlamentarit Niko Peleshi, PD kërkon që të jetë një proces transparent. Sipas formulës së PD-së, demokratët si pakicë do të zgjedhin 6 emra, ndërsa Partia Socialiste do të zgjedhë 3 prej tyre. Më pas, opozita do të çojë për votim në seancë vetëm njërin prej tyre.
    Njoftim për shtyp
    Konkretisht, grupi parlamentar i PD ka propozuar këtë formulë të bashkëveprimit midis grupeve parlamentare:
    A.    Për emërimin/zgjedhjen e organeve të pavarura kushtetuese apo të krijuara me ligj, për të cilën kërkohet shumicë e cilësuar (prej 3/5 të anëtarëve të Kuvendit – rasti i Avokatit të Popullit), procesi të jetë i ndërtuar sipas kësaj formule:
    a)    Grupi Parlamentar që përfaqëson pakicën parlamentare propozon deri në 6 (gjashtë) kandidatë të përzgjedhur prej tij, nga lista e kandidatëve që sipas Komisioneve Parlamentare përmbushin kërkesat e kërkuara nga Kushtetuta/Ligji.
    b)    Grupi Parlamentar që përfaqëson shumicën parlamentare të përzgjedhë nga lista e propozuar sipas shkronjës “a” më sipër 3 (tre) kandidatë të pranueshëm sipas tij për votim.c)    Grupi Parlamentar që përfaqëson pakicën parlamentare, nga lista e përzgjedhur sipas shkronjës “b” më sipër, propozon për emërim/zgjedhje 1 (një) kandidat.d)    Seanca plenare voton me konsensus mes të gjitha grupeve parlamentare kandidatin e përzgjedhur sipas shkronjës “c” më sipër. 
    B.    Për emërimin/zgjedhjen e organeve të pavarura kushtetuese apo të krijuara me ligj, për të cilën kërkohet shumicë e anëtarëve të Kuvendit, procesi të jetë i ndërtuar sipas kësaj formule:
    a)    Grupi Parlamentar që përfaqëson shumicën parlamentare propozon deri në 6 (gjashtë) kandidatë të përzgjedhur prej tij, nga lista e kandidatëve që sipas Komisioneve Parlamentare përmbushin kërkesat e kërkuara nga Kushtetuta/Ligji.b)    Grupi Parlamentar që përfaqëson pakicën parlamentare të përzgjedhë nga lista e propozuar sipas shkronjës “a” më sipër 3 (tre) kandidatë të pranueshëm sipas tij për votim.c)    Grupi Parlamentar që përfaqëson shumicën parlamentare, nga lista e përzgjedhur sipas shkronjës “b” më sipër, propozon për emërim/zgjedhje 1 (një) kandidat.d)    Seanca plenare voton me konsensus mes të gjitha grupeve parlamentare kandidatin e përzgjedhur sipas shkronjës “c” më sipër. 

    Më herët, kreu i grupit parlamentar të PS-së, Taulant Balla, deklaroi se mazhoranca nuk do të ketë një kandidaturë dhe se do të shqyrtojnë kandidaturat e opozitës për të vendosur më pas se cilin do të mbështesin. /ZËRI