Lajmidites.com

Author: Top-Channel.tv

  • Votimi për Avokatin e Popullit, PD tërheq firmat për të gjithë kandidatët: Presim Peleshin për të vijuar procedurën

    Votimi për Avokatin e Popullit, PD tërheq firmat për të gjithë kandidatët: Presim Peleshin për të vijuar procedurën

    Partia Demokratike ka tërhequr ditën e sotme firmat për të gjithë kandidatët për Avokatin e Popullit duke theksuar se mbeten ende në pritje të përgjigjes institucionale të Kryetarit të Kuvendit, Niko Peleshi.

    Sipas tyre, nënshkrimet e deputetëve të opozitës janë dhënë përpara kualifikimit të kandidatëve nga Komisioni i Ligjeve dhe pas vendimit të Komisionit deputetët e opozitës kanë tërhequr të gjitha nënshkrimet e dhëna paraprakisht, dhe kanë propozuar ndërtimin e një procesi transparent përzgjedhje mazhorancë-opozitë.
    “Për shkak të interesit të mediave mbi kandidatët për Avokat Populli, ju sqarojmë se:
    Nënshkrimet e deputetëve të opozitës janë dhënë përpara kualifikimit të kandidatëve nga Komisioni i Ligjeve, pavarësisht se kur kandidatët vetë i kanë depozituar në Kuvend dhe një pjesë prej tyre i kanë përdorur në kundërshtim me ligjin si propozim për votim (gjë që nuk është e vërtetë) në kuptim të nenit 9 të ligjit për Avokatin e Popullit.
    Pas vendimit të Komisionit të Ligjeve, që i është njoftuar zyrtarisht grupeve parlamentare, që “1 deputet mbështet vetëm 1 kandidat sipas ligjit”, deputetët e opozitës kanë tërhequr të gjitha nënshkrimet e dhëna paraprakisht, dhe kanë propozuar ndërtimin e një procesi transparent përzgjedhje mazhorancë-opozitë. Mbetemi në pritje të përgjigjes institucionale të Kryetarit të Kuvendit për të proceduar më tej.
    Tërheqja e nënshkrimeve depozitohet zyrtarisht në Kuvend”, shkruan PD.

    Top Channel

  • Takimi me Witkoff/ Putin nuk lëkundet, mblidhen me urgjencë ministrat e NATO-s

    Takimi me Witkoff/ Putin nuk lëkundet, mblidhen me urgjencë ministrat e NATO-s

    Pesë orë bisedime në Kremlin nuk mjaftuan për ta bindur Vladimir Putinin për planin 28 pikësh të paqes me Ukrainën, për miratimin e të cilit SHBA-ja është angazhuar maksimalisht.

    Presidenti rus u takua me të dërguarin e posaçëm të Shteteve të Bashkuara, Steve Witkoff, i cili tanimë do të kthehet në Washington për ta informuar nga afër presidentin Donald Trump lidhur me rezultatet e bisedimeve.
    Më pas përfaqësues të SHBA-së, ndër ta edhe dhëndri i Trumpit Jared Kushner, sërish do të vendosin kontakte me Rusinë, e pohuar kjo nga këshilltari i Putinit Juri Ushakov. Ushakov i cilësoi bisedimet si konstruktive, me përmbajtje dhe të dobishme. Palët, sipas tij, nuk janë shumë larg një paqeje, por as edhe nuk janë afër një zgjidhjeje të konfliktit. Ka ende shumë punë për të bërë u shpreh ai.
    Ende nuk ka një kompromis lidhur me çështjen e shkëputjes së territoreve ukrainase që kërkon Rusia. Putin kërkon të gjithë Donbasin, ndonëse ai nuk i kontrollon disa pjesë të këtij rajoni. Kievi vazhdimisht e hedh poshtë këtë kërkesë. Kreu i shtetit rus insiston se kërkesat e Europës për paqe janë të papranueshme, duke treguar kështu se për të, problem kryesor qëndron tek blloku europian.
    “Ne nuk kemi ndërmend të luftojmë me Europën, por nëse Europa kërkon luftë me ne, jemi gati që tani”, tha Putin.
    Nga kreu i NATO-s, Mark Rutte, kjo deklaratë e Putinit u lexua si dëshmi e faktit që Rusia po përgatitet për një përballje afatgjatë. Këtë e bëri të qartë edhe në tryezën e rrumbullakët që ministrat e jashtëm të aleancës zhvilluan me urgjencë.
    “Rusia vazhdon të testojë aftësinë tonë parandaluese. Duhet të kuptojmë të gjithë se po përballemi me rreziqe reale dhe afatgjata. Rusia ka shkelur hapësirën ajrore të aleancës me avionë dhe me dronë, ka kryer sabotime e ka dërguar anije spiune në ujërat e saj. Të gjitha këto veprime janë të pamatura dhe të rrezikshme”, u shpreh Rutte.
    Rutte shtoi se Rusia po “punon ngushtë” me Kinën, Korenë e Veriut dhe Iranin “për të dëmtuar shoqëritë tona dhe për të shkatërruar rregullat globale”. Vendet e NATO-s po “rrisin investimet në mbrojtje, por të gjithë duhet të kontribuojmë”, theksoi ai.

    Top Channel

  • Shtyhet zbatimi i taksës së re të pronës, ministri Malaj: Në 2028 përfundojnë vlerësimet e ndërtesave, nis në 2030

    Shtyhet zbatimi i taksës së re të pronës, ministri Malaj: Në 2028 përfundojnë vlerësimet e ndërtesave, nis në 2030

    Zbatimi i taksës së pronës do të fillojë në vitin 2030. Ministri i Financave Petrit Malaj nga eventi i mbylljes së projektit “ProTax Albania” bëri të ditur shtyrjen e këtij zbatimi me 2 vite pasi sipas tij procesi tranzitor i vlerësimit të pasurive të paluajtshme do të kërkojë një periudhë nga viti 2026-2028.

    Hartimi i projektligjit është gati sipas Malajt dhe së shpejti do t’i dërgohet këshillit të ministrave.
    “Sot, ne ndodhemi në një moment kyç. Kemi një sistem të ndërtuar dhe gati për t’u dorëzuar, një projektligj të hartuar sipas standardeve europiane, një bashkëpunim të konsoliduar me partnerët suedezë, dhe një vullnet të qartë institucional për të çuar përpara drejt fazës së fundit këtë reforme. Brenda vitit 2026, të gjitha bashkitë do të jenë të integruara në sistemin e Kadastrës Fiskale. Ky është parakushti thelbësor për çdo hap të mëtejshëm. Në vitin 2027 do të kryhet procesi kombëtar i vlerësimit të pronave.
    Ndërsa 2026-2027 do të shërbejë si periudhë tranzitore deri në aplikimin e ligjit të ri. Në vitin 2028 parashikohet futja e vlerësimeve të bazuara në treg për ndërtesat, si dhe përmirësimi i normave dhe lehtësimeve Dhe në vitin 2030 do të nisë zbatimi i takës mbi tokën/truall, bazuar në një sistem të plotë të integruar dhe sipas standardeve europiane. Ky do të jetë edhe finalizimi i reformës”, tha ministri i Financave, Petrit Malaj.
    Aktualisht tatimi vjetor për ndërtesa banimi është 0.05% e vlerës kadastrale ndërsa për ndërtesa komerciale 0.02% e vlerës.
    “Qëllimi ynë kryesor është të garantojmë një taksim të drejtë dhe efikas të pronës në Shqipëri, si dhe të forcojmë rolin e bashkive për mbledhjen e një prej taksave më të rëndësishme, jo vetëm në rajon, por edhe më gjerë. Është e vërtetë që u deshën gati 7 vjet, pas një procesi shumë kompleks, që u vështirësua jo pak, për shkak të Tërmetit të vitit 2019, por edhe Pandemisë, për të arritur sot në këtë stad ku jemi. Objektivi ynë është që ta çojmë peshën e kësaj takse në rreth 1% të PBB-së, në linjë edhe me standardet që kanë vendet e OECD-së”, u shpreh Malaj.
    Sipas ministritë duhet një bashkëpunim akoma më i madh ndëristitucional me bashkitë ndërsa për vitin 2026 parashikimi i të ardhurave nga taksa e pronës është në masën 10 miliardë ose rreth 100 milionë euro, apo 14 milionë euro më shumë se sa në vitin 2025.

    Top Channel

  • Hetimi ndaj Mogherinit, a do të ndikohen 40 studentët që vazhdojnë mësimet në kampusin e Kolegjit të Europës në Tiranë?

    Hetimi ndaj Mogherinit, a do të ndikohen 40 studentët që vazhdojnë mësimet në kampusin e Kolegjit të Europës në Tiranë?

    Nga tre kampuset ku operon Kolegji i Europës, përveç Brukselit dhe Polonisë është edhe Shqipëria. Kampusi i Tiranës ushtron aktivitetin akademik në godinën Liria të Universitetit të Tiranës.

    Përballja e rektores së Kolegjit të Europës, Federica Mogherini me drejtësinë pas dyshimeve për konkurrencë të pandershme në tenderin në lidhje me një program 9 mujor trajnimi për diplomatët e rinj, ka shokuar jo vetëm Brukselin. Dhe pyetja që lind natyrshëm është “A e prek hetimi i Brukselit kampusin e Tiranës?”
    Top Channel mëson se në kampusin e Tiranës zhvillohet vetëm një program pasuniversitar “Masteri për Transformimin dhe Integrimin Europian”, i cili ka 40 studentë ndërkombëtarë përfshirë ata të Shqipërisë dhe të Kosovës. Por përgjatë kësaj periudhe prej dy tri javësh janë në sezon provimesh dhe nuk ndodhen në godinë, megjithëse ditën e sotme është parë pjesë e stafit të cilët kanë zhvilluar një mbledhje në lidhje me aktualitetin por të pyetur nga Top Channel zgjodhën të mos bënin koment.
    Edhe pyetjet e Top Channel dërguar zyrës së komunikimit të Kolegjit të Europës nuk zbuluan më shumë detaje në këtë fazë. Kolegji i Europës konfirmon se janë njoftuar  më 2 dhjetor për veprimet hetimore të ndërmarra nga Prokuroria Publike Evropiane, kur edhe janë kryer kontrolle në ambientet e kampusit në Bryzh. Dhe në këtë situatë shprehin gatishmërinë për të bashkëpunuar në ndihmë të hetimit dhe që tregojnë se po punojnë për të mos u penguar procesi akademik.
    “Kolegji i Europës do të bashkëpunojë plotësisht me autoritetet, në interes të transparencës dhe respektimit të procesit hetimor. Kolegji mbetet i përkushtuar ndaj standardeve më të larta të integritetit, drejtësisë dhe pajtueshmërisë, si në çështjet akademike ashtu edhe në ato administrative. Kolegji po merr të gjitha masat e nevojshme për të siguruar vazhdimësinë e aktiviteteve. Nuk kemi koment të mëtejshëm në këtë fazë, për të mos ndikuar hetimin”, thuhet në deklaratën e Kolegjit të Europës.
    Në një vit në Kolegjin e Europës në 3 shtete ndjekin studimet pasuniversitare rreth 500 studentë. Prej tre kampuseve, Brukseli ka numrin më të madh të studentëve, konkretisht në Bryzh 350 diplomatë të rinj. Më pas është Polonia në kampusin Natolin, rreth 120 studentë. Dhe filiali i parë jashtë vendeve të BE që ju shtua Kolegjit në vitin 2024 ishte në kryeqytetin shqiptar, ku gjatë 2025 numëron 40 studentë.
     

    Top Channel

  • Video/ Ekzekutimi i biznesmenit Mondi Mëhalla, pamjet e autorëve teksa dalin nga parkimi

    Video/ Ekzekutimi i biznesmenit Mondi Mëhalla, pamjet e autorëve teksa dalin nga parkimi

    Janë publikuar pamjet kur autorët dalin nga parkimi me automjetin me të cilët autorët kryen vrasjen e biznesmenit Edmond Mëhalla në Elbasan.

    Ishte pikërisht ky automjet në pronësi të kompanisë së viktimës dhe ortakut të tij Xhino Ago që zbardhi ngjarjen.
    Policia arrestoi të martën ortakun e viktimës, banues në Elbasan, i dyshuar si bashkëpunëtor. Xhino Ago akuzohet për veprat penale “Vrasje me paramendim”, kryer në bashkëpunim, dhe “Prodhimi dhe mbajtja pa leje e armëve, armëve shpërthyese dhe municionit”.
    Po ashtu u arrestua roja i karburantit Kujtim Pisha, 52-vjeç, për “Moskallëzim i krimit”. Në kërkim u shpall Marselo Arani 32 vjeç, banues në Elbasan dhe Armando Kola 35 vjeç, banues në Laç, të dyshuar si të përfshirë në vrasje gjithashtu.
    Në kërkim u shpall Marselo Arani 32 vjeç, banues në Elbasan dhe Armando Kola 35 vjeç, banues në Laç, të dyshuar si autorë të vrasjes.
    Ndërkohë këtë të mërkurë u arrestua dhe një person i tretë i përfshirë në vrasje, Nevzat Spaho, 29-vjeç. Policia pritet të specifikojë rolin e secilit.
     

    Top Channel

  • Takimi ‘domethënës’ me SHBA-në për paqe në Ukrainë, Rusia: Mbaroi pa përparim

    Takimi ‘domethënës’ me SHBA-në për paqe në Ukrainë, Rusia: Mbaroi pa përparim

    Një delegacion amerikan, i kryesuar nga i dërguari i posaçëm Steve Witkoff, u takua me presidentin rus, Vladimir Putin, dhe ndihmësit e tij për gati pesë orë në Kremlin më 2 dhjetor, për bisedime mbi një propozim për t’i dhënë fund pushtimit të plotë të Ukrainës nga Moska.

    Në një ditë përpjekjesh intensive diplomatike për t’i dhënë fund konfliktit më të madh dhe më vdekjeprurës në Evropë që nga Lufta e Dytë Botërore, presidenti ukrainas, Volodymyr Zelensky, nuk ka pasur “kurrë” mundësi më të mirë se tani për ta arritur një marrëveshje.
    Por, pak para bisedimeve, Putini i akuzoi qeveritë evropiane se po përpiqen ta pengojnë paqen dhe paralajmëroi se, nëse Evropa dëshiron ta nisë një luftë me Rusinë, atëherë Moska është e gatshme të luftojë.
    Yury Ushakov, këshilltar i Putinit për politikën e jashtme, u tha gazetarëve pas takimit në Kremlin se “nuk jemi as më afër, por as më larg” arritjes së paqes.
    “Ne nuk shtjelluam formulime të veçanta që kishin përgatitur amerikanët, por thelbin e mesazhit. Disa gjëra na përshtaten. Disa u pritën me kritika nga ne”, tha Ushakov, duke theksuar se çështjet territoriale ishin pikë veçanërisht problematike.
    “Ne nuk shohim ndonjë mundësi për zgjidhjen e krizës së Ukrainës pa adresuar çështjet territoriale. Për të shënuar përparim të mirëfilltë, ka ardhur koha që si Moska ashtu edhe Uashingtoni të fillojnë të punojnë seriozisht”, shtoi ai.
    Witkoff nuk komentoi duke u larguar nga takimi drejt Ambasadës së SHBA-së në Moskë.
    Witkoff dhe dhëndri i presidentit amerikan Donald Trump, Jared Kushner, fluturuan për në Moskë më 2 dhjetor për t’u takuar Putinin dhe negociatorët rusë pas një propozimi fillestar 28-pikësh nga SHBA-ja.
    Ai dokument – i cili kryesisht shihej si i përputhshëm me qëllimet ruse për pushtimin e plotë të Ukrainës – u “përmirësua” në 19 pika pas bisedimeve midis delegacioneve amerikane dhe ukrainase javën e kaluar.
    Qeveritë evropiane gjithashtu kishin paraqitur ndryshime dhe një kundërpropozim për planin e draftit, duke synuar të hiqnin ose zbutnin dispozitat që sipas tyre cenonin sovranitetin e Ukrainës.
    Por, Moska i ka hedhur poshtë këto ndryshime evropiane menjëherë dhe Ushakov tha se Putini “pa dyshim paraqiti vlerësimin e tij për rolin pengues që evropianët po e luajnë në procesin e paqes”.
    Duke folur para takimit të tij me Witkoff dhe Kushner, Putin tha se Rusia është e gatshme t’i përfshijë shtetet evropiane në bisedime, në qoftë se ato e njohin atë që ai e quajti “realitetet në fushën e betejës” në Ukrainë.
    Duke folur para takimit të tij me Witkoff dhe Kushner, Putin tha se Rusia është e gatshme t’i përfshijë shtetet evropiane në bisedime, në qoftë se ato e njohin atë që ai e quajti “realitetet në fushën e betejës” në Ukrainë.
    “Ne nuk kemi asnjë qëllim ta luftojmë Evropën, e kam thënë këtë 100 herë”, tha Putin.
    “Por, nëse Evropa dëshiron të luftojë përsëri dhe e fillon luftën, atëherë ne jemi të gatshëm për atë menjëherë”.
    Bashkimi Evropian ka thënë disa herë se nuk do ta pranojë një rishikim të dhunshëm të kufijve të Evropës dhe se vetëm Ukraina mund të vendosë për të ardhmen e territorit të saj.
    Putin vazhdon të ngulë këmbë se Ukraina duhet t’ia dorëzojë Rusisë rajonin lindor të Donbasit për të siguruar paqen, duke përfshirë zonat që ushtria ruse nuk ka arritur t’i pushtojë në më shumë se tri vjet e gjysmë lufte.
    Kievi nuk i pranon këto kushte dhe i ka kundërshtuar përpjekjet e Moskës për t’i kufizuar shpresat e Ukrainës drejt anëtarësimit në NATO, për të vendosur kufij për madhësinë e forcave të saj të armatosura.
    “Tani, më shumë se kurrë, ka mundësi për ta ndalur këtë luftë”, tha Zelensky në një konferencë për shtyp në Dublin, pas takimit me kryeministrin irlandez, Micheal Martin, më 2 dhjetor.
    “Detyra jonë e përbashkët është të ndalim luftën, jo vetëm të arrijmë ndërprerjen e armiqësive. Kërkohet paqe e dinjitetshme. Për ta arritur këtë vërtet, të gjithë duhet të jenë në anën e paqes”, shtoi ai.
    Sekretari amerikan i Shtetit, Marco Rubio, duke komentuar bisedimet me Rusinë për t’i dhënë fund luftës së saj në Ukrainë, tha: “Kemi bërë përparime, por ende nuk kemi arritur aty ku duhet”.
    “Dhe, ajo që jemi përpjekur ta bëjmë – dhe mendoj se kemi bërë ca përparim – është të kuptojmë se me çfarë mund të jetonin ukrainasit, që t’u jepet atyre garanci sigurie për të ardhmen”, tha Rubio për Fox News në një intervistë të transmetuar më 2 dhjetor.
    “Në fund të fundit, vendimet duhet të merren, në rastin e Rusisë, vetëm nga Putini, jo këshilltarët e tij. Vetëm Putini mund ta përfundojë këtë luftë nga ana ruse”, shtoi ai.
    Ukraina ka shprehur hapur shqetësimin se Uashingtoni dhe Moska mund të pajtohen për një plan për të ndalur konfliktin më të madh dhe më vdekjeprurës në Evropë që nga Lufta e Dytë Botërore.
    Trump bëri fushatë në vitin 2024 duke pretenduar se mund ta ndalë luftën brenda 24 orësh, por arritja e një marrëveshjeje për të ndaluar pushtimin e plotë të Ukrainës – që Moska e nisi në shkurt 2022 – del të jetë shumë e vështirë.
    Trump ka shprehur pakënaqësi me të dyja palët, pasi bisedimet kanë ngecur për muaj, para se të rigjallëroheshin përsëri në javët e fundit.
    Moskë ka thënë vazhdimisht se duhet patjetër ta kontrollojë të gjithë Donjeckun, një nga pesë rajonet ukrainase që Putin pretendon pa bazë se janë ruse. Dorëzimi i tokës që forcat ukrainase e kanë mbajtur larg Rusisë me kosto të madhe do të ishte një lëshim i madh nga Kievi dhe mund të ketë pasoja politike për Zelenskyn.
    Ukraina frikësohet se disa nga kushtet e propozimit do ta lënë atë të ndjeshme ndaj pushtimit eventual nga Rusia, edhe pse Shtetet e Bashkuara kanë propozuar gjithashtu një garanci sigurie 10-vjeçare për Kievin.
    Putin ka thënë se është i gatshëm për bisedime për paqe, por nëse Ukraina refuzon marrëveshjen, atëherë forcat ruse do të çajnë përpara dhe do të marrin më shumë toka ukrainase.
    Disa nga veprimet e mëparshme të Witkoffit kanë ngritur alarme tek vëzhguesit e jashtëm, të cilët frikësohen se ai po manipulohet ose se nuk kupton thellësisht kontekstin e ndërlikuar historik të luftës.
    Witkoff ka përdorur përkthyes të siguruar nga Kremlini për bisedimet e tij me Putin dhe zyrtarë të tjerë, në vend që të përdorte përkthyes të autorizuar nga Ambasada e SHBA-së.
    Pas takimit të fundit të Witkoffit me Putin në gusht, zyrtarët amerikanë dhe evropianë thanë se ai nuk kishte kuptuar mirë gjeografinë e territorit ukrainas që Putin po pretendonte.
    Disa media cituan burime që thanë se Witkoff dhe Kushner mund të takojnë Zelenskyn pas bisedimeve në Kremlin.
    Zelensky tha se pret të marrë lajme nga ekipi amerikan menjëherë pas bisedimeve në Moskë dhe se mbetet i gatshëm të takojë Trumpin, në varësi të rezultateve të diskutimeve të 2 dhjetorit./REL

    Top Channel

  • Votimi i Avokatit të Popullit/ Pas negociatave me PS, PD tërheq firmat për Endrit Shabanin

    Votimi i Avokatit të Popullit/ Pas negociatave me PS, PD tërheq firmat për Endrit Shabanin

    Megjithëse kishte mbledhur më shumë se 28 firma nga deputetët demokratë, Endrit Shabani rezulton se nuk e ka më mbështetjen e tyre për të kandiduar për pozicionin e Avokatit të Popullit.

    Burimet i thanë Top Channel se gjatë ditës së sotme, teksa po bëhen negociatat me Partinë Socialiste, deputetët e PD-së që kishin firmosur për Shabanin, i kanë tërhequr firmat e tyre, duke ia bërë atij të pamundur të shkojë deri në fazën finale të këtij procesi, atë të votimit në Parlament.
    Endrit Shabani ka qenë një nga emrat më të pranuar për socialistët nga lista me 7 kandidatë që erdhi nga selia blu dhe kjo duket se ka bërë që demokratët të bëjnë një hap pas.
    I pyetur në konferencën e sotme për shtyp nëse do të mbështetet kandidatura e Shabanit, kryetari i PD-së, Sali Berisha nuk ia përmendi emrin, por la të kuptohet se demokratët kanë kandidatët e tyre në këtë proces.
    Një prej emrave që Berisha e ka përmendur shpesh është ai i kryetarit të shoqatës së Ish-të Përndjekurve Politikë, Besim Ndregjoni.
    Endrit Shabani, i cili në zgjedhjet e fundit parlamentare ishte pjesë e koalicionit me Adriatik Lapajn, ka pasur një përplasje të drejtpërdrejtë me kreun e PD-së, Sali Berisha kur i kërkoi atij gjatë një debati televiziv që të largohej nga politika dhe t’i hapte rrugën të rinjve të merrnin partinë.

    Top Channel

  • Meta kërkesë në GJKKO si Veliaj: Duhet të më nxirrni nga kafazi i gjykatës

    Meta kërkesë në GJKKO si Veliaj: Duhet të më nxirrni nga kafazi i gjykatës

    Me të njëjtën kërkesë si Erion Veliaj, Ilir Meta i është drejtuar GJKKO-së për lë dalë nga burgu, që ai e quan “kafazi i gjykatës”.

    Në kërkesën drejtuar Gjykatës së Posaçme, siguruar nga gazetarja e Top Channel Anila Hoxha, Ilir Meta kërkon të mos vendoset “në kafaz metalik në gjykatë”, pasi sipas tij, është trajtim “poshtërues dhe çnjerëzor”.
    “Kjo praktikë duhet menjëherë të ndërpritet dhe i pandehuri duhet të trajtohet me dinjitet dhe sipas standarteve të procesit të rregullt ligjor. Derisa të merren masat që kjo shkelje e dinjitetit njerëzor vendosur me qëllim poshtërues të hiqet, ne nuk do të zhvillojmë seanca gjyqësore. Besojmë dhe shpresojmë se do merren masa për rikthimin e normalitetit dhe gjykimi të vazhdojë sipas standartit të prezumimit të pafajësisë dhe dinjitetit njerëzor”, thuhet në kërkesë.

    Top Channel

  • U mor në pyetje për 10 orë rresht, Mogherini mbrojti veten para hetuesve: Procedura ishte transparente, nuk pati privilegjim

    U mor në pyetje për 10 orë rresht, Mogherini mbrojti veten para hetuesve: Procedura ishte transparente, nuk pati privilegjim

    Dhjetë orë marrje në pyetje, nga ora 14:00 deri në mesnatë. Nuk u mor asnjë masë pasi Mogherinit iu kthye pasaporta dhe mund të lëvizë lirisht brenda dhe jashtë Belgjikës.

    Të gjitha pyetjet gjetën përgjigje dhe ajo e madje e mbrojti veten para magjistratëve. “Procedura u zhvillua me transparencën më të madhe”, u tha ajo hetuesve, sipas asaj që La Repubblica zbulon.
    “Nuk pati privilegje ose nuk u shfrytëzua asnjë informacion i klasifikuar. Objektivi i vetëm ishte krijimi i një klase më të mirë diplomatike për Bashkimin Evropian”, tha ajo.
    Federica Mogherini tani është e lirë. Ish-Përfaqësuesja e Lartë e Bashkimit për Punët e Jashtme dhe Zëvendëspresidentja e Komisionit është nën hetim nga Zyra e Prokurorit Publik Evropian në Bruksel për një çështje që përfshin rolin e saj si drejtoreshë e Kolegjit të Europës në Bryzh.
    Dy të dyshuar të tjerë janë gjithashtu nën hetim: Ambasadori Stefano Sannino dhe Cesare Zegretti, menaxher i kolegjit prestigjioz në Bryzh. Ajo u arrestua të martën, iu hoq imuniteti diplomatik, u mor në pyetje dhe më pas u lirua, si dy italianët e tjerë, për shkak të mungesës së rrezikut të arratisjes së saj.
    Sipas informacionit të rrjedhur nga Zyra e Prokurorit Publik Europian, ajo e mbrojti veten gjatë marrjes në pyetje duke pretenduar çdo hap të procesit të dhënies së Akademisë Diplomatike Europiane, shkollës së përbashkët për trajnimin e diplomatëve të BE-së, Kolegjit të Europës, të cilin ajo e drejton.
    Sipas prokurorisë, Ambasadori Stefano Sannino, Sekretar i Përgjithshëm i EEAS, Ministria e Jashtme e BE-së, në atë kohë i dha Kolegjit detajet kryesore të tenderit, duke i lejuar atij të përgatitej aty ku konkurrentët e tjerë nuk ishin.
    Megjithatë, Mogherini e kundërshtoi këtë informacion dhe tha se të gjitha të dhënat ishin publike. Diskutimet midis Komisionit dhe EEAS që iniciuan projektin pilot midis viteve 2021 dhe 2022 ishin gjithashtu publike. Mogherini iu përgjigj gjithashtu asaj që Zyra e Prokurorit e konsideron një gur themeli të hetimit, blerjen e një ndërtese në Spanjaardstraat nga Kolegji, e konsideruar thelbësore për strehimin e studentëve të Akademisë.
    Prona, me vlerë 3.2 milionë euro, dyshohet se është blerë disa muaj para shpalljes së tenderit, në një kohë kur Kolegji po përjetonte vështirësi financiare. Ky vendim nëse konfirmohet do të sugjeronte akses të privilegjuar në informacion konfidencial. Megjithatë, Mogherini pohoi se nuk kishte nevojë për informacion konfidencial, sepse gjithçka ishte tashmë e qartë.
    Ndërtesa tani strehon pjesëmarrësit e kursit, sepse pas vitit të parë eksperimental, Komisioni e stabilizoi programin. Në vitin 2024, u nënshkrua një marrëveshje katërvjeçare që i besoi Kolegjit menaxhimin e Akademisë së re Diplomatike, me Mogherini-n si drejtoreshë.
    Ky vendim konsolidoi përvojën pilot dhe mbështeti rritjen e projektit, vlera e përgjithshme e të cilit është afër një milion euro, me afërsisht 700,000 të destinuara direkt për në Bryzh. Menaxhimi i shkollës do t’i besohet Kolegjit deri në vitin 2028.

    Top Channel

  • “Pashë një baba në varreza që përkundte arkivolin e bardhë të djalit të tij”, zonja e Parë e Ukrainës: Nuk do të doja që Europa të bëhej e pandjeshme, mos na harroni

    “Pashë një baba në varreza që përkundte arkivolin e bardhë të djalit të tij”, zonja e Parë e Ukrainës: Nuk do të doja që Europa të bëhej e pandjeshme, mos na harroni

    Zonja e Parë e Ukrainës, në Paris te Macron së bashku me bashkëshortin e saj, flet për Libération: “Nuk mund të mbetem indiferente ndaj fëmijëve, dhe jo vetëm sepse jam nënë. Një nga objektivat është mbështetja për familjet që rrisin jetimët.”

    Në agimin e disa ditëve më parë, ndërsa të gjithë flinin, një pallat në Ternopil u shkatërrua plotësisht nga një raketë hipersonike ruse.
    Tridhjetë e gjashtë të vdekur, 120 të plagosur. Ne në Europë pothuaj nuk e vëmë më re, por Olena Zelenska ishte aty: “Fatkeqësisht, shohim që tek ju njerëzit po lodhen, janë të ngopur duke dëgjuar lajme nga Ukraina: ‘Sa do të zgjasë akoma?’, pyesin. Por ne nuk kemi zgjidhje, më vjen keq: ose vdesim të gjithë, ose do të vazhdojmë të dërgojmë lajme…”.
    Që prej kur është bërë gruaja e presidentit ukrainas Volodymyr Zelensky, Olena ka kaluar më shumë kohë në luftë sesa në paqe.
    Dyzet e shtatë vjeçe, me dy fëmijë, arkitekte, nuk e di më sa lot ka derdhur. Por në Ternopil ishte diçka tjetër, thotë në një intervistë për gazetën franceze Libération: nën pallat, u shkrumbuan gjithashtu shtatë fëmijë dhe ajo ishte “një nga momentet që më ka shënjuar më thellë, për pjesën tjetër të jetës sime”.
    Një skenë e tmerrshme. “Një baba në varreza, që përkundte arkivolin e bardhë të djalit të tij. Ishte e patolerueshme. E tmerrshme. Do ta kujtoj për pjesën tjetër të jetës sime.”
    Fëmijët janë ankthi i saj. Ukrainasit dhe OKB thonë se pushtuesit i kanë deportuar në Rusi mbi njëzet mijë prej tyre. Dhe më pak se dy mijë janë kthyer mbrapsht, të shpëtuar nga rusifikimi i detyruar në ndonjë fshat të humbur siberian.
    Në 28 pikat e famshme të planit Trump-Putin për paqen, çështja e fëmijëve trajtohet në një nëntitull, sikur të ishte një legjendë urbane dhe jo një krim lufte.
    Cilatdo qoftë shifrat, është Olena Zelenska që merret me këtë: “Bring Kids Back”, ktheni fëmijët, është programi i saj për të identifikuar dhe riatdhesuar të gjithë të miturit e rrëmbyer.
    Ajo e çon atë nëpër botë dhe të martën ishte në Paris, ndërsa Zelensky në Elize takohej për të dhjetën herë me Emmanuel Macron. “Nuk mund të mbetem indiferente ndaj fëmijëve – thotë Zonja e Parë – dhe jo vetëm sepse jam nënë. Një nga objektivat është mbështetja për familjet që rrisin fëmijët që kanë mbetur jetimë.
    Po rindërtojmë gjithashtu strehimet kundërajrore në shkolla, mensat dhe kuzhinat, për të garantuar të drejtën e arsimit.”
    Spitale të dedikuara, qendra shëndeti mendor për adoleshentët (“shumë prej tyre vuajnë nga depresioni i rëndë dhe numri i vetëvrasjeve është në rritje”), hapësira rinore.
    Dhe rikthimi i vendeve të martirizimit, si Bucha dhe Borodyanka: “Është e jashtëzakonshme të shohësh sesi po rindërtohen dhe po bëhen më të bukura, sesi jeta po kthehet, sesi komuniteti po lulëzon. Njerëzit kanë nevojë për energji për të jetuar, për t’u gëzuar. Dhe rindërtimi i jashtëm na ndihmon të rindërtojmë nga brenda. Ne kemi një thënie: restauro njeriun dhe gjithçka do të restaurohet.”
    Nuk është e lehtë, nën bomba: “Nëse mendon vetëm për bombat, jeta ndalet. Por askush në Ukrainë, nga ata që kanë mbetur, nuk mund të mendojë vetëm për rrezikun. Çdo mëngjes, pas bombardimeve të natës, çohemi dhe shkojmë në punë.”
    Olena ka qenë në Quai d’Orsay, për të treguar çfarë po bën Ukraina për t’u rimëkëmbur. “Po,  pranon, është një moment i vështirë, i rëndë. Negociatat janë shumë intensive. Gjithçka po ndryshon shumë shpejt, por kjo sjell edhe shpresë. Po punojmë shumë dhe presim rezultate.
    Gjëja më e keqe është stanjacioni, kur nuk ndodh asgjë dhe të gjithë mbeten duke pritur. Kjo turbulencë, këto prova janë një hap i domosdoshëm.”
    Ka zonja të para që gjatë vizitave shtetërore shkojnë nëpër butike dhe restorante. Jo ajo ukrainase: “Shpesh më pyesin: si je? Dhe sa herë them me vete se do ta mendoj më vonë, sepse në të vërtetë nuk mendojmë shumë për këtë.
    Më duket se roli i një zonje të parë në kohë lufte është i njëjtë me atë të një mësueseje: vazhdojmë të bëjmë punën tonë, por me sfida më të mëdha.
    Duhet të jemi më fleksibile me oraret tona, të ndryshojmë gjërat shpejt, të riorganizojmë planet tona me urgjencë, të jemi më aktive… Ekziston kjo ndjenjë e vazhdueshme  urgjence”. “Nuk do të doja që Europa të bëhej e pandjeshme”, u thotë gazetarëve, teksa me dy gishta rrotullon nervozisht unazën. “Ju lutem, mos na harroni.”

    Top Channel