Lajmidites.com

Author: Top-Channel.tv

  • “Furgoni i emergjencës për të vrarë”, Karamuço trondit me deklaratën: Lëviz kur ka nevojë për atentate

    “Furgoni i emergjencës për të vrarë”, Karamuço trondit me deklaratën: Lëviz kur ka nevojë për atentate

    Një furgon me arsenal u kap ditët e djeshme nga policia në Tiranë. Sipas Ervin Karamuçës, ky është një furgon lëvizës, që shpërndan armë.

    Karamuço deklaroi se furgoni ka qëndruar rreth tre muaj i parkuar pranë zonës së Myslym Shyrit, i palëvizur dhe i kamufluar me logot e kompanive që merren me mirëmbajtjen e rrugëve. “Logoja është vënë kastile për t’u identifikuar dhe për të thënë ‘ej, mos i prekim këta se janë të filanit’,” tha ai, duke shtuar se për kapjen e këtij arsenali është përdorur edhe përgjim ambiental, në të cilin anëtarët e strukturës thoshin: “Ato të furgonit mos i prekim tani për tani.”
    “Po kush është ky furgon? Policia ka kohë që po hetonte. Ky operacion rezultoi i suksesshëm sepse e kanë ditur shumë pak njerëz në polici. Kjo ka lidhje me një hetim të SPAK,” u shpreh Karamuço.
    Sipas tij, është gjetur arsenali i një grupi kriminal, ku gjysma e anëtarëve janë arrestuar dhe gjysma janë në kërkim. Ai shtoi se ishte planifikuar një atentat me eksploziv në Tiranë. Në furgon janë gjetur armët që shihen në foto, por edhe aksesorët e detonimit në distancë të eksplozivit që do të përdorej për një ngjarje që parashikohej nga policia. Megjithatë, eksplozivi nuk është gjetur — “mund ta kenë hequr, mund ta kenë vendosur diku tjetër”, tha Karamuço.

    Sipas tij, kjo ngjarje “ka ndryshuar direkt metodën që ne kemi njohur deri më sot” për grupet kriminale, të cilat zakonisht i mbanin armët në banesa të braktisura ose të marra me qira, ndërkohë që tani i kanë të lëvizshme.
    “Më ka bërë shumë përshtypje logoja e përdorur, por edhe targa 911, numri i emergjencës. Pra ky furgon është i lëvizshëm; arsenalin e armëve dhe municioneve e lëvizin ku ju duhet, shpërndajnë armët, ikin dhe vijnë prapë këtu e parkohet,” tha Karamuçë.
    Ai shtoi se armët shpërndahen për atentate ndaj personave konkretë: “Merr armën dhe shko godite.”“Kjo që ne kemi zbuluar e përmbys të gjithë atë që ne njohim deri tani, që i dinim se i mbanin në shtëpi. Tani ka një furgon lëvizës, madje edhe numrin e ka numër emergjence, për të vrarë,” theksoi Karamuço.
    Në përfundim, ai tha se kjo është kapur si një arsenal lëvizës që i përkiste këtij grupi kriminal, por që dyshohet të jetë i lidhur edhe me grupe të tjera.

    Top Channel

  • I shpallur në kërkim ndërkombëtar, ekstradohet nga Italia një person

    I shpallur në kërkim ndërkombëtar, ekstradohet nga Italia një person

    Një person me iniciale E. L., është ekstraduar nga Italia pasi ishte shpallur në kërkim ndërkombëtar.

    “Si rezultat i partneritetit shumë të ngushtë të specialistëve të Drejtorisë së Interpolit me ata të Interpol Romës, gjatë kësaj faze të operacionit “The Wanted”, u finalizua procedura e ekstradimit nga Italia, në Shqipëri, të shtetasit E. L.”, njofton policia.
    Ai kërkohej ndërkombëtarisht, sepse GjKKO-ja, në muajin prill, 2025, i ka caktuar masën e sigurisë “Arrest në burg”, për veprën penale “Pastrimi i produkteve të veprës penale apo veprimtarisë kriminale”, kryer në kuadër të grupit të strukturuar kriminal.

    Top Channel

  • Kuvendi mblidhet dy herë sot, do të shqyrtohet kërkesa e PD për shkarkimin e Peleshit. Raportojnë edhe disa institucione

    Kuvendi mblidhet dy herë sot, do të shqyrtohet kërkesa e PD për shkarkimin e Peleshit. Raportojnë edhe disa institucione

    Kuvendi do të mblidhet dy herë sot.

    Në orën 10:00, do të shqyrtohet nisma e opozitës për shkarkimin nga detyra të kryetarit të Kuvendit, Niko Peleshi, dhe ku do të prezantohen dy raportet e PS dhe PD.
    Një nga pikat e rendit të Ditës është shqyrtimi i kërkesës së deputetëve të Partisë Demokratike për shkarkimin e Kryetarit të Kuvendit, Niko Peleshi, me pretendimin se ka shkelur rëndë Kushtetutën dhe rregulloren e këtij institucioni.
    Seanca për shkarkimin e Peleshit parashikohet të nisë në orën 10:00, ndërkohë që gjatë ditës së sotme Kuvendi do të mblidhet në dy seanca plenare.
    Ndërkohë në vijim, në seancën e orës 11:30, në Kuvend do të raportojnë mbi veprimtarinë e vitit 2024, krerët e Këshillit të Lartë të Prokurorisë, Avokatit të Popullit, Komisionerit për Mbikëqyrjen e Shërbimit Civil, Institutit të Statistikave, Autoritetit të Mediave Audiovizive dhe Radiotelevizionit Shqiptar.

    Top Channel

  • ‘Kanceri më sfidoi, por jo sa politika’, Rrëfimi i Mimoza Kusarit: Si zbulova tumorin në gji gjatë një kontrolli rutinë

    ‘Kanceri më sfidoi, por jo sa politika’, Rrëfimi i Mimoza Kusarit: Si zbulova tumorin në gji gjatë një kontrolli rutinë

    Politikania nga Kosova, Mimoza Kusari-Lila, ka ndarë rrëfimin e saj personal në emisionin Top Story, ku tregoi se si zbuloi se kishte një tumor në gji.

    Ajo tha se gjithçka nisi gjatë një kontrolli rutinë, që e kryen çdo vit. “Pas kontrolleve, zbulova se kisha një tumor 1 cm,” tregoi Kusari-Lila, duke shtuar se pas ndërhyrjes kirurgjikale iu nënshtrua edhe trajtimit me rreze.
    Deputetja u shpreh se momenti kur u diagnostikua me kancer përkoi me periudhën më të ashpër të sulmeve politike ndaj saj në Kosovë.

    “Kur u diagnostifikova me kancer, kam qenë në kulmin e sulmeve politike. Por ballafaqimi im personal, momenti kur e kuptova që kam kancer, ka qenë pjesa më e lehtë në raport me pjesën e jashtme. Thoja: qelizat malinje të brendshme i kam më lehtë t’i kontrolloj se ato që gjenden jashtë, ose që mundohen të më sulmojnë nga jashtë,” rrëfeu Kusari.

    Top Channel

  • Trump njofton se SHBA-ja do të fillojë “menjëherë” testimin e armëve bërthamore

    Trump njofton se SHBA-ja do të fillojë “menjëherë” testimin e armëve bërthamore

    Presidenti i SHBA-së, Donald Trump, njoftoi se i ka udhëzuar Departamentit të Mbrojtjes të fillojë testimin e armëve bërthamore amerikane “menjëherë” në përgjigje të programeve të testimit nga vendet rivale, një njoftim që erdhi pak momente përpara se ai të takohet me presidentin e Kinës, Xi Jinping.

    Trump tha në një postim në rrjetet sociale se SHBA-të “kanë më shumë armë bërthamore se çdo vend tjetër”, duke e renditur Rusinë të dytën dhe Kinën “një të tretën larg, por do të jetë edhe brenda 5 viteve”.
    “Për shkak të programeve të testimit nga vendet e tjera, unë i kam udhëzuar Departamentit të Luftës që të fillojë testimin e armëve tona bërthamore në baza të barabarta. Ky proces do të fillojë menjëherë”, tha Trump.
    Kjo do të shënonte një ndryshim të madh në politikën e SHBA-së. SHBA-të “kanë respektuar një moratorium vullnetar mbi testimet e eksplozivëve bërthamorë që nga viti 1992”, sipas Kongresit.
    Trump është aktualisht për në Busan, Korenë e Jugut, para se të takohet me Xi.

    Top Channel

  • Zgjedhjet parlamentare në Holandë, ekstremi i djathtë i dyti, surprizë në vendin e parë

    Zgjedhjet parlamentare në Holandë, ekstremi i djathtë i dyti, surprizë në vendin e parë

    Partia liberale e qendrës së djathtë D66 nën drejtimin e Rob Getten duket se do të sigurojë kryesimin në zgjedhjet holandeze, sipas sondazheve, dy vjet pasi përfundoi e gjashta në sondazhet e mëparshme.

    Pritet që partia liberale D66 të sigurojë 27 vende në parlamentin me 150 vende, dy më shumë se partia e Geert Wilders (PVV), e cila kishte fituar zgjedhjet e mëparshme.
    Tre parti të tjera po e ndjekin nga afër, duke përfshirë liberalët konservatorë, partinë e majtë të Gjelbër-Labor dhe Demokratët e Krishterë.
    Wilders kryesoi sondazhet gjatë gjithë fushatës, por pas rënies së qeverisë së tij të koalicionit në qershor, shumica e udhëheqësve të partive kryesore e bënë të qartë se nuk donin të punonin përsëri me të.
    Në të njëjtën kohë, partia D66 e Getten zhvilloi një fushatë të suksesshme, duke përfituar nga performanca e tij e mirë në debatet televizive.
    Sipas BBC, pjesëmarrja e tij në një program televiziv gjatë fushatës thuhet se e rriti më tej popullaritetin e tij.

    Top Channel

  • Zgjedhjet në Holandë, liberalët e qendrës kryesojnë sipas sondazheve/ Çfarë pritet të ndodhë

    Zgjedhjet në Holandë, liberalët e qendrës kryesojnë sipas sondazheve/ Çfarë pritet të ndodhë

    Liberalët e qendrës duket se po udhëheqin në zgjedhjet kombëtare të Holandës, sipas sondazheve të daljes nga kutitë të publikuara pas mbylljes së votimit.

    Megjithatë, konkurrenca mbetet e fortë, me katër parti rivale që rezultojnë shumë pranë tyre në preferencat e votuesve.
    Rezultatet paraprake tregojnë një garë të ngushtë, duke lënë të hapur mundësinë e koalicioneve paszgjedhore për të formuar qeverinë e ardhshme.
    Analistët politikë parashikojnë një periudhë negociatash intensive, pasi askush nuk duket të ketë një shumicë të qartë parlamentare.
    Zgjedhjet u ndoqën me interes të madh nga qytetarët holandezë dhe ndërkombëtarët, duke reflektuar rëndësinë e tyre për stabilitetin politik dhe drejtimin e politikave qeverisëse në vend.

    Top Channel

  • Gruaja me ngjyrë telefonoi për ndihmë policinë, por u vra nga vetë oficeri, ja çfarë vendosi gjykata në Amerikë

    Gruaja me ngjyrë telefonoi për ndihmë policinë, por u vra nga vetë oficeri, ja çfarë vendosi gjykata në Amerikë

    Një ish-zëvendës policie, Sean Grayson, 31 vjeç, është shpallur fajtor për vrasjen me armë zjarri të Sonya Massey, një grua me ngjyrë në Amerikë, ndërsa dënimi për të pritet të shpallet më 29 janar, dhe ai mund të përballet me deri në 20 vjet burgim ose dënim me kusht.

    Ngjarja tragjike ndodhi në 6 korrik 2024 në Springfield, kryeqyteti i Illinois, kur gruaja kishte telefonuar policinë për të raportuar për një hajdut dhe në vendngjarje mbërritën Grayson dhe një tjetër ndihmës sherifi, Dawson Farley.
    Sipas hetimeve, pas mbërritjes në shtëpi, oficerët vunë re një tenxhere me ujë të nxehtë në sobë. Grayson i kërkoi Massey-t ta hiqte atë, por situata mori një kthesë të papritur.
    Sipas pamjeve nga kamera e trupit të oficerit, gruaja e cila vuante nga probleme të shëndetit mendor, i ishte drejtua oficerëve duke iu lutur që ata mos ta lëndonin. Pikërisht në atë moment, Grayson e interpretoi frazën si kërcënim dhe e qëlloi tre herë, duke e goditur në fytyrë dhe duke e lënë të vdekur në vend.
    “Mund ta marrësh, por është një goditje në kokë… Nuk ke çfarë të bësh, vëlla”, u shpreh ai pasi e kishte qelluar. Më pas u largua për të marrë pajisjet e ndihmës së shpejtë, por i hodhi ato në dysheme kur u kthye, gjë që prokurorët e përmendën si shenjë të shpërfilljes së tij për jetën e viktimës.
    Në dëshminë e tij, Farley tha se Massey nuk përbënte asnjë rrezik dhe se nuk kishte bërë asgjë kërcënuese. Ai nuk përdori armë dhe nuk u akuzua. Megjithatë, Grayson mbrojti veprimin e tij duke pretenduar se kishte frikë se Massey mund ta digjte me ujin e nxehtë dhe se veproi për vetëmbrojtje.
    Fillimisht, Grayson ishte akuzuar për vrasje të shkallës së parë, që mund të sillte deri në burgim të përjetshëm, por juria e gjeti fajtor për vrasje të shkallës së dytë, një akuzë që zbatohet kur i pandehuri vepron nën “provokim serioz” ose me bindjen, edhe të paarsyeshme, se po mbron veten.
    Rasti shkaktoi indinjatë të gjerë publike dhe ringjalli debatin mbi përdorimin e forcës nga policia ndaj personave me ngjyrë në Shtetet e Bashkuara. Vdekja çoi gjithashtu në ndryshime ligjore në Illinois, të cilat tani kërkojnë më shumë transparencë mbi të kaluarën e kandidatëve për punë në policinë dhe strukturat e rendit.
    Ngjarja pati pasoja të menjëhershme edhe brenda institucioneve të zbatimit të ligjit pasi sherifi që e kishte punësuar Grayson doli në pension të parakohshëm, ndërsa Departamenti i Drejtësisë i SHBA-së nisi një hetim federal. Ndërkohë, familja e gruas, e përfaqësuar nga avokati i njohur i të drejtave civile Ben Crump, arriti një marrëveshje civile prej 10 milionë dollarësh me autoritetet lokale.

    Top Channel

  • Adoleshentet në Australi bien “pre” e rrjetit kriminal online, detyrohen të kryejnë akte dhune

    Adoleshentet në Australi bien “pre” e rrjetit kriminal online, detyrohen të kryejnë akte dhune

    Një ngjarje e pazakontë raportohet nga Australia, ku vajzat po detyrohen nga bandat kriminale të kryejnë akte dhune ndaj vetes dhe të afërmve të tyre.

    Sipas policisë vendase, vajzat, kryesisht adoleshente, po detyrohen përmes platformave të lojërave online si psh. “Roblox”, të dëmtojnë veten por edhe familjarët e tyre, apo kafshët shtëpiake.
    Lidhur me skemën e rrjetit kriminal online, tre persona janë arrestuar në Australi dhe nëntë të tjerë në të gjithë botën. Autorët e dyshuar kishin synime ekstremiste të dhunshme dhe donin të lëndonin adoleshentë ose të  rinj në fillim të të  20-ave, shkruan BBC.
    Ata përzgjidhnin vajzat e mitura jo vetëm platformave të lojërave, por edhe aplikacioneve të mesazheve si Discord dhe Telegram.
    “Target-grupi” i tyre ishin vajzat me vetëvlerësim të ulët ose me çrregullime të shëndetit mendor.
    Pothuajse 60 shkelës të dyshuar janë identifikuar vetëm në Australi dhe policia po punon për të gjetur të  dyshuarit e tjerë ne shtete të tjera.
    Australia si masë paraprake po përgatitet të prezantojë një ndalim të mediave sociale për fëmijët nën moshën 16 vjeç, me qëllim minimizimin e dëmit në internet.

    Top Channel

  • Vizita në Paris, Rama dhe bashkëshortja e tij priten për darkën zyrtare nga presidenti Macron

    Vizita në Paris, Rama dhe bashkëshortja e tij priten për darkën zyrtare nga presidenti Macron

    Kryeministri Edi Rama ka ndarë pamje nga mbërritja e tij në rezidencën presidenciale, pallatin Elysee, për darkën me Presidentin francez Emmanuel Macron.

    Nga videoja e postuar në Facebook nga kryeministri, ai shfaqet i shoqëruar nga bashkëshortja e tij, Linda Rama dhe pritet me përqafime në hyrje të pallatit Elysee nga çifti presidencial i Francës, Emmanuel dhe Brigitte Macron.

    Top Channel