Lajmidites.com

Author: Top-Channel.tv

  • Përplasi turmën e njerëzve me makinë në Francë, mes të plagosurve zyrtare e partisë së Le Pen, autori dyshohet se ishte…

    Përplasi turmën e njerëzve me makinë në Francë, mes të plagosurve zyrtare e partisë së Le Pen, autori dyshohet se ishte…

    Një ngjarje e rëndë ka tronditur ishullin francez Île d’Oléron, një vendpushim i njohur në brigjet e Atlantikut, ku një burrë 35-vjeçar përplasi me makinën e tij një grup njerëzish, përfshirë edhe një zyrtare të partisë së Le Pen.

    Sipas autoriteteve franceze, të paktën dhjetë persona u plagosën, ndërsa tre ndodhen në gjendje kritike. Autori u arrestua menjëherë në vendngjarje.
    Policia franceze bëri të ditur se i dyshuari është banor i ishullit Oléron dhe ka një histori të gjatë penale, përfshirë sjellje të paqëndrueshme, përdorim droge dhe alkooli.
    Gjatë kontrollit të mjetit, hetuesit gjetën disa bombola gazi, çka ngre dyshime se ai mund të ketë synuar të shkaktonte një shpërthim. Para arrestimit, ai u përpoq t’i vinte flakën makinës, por u neutralizua nga policia.
    Prokurori i La Rochelle tha se veprimi ishte “i qëllimshëm”, por motivi ende nuk është konfirmuar.
    “Në momentin e arrestimit ai bërtiti ‘Allahu Ekber’. Hetimi do të përcaktojë motivet e sakta të sulmit”, deklaroi prokurori.
    Ndër të plagosurit është edhe Emma Vallain, 22 vjeçarja asistente parlamentare e deputetit Pascal Markowsky, anëtar i Tubimit Kombëtar të Marine Le Pen.
    Presidenti i partisë, Jordan Bardella, u shpreh se është “thellësisht i tronditur” dhe dërgoi “ngushëllime për të plagosurit, veçanërisht për Emmën e vogël”, pa komentuar mbi motivin e autorit.
    Edhe politikani Éric Zemmour, lider i partisë Ripushtimi, reagoi në rrjetet sociale.
    “Vetëm pak vite më parë, vende si Île d’Oléron ishin të qeta. Sot shohim xhihadistë që shfaqen në të gjithë Francën. Mendimet e mia janë me viktimat”, tha ai.
    Ministri i Brendshëm francez konfirmoi se është hapur një hetim për tentativë vrasjeje, ndërsa shërbimet antiterrorizëm ndodhen në vendngjarje.
    “Këtë mëngjes, një shofer goditi këmbësorë dhe çiklistë në Saint-Pierre-d’Oléron dhe Dolus-d’Oléron. Dy persona janë në gjendje kritike dhe tre të tjerë të plagosur rëndë. Autori u arrestua nga xhandarmëria”, shkroi ministri në platformën X.
    Presidenti francez Emmanuel Macron, i cili po udhëton drejt Brazilit, po ndjek situatën në kohë reale përmes Ministrit të Brendshëm.
    “Pashë një grua të shtrirë përtokë, pa lëvizur. Mendova se ishte e vdekur. U deshën rreth 35 minuta që ambulancat të mbërrinin dhe më pas ajo u transportua me helikopter në spital”, tregon një dëshmitar.

    Top Channel

  • Zjarri në shtëpinë e të moshuarve në Bosnje, 11 të vdekur dhe mbi 30 të lënduar

    Zjarri në shtëpinë e të moshuarve në Bosnje, 11 të vdekur dhe mbi 30 të lënduar

    Njëmbëdhjetë njerëz e kanë humbur jetë dhe më shumë se 30 të tjerë janë lënduar si pasojë e një zjarri që shpërtheu në katin e shtatë të një shtëpie pleqsh në Tuzlla mbrëmjen e së martës, njoftuan të mërkurën autoritetet në kantonin e Tuzllës në Bosnje.

    Sipas të dhënave të fundit të pakonfirmuara, 30 persona janë shtruar në spital në Qendrën Klinike Universitare në Tuzlla, ndërsa numri i të lënduarve që deri më tani kanë kërkuar ndihmë mjekësore është më i lartë.
    Viktimat janë banorë të shtëpisë dhe trupat e tyre do të dërgohen për identifikim dhe autopsi, sipas autoriteteve.
    Nuk është e qartë se çfarë e shkaktoi zjarrin, por autoritetet e kanë nisur një hetim në vendin e ngjarjes.
    Drejtori i shtëpisë së pleqve, Mirsad Bakalloviç, dha dorëheqje një ditë pas zjarrit.
    Në një njoftim zyrtar disa orë pas zjarrit, shtëpia e pleqve konfirmoi numrin e të vdekurve dhe të lënduarve, dhe shtoi se të lënduarit po trajtohen në Qendrën Klinike Universitare të Tuzllës.
    Sipas saj, mes të lënduarve ka edhe oficerë policie, zjarrfikës, punonjës mjekësorë dhe punonjës të shtëpisë së pleqve në Tuzlla.
    Një numër i madh zjarrfikësish morën pjesë në shuarjen e zjarrit, ndërsa në vendngjarje shkuan edhe policia dhe shërbimet e emergjencës.
    Kryeministri i kantonit të Tuzllës, Irfan Halilagiç, i tha shërbimit publik të Bosnjës se po kërkohet një zgjidhje për strehim të përkohshëm për banorët e shtëpisë.
    Kryeministri i Federatës së Bosnjës, Nermin Nikshiç, njoftoi për televizionin boshnjak se Qeveria do të marrë pjesë në rindërtimin e shtëpisë dhe kujdesin për banorët e saj.
    “Në periudhën e ardhshme, ne do të formojmë një ekip të Qeverisë së Bosnjës që do t’i vizitojë institucionet nën juridiksionin e Bosnjes dhe do t’u kërkojë autoriteteve të kantoneve të bëjnë të njëjtën gjë për institucionet nën juridiksionin e tyre, kur të ndodhë diçka e tillë, në mënyrë që të mos japin informacione të përgjithshme. Sonte dëgjuam shumë informacione nga banorët. Sidoqoftë, duhet të presim për të parë se çfarë e shkaktoi saktësisht tragjedinë”, tha Nikshiç.
    Ndërkaq, presidentja e Kosovës, Vjosa Osmani, ka shprehur ngushëllime, pas zjarrit në shtëpinë e pleqve.
    “Në emër të popullit të Kosovës shpreh ngushëllime të sinqerta për familjarët e viktimave dhe popullit të Bosnje e Hercegovinës”, tha Osmani përmes një postimi në X, duke u uruar shërim të shpejtë të plagosurve./REL

    Top Channel

  • Rusia shtrëngon rrethimin mbi Pokrovskun, Kremlini paralajmëron rikthimin e testimeve bërthamore

    Rusia shtrëngon rrethimin mbi Pokrovskun, Kremlini paralajmëron rikthimin e testimeve bërthamore

    Forcat ruse duket se po forcojnë kontrollin mbi qytetin strategjik të Pokrovskut, me luftime të ashpra rrugore në të gjithë zonën e shkatërruar të Ukrainës lindore.

    Ndërkohë, Kremlini njoftoi se po shqyrton mundësinë për të rifilluar testimet bërthamore – për herë të parë pas më shumë se tre dekadash.
    Shtabi i Përgjithshëm i Ukrainës mohoi pretendimet e Moskës se trupat e saj janë rrethuar, duke deklaruar se po përpiqet të përforcojë mbrojtjen rreth Pokrovskut dhe Myrnohradit. Një ditë më parë, Presidenti Volodymyr Zelenskyy vizitoi trupat afër vijës së frontit për t’i falënderuar për qëndresën e tyre.Të dyja palët raportojnë versione të ndryshme të luftimeve, por analistët ushtarakë paralajmërojnë se situata është përkeqësuar ndjeshëm, me forcat ruse vetëm disa kilometra larg rrethimit të trupave ukrainase.
    Putini sinjalizon testime bërthamore
    Larg frontit, Vladimir Putin i urdhëroi zyrtarët të përgatisin propozime për testime të reja bërthamore, duke reaguar ndaj deklaratave të Donald Trump se SHBA mund të rifillojë testet e tilla.Putin theksoi se Rusia i është përmbajtur traktatit ndërkombëtar që ndalon testet, por paralajmëroi se “nëse SHBA-të apo ndonjë fuqi tjetër bërthamore teston, Moska do të bëjë të njëjtën gjë.”
    Rusia ka kryer së fundmi teste të armëve me energji bërthamore, përfshirë raketën Burevestnik – të njohur si “Çernobili fluturues” – dhe dronin nënujor Poseidon, por asnjë prej tyre nuk ka qenë testim real bërthamor.
    Një test i tillë do të shënonte fundin e një pauze 30-vjeçare që nga testimi i fundit sovjetik në vitin 1990.
    Pokrovsku, “porta e Donetskut”
    Pas më shumë se një viti luftimesh, Rusia duket se është afër marrjes së Pokrovskut, një qytet me rreth 50 mijë banorë para luftës, i vendosur në një rrugë strategjike që lidh fortesat kryesore të Ukrainës në rajonin e Donetskut. Rënia e tij do të ishte fitore simbolike dhe strategjike për Moskën, duke hapur rrugën për një ofensivë të mundshme drejt Kramatorskut dhe Slovianskut.Projekti DeepState, që monitoron vijën e frontit me imazhe satelitore, raportoi se trupat ruse kanë hyrë në disa lagje të qytetit, ndërsa situata mbetet “kritike”.Një ushtar ukrainas, Artem Karyakin, shkroi se “rusët janë të pranishëm në çdo lagje”, duke e përshkruar gjendjen si jashtëzakonisht të tensionuar.
    Kievi ka dërguar forca speciale për të ndalur përparimin rus, por operacionet nuk duket se kanë sjellë ndryshim domethënës. Analistë ndërkombëtarë paralajmërojnë se Ukraina mund të përsërisë “gabime të kushtueshme”, duke mos bërë tërheqje të kontrolluara edhe kur pozicionet janë të pashpresa.Përveç humbjeve njerëzore, Ukraina përballet me mungesë trupa, sulme të vazhdueshme me dronë dhe bombardime ajrore. Rusia ka vendosur armë të reja – përfshirë bomba rrëshqitëse me motor reaktiv – që mund të godasin objektiva shumë larg vijës së frontit.
    Ndërkohë, përplasjet kanë hyrë edhe në Kupiansk, në rajonin e Kharkivit, ku Rusia pretendon se ka rrethuar qytetin, por Ukraina e ka mohuar këtë.
    Ndërkohë që fronti lindor digjet, kontaktet diplomatike midis Moskës dhe Uashingtonit janë pothuajse të ngrira.Pas takimit me Xi Jinping në Korenë e Jugut, Donald Trump deklaroi se “ndonjëherë duhet t’i lësh të luftojnë”, ndërsa administrata e tij ka vendosur sanksione të reja ndaj industrisë ruse të naftës, duke dëmtuar të ardhurat e Kremlinit.Megjithatë, SHBA-të vazhdojnë të refuzojnë t’i japin Ukrainës raketa me rreze të gjatë veprimi, si Tomahawk, duke e kufizuar aftësinë e Kievit për të goditur objektiva ruse në thellësi të territorit armik.

    Top Channel

  • I dyshuari i grabitjes në Luvër një yll i rrjeteve sociale dhe ish-roje e muzeut, ja çfarë thonë raportet

    I dyshuari i grabitjes në Luvër një yll i rrjeteve sociale dhe ish-roje e muzeut, ja çfarë thonë raportet

    Një nga të arrestuarit për vjedhjen e xhevahireve të kurorës nga muzeu i Luvrit, me vlerë 88 milionë euro, është një figurë e njohur në mediat sociale dhe pasionant i motoçikletave.

    I identifikuar si Abdoulaye N., 39-vjeç, ai ka punuar më parë si roje sigurie në Qendrën Pompidou dhe është arrestuar në Aubervilliers, periferi në veri të Parisit, gjashtë ditë pas grabitjes më 19 tetor. Ai përballet me akuza për vjedhje të organizuar dhe konspiracion kriminal.
    Një gjykatë në Bobigny shtyu seancën e tij për akuza të tjera të vogla, duke argumentuar se vëmendja e medias e bënte të pamundur një seancë të qetë. Avokati i tij, Maxime Cavaillé, deklaroi se mbrojtja do të ruajë respektimin e prezumimit të pafajësisë dhe privatësinë e klientit, pavarësisht natyrës së jashtëzakonshme të rastit.
    Sipas hetimeve, katër persona janë në paraburgim, përfshirë tre anëtarë të bandës që përdorën një kamion të vjedhur me ashensor mallrash për të hyrë në galerinë Apollo. Dy prej tyre thyen dritare të pasigurta dhe vitrina xhami për të marrë gjerdanin e Napolonit I dhe diademën e Napolonit III, ndërsa dy të tjerët ikën me motoçikleta. Grabitja, e kryer gjatë ditës, zgjati më pak se shtatë minuta.
    Abdoulaye N., i njohur në mediat sociale si Doudou Cross Bitume, ka publikuar video duke kryer truke me motoçikleta dhe këshilla për ndërtimin e muskujve në platforma si TikTok, Instagram dhe YouTube. Hetuesit gjetën ADN-në e tij në disa sende të braktisura në vendngjarje, përfshirë doreza, jelek dhe prerës disku. Ai dyshohet të ketë qenë një nga dy personat që hynë me forcë në galeri.
    Fqinjët e tij përshkruajnë Abdoulaye N. si të dobishëm dhe të hapur, ndërsa mediat raportojnë se ai ka një dosje penale të pasur, me 15 vepra, përfshirë posedim droge, drejtim pa leje dhe vjedhje të mëparshme bizhuterish.
    Prokurorja e Parisit, Laure Beccuau, deklaroi se i dyshuari nuk ka dhënë shumë informacione, por ka pranuar pjesërisht përfshirjen e tij në grabitjen e Luvrit. Profili i të dyshuarve nuk korrespondon me krimin e organizuar profesional, duke lënë të hapur mundësinë që ata të jenë punësuar nga një tjetër i panjohur deri tani.

    Top Channel

  • Rama kërkoi mbledhje, të gjithë deputetët e Tiranës shkojnë në selinë rozë

    Rama kërkoi mbledhje, të gjithë deputetët e Tiranës shkojnë në selinë rozë

    Të gjithë deputetët e Tiranës i janë i drejtuar sot selisë së PS, ku po mbahet mbledhje me kreun e ekzekutivit.

    Top Channel mëson se është një takim i thirrur nga kryeministri Edi Rama.
    Nuk dihet ende qëllimi takimit dhe tema kryesore, ndërsa kujtojmë se një nga zhvillimet e fundit e cila prek politikisht PS është vendimi i Kushtetueses për të anuluar zgjedhjet e pjesshme në Tiranë.
    Më herët, PS kishte dalë me Ogerta Manastirliun si kandidate për bashkinë e Tiranës, por tashmë Kushtetuesja vendosi se zgjedhje nuk do të ketë dhe kryetar bashkie do të vijojë të jetë Erion Veliaj.

    Top Channel

  • Video/ Presidentja meksikane sulmohet seksualisht, burri e kap nga gjoksi dhe përpiqet ta puthë

    Video/ Presidentja meksikane sulmohet seksualisht, burri e kap nga gjoksi dhe përpiqet ta puthë

    Presidentja meksikane Claudia Sheinbaum është sulmuar seksualisht nga një burrë, ndërsa po komunikonte me qytetarët në rrugë.

    Ngjarja u regjistrua në video dhe u publikua nga Daily Mail, duke shkaktuar valë zemërimi në rrjetet sociale. Në pamjet e publikuara, sulmuesi shihet duke u përkulur drejt Sheinbaum dhe duke tentuar ta puthë në qafë pa pëlqimin e saj, teksa ajo po fliste me mbështetësit në një rrugë historike të Mexico City.

    Burri, i cili duket se ishte në gjendje të dehur, afrohet dhe i vendos duart në gjoks, ndërsa presidentja reagon me qetësi dhe i largon duart.
    “Do ta bëjmë foton, mos u shqetëso,” i tha ajo burrit, duke ruajtur qetësinë e saj, ndërsa vetëm më pas një anëtar i ekipit të sigurisë ndërhyri.
    Zemërim në internet
    Incidenti ka shkaktuar tërbim në rrjetet sociale, ku shumë përdorues kanë vënë në pikëpyetje reagimin e ngadaltë të sigurisë presidenciale.
    “Presidentja meksikane Claudia Sheinbaum u sulmua nga një burrë i dehur në publik. Ku ishte sigurimi i saj?”, shkroi një përdorues në platformën X (ish-Twitter).
    Një tjetër komentoi:
    “Nëse Meksika nuk mund ta mbrojë Presidenten e saj, si mund të mbrojë qytetarët e zakonshëm?”Të tjerë e quajtën “të pabesueshëm” reagimin e dobët të truprojave.
    Reagimet zyrtare
    Sipas mediave lokale, burri u arrestua menjëherë pas incidentit, ndërsa zyra e Presidentes nuk ka dhënë ende një deklaratë zyrtare. Sekretariati për Gratë, Institutet e Grave në Entet Federale dhe Komitetet për Barazi Gjinore në Dhomën e Përfaqësuesve dhe në Senat, dënuan ashpër sulmin.
    “Fatkeqësisht, asnjë grua nuk është e përjashtuar nga ngacmimet seksuale në vendin tonë. Ne punojmë çdo ditë për ta luftuar këtë fenomen,” thuhet në deklaratë.
    Meksika prej vitesh përballet me nivel të lartë dhune ndaj grave, që varion nga ngacmimet në rrugë deri te format më ekstreme, si sulmet me acid dhe vrasjet mizore të grave (femicide) — një problem i thellë që aktivistët e lidhin me kulturën e “mashkullorisë” që ende mbizotëron në vend.

    Top Channel

  • Ish-mbreti i Spanjës Juan Carlos rrëfen pendesat, zbulon marrëdhëniet e dashurisë dhe dhuratën 100 milionë dollarëshe nga Arabia Saudite

    Ish-mbreti i Spanjës Juan Carlos rrëfen pendesat, zbulon marrëdhëniet e dashurisë dhe dhuratën 100 milionë dollarëshe nga Arabia Saudite

    Ish-mbreti spanjoll Juan Carlos, i cili u detyrua të largohej në mërgim pas një sërë skandalesh, e përshkruan veten si një “njeri të plagosur” në kujtimet e tij të botuara në Francë të mërkurën (5 nëntor), të shkruara në bashkëpunim me autoren Laurence Debray.

    Në librin me 500 faqe, të titulluar “Pajtimi” (Réconciliation, botuar nga Stock*), ish-monarku 87-vjeçar pranon gabimet e tij dhe shprehet se ëndërron të rikthehet në atdhe.
    “Nuk kalon asnjë ditë pa më pushtuar nostalgjia. Është sikur Spanja më është ngjitur në lëkurë,” shkruan ai, duke rrëfyer se kishte frikë se do të vdiste pa qenë në gjendje të tregonte dhe të shpjegonte gjithçka.
    Juan Carlos, i cili prej vitit 2020 jeton në Emiratet e Bashkuara Arabe, flet hapur edhe për marrëdhëniet e tij personale, përfshirë lidhjen me aristokraten gjermane Corinne Larsen, të cilën e përmend pa e përmendur me emër.
    “Nuk mund ta shmang këtë çështje, pasi pati një ndikim të dhimbshëm në mbretërimin dhe fatin tim. I referohem me zemër të rëndë, dhe kjo do të jetë e vetmja herë,” shkruan ai.
    Një nga episodet më të diskutueshme të jetës së tij mbetet udhëtimi në Botsvana në vitin 2012, ku gjatë një ekspedite gjuetie ai u plagos. Ky incident, në kulmin e krizës ekonomike që përfshinte Spanjën, shkaktoi zemërim të madh publik dhe dëmtoi rëndë reputacionin e monarkut.
    Ish-mbreti pranon gjithashtu se kishte bërë një “gabim serioz” kur kishte pranuar një dhuratë prej 100 milionë dollarësh nga mbreti Abdullah i Arabisë Saudite.
    “Ishte një dhuratë që duhet ta kisha refuzuar,” shprehet ai në kujtimet e tij.
    Sipas bashkëautores Laurence Debray, “ai shprehet hapur se i vjen keq për disa gjëra — është mjaft e qartë. Është versioni i tij, e vërteta e tij, një pjesë e historisë së madhe e rrëfyer nga këndvështrimi personal.”
    Debray, e cila kishte shkruar më parë një biografi për të në vitin 2013 dhe kishte punuar me të në një dokumentar para abdikimit të tij në vitin 2014, u vendos në Abu Dhabi në shtator 2022 për të bashkëpunuar në shkrimin e kujtimeve.
    Juan Carlos u ngjit në fron në vitin 1975, pas vdekjes së diktatorit Francisco Franco, i cili e kishte emëruar pasardhësin e tij. Ai njihet si figura që udhëhoqi tranzicionin e Spanjës drejt demokracisë dhe gëzoi respekt ndërkombëtar për dekada.
    “Isha pranë tij në shtratin e spitalit. Ai më mori dorën dhe më tha me frymën e fundit: ‘Lartmadhëria Juaj, ruani unitetin e vendit.’ Kështu mora dorë të lirë për të filluar reformat,” kujton ai.
    Në kujtimet e tij, ai përmend edhe gruan e tij, Mbretëreshën Sofia, e cila ka qëndruar në Spanjë.
    “Më vjen shumë keq që gruaja ime nuk bëri kurrë udhëtimin për të më parë. Dyshoj se ajo nuk do ta zemërojë të birin,” thotë ai, duke iu referuar Mbretit aktual Felipe VI.
    Sipas Debray, në Spanjë njerëzit e kujtonin Juan Carlosin si “një njeri zemërhapur dhe të afërt me popullin”, por në realitet ai është “një njeri shumë i vetmuar, i ndarë midis familjes së tij dhe trashëgimisë së Francos që në moshë të re”.
    Në fund të kujtimeve, ish-mbreti shpreh dëshirën për të kaluar ditët e fundit të jetës në atdhe:
    “Do të doja të kthehesha në Spanjë, në shtëpinë time. Të gjej sërish vendin tim — atë të një njeriu që ia kushtoi veten plotësisht vendit të tij dhe që shpreson të varroset atje me nderime.”

    Top Channel

  • EMRAT/ Majlinda Angoni lirohet nga detyra e Prefektes së Shkodrës, lëvizje edhe në disa Ministri

    EMRAT/ Majlinda Angoni lirohet nga detyra e Prefektes së Shkodrës, lëvizje edhe në disa Ministri

    Majlinda Angoni lirohet nga detyra e Prefektes së Shkodrës, duke u zëvendësuar nga Holta Duda.

    Vendimet janë marrë sot në mbledhjen e Këshillit të Ministrave, ku lëvizje janë bërë po ashtu edhe në disa Ministri.
    Konkretisht:
    – Znj. Armela Baka emërohet zëvendësministër i Arsimit.
    – Z. Endrit Hoxha, zëvendësministër i Arsimit dhe Sportit, lirohet nga kjo detyrë.
    – Z. Martin Kajo emërohet zëvendësministër i Ekonomisë dhe Inovacionit.
    – Z. Sokol Duma, zëvendësministër i Ekonomisë, Kulturës dhe Inovacionit, lirohet nga kjo detyrë.
    – Znj. Majlinda Angoni, prefekt i Qarkut të Shkodrës, lirohet nga kjo detyrë.
    – Znj. Holta Duda emërohet prefekt i Qarkut të Shkodrës.
    – Z. Odise Kote, prefekt i Qarkut të Gjirokastrës, lirohet nga kjo detyrë.
    – Znj. Albana Hasanaj emërohet prefekt i Qarkut të Gjirokastrës.
    – Lirimin e z. Ermal Nufi, anëtar i këshillit drejtues të Agjencisë Shtetërore të Kadastrës, përfaqësues i Ministrisë së Infrastrukturës dhe Energjisë, dhe emërimin e znj. Viola Haxhiademi anëtar të këshillit drejtues të Agjencisë Shtetërore të Kadastrës, përfaqësues i Ministrisë së Infrastrukturës dhe Energjisë.
    – Lirimin e z. Alban Mësonjësi, anëtar i këshillit drejtues të Agjencisë Shtetërore të Kadastrës, përfaqësues i Ministrisë së Bujqësisë dhe Zhvillimit Rural, dhe emërimin e z. Dritan Palnikaj anëtar të këshillit drejtues të Agjencisë Shtetërore të Kadastrës, përfaqësues i Ministrisë së Bujqësisë dhe Zhvillimit Rural.

    Top Channel

  • “Nuk ishin rezultate të mira për republikanët”, Trump reagon pas humbjes në zgjedhjet e djeshme: Mbyllja e qeverisë është një nga arsyet

    “Nuk ishin rezultate të mira për republikanët”, Trump reagon pas humbjes në zgjedhjet e djeshme: Mbyllja e qeverisë është një nga arsyet

    Rezultatet e pafavorshme të zgjedhjeve të djeshme në SHBA për republikanët u pranuan nga Donald Trump, i cili hëngri mëngjes me ligjvënës të partisë konservatore.

    Një ditë pas zgjedhjes së Zohran Mamdani për kryetar bashkie të Nju Jorkut, presidenti amerikan tha për rezultatet: “Nuk mendoj se ishte mirë për republikanët”. Megjithatë, ai vuri në dukje se do të ketë një diskutim më të gjerë pasi gazetarët të largohen nga salla.
    Sipas Donald Trump, arsyeja e rezultateve ishte mbyllja e qeverisë, domethënë pezullimi i funksionimit të agjencive federale për shkak të një mosmarrëveshjeje midis demokratëve dhe republikanëve për projektligjin e buxhetit. Siç tha ai, sondazhet tregojnë se ata e zhvendosin fajin më shumë tek ai dhe republikanët.
    Në të njëjtën kohë, presidenti amerikan ushtroi presion mbi republikanët e Senatit për të shfuqizuar filibusterin.
    Filibustra është një procedurë në Senat që lejon debat të pakufizuar mbi një projektligj. Kjo do të thotë që senatorët mund të flasin për sa të duan mbi një projektligj. Qëllimi është të vonojë ose parandalojë miratimin e një projektligji.
    “Është koha që republikanët të bëjnë atë që duhet të bëjnë, dhe kjo është të shfuqizojnë filibusterin”, tha ai, duke paralajmëruar se përndryshe do të gjenden në një pozicion të keq dhe nuk do të jenë në gjendje të miratojnë asnjë projektligj.

    Top Channel

  • Trump tha se SHBA-të do fillojnë testet bërthamore, reagon Putin: Çështje serioze, kam urdhëruar Ministrinë e Jashtme dhe të Mbrojtjes që…

    Trump tha se SHBA-të do fillojnë testet bërthamore, reagon Putin: Çështje serioze, kam urdhëruar Ministrinë e Jashtme dhe të Mbrojtjes që…

    Presidenti rus, Vladimir Putin diskutoi deklaratat e homologu të tij amerikan, Donald Trump në lidhje me testet bërthamore në Këshillin e Sigurisë Ruse, duke e përshkruar çështjen si jashtëzakonisht serioze, ndërsa urdhëroi fillimin e përgatitjeve për testet e armëve bërthamore.

    Ai theksoi, megjithatë, se Rusia nuk ka plane të tërhiqet nga Traktati për Ndalimin e Testeve Bërthamore, por paralajmëroi për nevojën për të reaguar nëse traktati shkelet.
    Presidenti rus e bëri të qartë se vendi i tij mbetet besnik ndaj Traktatit dhe nuk ka ndërmend të tërhiqet prej tij.
    Megjithatë, ai theksoi se nëse vendet që kanë nënshkruar traktatin vendosin të kryejnë teste bërthamore, Rusia do të detyrohet të marrë masat e duhura.
    Putin gjithashtu udhëzoi Ministrinë e Jashtme, Ministrinë e Mbrojtjes, agjencitë e inteligjencës dhe shërbimet politike të fillojnë përgatitjet për testet e armëve bërthamore.
    “Unë udhëzoj Ministrinë e Jashtme, Ministrinë e Mbrojtjes të Federatës Ruse, shërbimet speciale dhe shërbimet politike përkatëse të bëjnë gjithçka që është e mundur për të mbledhur informacione shtesë mbi këtë çështje, ta analizojnë atë në nivelin e Këshillit të Sigurisë dhe të paraqesin propozime të koordinuara mbi fillimin e mundshëm të punës për përgatitjen për testet e armëve bërthamore”, tha ai.

    Top Channel