Lajmidites.com

Author: Top-Channel.tv

  • Inside Story/ “Ata janë mafiozë, më vrasin nëse denoncoj”, rrëfimi i fortë: Ku përfundojnë mbetjet e rrezikshme spitalore

    Inside Story/ “Ata janë mafiozë, më vrasin nëse denoncoj”, rrëfimi i fortë: Ku përfundojnë mbetjet e rrezikshme spitalore

    Për të kuptuar abuzimin me mbetjet e rrezikshme spitalore, mjafton të ndjekësh rutinën e përditshme pranë koshave në qendrat spitalore.

    Në bisedat që ne patëm me njerëzit që kërkojnë aty për mbetje të riciklueshme, kuptuam atë që ndodh rëndom. Ata përballen me mbetje spitalore apo farmaceutike nga më të rrezikshmet.
    Intervista:
    Qytetari: Kam parë mbetje spitalore shumë here. Vigonë, shiringa po jam shpuar.
    Gazetarja: Nuk ke frikë.
    Qytetari: Më përpara, por tani jo.
    Gazetarja: Pse.
    Qytetari: Ka kush më kuron.
    Gazetarja: Sot ke parë?
    Qytetari: Jo, e pashë por sa e pashë ika.
    Gazetarja: Pse?
    “Ka risk jo vetëm fizik pra prerje shpime e me radhë, kanë dhe risk kimik se ka edhe materiale kimike brenda medikamente ka risk biologjik pasi ka patologji infektive ka materiale biologjike që hiqen gjatë interventeve me radhë ka risk radioaktiv se ka edhe materiale të cila kanë potencial radioaktiv dhe me radhë”, tha mjeku infeksionist, Ilir Alimehmeti.
    Prania e kamerës frikësoi ata njerëz të pamundur që nxjerrin bukën e gojës duke rrëmuar nëpër koshat urbanë. Ata, e dinë mirë se dikush ka abuzuar që i ka hedhur në ato kosha mbetjet e rrezikshme.
    Mbetjet përmbajnë baktere, viruse, materiale që mund të përhapin sëmundje vdekjeprurëse. Ata rrëfejnë se kanë gjetur mbetje kirurgjikale, mbetje indesh njerëzore nga sallat e operacioneve, kimikate.
    Qytetari: Ju nuk bëni mirë kështu, edhe ju edhe Policia e Shtetit. Vini këtu më drejtohesh mua…
    Gazetarja: Pse?
    Qytetari: Ata që kanë atë aty janë të tërë mafiozë, vijnë e më vrasin mua dhe nuk ke çfarë i bën. Ku e di ti që ai nuk e merr vesh që nuk ti kam thënë unë ty këto? Edhe policia e shtetit thotë hajde denonco, po çfarë të denoncoj unë, ai të vret, të vret ty e jo mua. Ti çfarë pune bën? Kape shkopin vetë dhe kontrollo, po të doli mirë. Ja dil këtu ti një ditë të tërë nga mëngjesi deri në darkë dhe do ta shikosh do ta gjesh qeskën apo jo… Jo qese, por plasmas të zi e ke, dhe kam çarë disa herë duart. Gjeje, po nuk e gjete mua më rrahin ata, më vrasin po të them.
    Ky bashkëbisedim është zhvilluar pranë koshave të mbetjeve urbane që ndodhen përballë urgjencës së Qendrës Spitalore Universitare Tiranë. Qytetari rrëfen çfarë ka parë, por edhe frikën që i kanoset nëse tregon për median apo persona të tjerë.
    “Të kenë kontakt me mbetjen spitalore pra të kontaminohen dhe krijohet ai që thamë rreziku i menjëhershëm për shëndetin e këtyre personave që kanë kontakt të drejtpërdrejte me këto mbetje”, tha Kreu i Urdhrit të Farmacistëve, Dëfrim Goma.
    “Ato në fakt duhen zhdukur brenda ditës sepse të jemi shumë të qartë 4-5 ditë janë shumë për mbetje biologjike. provoni ju të lini diçka jashtë frigoriferit 4-5 ditë me këto temperatura për të kuptuar se çfarë i ndodh”, tha mjeku infeksionist, Ilir Alimehmeti.
    Ekzistojnë dy forma të mbetjeve që prodhohen brenda sektorit shëndetësor, mbetjet e rrezikshme dhe ato jo të rrezikshme. Të rrezikshmet përfshijnë mbetjet e mprehta, ato laboratorike, indet njerëzore, indet shtazore si dhe ato citostatike, farmaceutike, kimike apo radioaktive.

    Top Channel

  • ‘Trump ka të drejtë për Venezuelën’, liderja e opozitës, Machado: Maduro është narko-terrorist

    ‘Trump ka të drejtë për Venezuelën’, liderja e opozitës, Machado: Maduro është narko-terrorist

    Liderja e opozitës venezueliane, Maria Corina Machado, flet me adhurim rreth politikave dhe qëndrimit të Donald Trump ndaj vendit të saj.

    Ndërsa Shtëpia e Bardhë shqyrton mundësinë e një përshkallëzimi ushtarak, politikania fituese e Çmimit Nobel për Paqen tha se qëndrimi i Trump është “absolutisht i saktë”.
    Duke folur nëpërmjet një video-mesazhi në Forumin Amerikan të Biznesit në Miami, ajo tha gjithashtu se Presidenti Venezuelës Nicolas Maduro “nuk është një kryetar legjitim shteti” dhe se veprimet e Trump “do të mbrojnë miliona jetë qytetarësh të Amerikës Latine dhe sigurisht qytetarë Venezuelianë”.
    Machado foli nga një vendndodhje sekrete. Ajo e quajti Maduron “kreun e një strukture narko-terroriste që i ka shpallur luftë popullit Venezuelës dhe vendeve demokratike të rajonit”.
    Ajo madje pretendoi se strukturat kriminale e mbështetën regjimin duke kontrabanduar drogë, ar, armë dhe madje edhe trafikim njerëzor. “Duhet t’i ndaloni këto flukse parash”, tha ajo, duke theksuar se “Maduro e filloi këtë luftë dhe Presidenti Trump po i jep fund asaj”.
    Politico kujton se qeveria amerikane ka sulmuar tashmë më shumë se 10 anije venezueliane që pretendon se transportonin drogë. Të paktën 60 persona u vranë në këto sulme. Këtë vit, qeveria amerikane dyfishoi shpërblimin për kapjen e Maduros në 50 milionë dollarë, pas akuzave për konspiracion me drogën në vitin 2020, dhe shtoi Venezuelën në listën e vendeve të trafikimit të drogës.
    Megjithatë, Machado nuk iu referua thashethemeve se Trump po shqyrton ndërhyrjen ushtarake në Venezuelë, si dhe veprimeve që mund të çojnë në largimin e tij nga pushteti.

    Top Channel

  • Vjedhje dhe shantazhet online, 1109 vepra penale në 10 muaj ku më të rrezikuarit janë fëmijët

    Vjedhje dhe shantazhet online, 1109 vepra penale në 10 muaj ku më të rrezikuarit janë fëmijët

    Në një kohë kur lundrimi në internet zgjat me orë të tëra dhe jeta jonë po orientohet gjithmonë e më shumë drejt online-s, po ekspozohemi ndaj një lloji të ri krimi që zhvillohet në celular.

    Është i padukshëm por pasojat e tij janë të rënda, që cenojnë dinjitetin, vjedhin identitetin apo cenojnë të ardhurat e gjithsecilit. Referuar statistikave të policisë së shtetit, në 10 muajt e parë të këtij viti  janë shënuar 1109 vepra penale që lidhen me krimet kibernetike.
    “Të gjithë jemi të ekspozuar ndaj këtij krimi nëse nuk tregohemi të kujdesshëm. Më vurnerabël janë fëmijët dhe të moshuarit.  Të dhënat keqpërdoren kur ato bëhen publike, të dhënat bankare nëse i bëjmë publike na boshatisen llogaritë.  Mund të krijohen profile të rreme të cilat mund të përdoren për shantazh. Fëmijët janë të brishtë dhe mund të ndajnë materiale të papërshtatshme me të njohur e të panjohur që dëmtojnë jetën dhe shëndetin e tyre mendor”, u shpreh drejtoresha e hetimit të krimeve kibernetike, Ervina Gjana.
    Impakti që këto krime kanë në jetën dhe të ardhurat e qytetarëve u duk qartë tek skemat piramidale online të goditura në Fier e Divjakë disa javë më parë.
    “Ishte hetim kompleks ku inteligjenca artificiale, social inginering dhe mjetet e sofistikuara financiare ishin të treja në një.   Ishte një skemë e përhapur sepse përdorte joshjen”, u shpreh Gjana.
    Por mjaft të përhapura dhe me dëme ekonomike janë skemat fishing, ku biznese dhe qytetarë prezantohen me linqe që në dukje I përkasin kompanive serioze apo postave por në fakt janë të rreme dhe nëpërmjet të dhënave bankare që qytetarët plotësojnë ju hakohen llogarite.
    Rasti më i fundit u shënua në kryeqytet ku 2 kinezë të cilët tashmë u vunë në pranga  kishin ndërtuar një faqe që përngjante me postën shqiptare. Ata dërguan rreth 5 mijë mesazhe në Shqipëri ku u kërkohej klientëve një pagesë modeste për të tërhequr një pako por qëllimi i vërtetë ishte zbrazja e llogarive.

    Top Channel

  • Ambasadori Gonzato i dorëzon Progres Raportin, Ministrja Spiropali: Treguesi më serioz i Shqipërisë që sheh nga e ardhmja

    Ambasadori Gonzato i dorëzon Progres Raportin, Ministrja Spiropali: Treguesi më serioz i Shqipërisë që sheh nga e ardhmja

    Ambasadori Silvio Gonzato i ka dorëzuar sot Ministres për Europën Elisa Spiropali, Raport Progresin e Komisionit Europian.

    Në një reagim në rrjetet sociale, ministrja shprehet se ky raport është treguesi më serioz i Shqipërisë që sheh me sytë nga e ardhmja
    “Ambasadori Silvio Gonzato më dorëzoi sot Raport Progresin e Komisionit Europian, treguesin më serioz të Shqipërisë që sheh me sytë nga e ardhmja, për punët e mira dhe për sfidat që na presin”, shkruan Spiropali.

    Top Channel

  • Mamdani me shqiponjën shqiptare/ Fotot e Kryebashkiakut të ri të Nju Jorkut që u bënë virale, flet i riu shqiptar që i shkrepi

    Mamdani me shqiponjën shqiptare/ Fotot e Kryebashkiakut të ri të Nju Jorkut që u bënë virale, flet i riu shqiptar që i shkrepi

    Zohran Mamdan, kryetari i ri i Bashkisë së New York-ut shfaqet me shqiponjë. Janë këto fotografi që po kthehen virale në internet, të shkrepura nga i riu me origjinë shqiptare, Erzen Gashi.

    “Ka shokë shqiptarë, e ka parë që bëjnë shqiponjën ashtu edhe djali që është në foto me të i ka thënë a po e bëjmë shqiponjën për një foto? Edhe ashtu e ka lëshuar vetë”, u shpreh fotografi Erzen Gashi.
    37-vjeçari i lindur në Slloveni, i rritur në ShBA, por me babin nga Kosova dhe mamin nga Mali i Zi tregon për Top Channel takimin e Mamdan gjatë fushatës elektorale me komunitetin shqiptar në New York.
    “Fotot e Mandamit që i kam bërë falë një shokut Dritan Fida që më thirri për një event me shqiptarët edhe i njeh se jemi shumë shqiptarë këtu, e donte të dinte më shumë. Duket i vërtetë si në video dhe foto, është njeri i mirë dhe i ëmbël… kollaj mund të flasësh me të, të bësh shoqëri me të”, tha Gashi.
    Fitorja e të riut mysliman Zohran Mamdan me prejardhje afrikano-indiane, u cilësua historike dhe Erzeni zbulon si është pritur rezultati i tij.
    “Fola me të pak. I tregova që jam mysliman, që jam emigrant. Mua më duket sikur shqiptarët janë për të, kanë besim. Ka kohë që s’ka pasur një atmosferë kaq të mirë se unë që 30 vite jetoj këtu e kam parë këtë qytet duke shkuar poshtë me shtrenjtësi, vështirësi… tash emigrantët kanë frikë në krejt Amerikën dhe kemi besim se do na mbrojë”, u shpreh ai.
    Fotoja me shqiponjën shpreson të shumëfishohet, sepse Erzeni ka pasion fotografinë por ka studiuar në sektorin shëndetësor e punon në spital; e beson për një ofertë pune nga kryebashkiaku i ri i New York.
    “Ja kam çuar fotot që kam bërë atë ditë dhe i kam thënë që nëse keni nevojë prapë, kisha pasur qejf se më shumë dua fotot e videot sesa punën që bëj”, përfundoi ai.

    Top Channel

  • Mbi një orë mbledhje në PS, Rama-deputetëve të Tiranës: Pavarësisht vendimit të Kushtetueses, duhet të jemi gati për zgjedhje në çdo kohë

    Mbi një orë mbledhje në PS, Rama-deputetëve të Tiranës: Pavarësisht vendimit të Kushtetueses, duhet të jemi gati për zgjedhje në çdo kohë

    Rreth një orë e gjysmë ka zgjatur mbledhja në selinë rozë, mes kryeministrit Edi Rama dhe deputetëve të qarkut të Tiranës, por dhe ministrat dhe kreun e Grupit Parlamentar. 

    Burime bëjnë me dije se në mbledhje Rama ka qenë i prerë me porositë, ku ka kërkuar rienergjizim të PS në Tiranë.
    Një tjetër porosi e kreut të ekzekutivit  ishte organizimi për Tiranën, komunikimi me njerëzit dhe adresimin e problematikave të njësive.
    Mos të humbim ritmin e punës së partisë në Tiranë, mëson gazetari i top Channel, Muhamed Veliu, të jetë shprehur Rama në mbledhjen me dyer të mbyllura.
    “Pavarësisht situatës nga Kushtetuesja ne duhet të jemi gati për zgjedhje në çdo kohë”, citojnë burimet brenda mbledhjes.
    Kujtojmë se një nga zhvillimet e fundit e cila prek politikisht PS është vendimi i Kushtetueses për të anuluar zgjedhjet e pjesshme në Tiranë.
    Më herët, PS kishte dalë me Ogerta Manastirliun si kandidate për bashkinë e Tiranës, por tashmë Kushtetuesja vendosi se zgjedhje nuk do të ketë dhe kryetar bashkie do të vijojë të jetë Erion Veliaj.
     
     

    Top Channel

  • Angelina Jolie në Kherson, ylli i Hollivudit viziton një maternitet dhe një spital në Ukrainë

    Angelina Jolie në Kherson, ylli i Hollivudit viziton një maternitet dhe një spital në Ukrainë

    Angelina Jolie, një ish-ambasadore e OKB-së për refugjatët, bëri një vizitë surprizë në Kherson, në jug të Ukrainës, të mërkurën.

    Aktorja amerikane vizitoi objekte mjekësore, duke përfshirë një maternitet dhe një spital pediatrik, në një qytet që ishte nën kontrollin rus për shumë muaj në vitin 2022.
    Një zyrtar lokal, Vitaly Bogdanov, postoi një foto në Facebook ku shihet Angelina Jolie e veshur me një jelek antiplumb me simbole ukrainase. Vizita duket se ka pasur edhe disa kthesa të papritura.

    Angelina Jolie receives a commemorative “Kherson” coin as a gift in an actual city of Kherson, Ukraine.
    I just want to remind everyone abroad about Russia’s “human safari” in Kherson – they hunt civilians with drones. It’s one of the most dangerous places in Ukraine, and one… pic.twitter.com/UO7TEBK9Pc
    — Kate from Kharkiv (@BohuslavskaKate) November 5, 2025

    Në një pikë kontrolli, autoritetet zbuluan se një nga truprojat e Jolie-s nuk ishte rekrutuar dhe e çuan menjëherë në zyrën e rekrutimit. Thuhet se ishte e nevojshme që vetë Jolie të ndërhynte për t’i dhënë fund incidentit. As aktorja dhe as qeveria ukrainase nuk kishin komentuar për vizitën.

    Angelina Jolie has just arrived to Lviv, Ukraine. pic.twitter.com/Cs894omI9d
    — Visegrád 24 (@visegrad24) April 30, 2022

    Ylli i Hollivudit, e cila ishte Komisionere e Lartë e OKB-së për Refugjatët nga viti 2012 deri në vitin 2022, kishte vizituar Ukrainën disa muaj pas fillimit të pushtimit rus dhe ishte takuar me persona të zhvendosur në Lviv, në pjesën perëndimore të vendit.

    Top Channel

  • Plagoset me armë zjarri 30-vjeçari në Bathore, detajet e para

    Plagoset me armë zjarri 30-vjeçari në Bathore, detajet e para

    Një 30-vjeçar është plagosur me armë zjarri në kryeqytet.

    Elvis Visha është dërguar për mjekim në spital, jashtë rrezikut për jetën.
    “Rreth orës 18:45, është dërguar për mjekim në spital, jashtë rrezikut për jetën, shtetasi E. V., rreth 30 vjeç, i cili dyshohet se është plagosur në krahë me armë zjarri, në Bathore“, njofton policia.
    Grupi hetimor po punon për identifikimin dhe kapjen e autorit, si dhe për sqarimin e plotë të rrethanave të rastit.

    Top Channel

  • Falen 507 milionë euro borxhe/ Zerohen detyrimet në tatime dhe dogana për subjektet gjatë viteve 2014-2024

    Falen 507 milionë euro borxhe/ Zerohen detyrimet në tatime dhe dogana për subjektet gjatë viteve 2014-2024

    Fatura e borxheve tatimore dhe doganore të papaguara të krijuara në një periudhë 10 vjeçare arrin vlerën e 507 milionë eurove.

    Projektiligji i cili përcakton edhe këto detyrime i titulluar si  “Ligji për fshirjen, shuarjen dhe pagesën e detyrimeve tatimore ndaj administratës tatimore qendrore dhe detyrimeve të pagueshme në doganë” ka nisur procedurën e konsultimeve me grupet e interesit.
    “Neni 5, parashikon fshirjen e plotë të detyrimeve tatimore direkte apo indirekte të papaguara që i përkasin periudhave deri më 31 dhjetor 2014, përveç kontributeve të sigurimeve shoqërore dhe shëndetësore. Për këto të fundit, parashikohet fshirja ose shuarja e dënimeve administrative dhe kamatëvonesave për periudhat deri më 31 dhjetor 2014, duke përfshirë edhe të vetëpunësuarit në bujqësi, por pa përfshirë kontributin. Po ashtu, ky nen parashikon faljen e gjobave dhe kamatëvonesave në rastet kur është paguar principali”, deklaron Ministria e Financave.
    Këto janë dhe borxhet e përllogaritura nga Ministria e Financave deri nga fundi i 2014 deri në dhjetor 2024. Ajo çfarë vihet re është përllogaritja e borxheve sipas periudhave mujore dhe vjetore ku theksi vihet tek ajo 10-vjeçare.
    Sipas relacionit, detyrimet e vjetra mbi 10 vjet deri në fund të 2014 arrijnë vlerën prej rreth 507.3 milionë eurosh, që përbëhen nga 295 milionë euro borxhe tatimore dhe 257.6 milionë euro borxhe doganore për periudhën deri në fund të vitit 2014.
    Por si do të veprohet me skemën e faljes?
    Për periudhën deri më 31 dhjetor 2014: detyrimet tatimore/doganore do të fshihen tërësisht, përveç sigurimeve shoqërore/shëndetësore për këto të fundit fshihen vetëm gjobat dhe kamatëvonesat, por jo kontributi vetë.
    Por për periudhën 1 janar 2015 – 31 dhjetor 2019 lehtësirat do të jenë me kushte. Për të përfituar, subjekti duhet të paguajë një pjesë (50% menjëherë ose 75% në këste) përpara afateve (30 qershor 2026 ose 31 dhjetor 2026) dhe në këto raste gjobat dhe interesat fshihen.
    Për periudhën 1 janar 2020 – 31 dhjetor 2024: ndalon fshirjen e principalit, por fshihen gjobat/kamatë të kushtëzuara me pagesën e detyrimit të plotë brenda 31 dhjetorit 2026.
    Janë rreth 207 mijë e 71 tatimpagues debitorë por jo të gjithë tatimpaguesit do të përfitojnë nga lehtësitë. Përjashtohen bizneset e dënuar me vendim gjyqësor të formës së prerë ose janë në proces gjyqësor për vepra penale në fushën tatimore ose doganore.
    Ndërsa shifra totale e borxheve të papaguara  vetëm për tatime dhe dogana për periudhat deri në fund të vitit 2024 shkon në rreth 211 miliardë lekë  apo 1.7 miliardë euro, nisma e “Paqjes Fiskale” synon të përqendrohet kryesisht në fshirjen e detyrimeve shumë të vjetra (deri më 31 dhjetor 2014) në vlerën prej 507 milionë euro. Megjithatë, kjo fshirje nuk përfshin kontributet për sigurime shoqërore e shëndetësore duke lënë kështu një pjesë të konsiderueshme të detyrimeve në ngarkim për vetëpunësuarit dhe kontributdhënësit.
    Në këtë kontekst, nisma shihet si një strategji për “pastrimin” e stokut të borxheve të vjetra dhe për përmirësimin e financave publike por pika kryesore e vëmendjes mbetet se përfitimi nuk është gjithëpërfshirës dhe ka kushte të qarta që duhet përmbushur.

    Top Channel

  • Zbardhet dosja e SPAK për tunelin e Llogarasë, përfshihen komunikime mes zv.kryeministres Balluku dhe ish-drejtorit të ARSH, Berberi

    Zbardhet dosja e SPAK për tunelin e Llogarasë, përfshihen komunikime mes zv.kryeministres Balluku dhe ish-drejtorit të ARSH, Berberi

    SPAK ka marrë të pandehur katër zyrtarë të Ministrisë së Infrastrukturës në lidhje me procedurat e tenderit për ndërtimin e tunelit të Llogarasë, ndër të cilët edhe Mirzeta Kashnica, specialiste e nivelit të lartë në këtë ministri.

    Sot është publikuar dosja e Prokurorisë së Posaçme që lidhet me rastin e Kashnicës, ku përfshihen komunikime mes zyrtarëve të ministrisë dhe ish-drejtuesve të Autoritetit Rrugor Shqiptar, si edhe mes tyre dhe zëvendëskryeministres Belinda Balluku, për ecurinë e procesit të tenderimit.
    Pjesë nga dosja u bënë publike fillimisht nga kryetari i grupit parlamentar të PD-së, Gazment Bardhi, në një konferencë për shtyp, dhe më pas u përmendën edhe nga kryetari i PD-së, Sali Berisha, gjatë mbledhjes së grupit parlamentar.
    Në 45 faqet e dosjes për Mirzeta Kashnicën, prokuroria ka përfshirë disa komunikime të cituara si pjesë e hetimit mbi mënyrën e zhvillimit të procedurave për tenderin, me një vlerë rreth 190 milionë euro.
    Në një prej bisedave të përfshira, gjatë procesit të parë të tenderimit, Balluku i shkruan një prej vartësve: “Mendoj ta anulojmë, skualifikoji të gjithë”, ndërsa ish-drejtori i ARRSH-së, Evis Berberi, i përgjigjet: “Jam mëse dakord, se kam diçka që s’më kuadron në gjithë situatën. Kur e do, sot apo nesër?”. Më pas, Balluku shton: “Kam atë ndjesinë time që nuk duhet”, dhe Berberi vijon: “E ke të fortë ndjesinë. Kur e do?”.
    Në dosje përfshihen gjithashtu komunikime të tjera ndërmjet zyrtarëve të ministrisë dhe ARRSH-së lidhur me tenderin e dytë, i cili më pas u fitua nga një kompani turke.
    Burime pranë çështjes theksojnë se hetimet janë ende në fazën e verifikimeve dhe nuk ka ende një qëndrim përfundimtar mbi përgjegjësitë individuale apo institucionale.

    Top Channel