Lajmidites.com

Author: Top-Channel.tv

  • Një milion euro për ekzekutimin e prokurorit belg, arrestohen tetë persona, pjesë e klanit shqiptar të drogës

    Një milion euro për ekzekutimin e prokurorit belg, arrestohen tetë persona, pjesë e klanit shqiptar të drogës

    Tetë persona, të cilët dyshohen se janë pjesë e një klani shqiptar të përfshirë në trafikun e drogës, janë vënë në pranga në Belgjikë pasi dyshohen për një komplot ndaj prokurorit të Brukselit Julien Moinil.

    Le Soir shkruan se këtë të martë janë kryer 18 bastisje në kuadër të hetimeve për kërcënimet me vdekje ndaj Prokurorit të Mbretit në Bruksel, Julien Moinil.
    Pak ditë më parë mediat investigative ndërkombëtare raportuan se për kokën e të cilit, mafia shqiptare kishte vënë një çmim prej 1 milion euro.
    Kontrollet janë kryer kryesisht në Bruksel, por edhe në Leuven. Tetë persona janë ndaluar dhe aktualisht po merren në pyetje.
    Pas marrjes në pyetje, gjykatësi do të vendosë nëse ata do të mbeten në paraburgim,” shton prokuroria
    Gjatë muajit korrik 2025, prokuroria federale është informuar nga policia gjyqësore federale e Brukselit për një komplot të mundshëm për të kryer një atentat ndaj Prokurorit të Mbretit në Bruksel.
    “Të dyshuarit kryesorë duket se kanë të kauar kriminale lidhur me trafikun e organizuar të drogës. Dyshohet se ata janë aktivë brenda rrjeteve kriminale shqiptare,” thekson ministria publike.
    “Gjatë muajve të fundit, policia gjyqësore federale e Brukselit, nën drejtimin e një gjyqtari të ngarkuar me çështjen nga prokuroria federale, ka kryer një hetim të thelluar mbi të gjitha informacionet.
    Policia federale është angazhuar për disa muaj me radhë në këtë drejtim. Edhe brenda Prokurorisë Federale, disa prokurorë janë ngarkuar me ndjekjen e kësaj çështjeje.”

    Top Channel

  • Wynn Las Vegas, kazino luksoze apo rruga sekrete ku kalojnë miliardat e karteleve dhe investitorëve kinezë

    Wynn Las Vegas, kazino luksoze apo rruga sekrete ku kalojnë miliardat e karteleve dhe investitorëve kinezë

    Në dukje, kazinoja e famshme Wynn në Las Vegas është mishërimi i ëndrrës amerikane, kthesa të arta, liqene, palma, kamerierë me doreza të bardha.

    Por thellë-thellë, agjentët federalë amerikanë zbulojnë një realitet shumë më të errët, një “tubacion” miliardash ku takohen lojtarë të mëdhenj kinezë, kartele meksikane dhe një rrjedhë parash që kalon kufijtë, ligjet dhe bankat.Departamenti i Drejtësisë i SHBA-së njoftoi se Wynn Las Vegas pranoi të paguante mbi 130 milionë dollarë për të mbyllur përkohësisht një çështje penale jashtëzakonisht të rëndë. Kazinoja akuzohet për komplot me kompani të paligjshme të transferimit të parave në të gjithë botën për të lehtësuar rrjedhën e fondeve tek klientët e saj, duke funksionuar si një qendër në një sistem financiar paralel, jashtë radarit të rregullatorëve.
    CNN e përshkruan këtë si një “tubacion sekret” që kalon nëpër kazinonë më të madhe në Vegas dhe një nga më të mëdhatë në botë, duke kanalizuar jo vetëm fondet kineze që shmangin kontrollin e kapitalit të Pekinit, por edhe “paratë e zeza” nga kartelet e Amerikës Latine. Skema ishte thjesht logjike, por komplekse në ekzekutim. Wynn, sipas marrëveshjes së saj të mosndjekjes penale, punoi me “agjentë të pavarur” që vepronin si bankierë de facto. Ata rekrutuan lojtarë të pasur nga Kina dhe vende të tjera, organizuan blerjen e çipave dhe të parave në Las Vegas, dhe më pas krijuan rrugë komplekse përmes kompanive dhe llogarive në Amerikën Latine dhe Azi. Paratë përfundonin në llogari të kontrolluara nga kazinoja në Kaliforni dhe prej andej transferoheshin në arkën e Wynn. Në letër, gjithçka dukej e thjeshtë, lojtari paraqitej me kredi në kazino, luante dhe largohej. Në praktikë, një pjesë e “parave të zeza” pastrohej – qoftë fonde kineze që shkelin limitin vjetor prej 50,000 dollarësh, apo dollarë të kartelit që kërkonin një dalje “ligjore” nga SHBA-ja.
    Agjentët federalë përshkruajnë dy praktika tradicionale kineze të përdorura në Las Vegas: “Koka njerëzore” (ren tou): një lojtar blen çipa dhe luan në emër të dikujt tjetër që nuk mund ose nuk dëshiron të ekspozohet.
    “Para fluturuese” (qian chen), dollarët dorëzohen në para të gatshme në SHBA, ndërsa marrësi dërgon ekuivalentin në juan ose në një monedhë tjetër jashtë vendit.
    Kur investitorët kinezë takohen me kartelet
    Kartelet e Amerikës Latine nuk kërkojnë vetëm fitim, ato duhet të shndërrojnë kamionët me para në fonde të “pastra”. Në këtë hendek midis ligjshmërisë dhe ekonomisë në hije hyjnë ndërmjetësit kinezë, bankat nëntokësore dhe kazinotë. Autoritetet dokumentojnë raste ku rrjetet bankare kineze ndërmarrin “martimin” e dy rrjedhave, dollarët e karteleve që largohen nga SHBA-ja dhe fondet e biznesmenëve kinezë që shpëtojnë nga kufizimet e kapitalit të Pekinit.
    Paratë hyjnë në SHBA, investitorët kërkojnë dollarë jashtë vendit dhe juan brenda Kinës. Ndërmjetësit kryejnë “transformimin” në mënyrë që asgjë të mos lëvizë jashtë kontrollit, por bilancet dhe përfituesit ndryshojnë. Kur kjo skemë kalon nëpër kazino, dhoma VIP dhe “koka njerëzish”, zbulimi bëhet pothuajse i pamundur pa një hetim të koordinuar.
    Wynn është një nga kompanitë kryesore të industrisë, me qasje në banka të mëdha dhe ekspertë të nivelit të lartë të pajtueshmërisë. Megjithatë, kazinoja pranoi se lejoi lojëra fati me ndërmjetës, transferta komplekse ndërkufitare dhe marrëveshje me klientë të lidhur me organizata kriminale.
    Argumenti i kompanisë: Konkurrencë e ashpër, klientë VIP ndërkombëtarë dhe regjime valutore të ndërlikuara. Në realitet, autoritetet përshkruajnë një model biznesi të vetëdijshëm ku kazinoja mbylli sytë ndaj praktikave të paligjshme.
    Marrëveshja e mosndjekjes penale shpëton markën, por lë pas shumë pyetje: Sa kazino të tjera në Las Vegas, Makao dhe Manila kanë ndërtuar fitimet e tyre mbi gatishmërinë për të vepruar si “kanal” për fonde jashtë radarit?
    Në Evropë, ku qytetet po përpiqen të kopjojnë modelin e Las Vegasit, mesazhi është i qartë: Nëse pajtueshmëria është dekorative dhe kontrollet të lehta, të njëjtat qarqe kriminale do të gjejnë një shtëpi të re. Lojtarët kinezë me rreziqe të larta udhëtojnë kudo, dhe kartelet kërkojnë gjithmonë çarjen e radhës në sistem. Deri sa politika lejon që “tempujt e lojërave të fatit” të paraqiten si vendpushime të thjeshta argëtimi, kanalet e parave të vërteta do të fshihen jo në rrugicat e errëta, por nën llambadarët e shtrenjtë.

    Top Channel

  • Kate Middleton mban fjalimin e saj të parë publik pas dy vitesh: Dashuria është lidhja e parë dhe më thelbësorja

    Kate Middleton mban fjalimin e saj të parë publik pas dy vitesh: Dashuria është lidhja e parë dhe më thelbësorja

    Kate Middleton ka mbajtur fjalimin e saj të parë publik në dy vjet, duke u kërkuar udhëheqësve të biznesit të japin përparësi “kohës dhe dashurisë” krahas fitimit dhe suksesit.

    Princesha e Uellsit foli në eventin e Grupit të Punës për Biznesin e Fëmijërisë së Hershme, përpara udhëheqësve më të lartë të biznesit në Britani. Ishte fjalimi i saj i parë publik që nga nëntori i vitit 2023. Që atëherë, ajo ka postuar mesazhe të regjistruara në mediat sociale, duke përfshirë edhe rreth rikuperimit të saj gradual nga kimioterapia, por ky ishte fjalimi i saj i parë ballë për ballë.
    “Përkushtimi im dhe puna e Qendrës për Fëmijërinë e Hershme është e rrënjosur në një të vërtetë themelore, dashuria që ndiejmë në vitet tona të para formëson në thelb atë që bëhemi dhe mënyrën se si lulëzojmë si të rritur”, tha Kate Middleton.

    Ajo e përshkroi dashurinë si “lidhjen e parë dhe më thelbësore”, por edhe si “fijen e padukshme, të endur me kalimin e kohës, me kujdes dhe butësi, përmes marrëdhënieve të qëndrueshme dhe të dashura, për të krijuar mjedisin thelbësor rreth një fëmije”.
    Kate u foli sipërmarrësve rreth nevojës që familjet të jenë në gjendje t’u ofrojnë një mjedis mbështetës fëmijëve të tyre dhe u bëri thirrje atyre të rishqyrtojnë vendet e tyre të punës dhe të krijojnë një model të ndryshëm për prioritetet e tyre, në të cilin kompanitë do të “vlerësonin kohën dhe dashurinë aq sa vlerësojnë produktivitetin dhe suksesin”.
    Mesazhi qendror i Princeshës për udhëheqësit e biznesit të pranishëm ishte një sfidë e qartë, të rimendonin rolin e tyre në shoqëri. Kate Middleton theksoi se çdo mjedis, një shtëpi, një biznes, një vend pune, është një ekosistem që vetë njerëzit bëjnë përpjekjet e tyre për ta bërë të funksionojë siç duhet. “Në Qendrën për Fëmijërinë e Hershme, ne besojmë se duhet të bëjmë gjithçka që mundemi për të krijuar kushtet që dashuria të lulëzojë. Në këtë mënyrë, ne investojmë në të ardhmen tonë”, tha ajo. Rivendosja e dinjitetit në “punën e qetë, shpesh të padukshme të kujdesit” është, sipas Princeshës, çelësi për ndërtimin e një shoqërie më të lumtur dhe më të shëndetshme.

    Top Channel

  • “Them shpesh ‘përse po jetoj?’”/ Një vit nga vrasja e Martin Canit, rrëqeth nëna e 14-vjeçarit në ‘Goca dhe Gra’: Djali i vogël ende nuk e pranon

    “Them shpesh ‘përse po jetoj?’”/ Një vit nga vrasja e Martin Canit, rrëqeth nëna e 14-vjeçarit në ‘Goca dhe Gra’: Djali i vogël ende nuk e pranon

    Kjo e martë e 18 nëntorit shënon një vit nga vdekja e të miturit Martin Cani, i cili u vra nga bashkëmoshatari i tij me thikë pranë shkollës 9-vjeçare “Fan Noli”.

    Në një lidhje live në ‘Goca dhe Gra’, e ëma e Martin Canit, Florina Cani, foli për të birin nga dhomën të cilën ata e kanë kthyer në një muze për djalin e mitur që ndërroi jetë.
    “Ideja ishte e bashkëshortit por edhe e imja që Martinin ta mbajmë këtu me kujtimin e tij, i buzëqeshur dhe i dashur. Nuk duam ta harrojmë edhe pse ai iku në mënyrën të padrejtë. Viti më i vështirë sepse hera herës them pse jetoj, kur kujtoj Martinin që ikte në shkollë. Nuk ka gjë më të fortë se sa ta çosh në shkollë dhe mos të kthehesh më, ishte ditë tmerri. Në ditët e mia më të errëta shqiptarët më kanë ndenjur pranë. Familjarët i kemi pas pran por edhe shqiptarët na kanë respektuar pafund”, tha e ëma.
    Ajo po ashtu foli edhe për librin të cilin po e shkruan në kujtim të djalit.
    “Po e vazhdoj librin. Ardhja e Martinit në jetë dhe gjatë rritje ai ishte fëmijë shumë i veçantë. Nga lindja te ajo ditë e mallkuar që i mori jetën nga një bashkëmoshatar. Ai nuk e meritonte këtë.
    E kujtoj kur mori çantën dhe iku nëpër shkallë, deri kur shkonte te autobusi e shoqëroja me sy. Më tha mami ika, mirupafshim”, tha Florina.
    Për familjen e tyre dhimbja është edhe më e madhe, pasi sic tregoi edhe e ëma e Martinit, djali i tyre i vogël nuk e pranon akoma humbjen e të vëllait.
    “Ja kemi shpjeguar edhe djalit të vogël por ai e ka të pamundur ta pranojë që Martini nuk kthehet më. Por jetojmë në një shoqëri shumë të egër. Stop dhunës dhe bullizmit sepse jeta është e shenjt, në qoftë se ja merr nuk kthehet më mbrapsht. Të gjithë jemi fajtor dhe duhet punë jo neglizhencë”, tha ajo.

    Top Channel

  • Takimi me zyrtarin e DASH, Bardhi: Shqipëria ka nevojë reale për luftë kundër krimit

    Takimi me zyrtarin e DASH, Bardhi: Shqipëria ka nevojë reale për luftë kundër krimit

    Kryetari i Grupit Parlamentar të Partisë Demokratike, Gazment Bardhi, ka publikuar foto nga takimi me Drejtorin për Çështjet e Europës Perëndimore dhe Qendrore në Departamentin Amerikan të Shtetit, Mark Fleming.

    Në një reagim në Facebook ai shkruan se SHBA mbetet një partner kyç në mbështetjen e Shqipërisë dhe të ardhmes së saj europiane, ndërsa thekson se vendi ka nevojë për një luftë reale kundër krimit të organizuar.
    “Kënaqësi takimi me Drejtorin për Çështjet e Europës Perëndimore Qendrore në Departamentin Amerikan të Shtetit z. Mark Fleming. Lufta ndaj krimit të organizuar duhet të jetë prioritet i çdo vendi anëtar të NATO-s. Shqipëria ka nevojë për luftë reale ndaj krimit të organizuar, dhe për këtë nevojitet një qeverisje e përgjegjshme, e pa lidhur me krimin e organizuar, si dhe një drejtësi të pavarur dhe me integritet. SHBA ka qenë dhe mbetet një partner kyç në mbështetjen e Shqipërisë dhe të ardhmes së saj europiane”, shkruan ai.
     

    Top Channel

  • “Vendet kandidate i kanë institucionet për t’i luftuar këto raste”, Komisionerja e BE për hetimin e Ballukut: Hap përpara që u zbulua

    “Vendet kandidate i kanë institucionet për t’i luftuar këto raste”, Komisionerja e BE për hetimin e Ballukut: Hap përpara që u zbulua

    Komisionerja për Zgjerimin e BE-së, Marta Kos, shprehet se SPAK po funksionon dhe se hetimi i rasteve të korrupsionit të zyrtarëve të lartë është një hap përpara.

    Në një intervistë dhënë më “DW”, ajo u ndal edhe te hetimi për numrin dy të qeverisë, Belinda Balluku, duke theksuar se është më rëndësi që janë këto institucione që i zbulojnë këto raste, njëjtë siç ndodh në vendet e BE.
    “Për mua ky është një hap përpara, sepse këto raste janë zbuluar. Siç e përmenda më herët, kemi raste korrupsioni edhe brenda BE-së. Ato ndodhin kudo. E rëndësishme është të kemi institucione, vendet kandidate i kanë institucioni për t’i luftuar këto raste. Më pas do të jetë sistemi gjyqësor ose gjykatat që do të zbulojnë nëse ligji është shkelur dhe nëse është shkelur, se çfarë do të ndodhë më pas”, u shpreh kur u pyet për zv.kryeministren Balluku.
    “Disa raste në Shqipëri kanë treguar se agjencia SPAK po punon. Nëse shohim se rastet janë zbuluar, tregon se gjithashtu ne kemi bërë punë të mirë në procesin e pranimit. Dhe lufta kundër korrupsionit është në grupin e të ashtuquajturave „Themelore”, që do të thotë se kjo është me të vërtetë fusha ku ne bëjmë shumë përpjekje për të ndihmuar vendet kandidate. Nga ana tjetër, ato duhet të bëjnë shumë reforma. Për shembull, në Shqipëri, është kryer verifikimi i gjyqtarëve. Nuk është vërtet e lehtë. SPAK po jep rezultate. Por kjo nuk është e mjaftueshme. Ka të bëjë me ndryshimin e kulturës politike.
    Një vend mund të ketë ligjet më të mira të mundshme kundër korrupsionit por nëse korrupsioni pranohet gjerësisht nga njerëzit, atëherë nuk kemi bërë mjaftueshëm. Pra, kjo është pika kryesore e veprimit. Është e rëndësishme për ne, por gjithashtu është diçka ku ne jemi vërtet të rreptë. Në fakt, unë jam e rreptë dhe ne jemi të rreptë në të gjithë kapitujt që ata duhet të përmbushin dhe tani Shqipëria. Dua të theksoj se ne hapëm të gjithë grup-kapitujt, por tani fillon puna e vërtetë.
    Pra, duhet të negociojmë kapitull pas kapitulli. Ata duhet të përmbushin kriteret e ndërmjetme, kështu që ka disa kritere që duhet të përmbushin. Pasi të përmbushen, ne do të jemi në gjendje të mbyllim edhe kapitujt. Krimi i organizuar, anti-korrupsioni, sistemi i prokurimit publik, sistemi gjyqësor, të drejtat e njeriut, gjithçka që është në grupin e parë, është në të vërtetë kaq e rëndësishme, saqë ne e fillojmë dhe e mbyllim me të. Kështu që ne mund të monitorojmë edhe zhvillimet ndërmjet”, tha ajo për punën e SPAK.
     
     

    Top Channel

  • “Fizikisht ose online”, Këshilli Bashkiak letër SPAK dhe Drejtorisë së Burgjeve: Lejoni marrjen pjesë në mbledhje të Erion Veliajt

    “Fizikisht ose online”, Këshilli Bashkiak letër SPAK dhe Drejtorisë së Burgjeve: Lejoni marrjen pjesë në mbledhje të Erion Veliajt

    Këshilli Bashkiak i Tiranës i kanë dërguar një kërkesë zyrtare SPAK dhe Drejtorisë së Burgjeve, duke i kërkuar që t’i japin leje kryebashkiakut Erion Veliaj për të marrë pjesë në mbledhjen e radhës ditën e premte.

    Në shkresën zyrtare të firmosur nga Këshilltarët, theksohet se “duke qenë se pjesëmarrja e Kryetarit të Bashkisë është një e drejtë funksionale e garantuar me ligj, e nevojshme për prezantimin e drafteve, buxhetit, raportimeve vjetore dhe çështjeve të administrimit të njësisë së vetëqeverisjes vendore, ju kërkojmë që, nëse ndaj tij janë duke u zbatuar masa kufizuese, të vlerësohet lejimi i përkohshëm për pjesëmarrje fizike, ose, nëse kjo nuk është e mundur, mundësimi i pjesëmarrjes së tij nëpërmjet një modaliteti të përshtatshëm komunikimi (online, videokonferencë apo formë tjetër të aprovuar).
    Më tej thuhet se Këshilli Bashkiak është i gatshëm të bashkëpunojë plotësisht për çdo kërkesë sigurie, protokolli apo logjistike të institucioneve, me qëllim garantimin e një procesi ligjor, transparent dhe funksional.
     

    Top Channel

  • Atentat ish-ministrit rus të Mbrojtjes teksa vizitonte varrin e një familjari, si arriti të shpëtonte Sergei Shoigu

    Atentat ish-ministrit rus të Mbrojtjes teksa vizitonte varrin e një familjari, si arriti të shpëtonte Sergei Shoigu

    Sipas Moskovsky Komsomolets, objektivi i një atentati të dështuar thuhet se ishte Sergei Shoigu, ish-ministri rus i Mbrojtjes.

    Agjencia ruse e inteligjencës FSB (pasardhëse e KGB-së) kishte njoftuar më parë se një “zyrtar i lartë” ishte shënjestruar ndërsa vizitonte varrin e një anëtari të familjes në varrezat Troyekurovskoye në Moskë, pa zbuluar identitetin e tij. FSB pretendoi se agjentët e saj kishin zbuluar një pajisje shpërthyese me një kamera të fshehur, në një vazo me lule pranë varrit, duke deklaruar se ajo ishte përdorur për të monitoruar lëvizjet e zyrtarit të lartë.
    Gazeta Moskovsky Komsomolets, pa specifikuar burimet e saj, raportoi të hënën vonë se objektivi i supozuar i komplotit të dështuar të vrasjes ishte ish-ministri i mbrojtjes i vendit dhe sekretari aktual i Këshillit të Sigurisë.
    Deputeti i lartë i Dumës Shtetërore Andrei Kolesnik pretendoi se komploti i supozuar kundër Shoigut ishte pjesë e një përpjekjeje më të gjerë për të destabilizuar Rusinë. “Qëllimi i tyre ishte të mbjellin panik”, tha Kolesnik.
    Sipas gazetës ruse, zyrtarët e FSB-së ende nuk kanë komentuar mbi raportin e saj. Në deklaratën e saj, FSB-ja pretendoi se shërbimet e inteligjencës ukrainase rekrutuan një çift rus, një emigrant të paligjshëm nga Azia Qendrore dhe një banor të Kievit me emrin Dzhalolindin Shamsov, për të vrarë Shoigun. Çifti rus dhe banori i Azisë Qendrore u arrestuan, tha agjencia, por nuk ishte e qartë se me çfarë akuzash përballeshin.
    Mediat shtetërore publikuan një video të FSB-së që tregonte gruan ruse të arrestuar duke rrëfyer se i ishte premtuar drogë në këmbim të vendosjes së kamerës në vazon e fshehur në varrin në varrezave Troyekurovskoye. Nuk ishte menjëherë e qartë nëse gruaja, emri dhe mosha e së cilës nuk u zbuluan, kishte pranuar fajin nën presion. FSB tha se kishte lëshuar një urdhër arresti për Shamsov me akuzat për trafikim të paligjshëm armësh, që dyshohet se lidhet me një vrasje të vitit 2021 në republikën e Bashkortostanit.

    Top Channel

  • Dhoma e Përfaqësuesve urdhër Departamentin të Drejtësisë së Trump për publikimin e dosjes ‘Epstein’, projektligji kalon në Senat

    Dhoma e Përfaqësuesve urdhër Departamentin të Drejtësisë së Trump për publikimin e dosjes ‘Epstein’, projektligji kalon në Senat

    Dhoma e Përfaqësuesve ndërmori një hap të rëndësishëm, duke urdhëruar Departamentin e Drejtësisë të Presidentit Donald Trump që të publikojë të gjitha dosjet hetimore lidhur me Jeffrey Epstein, i cili është dënuar për krime seksuale, vendim që erdhi pas muajsh grindjesh brenda Partisë Republikane.

    Masa, që ka fituar mbështetje të gjerë nga shumica e republikanëve, tani do të kalojë në Senat, ku liderët e Partisë Republikane duhet të vendosin nëse do ta dërgojnë atë në tavolinën e Presidentit Trump për nënshkrim. Presidenti Trump ka thënë se do ta nënshkruajë projektligjin nëse ai kalon Kongresin, pasi më parë e kishte quajtur këtë çështje një “mashtrim demokrat”.
    Pavarësisht përpjekjeve të udhëheqësve republikanë, përfshirë Kryetarin e Dhomës së Përfaqësuesve, Mike Johnson, për të zbutur shqetësimet mbi privatësinë e viktimave të Epstein, masat tani kanë kaluar me mbështetje të gjerë. Johnson tha se ai do të kërkojë nga Udhëheqësi i Shumicës në Senat, John Thune, të shtojë mbrojtje të tjera nëse ligji kalon atje.
    Ky është një zhvillim i papritur për Presidentin Trump dhe liderët republikanë, të cilët kishin bërë përpjekje të shumta për të ndaluar masën, që u udhëhoq nga përfaqësuesi i Partisë Republikane, Thomas Massie, dhe që u mbështet fuqimisht nga demokratët. Pasi shihej një mundësi për humbje të turpshme, Trump pranoi të tërhiqej dhe e lejoi masën të kalonte.
    “Ky është një moment i vonuar,” tha Massie para votimit.
    Ai theksoi se ai dhe të tjerët që e mbështetën këtë masë kishin luftuar kundër presidentit, prokurorit të përgjithshëm dhe drejtorit të FBI-së, për të arritur këtë fitore.
    Massie, i cili ka qenë objekt i kritikave të ashpra nga Trump dhe këshilltarët e tij, e priti kthesën e presidentit. “Ajo që po bën Trumpi këtë javë është forcimi i pozicionit të tij duke u bashkuar me ne, dhe ne jemi të lumtur që e kemi atë,” tha ai.
    Përpjekjet e udhëheqësve republikanë për të bllokuar publikimin e dosjeve të Epstein kanë çuar në grindje të brendshme. Përfaqësuesja Marjorie Taylor Greene është bashkuar me Massie në kërkesën për publikimin e dokumenteve, duke bërë që Trump ta cilësonte atë “tradhtare”.
    Massie dhe përfaqësuesja demokrate Ro Khanna kanë nisur një fushatë për të anashkaluar udhëheqësit e Partisë Republikane dhe për të sjellë një projektligj në sallë pa miratimin e tyre. Shtëpia e Bardhë ka bërë përpjekje për të bllokuar këtë iniciativë, duke kërcënuar publikisht Massie dhe Greene, por pa sukses.
    Së fundi, Massie dhe Khanna arritën të siguronin firmën e 218-ë të nevojshme për të detyruar Kryetarin e Dhomës të sjellë masën në seancë.
    Përfaqësuesja demokrate, Adelita Grijalva, e cila dha nënshkrimin përfundimtar, theksoi se kjo nuk ishte një çështje partiake. “Kjo është një kërkesë nga kombi. Kjo nuk është një çështje partiake,” tha ajo.
    Në të njëjtën kohë, Komisionet hetimore të Dhomës së Përfaqësuesve kanë nisur hetimet mbi çështjen Epstein, një çështje që ka qenë një burim tensioni dhe përçarje në Uashington.

    Top Channel

  • 18-vjeçari po përgatiste sulm terrorist në festivalin e Stokholmit, pranon lidhjen me Shtetin Islamik

    18-vjeçari po përgatiste sulm terrorist në festivalin e Stokholmit, pranon lidhjen me Shtetin Islamik

    Një 18-vjeçar me shtetësi të dyfishtë, suedeze dhe siriane, në gjyq në Suedi rrëfeu të martën se kishte planifikuar një sulm terrorist në një festival të madh kulturor në Stokholm në emër të Shteti Islamik, tha avokati i tij të martën.

    Burri kishte premtuar vazhdimisht besnikëri ndaj Shtetit Islamik, sipas aktakuzës. Johan Ackermark, avokati i tij, i tha AFP-së se klienti i tij u deklarua fajtor për akuzat e “përgatitjes së një krimi terrorist” dhe “përgatitjes së krimeve të rënda (duke përdorur) produkte shpërthyese”. I riu akuzohet gjithashtu, së bashku me një 17-vjeçar, për tentativë vrasjeje në Gjermani në gusht 2024, një akuzë që ai e mohon, tha Ackermark.
    Përgatitjet u zhvilluan midis gushtit 2024 dhe shkurtit 2025, sipas prokurorisë. I dyshuari kishte qenë nën hetim nga hetuesit që nga gjysma e dytë e vitit. Hetimi “bëri të mundur parandalimin e një sulmi të rëndë terrorist në Suedi”, tha prokurori Henrik Olin në kohën e ngritjes së aktakuzës. Sipas prokurorëve, i pandehuri kishte ndërmend të kryente sulmin e tij në Festivalin e Kulturës së Stokholmit në gusht, në një park në qendër të kryeqytetit, duke përdorur eksplozivë dhe armë.I akuzuari kishte blerë gjithashtu një kamerë trupi për të filmuar sulmin dhe kishte përgatitur një video ku merrte përgjegjësinë. Burri u arrestua në Stokholm më 11 shkurt dhe që atëherë ka qenë në paraburgim. Gjykimi filloi javën e kaluar dhe do të përfundojë më 26 nëntor.

    Top Channel