Lajmidites.com

Author: Syri.net

  • VIDEO/ Teliti: Tirana me buxhet 500 mln euro, por pa çerdhe e shkolla. Ku shkojnë paratë e qytetarëve?

    VIDEO/ Teliti: Tirana me buxhet 500 mln euro, por pa çerdhe e shkolla. Ku shkojnë paratë e qytetarëve?

    Nënkryetari i Këshillit Bashkiak të Tiranës, Dorian Teliti, gjatë një interviste në ‘Edicionin e Pasdites’ në SYRI TV me moderatorin Bled Marku, ka ngritur akuza të forta ndaj administrimit financiar të Bashkisë së Tiranës, duke u shprehur se, megjithëse kryeqyteti ka një buxhet mbi 500 milionë euro, vazhdon të vuajë për investime bazike në çerdhe, kopshte dhe shkolla.

    Teliti tha se qytetarët dhe bizneset e Tiranës paguajnë çdo vit taksa të dedikuara për gjelbërimin dhe infrastrukturën arsimore, por fondet nuk shkojnë në destinacion.

    ‘Ju e patë edhe deklaratën, që do jenë ndërtuesit që do marrin leje në të ardhmen, të cilët do të kontribuojnë në pyllëzimin e Tiranës. Jo mor vëlla, ne e paguajmë taksën për gjelbërimin. Bizneset e Tiranës paguajnë taksë për gjelbërimin, familjet paguajnë taksën. Ku shkojnë këto para? Pse nuk shkojnë këto para për gjelbërimin e Tiranës?’

    Ai akuzoi Bashkinë se po lejon ndërtimet të pushtojnë hapësirat publike, përfshirë Parkun e Liqenit.

    ‘Si është e mundur që liqeni, kodrat e liqenit dhe pjesa e liqenit të Tiranës, parkut, parku kombëtar i liqenit vetëm kafshohen nga ndërtimet dita-ditës? Pse duhet që t’i japim leje të reja ndërtimi që këta ndërtuesit që do marrin leje të ndërtimit, të mbjellin disa pemë të reja? Jo mor, ne i kemi paguar dhe paret për këto.’

    Sipas Telitit, vetëm për infrastrukturën arsimore janë paguar rreth 60 milionë euro gjatë viteve të fundit, por qyteti ende vuan mungesën e shkollave.

    ‘Ku janë paratë që neve kemi paguar me taksë dhe të dedikuar madje për infrastrukturën arsimore, 60 milionë euro gjatë viteve të fundit? Si është e mundur që ende sot vuajmë për shkolla, për struktura arsimore, në këtë Tiranë e cila… paguan nja 300 milionë euro taksa dhe tarifa vit për vit. Plus transfertat buxhetore që jep dhe qeveria… shkojnë mbi 500 milionë euro.’

    Ai denoncoi faktin që Bashkia është katër herë poshtë planit për investime, ndërkohë që ka një performancë të lartë në mbledhjen e të ardhurave.

    ‘Jemi katër herë poshtë planit, katër herë më pak sesa planifikimi në kryerjen e investimeve. Ama kokë më kokë përsa i përket mbledhjes së të ardhurave.’

    Teliti kundërshtoi argumentin se mungesa e kryetarit të bashkisë po sjell bllokim në institucion.

    ‘Po pse kur vjen puna funksionojnë tatimet, taksat e Tiranës për të mbledhur paret, paret e sipërmarrjes me anë dhe të qytetarëve? Pse funksionon aty? Pse funksionojnë gjobat që vendosen nga policia bashkiake? Pse këto struktura kur vjen puna për të ndëshkuar dhe për të marrë para nga xhepat tanë, funksionojnë? Po nuk funksionojnë strukturat që duhet të kthejnë mbrapsht shërbimet tek ne?’

  • FOTO/ Greqi, aksidentohet autobusi me 30 pelegrinë, ka të lënduar

    FOTO/ Greqi, aksidentohet autobusi me 30 pelegrinë, ka të lënduar

    Një autobus me 30 pelegrinë doli nga rruga dhe u përmbys në afërsi të Athinës.

    Sipas raportimeve të mediave greke, 12 persona u plagosën lehtë dhe u dërguan në spitalin e Volosit.

    Autobusi turistik po udhëtonte nga Larisa drejt një manastiri në Kanalia, Magnezi.

    Forcat e policisë, tre automjete të zjarrfikësve dhe katër ambulanca ndodhen  në vendngjarje, ndërsa drejtuesit e automjeteve të tjera, që kalonin ndaluan dhe nxituan për të ndihmuar.

    Rrethanat e aksidenti  mbeten  të paqarta. Grupi hetimor po punon për sqarimin e tyre.

  • Anës lumenjve: Ndotje masive nga landfillet klandestine të mbetjeve

    Anës lumenjve: Ndotje masive nga landfillet klandestine të mbetjeve

    Nga jugu në veri, shtretërit e lumenjve janë mbushur me venddepozitime ilegale të mbetjeve urbane, duke shkaktuar dëme mjedisore dhe shëndetësore, ndërkohë që institucionet përgjegjëse bëjnë një sy qorr.

    Tonelata mbetjesh bashkohen me ndotjen rreth inceneratorit të Elbasanit, ndërsa në rrjedhën e Shkumbinit mbërrijnë plehra të tjera nga venddepozitimet anës përroit Papër. Më tej, në Peqin, grumbuj mbetjesh dhe inertesh derdhen direkt në lumë.

    Dikur me ujë të kristaltë, lumi i Shkumbinit është sot një nga më të ndoturit në vend.

    “I gjithë lumi Shkumbin është një hotspot i madh, sepse venddepozitimet buzë Shkumbinit nuk u rehabilituan asnjëherë. Nuk e di nëse bashkitë janë duke i derdhur mbetjet në landfillin e Elbasanit” thotë Ornela Çuçi, eksperte e mjedisit.

    Por Shkumbini nuk është i vetmi. Nga jugu në veri, në shtretërit e lumenjve derdhen prej vitesh pirgje me plehra në venddepozitime të paligjshme, duke i ndotur ujërat me grumbuj plastike, qese që valëviten në pemët përreth dhe inerte që ngrihen si kodra dhe rrëshqasin në ujë.

    Në lumin Devoll që kalon pranë Gramshit, mbetje urbane dhe inerte gjenden në shtratin e lumit, duke pritur stinën e rreshjeve që t’i zhvendosë prej aty drejt liqenit të Banjës. Në Obot të Shkodrës në veri të vendit, përrenjtë që zbresin drejt lumit Buna sjellin mbetje të vendbanimeve përreth, njësoj si në brigjet e lumenjve Fan dhe Gjadër, ku gjenden vendgrumbullime të paligjshme mbetjesh që përfundojnë në detin Adriatik.

    Ekspertët e mjedisit fajësojnë sistemin jofunksional të menaxhimit të mbetjeve urbane në Shqipëri, sikurse institucionet përgjegjëse dhe vetë qytetarët.

    Sipas Denisa Kasës, aktiviste mjedisore, një pjesë e madhe e komuniteteve lokale nuk janë ende të ndërgjegjësuar për dëmet mjedisore.

    “Ne si pjesë e shoqërisë civile, vazhdimisht kemi organizuar pastrime përgjatë lumenjve, por edhe aktivitete për t’u njohur me lumenjtë. Duhet të kemi parasysh se një pjesë e madhe e komuniteteve dhe njerëzve nuk janë të ndërgjegjshëm për vijimësinë e një lumi nga fillimi deri në fund dhe çfarë ndodh përgjatë tij,” tha Kasa.

    Edhe Aleko Miho, profesor në Departamentin e Biologjisë në Fakultetin e Shkencave të Natyrës e vendos theksin te nevoja për ndërgjegjësim.

    “Pjesa qytetare është e rëndësishme, kështu që të gjithë së bashku duhet të luftojmë për ndërgjegjësimin si shoqëri. Shoqëria ka nevojë shumë të ndërgjegjësohet për këtë gjë, shkolla ka të bëjë shumë për edukimin mjedisor,” tha ai.

    Mes dhjetra venddepozitimeve klandestine, ka edhe nga ato që janë të certifikuara dhe përdoren nga pushteti vendor në kundërshtim me parashikimet ligjore. Landfille të tilla janë veçanërisht problematike për lumin e Vjosës.

    “Në Vjosë kemi disa vendgrumbullime që janë shumë afër lumit. Kemi të Këlcyrës, të Tepelenës, pra gjatë gjithë Vjosës kemi disa vendgrumbullime mbetjesh. Sa më afër lumit, kuptohet që ndotja është shumë direkte në lumë,” thotë Besjana Guri, drejtuese e qendrës mjedisore “Lumi”.

    Edhe profesori Aleko Miho është i shqetësuar për ndotjen e lumit Vjosa, i shpallur Park Kombëtar nga qeveria shqiptare.

    “Përgjatë Vjosës ka disa shkarkime që vijnë nga zonat e banuara, që janë shkarkime të lëngëta që i shihni dhe nuk i shihni. Ne shpesh shohim ato që janë të dukshme, një landfill apo shpërndarje gjatë lumit apo në deltën e tij të mbetjeve plastike. Por ndotja është e shpërndarë, ka në lumë, ka në të gjithë pellgun e saj,” tha Miho.

    Efektet e ndotjes së lumenjve nga mbetjet i kanë kapërcyer kufinjtë e Shqipërisë. Prej vitesh, Mali i Zi dhe Kroacia ankohen për mbetjet e plastikës, të cilat zhvendosen në hapësirën e tyre përmes rrymave detare.

    “Fatmirësisht në Shqipëri, rrymat bregdetare nuk na i lënë të gjitha mbetjet që ne depozitojmë në detin Adriatik, por i marrin rrymat bregdetare dhe i çojnë në Kroaci ose në fund të brigjeve të Malit të Zi. Kësisoj, duke e hequr nga momenti jonë, ne i marrim mbetjet dhe i fshehim poshtë tapetit si gjithmonë,” thotë Ornela Çuçi. “Në këtë rast, tapeti ynë i poshtëm qenka Kroacia, dhe ata ankohen,” shtoi ajo.

    Profesori Aleko Miho thotë se mbetjet e plastikës në lumenjtë e Shqipërisë shkaktojnë probleme të shumta mjedisore dhe shëndetësore,  ndaj ai bën thirrje që këtë dëm ta paguajnë ndotësit.

    “Një plastikë në ujë ka gjithë kohën të shpërbëhet dhe të lëshojë mikroplastika, pjesa më e madhe e të cilave janë kancerogjene,” shpjegon Miho.

    “Ndotësi duhet të paguajë. Edhe qytetari që ndot duhet të paguajë, edhe ai që shkarkon plehra në buzë të lumit pa pyetur duhet të paguajë, edhe bashkia që nuk kujdeset për mbledhjen e plehrave ka pjesën e vet të përgjegjësisë,” shton më tej ai.

    Pas dështimit të investimeve prej dhjetramilionë eurosh në trajtimin e mbetjeve urbane, qeveria ka përgatitur së fundmi një tjetër ligj dhe strategji. Por ekspertët e mjedisit janë mosbesues për aplikimin e tyre në praktikë.

    “Kjo çështja e strategjive ka filluar të bëhet komike. Strategjia e parë që u bë në 2011 u pa që ishte implementuar shumë pak. Me ndihmën e GIZ u bë strategjia tjetër. Tashmë është bërë nevoja për një strategji pas 5 vitesh sërish, çka do të thotë që ne jemi të paaftë edhe të planifikojmë çfarë duhet të bëjmë, dhe kjo kryesisht për shkak të mosmenaxhimit të qartë të veprave madhore në këtë vend,” përfundoi Çuçi./Reporter.al

  • ‘Qartë e paekuivok!’ SHBA-ja i kërkon Serbisë që Rusia të tërhiqet plotësisht nga pronësia e Industrisë së Naftës

    ‘Qartë e paekuivok!’ SHBA-ja i kërkon Serbisë që Rusia të tërhiqet plotësisht nga pronësia e Industrisë së Naftës

    Ministrja e Minierave dhe Energjisë së Serbisë, Dubravka Dedoviq-Handanoviq, ka bërë të ditur se kanë marrë njoftim nga Qeveria e Shteteve të Bashkuara të Amerikës, ku kërkohet largimi i pronësisë ruse nga Industria e Naftës e Serbisë (NIS).

    “Sipas kërkesës së NIS-it, për herë të parë është thënë qartë dhe pa ekuivok se duam një ndryshim të plotë të aksionarëve rusë, që do të thotë se kërkohet tërheqja e tyre nga pronësia”, ka bërë të ditur ministrja serbe.

    Ministrja theksoi se Serbia po përballet me vendime të jashtëzakonshme në një situatë gjeopolitike shumë të ndërlikuar. Ajo shtoi se vendi, pa qenë fajtor ose i detyruar, është përfshirë në një konflikt politik dhe gjeopolitik dhe tani po përballet me pasojat, duke theksuar se qeveria synon të veprojë drejtësisht ndaj të gjithë partnerëve dhe miqve të saj, përfshirë Rusinë.

    Qeveria e Serbisë do të mbajë mbledhje nesër në Pallatin e Serbisë, ku janë ftuar të gjithë drejtorët e ndërmarrjeve publike. Seanca do të fillojë në orën 11:00, njoftoi qeveria.Shtetet e Bashkuara kanë vendosur sanksione ndaj NIS-it për shkak të pronësisë shumicë ruse në këtë kompani. /Koha.net/

    Lexo dhe: Serbia në krizë nafte për shkak të sanksioneve të SHBA kundër kompanisë NIS, REL: Çmimet mund të rriten, rezervat zgjasin vetëm 10 ditë

  • Policia plan masash për ‘Shqipëri – Angli’, kontrolle të imtësishme, rrugët ku ndalohet qarkullimi i makinave

    Policia plan masash për ‘Shqipëri – Angli’, kontrolle të imtësishme, rrugët ku ndalohet qarkullimi i makinave

    Policia e shtetit publikon masat e sigurisë për ndeshjen ndërkombëtare të futbollit Shqipëri – Angli që do të zhvillohet më datë 16 nëntor, në orën 18:00, në stadiumin “Air Albania”.

    Për mbarëvajtjen e këtij aktiviteti sportiv, Policia e Shtetit informoi sot se do të angazhojë qindra punonjës policie, të cilët do të garantojnë rendin dhe sigurinë publike, si dhe do t’ju ofrojnë ndihmë dhe informacion, në rast nevoje, në mënyrë që ky aktivitet të përmbyllet pa incidente, në interes të imazhit të vendit.

    Në këtë kuadër janë marrë masa për shoqërimin dhe sigurimin e futbollistëve të ekipit të Anglisë, nga aeroporti i Rinasit, në hotel, në stadium dhe në kthim për në Rinas.

    -Organizimi i shërbimeve për garantimin e rendit publik para, gjatë dhe pas përfundimit të ndeshjes së futbollit, jo vetëm pranë stadiumit, por edhe kontrolli i territorit në të gjithë qytetin e Tiranës.

    -Kryerja e kontrolleve të hollësishme në mjediset e stadiumit për shtetas të paautorizuar, sende dhe lëndë të ndaluara, para se të futen tifozët;

    -Sigurimi i rrugëkalimeve të shërbimeve të emergjencës;

    -Menaxhimi i trafikut rrugor në qytetin e Tiranës, para, gjatë dhe pas ndeshjes së futbollit.

    Për të garantuar sigurinë para, gjatë dhe pas zhvillimit të kësaj ndeshjeje ndërkombëtare, është bashkëpunuar me të gjitha institucionet që kanë rol në mbarëvajtjen e këtij aktiviteti, konkretisht me Federatën Shqiptare të Futbollit dhe UEFA-n, Gardën e Republikës, Policinë Bashkiake, Shërbimin Zjarrfikës, Shoqëritë private të sigurisë (stjuardët dhe personeli i sigurisë),  Spitalet, qendrat shëndetësore dhe ato të ndihmës së parë.

    Janë vendosur kontakte dhe po bashkëpunohet dhe me personelin e shërbimit të sigurisë të ekipit të futbollit të Anglisë, në funksion të rritjes së standardeve të sigurisë para, gjatë dhe pas zhvillimit të kësaj ndeshjeje ndërkombëtare.

    Për mbarëvajtjen e këtij aktiviteti, më datë  16 nëntor  nga ora 14:00 deri në përfundim të ndeshjes, nga Policia e Shtetit, në bashkëpunim me bashkinë e Tiranës, do të aplikohen kufizime të qarkullimit të mjeteve në disa akse rrugore në afërsi të stadiumit dhe konkretisht:

    * Rruga “Papa Gjon Pali II”;

    * Rruga “Dervish Hima”, pranë ambasadës së SHBA-së;

    * Rruga “Asim Zeneli”, pranë ambasadës së SHBA-së;

    * Rruga “Themistokli Gërmenji”;

    * Rruga “Ismail Qemali”, kryqëzimi i Liceut;

    * Rruga “Mustafa Matohiti”, pranë shkollës “Kosova”;

    * Rruga “Jul Variboba”, pranë postës;

    * Rruga “ Lekë Dukagjini”, pranë ish-Gardës së Republikës;

    * Rruga “Avdyl Frashëri”, pranë kryqëzimit të Librit Universitar;

    * ⁠Rruga “Skerdilajd Llagami”;

    * ⁠Rruga “Faik Konica”.

    Në zbatim të planit të masave, punonjësit e Policisë së Shtetit do të ushtrojnë kontroll të imtësishëm ndaj tifozëve, para futjes në stadium, me qëllim parandalimin e hyrjes në stadium, të banderolave me përmbajtje raciste, të fishekzjarrëve, flakadanëve, lëndëve piroteknike, monedhave metalike, çadrave, çakmakëve, karikuesve të celularëve, mjeteve/produkteve për përdorim kozmetik dhe sendeve të tjera të forta, të rrezikshme për jetën dhe shëndetin e pjesëmarrësve.

    Me këtë rast, informojmë shtetasit shqiptarë dhe të huaj, se në bazë të Kodit Penal të Republikës së Shqipërisë, veprimet e dhunshme në aktivitetet sportive, si hyrja në fushën e lojës gjatë kohës së zhvillimit të aktivitetit sportiv nga persona të paautorizuar, përbën kundërvajtje penale dhe dënohet me gjobë nga 50 000 deri në 100 000 lekë. Kur nga kjo vepër, ka ardhur pengimi i zhvillimit normal të aktivitetit sportiv, dënohet me gjobë ose me burgim deri në tre muaj.

    Hedhja e sendeve të forta në fushën e lojës ose mbi njerëzit, mbajtja apo përdorimi i lëndëve piroteknike, fishekzjarrëve, flakadanëve, gjatë zhvillimit të një aktiviteti sportiv, dënohen me burgim nga gjashtë muaj deri në tre vjet.

    Legjislacioni penal shqiptar e konsideron vepër penale, goditjen apo çdo vepër tjetër dhune, ndaj sportistit, trajnerit, arbitrit, ndërmjetësit sportiv, për shkak të veprimtarisë sportive, dhe i dënon me burgim nga një deri në tre vjet.

    Kjo vepër, kur kryhet në ambiente sportive, më shumë se një herë, apo nga drejtues apo anëtarë të klubeve sportive, dënohet me burgim nga një deri në pesë vjet.

    Hyrja në stadium e tifozëve dhe e sportdashësve që kanë blerë biletë, fillon në orën 15:00.

    Kërkojmë mirëkuptimin e tifozëve që të paraqiten në hyrjen e stadiumit, duke filluar nga kjo orë, pasi për shkak të fluksit të tifozëve, pak para fillimit të ndeshjes, mund të humbasin mundësinë për të hyrë në stadium.

  • Petrit Vasili:Tuneli i Lllogarasë jo vetëm aferë korruptive, por edhe rrezik për e jetën e qytetarëve

    Petrit Vasili:Tuneli i Lllogarasë jo vetëm aferë korruptive, por edhe rrezik për e jetën e qytetarëve

    Pas lajmit të publikuar nga Syri.net për përgjimet e dosjes Balluku, ku inxhinieri grek komunikon me vartësin e ministres dhe e ve në dijeni për cilësinë e punimeve në tunelin e Llogarasë, ka reaguar ish-deputeti i Partisë së Lirisë, Pretrit Vasili.

    LEXO EDHE: ‘Jemi në këtë projekt për shkakun tënd dhe për ty…’ Si u mashtrua me ekspertë grekë e shqiptarë për të fituar tenderin prej 2 milion eurosh

    Në një postim në Facebook, Petrit Vasili paralajmëron për pasojat e hapjes së tunelit të pambaruar të Llogarasë nga Rama në korrik 2024. Sipas Vasilit, ky projekt nuk ishte vetëm i papërfunduar, por edhe i pasigurt për qytetarët që e përdorin, – thotë Vasili.

    Postimi i plotë i Vasilit:

    Në korrik 2024, Rama inauguroi dhe hapi për lëvizjen e makinave dhe qytetarëve tunelin e pambaruar të Llogarasë.
    Por kush garantoi për sigurinë e tunelit?

    Komunikimet mes supervizorit grek Kirkinezis dhe drejtorit të ARRSH, Berberi, janë tronditëse. Ja çfarë shkruan Kirkinezis:

    “Evis… kontraktori duhet të kuptojë se projekti nuk është thjesht një ‘vrimë’, por një tunel i cili duhet të ndërtohet sipas specifikimeve dhe praktikave ndërkombëtare, duke respektuar ABSOLUTISHT çështjet e SIGURISË…”

    Në nëntor 2022, kur inxhinieri grek raportonte shkelje alarmante të sigurisë, konstatohej se kontraktori po hidhte “beton pa çelik, jo të përforcuar”.

    “Propozimi i ri i kontraktorit ka të bëjë vetëm me kushtet normale të funksionimit, pa asnjë dispozitë për rastet e zjarrit. Nëse ndodh një incident i tillë, sigurisht që do të ketë viktima”, shkruante më tej supervizori grek.

    Në dritën e këtyre fakteve shokuese, një gjë është e qartë: që në momentin e hapjes, në korrik 2024, tuneli ishte totalisht i pasigurt në çdo aspekt — që nga siguria e jetës, ventilimi, cilësia e ndërtimit, mbrojtja ndaj zjarrit etj.

    Pra, jeta e qytetarëve u vunë në rrezik të madh vetëm për hir të propagandës së Ramës dhe në funksion të aferës shumë milionëshe që përfaqëson tuneli i Llogarasë.

    Kjo ngjarje përbën një krim të vërtetë ndaj jetës së qytetarëve, që është vënë në rrezik me ndërgjegje të plotë nga Rama dhe qeveria.
    SPAK e ka para syve një krim të tillë, por ende nuk e ka thirrur Ramën për t’u përgjigjur.
    SPAK nuk mund t’i shmanget më hetimit për këtë krim, që përbën një rrezik shumë serioz për jetën e qytetarëve në tunelin e Llogarasë.

  • ‘Qartë e paekuivok!’ SHBA-ja i kërkon Serbisë që Rusia të tërhiqet plotësisht nga pronësia e Industris së Naftës

    ‘Qartë e paekuivok!’ SHBA-ja i kërkon Serbisë që Rusia të tërhiqet plotësisht nga pronësia e Industris së Naftës

    Ministrja e Minierave dhe Energjisë së Serbisë, Dubravka Dedoviq-Handanoviq, ka bërë të ditur se kanë marrë njoftim nga Qeveria e Shteteve të Bashkuara të Amerikës, ku kërkohet largimi i pronësisë ruse nga Industria e Naftës e Serbisë (NIS).

    “Sipas kërkesës së NIS-it, për herë të parë është thënë qartë dhe pa ekuivok se duam një ndryshim të plotë të aksionarëve rusë, që do të thotë se kërkohet tërheqja e tyre nga pronësia”, ka bërë të ditur ministrja serbe.

    Ministrja theksoi se Serbia po përballet me vendime të jashtëzakonshme në një situatë gjeopolitike shumë të ndërlikuar. Ajo shtoi se vendi, pa qenë fajtor ose i detyruar, është përfshirë në një konflikt politik dhe gjeopolitik dhe tani po përballet me pasojat, duke theksuar se qeveria synon të veprojë drejtësisht ndaj të gjithë partnerëve dhe miqve të saj, përfshirë Rusinë.

    Qeveria e Serbisë do të mbajë mbledhje nesër në Pallatin e Serbisë, ku janë ftuar të gjithë drejtorët e ndërmarrjeve publike. Seanca do të fillojë në orën 11:00, njoftoi qeveria.Shtetet e Bashkuara kanë vendosur sanksione ndaj NIS-it për shkak të pronësisë shumicë ruse në këtë kompani. /Koha.net/

     

  • U akuzuan se ndihmuan mikun e Gilmando Danit të hynte në AMP, Gjykata e Tiranës liron 2 policët e komisariatit nr 3

    U akuzuan se ndihmuan mikun e Gilmando Danit të hynte në AMP, Gjykata e Tiranës liron 2 policët e komisariatit nr 3

    Gjykata e Tiranës vendosi sot të cilësojë të paligjshëm arrestimin 2 policëve të komisariatit nr 3 në Tiranë të cilët u akuzuan se kanë ndihmuar mikun e Gilmando Danit të hynte në AMP.

    Për Bruno Cara dhe Arshim Zajmi, Gjykata e Tiranës nuk caktoi masë sigurimi në ngarkim të tyre, informon gazetari i Syri Tv Fatjon Gjinaj. Prokuroria kishte kërkuar masën detyrim paraqitje dhe ndalim për të dalë jashtë vendit deri në sqarimin e plotë të rrethave të hetimit.Dy efektivët u proceduan nga AMP pasi akuzohen se kanë dhënë vertetimin që të bëhej pjesë e kësaj agjencie Muçi Shaljani që ra pre e atentatit me Gilmando Danin. Sipas AMP-së 2 punonjësit e policisë dyshohet se në bashkëpunim kanë përpiluar Vërtetimin e Besueshmërisë për Muçin, pa pasqyruar në të, të dhënat të cilat përbëjnë shkak për cënimin e kushteve të sigurisë.

    Muçi Shaljani Sheqeri ndërroi jetë sot në orët e para në Spitalin e Traumës.

    40-vjeçari kishte marrë disa plumba në kokë dhe pjesët e trupit ndërkohë që policia ende nuk ka identifikuar asnjë nga 3 ekzekutorët e atentatit të ndodhur më 11 nëntor 2025.

  • Serbia në krizë nafte për shkak të sanksioneve të SHBA kundër kompanisë NIS, REL: Çmimet mund të rriten, rezervat zgjasin vetëm 10 ditë

    Serbia në krizë nafte për shkak të sanksioneve të SHBA kundër kompanisë NIS, REL: Çmimet mund të rriten, rezervat zgjasin vetëm 10 ditë

    Nafta për përpunim në Rafinerinë e Pançevës, e cila është pjesë e Industrisë së Naftës së Serbisë (NIS), sipas llogarive të zyrtarëve, mjafton edhe për dhjetë ditë të tjera.

    Për shkak të sanksioneve të SHBA-së kundër NIS-it, që kanë ardhur si rezultat i pronësisë shumicë ruse, furnizimi me naftë të papërpunuar për Serbinë është ndërprerë.

    Me ndihmën e shtetit, apo përmes sasive të naftës nga rezervat shtetërore, rafineria në Pançevë do të ketë lëndë të parë vetëm deri më 25 nëntor.

    Në rast të zvogëlimit të kapaciteteve ose ndalimit të punës pas këtij afati, të parët që do ta ndienin goditjen, do të ishin punëtorët e rafinerisë.

    “Deri tani kemi arritur të kontribuojmë që kufizimet e shkaktuara nga sanksionet, të mos e rrezikojnë sigurinë ekzistenciale të punëtorëve, por është e rëndësishme që sa më shpejt të gjendet një zgjidhje e qartë dhe e qëndrueshme”, thotë për Radion Evropa e Lirë Bozho Dostiq, kryetar i Sindikatës së Rafinerisë së Naftës në Pançevë.

    Ai shton se në NIS punojnë rreth 13.500 persona, ndërsa nga kompania varen indirekt edhe rreth 20.000 anëtarë të familjeve të tyre.

    Prioritet i sindikatës, sipas Dostiqit, është që “asnjë familje të mos i ndiejë pasojat e situatës aktuale”.

    “Të ruhet çdo vend pune dhe të mbrohen të drejtat, të paktën në nivelin e garantuar nga Marrëveshja Kolektive”, shton ai.

    Sa e rëndësishme është rafineria në Pançevë?

    Shumica e produkteve të naftës që arrijnë në stacionet e benzinës, vijnë nga rafineria në Pançevë, ndërsa një pjesë më e vogël importohet.

    Sipas presidentit serb, Aleksandar Vuçiq, shteti ka ndërhyrë tashmë me më shumë se 80.000 tonë naftë bruto, të siguruar nga rezervat e mallrave, “në mënyrë që rafineria të mund të funksionojë”.

    “Mund ta lëmë rafinerinë të mos funksionojë për 15-20 ditë, por pas kësaj do të duhet edhe një muaj që të fillojë të funksionojë. Kjo do të ndikojë në shkallën tonë të rritjes, kjo do të ndikojë në produktin e brendshëm bruto, pagat, pensionet, gjithçka… Njerëzit duhet ta dinë këtë”, tha Vuçiq për Radio Televizionin e Serbisë (RTS) më 23 tetor.

    Serbia plotëson vetëm një të pestën e sasisë së kërkuar të naftës nga prodhimi vendas, sipas të dhënave nga Agjencia serbe e Energjisë. Pjesa tjetër e naftës importohet. Nafta bruto përpunohet në produkte nafte në rafineri, të cilat më pas u shpërndahen konsumatorëve.

    Çfarë thonë kompanitë e naftës?

    NIS-i nuk iu përgjigj pyetjeve të Radios Evropa e Lirë në lidhje me skenarët e mundshëm pas 25 nëntorit, kur rafineria e Pançevës do të mbetet pa naftë bruto për përpunim, dhe çfarë pasojash mund të ketë kjo për vetë rafinerinë dhe tregun e derivateve të naftës.

    Pyetjeve të njëjta nuk iu përgjigj as Ministria serbe e Minierave dhe Energjisë.

    Shoqata e Kompanive të Naftës e Serbisë (UNKS) konfirmon për Radion Evropa e Lirë se importet e produkteve të naftës janë rritur ndjeshëm që nga 10 janari, kur SHBA-ja e vendosi NIS-in në listën e sanksioneve, me qëllim zëvendësimin e sasive të karburantit që mungojnë.

    Sipas Tomisllav Miqoviqit, sekretar i përgjithshëm i UNKS-së, kompanitë anëtare të shoqatës janë importueset më të mëdha të produkteve të naftës në Serbi.

    “Importi është rritur gradualisht. Së shpejti, pengesat logjistike do të jenë një sfidë më e madhe sesa vullneti dhe kapaciteti i kompanive anëtare për të importuar”, thotë Miqoviq.

    Serbia nuk ka dalje në det, çka e vështirëson transportin dhe logjistikën.

    “Meqenëse importi bëhet përmes Danubit… pastaj me hekurudhë dhe transport rrugor, në çdo fazë të këtij transporti mund të paraqiten vështirësi”, shpjegon Miqoviq.

    Kush do t’i ndiejë pasojat?

    Në rast të ndërprerjes së punës së rafinerisë në Pançevë, ekonomisti Millan Kovaçeviq thotë se Serbia do të detyrohej të importonte derivate të gatshme të naftës nga shtetet tjera.

    “Në mënyrë të pashmangshme, këto burime të tjera do të ishin më të shtrenjta”, thotë ai për Radion Evropa e Lirë.

    Çmimet e karburanteve – vlera maksimale e të cilave përcaktohet një herë në javë nga Ministria e Tregtisë së Brendshme dhe të Jashtme e Serbisë – kanë lëvizur gjatë dhjetë muajve të fundit.

    Aktualisht, ato janë pak më të ulëta krahasuar me çmimet e 10 janarit, kur NIS-i u fut në listën e sanksioneve të SHBA-së.

    Krahasuar me BE-në, çmimet e benzinës në Serbi janë në nivel të ngjashëm, ndërsa dizeli është rreth 10 për qind më i shtrenjtë. Për këtë llogaritje janë marrë të dhënat e Komisionit Evropian nga nëntori.

    Në rast se rafineria në Pançevë ndalon punën, Kovaçeviq nuk e përjashton as mundësinë e mungesave të karburanteve.

    “Nga aspekti logjistik, është vështirë të garantohet se nuk do të ketë mungesa, sepse e dimë që nuk kemi qasje në asnjë det për furnizim me naftë dhe e dimë që derivatet për tregun tonë janë siguruar pothuajse ekskluzivisht nga Pançeva”, thotë Kovaçeviq.

    Sipas tij, të parët që do të prekeshin, do të ishin konsumatorët, e më pas edhe vetë ekonomia.

    “Të dyja palët do të duhej patjetër të përballonin koston – qytetarët me një standard më të ulët jetese, ndërsa ekonomia dhe sektorët e tjerë me kushte më të vështira operimi. Kjo do të thotë se aktiviteti ekonomik do të ngadalësohej dhe do të kishte ndikim negativ në prodhimin e brendshëm bruto”, shpjegon Kovaçeviq.

    Situata, sipas tij, bëhet edhe më e ndërlikuar nga fakti se kompania ruse, Lukoil, është gjithashtu nën sanksione.

    Kjo kompani, e cila kërkon blerës për asetet e saj jashtë Rusisë, ka rreth 7 për qind të tregut me pakicë të derivateve të naftës në Serbi.

    Ku kanë mbetur negociatat për sanksionet?

    Ndërkohë, negociatat për fatin e NIS-it vazhdojnë – mes Rusisë, si pronare shumicë, dhe SHBA-së, e cila ka vendosur sanksione ndaj kompanive energjetike ruse.

    Sanksionet amerikane synojnë të pamundësojnë financimin e pushtimit që Moska ka nisur ndaj Ukrainës në shkurt të vitit 2022.

    Edhe pse në janar refuzoi mundësinë e nacionalizimit të NIS-it – pra që kompania më e madhe e naftës në Serbi t’i kthehej kontrollit shtetëror – presidenti i Serbisë, Vuçiq, tha për RTS-në më 23 tetor se shteti do të ndërhyjë, sapo të shfaqen probleme me furnizim.

    “Ditën e parë që të kemi probleme, ne do t’i marrim gjërat në duart tona dhe do t’i zgjidhim – ditën e parë. Këtë ua kam thënë të gjithëve: edhe rusëve, edhe amerikanëve”, u shpreh Vuçiq.

    Ai nuk specifikoi se cilat masa konkrete do të mund t’i ndërmerrte shteti.

    Sipas ministres së Minierave dhe Energjisë në Serbi, Dubravka Gjedoviq Handanoviq, Rusia është e gatshme t’ia dorëzojë kontrollin dhe ndikimin mbi NIS-in një pale të tretë – gjë që është mbështetur edhe nga autoritetet në Beograd.

    Ndërkohë, kërkesa e NIS-it drejtuar autoriteteve amerikane për heqjen e kompanisë nga lista e sanksioneve, mbetet ende në pritje.

  • Tragjedi në Rrogozhinë, 24-vjeçari përplas me makinë për vdekje një vajzë 2-vjeçare

    Tragjedi në Rrogozhinë, 24-vjeçari përplas me makinë për vdekje një vajzë 2-vjeçare

    Një ngjarje e rëndë është regjistruar mesditën e sotme në Rrogozhinë, ku një vajzë 2-vjeçare ka humbur jetën.

    Policia bën me dije se e mitura është përplasur për vdekje me makinë nga 24-vjeçari me iniciale F.Xh.

    Mësohet se i riu ka qenë duke kthyer mjetin në momentin që ka përplasur të miturën, e cila ka ndërruar jetë.

    Ndërkohë, drejtuesi i automjetit është shoqëruar në Polici për veprime të mëtejshme.

    “Rreth orës 13:55, në lagjen nr. 2, Rrogozhinë, shtetasi F. Xh., 24 vjeç, banues në Rrogozhinë, ka goditur me automjet gjatë kthimit të automjetit për në rrugën e lagjes një të mitur 2-vjeçare, e cila ka ndërruar jetë.

    Drejtuesi i automjetit është shoqëruar në Polici për veprime të mëtejshme”, njofton policia.