Lajmidites.com

Author: Syri.net

  • Suedia do të investojë 3.5 miliardë dollar për të rritur mbrojtjen ajrore

    Suedia do të investojë 3.5 miliardë dollar për të rritur mbrojtjen ajrore

    Suedia ka njoftuar këtë të martë se po investon 3.5 miliardë dollar shtesë në mbrojtje ajrore, mes kërcënimit në rritje nga dronët dhe format e tjera të sulmeve ajrore.

    Duke folur në Halmstad, në jugperëndim të Suedisë, në regjimentin e mbrojtjes ajrore, ministri i mbrojtjes, Pal Jonson tha:

    “Mbrojtja e Suedisë duhet të forcohet kundër kërcënimeve të tilla si raketa e dronë. Mënyra më e mirë për të garantuar paqen dhe lirinë është investimi në mbrojtje. Porositë e mjeteve të nevojshme për mbrojtje gjithashtu kontribuojnë në rritje, vende pune dhe siguri të furnizimit. Ato gjithashtu përmirësojnë mundësitë e rritjes së kapacitetit të prodhimit në industrinë e mbrojtjes”, u shpreh ai.

    Sakaq, investimet e reja përfshijnë sisteme shtesë të mbrojtjes ajrore dhe sisteme moderne radarësh.

  • Vuçiç: Edhe katër ditë deri në ndërprerjen e punës në rafinerinë e NIS-it

    Vuçiç: Edhe katër ditë deri në ndërprerjen e punës në rafinerinë e NIS-it

    Presidenti i Serbisë, Aleksandar Vuçiq, tha më 25 nëntor se Serbia ka edhe katër ditë deri në ndalimin e plotë të punës së rafinerisë nëse Shtetet e Bashkuara nuk e aprovojnë licencën e punës për Industrinë e Naftës së Serbisë (NIS).

    “Rafineria e NIS-it po funksionon, ende nuk është fikur”, tha Vuçiq.

    Më 18 nëntor, NIS-i kërkoi nga SHBA-ja një licencë të posaçme për të vazhduar punën gjatë kohës sa zgjasin negociatat mes aksionarëve dhe palëve të interesuara për ndryshimin e strukturës së pronësisë të kompanisë.

    Vuçiq tha se pritej që Serbia ta merrte këtë licencë, “por ka edhe gjëra të tjera që ata [SHBA] duhet t’i dëgjojnë dhe t’i shohin” që të miratojnë licencën.

    Ai tha se në rast të ndërprerjes të punës së rafinerisë duhen 20 ditë për ta vënë atë sërish në funksion.

    “Kemi bërë gjithçka që na kanë thënë miqtë rusë dhe jemi dërguar në një situatë shumë të vështirë”, tha Vuçiq.

    “Na kanë mbetur edhe sot e nesër për të marrë licencën”, shtoi ai.

    Presidenti serb tha se ka pasur zëra në Qeveri se duhet të bëhet nacionalizimi i NIS-it, por propozimi i tij, i cili është miratuar, ishte që të jepen edhe 50 ditë kohë për të gjetur një blerës të ri për NIS-in.

    Ai tha se me ndërprerjen e punës së rafinerisë do të “vihej në rrezik funksionimi i sistemit shëndetësor, ndihmës së shpejtë”, si dhe furnizimi i zinxhirëve tregtarë dhe funksionimi i sistemit të transportit.

    Vuçiq tha gjithashtu se Banka Popullore e Serbisë ka marrë paralajmërime, ashtu si edhe bankat komerciale në Serbi, për sanksione dytësore për shkak të bashkëpunimit me NIS-in.

    “Po i vëmë në rrezik edhe bankat komerciale edhe Bankën Popullore. Unë personalisht kam marr garanci verbale nga amerikanët se nuk do të ketë sanksione të tilla për bankat”, tha ai.

    Vuçiq kishte deklaruar më herët gjatë nëntorit se pronarët rusë po negociojnë për shitjen e aksioneve të tyre në NIS me tre partnerë, por nuk kishte treguar se për kë bëhej fjalë.

    Sanksionet amerikane ndaj NIS-it hynë në fuqi më 9 tetor, si përpjekje e administratës amerikane për t’i pamundësuar Rusisë që të përdorë të ardhurat nga energjia për luftën në Ukrainë. Këto sanksione më parë ishin shtyrë tetë herë.

    Shteti i Serbisë në vitin 2008 ia shiti 51 për qind të aksioneve të NIS-it kompanisë shtetërore ruse Gazprom Neft për 400 milionë euro, pa tender.

    Ndërkohë, struktura pronësore e NIS-it është ndryshuar disa herë, por ajo vazhdon të jetë shumicë në duart e kompanive ruse, ndërsa Serbia ka 29.87 për qind të aksioneve.

    NIS është e vetmja kompani në Serbi që merret me kërkimin, prodhimin dhe përpunimin e naftës, si dhe prodhimin e gazit natyror.

    Serbia është i vetmi vend në Evropë, së bashku me Bjellorusinë, që nuk i është bashkuar sanksioneve të Bashkimit Evropian ndaj Rusisë pas pushtimit të Ukrainës fqinje./ REL/ 

  • Balliu: Dy ditë shi, përmbytemi. Në verë, marrim flakë. Nuk ka faj moti, por korrupsioni i qeverisë

    Balliu: Dy ditë shi, përmbytemi. Në verë, marrim flakë. Nuk ka faj moti, por korrupsioni i qeverisë

    Zv/kryetari i Komisionit të Punëve të Brendshme, z. Balliu, ka publikuar sot videon që tregon qartë situatën alarmante në vend: përmbytje sapo bie shi dhe flakë sapo vjen vapa.

    Me ironi Balliu pyet: “Në çfarë temperature punon mirë kjo qeveri?”

    Ai theksoi se përgjegjësia nuk bie mbi heronjtë që rrezikojnë jetën në terren, por mbi qeverinë që me aferat korruptive bllokon kanalet, shkatërron infrastrukturën dhe e lë vendin të pambrojtur përballë çdo fatkeqësie natyrore.

    Sipas Balliut, mjetet e emergjencave civile janë 40–50 vite më të vjetra se ato të Kosovës dhe Maqedonisë.

    “Sikur të investonim më shumë te emergjencat dhe më pak te aferat korruptive të Ballukut, sot s’do ishim në këtë katastrofë.”

    Ai kujtoi se rrugët e ndërtuara në kohën e Partisë Demokratike nuk kanë pasur shembje, ndërsa rrugët e ndërtuara nga Rama–Balluku shkërmoqen me dy ditë shi.

  • Qyteti fantazmë/ U shpenzuan 100 miliardë dollarë për ndërtimin, por mbeti thuajse bosh

    Qyteti fantazmë/ U shpenzuan 100 miliardë dollarë për ndërtimin, por mbeti thuajse bosh

    Nga Alesia Fiddler, DAILY MAIL

    Ka një qytet në Malajzi që fillimisht u projektua për të strehuar një popullsi prej 700.000 banorësh.

    ‘Forest City’ u ndërtua nga kompania kineze ‘Country Garden’, si pjesë e projektit të tyre ‘Belt and Road’ që nisi në vitin 2016. Janë shpenzuar plot 80 miliardë paund (100 milionë dollarë) për ndërtimin e komunitetit, me qëllim krijimin e një peizazhi modern dhe miqësor me mjedisin.

    Me gjithë planet e mëdha, vetëm rreth 9.000 persona janë zhvendosur në ‘Forest City’ që nga fillimi i punimeve disa vite më parë.

    Qyteti madje ka edhe një park ujor, restorante dhe bare, si dhe një fushë golfi, por mbetet kryesisht i pabanuar.

    Ndryshimet në kontrollin e kapitalit të Kinës në vitin 2017, vetëm një vit pas fillimit të punimeve, çuan në ulje të investimeve dhe probleme në përfundimin e punimeve.

    Vetëm rreth 15 për qind e projektit ishte përfunduar deri vitin e kaluar.

    Nazmi Hanafiah u zhvendos në qytet për gjashtë muaj dhe jetoi në një apartament me një dhomë gjumi në një kullë banimi. Megjithatë, ai nuk qëndroi për shumë dhe i tha BBC-së: “Nuk më interesonte depozita, nuk më interesonin paratë. Thjesht duhej të largohesha”.

    Inxhinieri i IT-së e përshkroi ‘Forest City’ si një “qytet fantazmë” dhe tha: “Dridhem vetëm duke u kthyer këtu.”

    Një tjetër banore, Joanne Kaur, i tha medias: “Ky vend është i çuditshëm. Edhe gjatë ditës, kur del nga dera e përparme, korridori është i errët”.

    Qyteti përbëhet nga katër ishuj që shtrihen në një sipërfaqe prej 30 km², sipas faqes zyrtare të ‘Forest City’.

    Faqja vazhdon: “Forest City, i ndërtuar së fundmi, do të jetë një qytet inteligjent dhe i gjelbër futuristik që kombinon mjedisin, teknologjinë dhe teknologjinë më të avancuar për të krijuar një ekosistem ideal, idilik dhe të bazuar në teknologji për të jetuar dhe punuar”.

    ‘Country Garden’ i tha BBC-së se ishte “optimiste” se qyteti do të përfundojë pavarësisht çdo problemi.

    Ka vende po aq “të çuditshme” shumë më afër, përfshirë edhe ishullin e braktisur ‘Pleasure Island’, në Cleethorpes.

    ‘Pleasure Island’ ishte ndarë në gjashtë zona – Afrika, Maroku, Anglia e Vjetër, Spanja, Kiddies Kingdom dhe Ëhite Knuckle Valley – dhe kishte shumë atraksione për adrenalinë, përfshirë Alakazam, Terror Rack dhe Gravitron. Parku u mbyll në vitin 2016 pas 23 vitesh, dhe parku tematik që dikur ishte i popullarizuar, është lënë të shkatërrohet.

    Atraksionet u shitën në tetor 2018, por shumica e ndërtesave mbeten të paprekura edhe sot.

    Nga karuselët që janë lënë plotësisht të vendosura me gjithë dekorin e tyre, deri tek sallat e lojërave me makinat akoma brenda, parku tematik ka një gamë strukturash që ende qëndrojnë në këmbë.

  • Ai cilësohet si një hyjni e futbollit, pesë vjet që nga vdekja e Diego Armando Maradonës

    Ai cilësohet si një hyjni e futbollit, pesë vjet që nga vdekja e Diego Armando Maradonës

    Maradona e udhëhoqi Argjentinën drejt titullit të Kupës së Botës në vitin 1986, kulmi i karrierës së tij të jashtëzakonshme.

    Diego Armando Maradona lindi më 30 tetor 1960. Ai u rrit në lagjen e varfër të Villa Fiorito në periferi të Buenos Airesit.

    “Binte më shumë shi brenda sesa jashtë”, tha ai dikur për shtëpinë e tij të parë. E gjithë familja jetonte në tre dhoma, pa ujë të rrjedhshëm: Diego i Vjetër dhe Tota, Diego i vogël, katër motrat e tij më të mëdha dhe tre vëllezër e motra më të vegjël.

    Që në djalëri, ai luante futboll në rrugë dhe një fëmijëri modeste plot sfida i dha formë aftësisë së tij luftarake dhe stilit të lojës.

    Maradona e udhëhoqi Argjentinën drejt titullit të Kupës së Botës në vitin 1986, kulmi i karrierës së tij të jashtëzakonshme.

    Në karrierën e tij, ai luajti për Argentinos Juniors, Boca Juniors, Barcelonën, Napolin – ku fitoi dy tituj kampionë italianë dhe kishte statusin e një hyjnie – pastaj për Sevilla dhe Newell’s Old Boys, dhe e përfundoi karrierën e tij në shtëpi, në Boca Juniors.

    Pas karrierës së tij si lojtar, u shkrua shumë për varësinë e tij nga droga dhe alkooli. Ai e filloi karrierën e tij si trajner në Textile Mandi, më pas drejtoi shkurtimisht Racing Club dhe nga viti 2008 deri në vitin 2010, ekipin kombëtar argjentinas. Ai gjithashtu drejtoi Al-Wasl, Deportivo Rijestra, Fujairah, Dorados de Sinaloa, dhe klubi i fundit që ai drejtoi ishte Gimnasia de La Plata.

    Në Argjentinë dhe Napoli, Maradona është një hyjni

    Ai mbahet mend edhe për lëvizjen e tij të njohur si “dora e Zotit”, e cila eliminoi Anglinë nga Kupa e Botës në vitin 1986. Në Argjentinë dhe Napoli, Maradona ishte gjithmonë më shumë sesa një hero sporti – ai është një figurë hyjnore atje.

    Në Argjentinë, një vend që ka mbijetuar shumë frustrime sociale dhe disa diktatura ushtarake, El Diego është bërë simbol i shpresës dhe idhulli i miliona njerëzve.

    “Ëndërroj që të mund të shënoj një gol tjetër kundër anglezëve, këtë herë me dorën time të djathtë”, tha ai në një nga intervistat e tij të fundit me France Football. Ai tashmë u kishte dhënë atyre një, me dorën e majtë – “Dora e Zotit”, siç tha pas ndeshjes. Ishin golat që shënoi kundër Anglisë në çerekfinalet e Kupës së Botës 1986, në një fitore 2:1, që ndoshta shënuan më shumë karrierën e tij.

    Për një epërsi 1:0, Maradona “kërceu” portierin Peter Shilton dhe shënoi një gol me dorën e ngritur mbi kokë. Gjyqtari tunizian Ali Bin Nasser tregoi me gisht nga qendra pa menduar. Anglezët protestuan, por nuk pati ndihmë.

    Katër minuta më vonë, Maradona shënoi një nga golat më të bukur të të gjitha kohërave. Ai mori topin në gjysmën e tij dhe më pas rreshtoi katër lojtarë kundërshtarë dhe portierin. Një gol i pabesueshëm, që më vonë u shpall goli i shekullit. Gary Lineker arriti ta zvogëlonte rezultatin në fund, dhe Argjentina më pas fitoi titullin e saj të dytë të Kupës së Botës.

    “Jam shumë krenar që i bëj njerëzit të lumtur me futbollin”

    “Jam shumë krenar që i bëj njerëzit të lumtur përmes futbollit. Ndjej se u kam dhënë kënaqësi dhe argëtim atyre që më shikonin në stadiume ose në televizion”, tha ai në atë kohë.

    Një nga futbollistët më të mëdhenj që bota ka parë ndonjëherë ka përjetuar gjithashtu pengesa dhe skandale të panumërta gjatë viteve, të cilat kanë kërcënuar ta njollosin trashëgiminë e tij përgjithmonë.

    Por, siç tha vetë Maradona, topi nuk mund të ndotet. Pavarësisht të gjitha incidenteve, sjelljeve të çuditshme dhe problemeve me alkoolin dhe drogën, ai mbeti një figurë interesante.

    “Talenti dhe stili i tij i jetesës së egër e ndoqën që në moshë të re. Thjesht nuk mund të kishte mbaruar ndryshe”, tha ish-shoku i tij i skuadrës te Argjentina dhe Boca Juniors, Hugo Perotti.

    Një yll si minoren

    Talenti i tij i jashtëzakonshëm ishte i dukshëm që në moshë të re, dhe karriera e tij u ndikua më shumë nga xhaxhai i tij Cirilo, ish-portieri i klubit të vogël Corrientes.

    “Gjithçka, gjithçka që mund të bënte me topin. Me kokë apo me këmbë, nuk kishte rëndësi. Topi thjesht ngjitej te Diego”, tha Francisco Cornejo, vëzhguesi i Argentinos Juniors që e vuri re i pari talentin e tij.

    Ai shpejt e tejkaloi mjedisin vendas. Në moshën 15 vjeç, ai tashmë luante për Argentinos Juniors dhe u bë lojtari më i ri ndonjëherë në Primera.

    Në moshën 16 vjeç, ai debutoi për “Gauche”, në një ndeshje miqësore kundër Hungarisë, dhe në moshën 19 vjeç, u shpall lojtari më i mirë në Amerikën e Jugut për herë të parë.

    Pas pesë vitesh te Argentinos Juniors, në vitin 1981 ai u transferua te Boca Juniors. Pavarësisht se qëndroi te “La Bombonera” vetëm për një sezon, ai e bëri atë të veçantë. Me 28 gola në 40 ndeshje, ai e udhëhoqi ekipin drejt titullit të Primera-s.

    Edhe pse tifozët e Bocas donin që ai të qëndronte përgjithmonë, pas vetëm një sezoni ai u largua për në Barcelonë për një shumë rekord prej 7.3 milionë dollarësh në atë kohë.

    Regjistrime në Barcelonë dhe Napoli, i pezulluar për kokainë

    Pas dy sezonesh në Camp Nou, ai u transferua te Napoli për një tjetër rekord botëror – 13 milionë dollarë. Me mbërritjen e tij në Napoli, gazeta lokale vuri në dukje se qytetit i mungonin shkollat, autobusët, shtëpitë dhe vendet e punës, por asgjë aq e rëndësishme sa Maradona. Kur pa 75,000 njerëz në ceremoninë e lançimit, ishte dashuri me shikim të parë.

    Me Napolin, ai fitoi dy tituj kampionë italianë, Kupën UEFA, Kupën e Italisë dhe Superkupën. Në Napolin e çmendur pas futbollit, ky gjeni u bë si një hyjni, por në të njëjtën kohë viktimë e suksesit të tij. Pavarësisht suksesit të tij në fushë, jeta private e Maradonës po përkeqësohej.

    Ai u largua nga Napoli në vitin 1991, pasi mori një pezullim 15-mujor për abuzim me kokainë. Pas pezullimit, ai u bashkua me Seviljen, por luajti vetëm 26 ndeshje atje, shumë larg suksesit që arriti në Napoli.

    Nga Sevilla, ai u kthye në atdheun e tij, te Newell’s Old Boys, ku bëri vetëm shtatë paraqitje. Klubi i tij i fundit ishte Boca Juniors (1995–1997).

    Luajti për herë të fundit për Argjentinën në vitin 1994, një karrierë si trajner më pak e suksesshme.

    Ai bëri dy paraqitjet e tij të fundit për ekipin kombëtar në Kupën e Botës 1994, ku rikthimi i tij mbresëlënës në fushë u eklipsua nga një test pozitiv për doping. Ai e përfundoi karrierën e tij me ekipin kombëtar me 34 gola në 91 paraqitje.

    Ai e filloi karrierën e tij si trajner te Textile Mandi, më pas drejtoi për një kohë të shkurtër Racing Club dhe nga viti 2008 deri në vitin 2010, ekipin kombëtar argjentinas. Ai drejtoi Al-Wasl, Deportivo Rijestra, Fujairah, Dorados de Sinaloa dhe klubi i fundit që ai drejtoi ishte Gimnasia de La Plata. Megjithatë, ai pati dukshëm më pak sukses si trajner.

    Diego Armando Maradona vdiq në shtëpinë e tij më 25 nëntor 2020 si pasojë e një ataku në zemër, siç raportohet nga mediat italiane.

    Pavarësisht jetës së tij private të diskutueshme, ndikimi i Maradonës në futboll nuk mund të vihet në dyshim.

    “Gjërat që unë mund të bëja me topin, ai mund t’i bënte me një portokall”, tha Michel Platini kur u pyet për Maradonën.

  • Pritë sapo doli nga shtëpia, 3 persona e prisnin Julian Sulën në rrugë. Njëri qëlloi, por se kapi asnjë plumb

    Pritë sapo doli nga shtëpia, 3 persona e prisnin Julian Sulën në rrugë. Njëri qëlloi, por se kapi asnjë plumb

    Elton Qyno – Syri.net

    Tre persona i kanë ngritur pritë Julian Sula në Lushnjë, teksa ai po ecte me makinën e tij, jo të blinduar.

    “Juli i Pashakos”, sapo kishte dalë nga banesa e tij dhe ka hipur në automjeti duke ecur në rrugët e qytetit të Lushnjës.

    Gazetari Elton Qyno ka mësuar se ai ka qënë i vetëm në makinë, ndërsa papritur 3 persona që ndodheshin në rrugë në këmbë kanë qëlluar me automatik, në drejtim të tij.

    Drejt mjetit janë lëshuar rreth 7 plumba por sipas policisë asnjëri prej tyre besohet se nuk e ka prekur Julian Sula.

    “…një plagë që ka në pjesën e këmbës Julian Sula, ndodhet mbi gishtat e këmbës dhe më tepër besohet se e ka dëmtuar kur është larguar me vrap se sa nga plumbat. Megjithatë qartazi këtë pjesë do e caktojë eksperti mjeko-ligjor…”- tha një burim pranë policisë së Lushnjës.

    Aktualisht hetimet janë përqendruar në mbledhjen e të gjitha provave, ndërsa në vendin ku është djegur makina është gjetur arma e krimit një automatik kallashnikov.

    Ende nuk dihet identiteti i tre personave të cilët pas goditjes me armë kanë hipur në një automjet dhe larguar në drejtim të fshatrave të Lushnjës, duke e djegur makinën.

    Ky atentat kriminal lidhet me larjen e hesapeve mes grupeve kriminale në vend.

    Ndërkohë sulmi vjen në një kohë kur ende nuk është shuar jehona e atentatit mafioz e vrasjen para derës së aeroportit të Rinasit, të Gilmando Danit dhe Mustafa Sheqerit, ngjarje e cila ende nuk është zbardhur.

  • Rama pompon miliarda nga paratë e qytetarëve shqiptarë tek miku i tij izraelit dhe…

    Rama pompon miliarda nga paratë e qytetarëve shqiptarë tek miku i tij izraelit dhe…

    Tre muaj më parë, shoqëria shtetërore Kayo themeloi një kompani të përbashkët me Timak. Kompania e quajtur Timak Defence, me objekt prodhimin dhe përshtatjen e mjeteve ushtarake, u regjistrua në Qendrën Kombëtare të Biznesit në 13 gusht të këtij viti.

    Por ende pa u mbushur mirë dy muaj e gjysmë nga themelimi i kompanisë, qeveria filloi menjëherë të pompojë miliarda lekë nga buxheti në llogaritë e saj përmes kontratave sekrete.

    Kontratat

    Në 26 shtator të këtij viti, Kolegji i Mbrojtjes dhe Sigurisë mori vendim për instalimin e një sistemi anti dron të njohur si C-UAS. Dy javë më vonë, Reparti Ushtarak 3001 në Tiranë ka lidhur kontratën me kompaninë Timak Defence. Vetëm tre ditë më vonë është nxjerrë urdhri për zbatimin e kontratës dhe në fund të tetorit, Reparti Ushtarak 3001 derdhi 6.1 milionë euro në llogarinë e Timak Defence.

    Nuk dihet se me çfarë proçedure është lidhur kontrata, pasi në buletinin e prokurimit publik nuk ekziston asnjë gjurmë e saj. Nuk dihet as se cila është shuma totale e saj. Pagesa prej 6.1 milionë eurosh mund të jetë e plotë, por mund të jetë edhe e pjesshme.

    Ajo që dihet e sigurtë është se thesari ka filluar të pompojë miliarda lekë me breshëri në llogarinë e Timak Defence.

    Në 29 tetor, qeveria shqiptare lidhi një tjetër kontratë sekrete me Timak Defence, këtë herë për blerjen e automjeteve taktike të transportit të lehtë. Autoriteti zbatues i kontratës është Reparti Ushtarak nr 4300 në Tiranë.

    Një ditë më vonë, në 30 tetor Sekretari i Përgjithshëm i ministrisë së Mbrojtjes nxorri urdhërin e monitorimit dhe të nesërmen kompania lëshoi një tjetër faturë prej 4.4 milionë eurosh në drejtim të buxhetit.

    Paratë u paguan 4 nëntor. E gjitha në një kohë rekord dhe koordinim perfekt, aq sa 17 vendimet e inceneratorit në një ditë duken amatorizëm.

    Në total, qeveria ka ekzekutuar deri me tani 10.5 milionë euro pagesa nga buxheti në drejtim të Timak Defence, teksa aksionarët e saj shijojnë lumenjtë e parave të qytetarëve nga pozitat e tyre të monopolit me ligj.

    Nga Arjetë u bë Yeffet

    Vetëm pak muaj para se miliardat e buxhetit të fillonin të rridhnin drejt Timak, kompania e cila vetëreklamohet se prodhon automjete, pësoi ndryshime të rëndësishme në strukturën e pronësisë. E zotëruar që nga themelimi i saj në masën 100 për qind nga Arjeta Puca, kompanisë iu bashkua një pronar i ri përmes një transaksioni shumë të pazakontë.

    Në 17 qershor, Arjeta Puca shiti 49 për qind të aksioneve të Timak për një çmim prej vetëm 490 eurosh. Blerësi ishte Ron Yeffet, një izraelit me nënshtetësi shqiptare dhe nën rrogoz shumë i afërt me Edi Ramën.

    Shitja e Timak

    Çfarë e nxiti zonjën Puca të shiste biznesin e saj kaq lirë, në një kohë kur Timak reklamohej fort si General Motors-i i Shqipërisë, edhe pse në të vërtetë është thjesht një repart saldimi, i cili ansemblon hekura të prodhuar nga të tjerët? Gjithçka do të bëhej e qartë vetëm pak muaj më vonë.

    Menjëherë pas hyrjes së mikut të Edi Ramës si pronar me 49 për qind të aksioneve, Ardi Veliu hyri në ortakëri me kompaninë Timak. Shoqëria shtetërore Kayo dhe Timak bashkëthemeluan kompaninë Timak Defencë, ku Timak mban 80 për qind të aksioneve dhe Kayo 20 për qind.

    Kësaj kompanie iu dha me vendim qeverie, monopoli i furnizimit me automjete të ushtrisë, gardës dhe policisë. Por jo vetëm kaq. Tashmë kompania ka marrë edhe monopolin e dronëve, teksa Edi Rama reklamon në studiot televizive se do të mbrojë Trumpin dhe gjithë udhëheqësit e botës në samitin e Natos në Tiranë me dronët e prodhuar nga Roni dhe Arjeta.

    Edi Rama dhe Arjeta Puca

    Por kontratat e mbrojtjes po përvijohen si fronti i ri i plaçkitjes, krismat e të cilës do të dëgjohen ndoshta pas disa vitesh. Njësoj siç ndodhi me infrastrukturën. Por me një ndryshim të vetëm.

    Të mbytur nga skandalet në qeveri, si dhe nga frika prej SPAK, tashmë kanë shpikur stilin e shoqërive aksionere shtetërore për të çuar miliardat e buxhetit tek miqtë e qeverisë. Ndaj nuk është çudi që pas disa vitesh, edhe ky të dalë si një vendim gjeostrategjik me pak korrupsion brenda./Kapitali

     

  • Ecja 30 minuta në ditë, ‘ilaçi’ më i nënvlerësuar për zemrën dhe trurin

    Ecja 30 minuta në ditë, ‘ilaçi’ më i nënvlerësuar për zemrën dhe trurin

    Jo të gjithë kanë kohë apo dëshirë për palestër, por lajmi i mirë është se edhe një shëtitje e thjeshtë mund të bëjë mrekulli për shëndetin.

    Hulumtimet tregojnë se ecja 30 minuta në ditë, në ritëm mesatar, lidhet me rrezik më të ulët për sëmundje të zemrës, diabet të tipit 2, disa lloje kanceri dhe madje demencë në moshë të thyer.

    Mjekët theksojnë se aktiviteti i rregullt fizik përmirëson qarkullimin e gjakut, ul tensionin arterial dhe ndihmon në kontrollin e peshës. Në të njëjtën kohë, lëvizja çliron endorfina, të ashtuquajturat “hormonët e lumturisë”, që ndikojnë pozitivisht te humori dhe energjia.

    Edhe nëse nuk keni kohë për 30 minuta rresht, ekspertët sugjerojnë ta ndani në tre herë nga 10 minuta gjatë ditës: të zbrisni një stacion më herët, të përdorni shkallët në vend të ashensorit ose të bëni një shëtitje të shkurtër pas drekës.

  • Paguanin 300 mijë euro për një fundjavë në Sarajevë për të vrarë popullsinë civile/ Tjetër padi për Vuçiç

    Paguanin 300 mijë euro për një fundjavë në Sarajevë për të vrarë popullsinë civile/ Tjetër padi për Vuçiç

    Nga Alba Kepi – Syri.net

    250–300 mijë euro për një fundjavë turistike në Sarajevë për të vrarë popullsinë civile.

    Preferoheshin gra, vajza dhe fëmijë. Vrasësit‐killer ishin njerëz të pasur, me pasion për armët, luftën dhe gjuetinë, dhe vinin nga e gjithë Europa Perëndimore e madje edhe nga përtej oqeanit.

    Ata ishin shumë nuk numërohen me gishtat e duarve dhe viktimat e tyre po aq. Disa nga snajperat turistë mund të kenë vdekur por disa jetojnë ende sot.

    Kjo është dëshmia tronditëse që shkrimtari italian Ezio Gavazzeni rrëfen në një intervistë ekskluzive për gazetaren Alba Kepi.

    “Në janar të vitit 2025 dorëzova një kallëzim në Prokurorinë e Milanos dhe në nëntor 2025, pra pak javëmë parë, jam thirrur nga Reparti Special Hetimor i Milanos, ROS. U kam dorëzuar të gjitha materialet dhe dokumentacionin tim. Nuk e dëshiroja këtë vëmendje mediatike, nuk e di se si lajmi përfundoi në tëpërditshmet italiane. Ajo që dua me këtë kallëzim dhe investigim është të hedh dritë dhe të sjell të vërtetën mbi atë që ka ndodhur mes viteve 1992–1996 gjatë rrethimit të Sarajevës.”

    Sipas tij, grupe personash nga bota perëndimore udhëtonin drejt Sarajevës si turistë, por qëllimi i tyre ishte të qëllonin mbi popullsinë civile.

    “Dija diçka për këtë ‘trafik turistësh’, nëse mund ta quajmë kështu, nga disa artikuj të viteve ’90 tëpublikuar në mediat italiane. Më kishte prekur shumë. Pas daljes së dokumentarit Safari Sarajevo, interesi im për të hetuar këtë fenomen u rrit edhe më tepër.”

    Kush ishin këta turistë‐killer?

    “Vinin nga e gjithë Europa. Megjithatë, hetimi im është përqendruar te italianët e përfshirë dhe te individënga Kanadaja dhe SHBA-ja. Dëshmitë që kam mbledhur e vërtetojnë këtë. Ishin sipërmarrës, profesionistëtë suksesshëm, njerëz të vlerësuar në shoqëri, të gjithë me një pasion të përbashkët për armët dhe gjuetinë. Për të analizuar profilin e tyre psikologjik më ka ndihmuar një kriminologe. Të gjithë ishin meshkuje nuk kishte gra mes tyre.”

    Sa paguanin për këtë “hobi” mizor?

    “Paguanin nga 250 deri në 300 mijë euro për një fundjavë. Qëllonin ndaj kujtdo, por sidomos ndaj personave më të pambrojtur: fëmijëve, vajzave, grave.”

    Çfarë pritet nga ky kallëzim i dorëzuar në Prokurorinë e Milanos?

    “Pres që drejtësia të vihet në lëvizje dhe të nisë një proces ndaj tyre.”

    Pse nuk e dorëzuat kallëzimin në Gjykatën e Hagës?

    “U konsultova me avokatët e mi dhe zgjodhëm këtë rrugë. Asgjë më shumë.”

    Pak ditë më parë, një gazetar kroat dorëzoi po në Milano një kallëzim tjetër ndaj presidentit serb Aleksandar Vuçiç. Çfarë mendoni për këtë?

    “Mendoj se sa më shumë zëra të ketë në kërkim të së vërtetës, aq më mirë. Për faktet që lidhen me Vuçiç-in, nuk di çfarë të them, nuk e kam ndjekur. Ai vetë ka deklaruar se ka qenë vullnetar në luftë. Di vetëm se e gjithë ajo botë serbo–ruse kishte një kanal të privilegjuar për të vepruar atje, dhe nuk kishin nevojë për vektorë ndihmës.”

  • Atentati në Lushnje/ Rivali i Aldo Bares është plagosur

    Atentati në Lushnje/ Rivali i Aldo Bares është plagosur

    Objektiv i atentatit të regjistruar paraditen e sotme në Lushnjë, dyshohet se ka qenë 45-vjeçari Julian Sulaj, i njohur ndryshe edhe si Juli Pashako. Ai njihet edhe si rivali i Aldo Bares.

    Në vendngjarje janë gjetur gëzhoja, ndërsa policia po punon për zbardhjen e ngjarjes.

    Sakaq, në fshatin Lifaj është gjetur një mjet pa targa i djegur, çka ngre dyshime për atentat.

    Lidhur me ngjarjen ka reaguar edhe Policia e Lushnjës.

    Njoftimi i policisë:

    Rreth orës 10:40, në afërsi të stadiumit Lushnjë, dyshohet se është plagosur në këmbë me armë zjarri shtetasi J. S., 45 vjeç, i cili ndodhet jashtë rrezikut për jetën.

    Shërbimet e Policisë kanë ngritur pika kontrolli në hyrje-dalje të qytetit dhe po punojnë për identifikimin dhe kapjen e autorëve.

    Në afërsi të fshatit Lifaj, është konstatuar një automjet duke u djegur, i cili dyshohet se u përket autorëve.

    Grupi hetimor në drejtimin e Prokurorisë po punon për zbardhjen e plotë të rrethanave të ngjarjes.