Drejtuesi politik i PD-së, për qarkun e Beratit, Lefter Maliqi ka deklaruar ditën e sotme se SPAK ka marrë zyrtarisht nën hetim, kryebashkiakun e Kuçovës, Kreshnik Hajdari për 4 kallëzime të bëra ndaj tij.
Sipas Maliqit, përveç këtyre 4 kallëzimeve të bëra nga ai vetë ndaj Hajdarit, janë depozituar edhe kallëzime të tjera nga avokati Arben Llangozi dhe deputetja Albana Vokshi. Ai shton se së fundmi ka dorëzuar edhe një kallëzim për një tender prej 1 milion euro në zonën e Havaleas.
Referuar këtyre kallëzimeve, Maliqi ngre pyetjen se pse Hajdari nuk është shkarkuar ende nga detyra, ndërsa ka ngritur dyshime për mbrojtje politike ndaj tij.
Reagimi i Maliqit:
“SPAK” zyrtarisht nën hetim për 4 kallëzime të dënuarin dhe të paaftin Hajdari në krye të Bashkisë Kuçovë, të dhuruar në 2019 dhe grabitur në 2023. Plus 2 kallëzime nga Avokati Arben Llangozi, plus 1 kallëzim nga Deputetja Albana Volshi, plus kallëzimi i fundit nga ana ime për tenderin 1 Milion Euro në Havaleas. Ndërkohë dhe Prokuroria e Beratit, ende ka hetimet për 4 Milion Euro të Sinëcit. Gjykata Administrative Tiranë, rrëzoi ankimin e Hajdarit për shkarkimin e tij, i cili ju kthye “KQZ”, ku jemi në pritje. Gjykata e Posaçme kundër krimit të organizuar e dënoi Hajdarin me 9 muaj burg të konvertuar me 150 orë punë dhe nuk e apeloi. Hajdari duhet të ishte shkarkuar me kohë nga Kryeministri dhe “KQZ”.
Kush po e mbron ende? Oligark, Ministër??? Dhe pse??? Perse po e keqpërdorin Hajdarin?? Me porosi te kujt po i jep tenderat Hajdari kush po e keqperdor ?Po këta janë pjesë e hetimeve në “SPAK”, do i marr Hajdari me vete??? Pse po e keqpërdorin dhe cilat janë përfitimet e medha të tyre me firmën e të paaftit Hajdari? Cilat janë pazaret e tyre me disa eksponentë të PD kundra meje për dështimin e Opozitës? Pse kanë frikë?? A kanë frikë që emri im tek demokratët, opozitarët e ndershëm që duan ndryshim dhe janë kundra pazareve të pista bashkë me socialistët e ndershëm, ju prish interesat personal se do fitojmë Bashkitë Berat e Kuçovë?? A bëtë pazare ju hajdutë Rilindas në pushtet politik dhe lokal në Qarkun Berat dhe në bashkëpunim me këta 2-3 eksponentë politikë të PD më luftuat dhe dogjët mandatin e 3 të PD?
Pasi po të ishim të Bashkuar si PD e opozitë ishin të sigurt 3 mandate në PD. Harrojeni se me paratë tuaja të pista e aferat korruptive do përçani opozitën. Opozita do pastrohet dhe do fitojë Bashkitë Berat e Kuçovë dhe në shkallë vendi, krahë njerëzve të punës me eksperiencë dhe figurave të reja. Pazaret e paratë e pista do ju dalin nga hundët! Vendin e keni ne burg.
Author: Gijotina.com
-
Maliqi: SPAK ka marrë zyrtarisht nën hetim Kreshnik Hajdarin për 4 kallëzime
-
Çështja e “21 janarit”/ ish-presidenti, Bamir Topi paraqitet në SPAK
Ish-presidenti, Bamir Topi, është paraqitur mëngjesin e kësaj të martë në Prokurorinë e Posaçme (SPAK).
Mësohet se ish-presidenti do të merret në pyetje si person në dijeni, në lidhje me çështjen e 21 Janarit, ku u vranë 4 protestues. Për të njëjtën dosje më herët është marrë në pyetje edhe Lulzim Basha dhe Sali Berisha.
Hetimi për ngjarjen e 21 janarit është rihapur nga SPAK një vit më parë, pas vendimmarrjes së Gjykatës së Lartë që urdhëronte Prokurorinë e Posaçme të hetonte një kallëzim të bërë nga Rajmonda Nika, bashkëshortja e të ndjerit Aleks Nika, njëri prej 4 viktimave të 21 Janarit. -
Tre italianë kapen me pajisje përgjimi në Durrës/ Gazetarja: Deklaruan se janë të Guardia Di Finanza-s
Gazetarja Klodiana Lala ka dhënë detaje nga kapja e disa pajisjeve përgjuese të paligjshme që kanë hyrë në territorin shqiptar nga tre shtetas italianë, dy prej të cilëve zyrtarë të Guardia di Finanza. E ftuar në MCN TV, Lala tha se shtetasit italianë janë lënë të largohen, por pajisja është mbajtur në Shqipëri dhe Prokuroria po heton. Gazetarja shtoi se ngjarja është fshehur dhe nuk ka asnjë informacion zyrtar nga autoritetet, ndërkohë ende nuk dihet se çfarë është përgjuar.
“Ngjarje që nuk ka marrë vëmendjen në media, nuk e kuptoj pse. Bëhet fjalë për një skandal të madh që po konsumohet në territorin e Shqipërisë. Pajisjet janë pajisje të sofistikuara përgjimi, janë në ambjentet e Prokurorisë së Durrësit. Kam rënë në dijeni të shtunën, më është konfirmuar se disa persona kishin udhëtuar me traget të linjës Bari-Durrës, kishin mbërritur të premten në Portin e Durrësit. Në automjetin e tyre, sipas burimeve të besuara, janë tre shtetas italianë, kanë hyrë në Shqipëri, kanë qëndruar 12-13 orë, mendohet se kanë kryer përgjime të paligjshme, të paautorizuar, nuk ka patur skuadër të përbashkët, pasi kanë përfunduar punën këta shtetas janë ndaluar kur do të merrnin tragetin Durrës-Ankona.
Janë prezantuar si punonjës të Guardia di Finanza. Dy prej tyre kanë rezultuar se ishin vërtetë të tillë. Nuk dihet a kanë autorizim nga eprorët e tyre. I treti, është person i kontaktuar dhe është marrë nga zyrtarët e Guardias për të përdorur pajijset. Janë marrë në pyetje, të tre janë lejuar të largohen drejt Italisë. Pajisjet janë të bllokuara dhe pritet ti nënshtrohen ekspertimit. Prokuroria ka caktuar një prokuror. Policia e ka referuar, nuk ka reagim zyrtar, në mënyrë të fshehtë e ka dërguar në prokurori për dy vepra, përgjimi i paligjshëm dhe futja e mallrave kontrabandë. Ne kemi patur historik në lidhje me pajisje përgjuese të dyshimta, nëse ju kujtohet ka qenë pajisja IMSI Catcher, që u dyshua e u përdor edhe në burgje. U arrestua një izraelit. Ka patur edhe dy raste të tjera që janë bllokuar në hyrje ose dalje.
Rasti konkret është shqetësues pasi dy persona janë të Guardia di Finanza, ata lëvizin për anëtarë të krimit të organizuar ose politikanë që mund të kenë lidhje me krimin e organizuar. Se kush është përgjuar, cili është itenerari, dhe çfarë ka ndodhur me rezultatet e përgjimit, këtë përgjigje duhet ta japë prokuroria. Autoritetet po heshtin, skandali bëhet edhe më i madh. Pse këta persona janë lejuar të largohen? Mund të mbaheshin të pakten më bllokim pasaporte derisa të bëhej ekspertimi i pajisjeve”, tha ndër të tjera Lala. -
BE përshpejton dëbimet e emigrantëve, firmosen marrëveshje të reja për qendrat e kthimit
Bashkimi Evropian po përgatitet të zbatojë një ligj të ri që synon të përshpejtojë procesin e deportimit të azilkërkuesve të refuzuar dhe emigrantëve të parregullt. Sipas rregullores së re të quajtur “Rregullorja e Kthimit”, shtetet anëtare do të kenë të drejtën të nënshkruajnë marrëveshje dypalëshe me vende jo-anëtare të BE-së për ngritjen e qendrave të kthimit, ku do të dërgohen personat që nuk kanë të drejtë qëndrimi në territorin e BE-së.
Në bazë të propozimit, shtetet evropiane mund të dërgojnë emigrantët edhe në vende që nuk lidhen me origjinën e tyre, për sa kohë që ekziston një marrëveshje dypalëshe dhe respektohen standardet ndërkombëtare të të drejtave të njeriut. Qendrat e kthimit mund të funksionojnë si vende tranziti, ku migrantët përgatiten për t’u riatdhesuar, ose si destinacione të përhershme për ata që nuk pranohen në asnjë shtet tjetër.
Ministri danez për Imigracionin, Rasmus Stoklund, konfirmoi se “kriteri i lidhjes me vendin e origjinës është hequr”, duke u dhënë shteteve anëtare më shumë hapësirë për veprim. “Qendrat mund të jenë tranziti ose vende ku personat mbahen për periudha më të gjata”, theksoi ai.
Por nisma ka shkaktuar reagime të ashpra nga organizatat e të drejtave të njeriut. Më shumë se 100 organizata ndërkombëtare, përfshirë Amnesty International, ActionAid, Caritas Europa dhe Human Rights Watch, kanë paralajmëruar se masa të tilla mund të çojnë në shkelje të rënda të të drejtave të migrantëve, duke e larguar BE-në nga parimet e së drejtës ndërkombëtare.
Sipas Komisionit Evropian, aktualisht vetëm 20% e urdhrave të kthimit zbatohen në praktikë. Me rregulloren e re, BE synon ta rrisë këtë përqindje, përmes sanksioneve më të rënda ligjore për ata që nuk bashkëpunojnë me autoritetet, përfshirë heqjen e lejeve të punës dhe dënimet me burg./ Euronews./ -
Arrest në Itali: Shqiptari hesht për vjedhjen e bizhuterive të arit
Një shqiptar i dyshuar si pjesë e një bande “skifterësh” në Itali, u arrestua nga karabinierët në rajonin e Torinos.
Fundjavën e kaluar, ai u ndoq dhe u rrah nga qytetarët pas një vjedhjeje me thyerje në një shtëpi në Arnad të Aostës, duke marrë prej aty të paktën 5 mijë euro mall, kryesisht bizhuteri floriri dhe sende me vlerë.
Banorët e goditën edhe me një mjet bujqësor, kazmë, duke i shkaktuar dëmtime me kohë rikuperimi shëndetësor një muaj.
“TGR Valle d’Aosta”, raportoi se arrestimi i 40-vjeçarit është konfirmuar dhe vepra e tij e provuar tashmë, teksa Gjykata e la në qeli.
Kur karabinierët mbërritën në vendngjarje, e gjetën burrin shqiptar duke vuajtur nga lëndime të shumta. Ata thirrën shërbimet e urgjencës mjekësore, ku emigranti u diagnostikua me një frakturë të legenit të shkaktuar nga një rënie, ndërsa po përpiqej të ngjitej mbi një gardh privat, por edhe goditje nga banorët.
Gjykatësi në Gjykatën e Aostës ka vendosur që emigranti duhet të mbetet në burg dhe do të transferohet atje pasi të dalë nga reparti i spitalit ku ende po kurohet.
Shqiptari shfrytëzoi të drejtën e tij për të heshtur, duke deklaruar vetëm se ishte kuzhinier në Shqipëri. Gjykimi i shpejtë është caktuar për 19 dhjetor.
Karabinierët raportuan se “në kohën e arrestimit të tij, atij iu gjetën 500 euro në para të gatshme, një çantë luksoze dhe objekte të çmuara, me një vlerë totale të vjedhur prej afërsisht 5 mijë eurosh”.
Sipas atyre që drejtojnë hetimin, “kjo nuk është një vjedhje e qëllimshme, por një nga shumë përpjekje për të sulmuar shtëpitë në zonë”. Vjedhja me forcë duket se ka ndodhur përmes një dere me rrjetë që ishte shqyer.
Për këtë arsye, akuza është vjedhje e rëndë, e cila mbart një dënim prej 4 deri në 7 vjet burg, informon media italiane.
Por për shkak të kartelës penale të pastër, pasi është pa precedentë, shqiptari mund të shpëtojë me më pak se 4 vite dënim, arrest shtëpiak dhe ndalim qëndrimi në Luginën e Aostës.
Nuk ka asnjë gjurmë të bashkëpunëtorëve, një ose ndoshta dy, që janë arratisur. Hetimet për ta po vijojnë ende
Policia tha se po kërkon edhe tre qytetarët që dyshohet se e goditën hajdutin e dyshuar me një kazmë, duke i shkaktuar plagë që besohet se do të shërohen brenda 30 ditësh. -
Alarm në Belsh/ Banorët ngrenë shqetësimin, hapet një tjetër gropë karstike në Dumre
Një gropë tjetër karstike është shfaqur prej disa ditësh në qytetin e Belshit, duke rikthyer shqetësimin e hershëm në zonën e Dumresë, e njohur për formacionet karstike që ndër vite kanë krijuar rreth 84 liqene.
Gropa ka një diametër rreth 7 metra dhe thellësi mbi 12 metra, duke shkaktuar frikë te banorët, të cilët thonë se hapësira po zgjerohet dita-ditës dhe po i afrohet rrezikshëm banesave.
Sipas banorëve, situata ka përkeqësuar ndjesinë e pasigurisë dhe kërkohet ndërhyrje e menjëhershme nga autoritetet për të shmangur pasoja të mundshme. Fenomeni po avancon me shpejtësi dhe rreziku sa vjen e shtohet.
Ndërkohë, autoritetet vendore kanë apeluar banorët të qëndrojnë larg gropës, veçanërisht fëmijëve, të cilët rrezikojnë më shumë për shkak të mungesës së ndërgjegjësimit ndaj pasojave. Frika është e ndjeshme jo vetëm në një familje, por edhe në të paktën 4-5 banesa që ndodhen pranë formacionit karstik.
Fenomenet karstike nuk janë të reja për Belshin. Në qershor të këtij viti, një gropë tjetër u hap në fshatin Dëshiran, ndërsa në maj të vitit 2022, një rast i ngjashëm u shënua në fshatin Çestije, po ashtu pranë banesave. -
Kanadaja refuzon ekstradimin e 62-vjeçarit të dënuar në Shqipëri për vrasjen e policit dhe të birit 8-vjeçar
Një shtetas shqiptar që jetonte i fshehur në Quebec pasi ishte dënuar në vendin e tij për vrasjen e një polici dhe të një fëmije 8-vjeçar nuk do të ekstradohet, ka konfirmuar këtë javë Gjykata e Apelit.
Një shtetas shqiptar që jetonte i fshehur në Quebec pasi ishte dënuar në vendin e tij për vrasjen e një polici dhe të një fëmije 8-vjeçar nuk do të ekstradohet, ka konfirmuar këtë javë Gjykata e Apelit.
“Gjykatësi [i shkallës së parë] ka vlerësuar, me të drejtë, se provat në tërësinë e tyre nuk ishin të mjaftueshme për të urdhëruar ndalimin”, thuhet në vendimin e shpallur të premten në Montreal.
Ëngjëll Brahimi, 62 vjeç, nuk ka më arsye të shqetësohet se do të dërgohet në Evropën Lindore, ku ai rrezikon një dënim të gjatë burgimi në lidhje me vrasjen brutale të një oficeri të lartë policie dhe të fëmijës së tij 8-vjeçar, ngjarje e ndodhur 25 vjet më parë.
Masakër me armë automatike
Sipas autoriteteve shqiptare, Brahimi kërkonte të hakmerrej për vdekjen e vëllait të tij, dhe për këtë arsye dyshohet se kishte shënjestruar shefin e hetimeve të një rrethi, në momentin kur ky i fundit po shkonte në plazh me familjen.
“Një automjet Audi shfaqet nga një pyll i vogël dhe i del në pritë, përmend dokumenti i gjykatës. Një burrë del duke mbajtur një armë automatike. Ai qëllon disa herë […].”
Një fëmijë 8-vjeçar humbi jetën në sulm, ndërsa polici arriti të largohej. Por një nga autorët e gjeti pranë një lumi, ku e ekzekutoi.
Gruaja e viktimës e identifikoi Brahimin rreth pesë muaj më vonë përmes disa fotografive që iu treguan. Autoritetet shqiptare u përpoqën ta arrestonin, por ai kishte ikur tashmë. Fillimisht në Greqi, e më pas në Kanada, ku madje kishte marrë edhe shtetësinë.
Prova të pasigurta
E kaluara e gjeti sërish Brahimin, i cili u zbulua. Por ekipi i tij i avokatëve arriti të tregojë se gjyqi që ishte zhvilluar në Shqipëri nuk kishte qenë i besueshëm.
“Provat janë aq pak të besueshme saqë ekstradimi do të përbënte një gabim gjyqësor”, kishte shpjeguar gjyqtari Alexandre Boucher në vitin 2023, duke vënë në dukje se gjatë gjyqit atje, gruaja e viktimës kishte zgjedhur fotografinë e gabuar për identifikimin e të dyshuarit.
Prokurori i përgjithshëm i Kanadasë, duke vepruar në emër të Republikës së Shqipërisë, e kishte çuar çështjen në apel, duke pretenduar disa gabime nga gjyqtari. Por në fund të procesit, gjykata më e lartë e Quebec-ut vlerësoi se nuk kishte pasur asnjë gabim.
“Ai verifikoi mjaftueshmërinë dhe besueshmërinë e provës së certifikuar të paraqitur në mbështetje të kërkesës për ekstradim, vendosi Gjykata e Apelit. Ai vlerësoi se provat paraqisnin një të metë të dukshme dhe se ekzistonte një rrezik real që ato të ishin thelbësisht të pasakta.”
Për më tepër, edhe pse arratisja e Brahimit mund të linte të kuptohej se ishte sjellje e një personi fajtor, ajo mund të përputhej gjithashtu me dikë që dëshiron “të shmangë një akuzë të gabuar”, është theksuar.
gijotina.com/ -
U rikonstruktua para disa vitesh, shembet një pjesë e trotuarit në aksin Pogradec–Qafë Plloçë
Një rrëshqitje e tokës ka shkaktuar shembjen e një pjese të trotuarit në aksin rrugor Pogradec–Qafë Plloçë, pranë fshatit Gështenjas.
Si pasojë, janë dëmtuar edhe rrjetet nëntokësore, ndërsa banorët paralajmërojnë se situata po përkeqësohet nga dita në ditë dhe mund të prekë së shpejti edhe karrexhatën e rrugës.
Gjithashtu raportohet se ky segment rrugor, i cili përshkon një zonë të banuar, prej muajsh është pa ndriçim, çka e bën edhe më të rrezikshëm kalimin e këmbësorëve gjatë mbrëmjes.
Aktualisht nuk janë vendosur tabela paralajmëruese apo barriera mbrojtëse, ndërsa dëmtimet e dukshme po e kthejnë zonën në një rrezik potencial për aksidente.
Rruga Pogradec–Qafë Plloçë u rikonstruktua në vitin 2018, me investim që përfshinte zgjerimin e korsive, ndërtimin e trotuareve dhe sistemin e ndriçimit publik.Megjithatë, pesë vite pas përfundimit të punimeve, dëmtimet e përsëritura tregojnë për mungesë mirëmbajtjeje dhe mbikëqyrjeje.
-
Bizneset e mishit në “sitë”: Zbulohen miliona të fshehura nga tatimet
Tre biznese blegtorale në Shqipëri, të angazhuara në blerjen dhe shitjen e gjësë së gjallë dhe tregtimin e mishit të freskët, kanë fshehur rreth 10 milion euro fitime. Këto subjekte, përkatësisht Hallaçi në Kukës, Kazazi dhe Tafaj në Kavajë, dëshmuan disbalancë mes sasisë së madhe të mishit të blerë dhe shitjeve, pasi tregtimi i produkteve bëhej pa faturë. Ky aksion u iniciua pas denoncimeve nga qytetarët.
Drejtoria e Hetimit Tatimor, në bashkëpunim me Task Forcën e Terrenit, ndërhynë në këto biznese, ndërsa një subjekt tjetër në Fier është në hetim për shkelje të ligjit, duke përfshirë mosinstalimin e sistemit të fiskalizimit dhe mungesën e listës së çmimeve. Eksperti i bujqësisë, Ndoc Fasllia, thekson se qëllimi i këtyre kontrolleve është evidentimi i evazionit fiskal dhe rritja e të ardhurave për buxhetin e shtetit.
Fasllia shpjegon se kontrolli i administratës tatimore ka për synim të rrisë të ardhurat në arkën e shtetit. Ai sugjeron se këto aksione do të ishin më efektive nëse do të ishin të koordinuara me institucionet që garantojnë sigurinë ushqimore, si AKU, AKVMB dhe ISUV. Kjo do të ndihmonte jo vetëm në eliminimin e informalitetit, por edhe në garantimin e cilësisë së produkteve ushqimore.
Ai gjithashtu kërkon që këto kontrolle të mbështeten me fonde për krijimin e laboratorëve, duke rritur kështu standardet e tregtisë së mishit. Gjatë vitit 2025, Administrata Tatimore ka zbuluar tashmë më shumë se katër subjekte të mëdha blegtorale që janë në shkelje dhe fshehin të ardhurat e tyre. Këto zhvillime vijnë në një kohë kur është e domosdoshme për të garantuar një treg më të rregullt dhe të ndershëm në sektorin e blegtorisë. -
Zbulohet emri i porositësit të dyshuar të vrasjes së Mondi Mëhallës
Zbulohet emri i personit, që policia e Elbasanit dhe familjarët e biznesmenit Mondi Mëhallës, e kërkojnë si të dyshuar për organizimin dhe financimin e vrasjes së tregtarit të naftës në Elbasan, në datën 30 nëntor 2025.
Gazetari Elton Qyno, ka mësuar se nuk bëhet fjalë për një person të huaj, por për një 35-vjeçar nga Elbasani që emrin e ka të ngjashëm me arabët dhe që quhet Oklid El Ouejdi. Në qytetin e Elbasanit ky personazh njihet me nofkën “Kiço” dhe “Oliver”. Oklid El Ouejdi njihet në qytet dhe si nipi i një personazhi që thirret “Timi” i Elbasanit.Oklid El Ouejdi
Sipas burimeve të policisë së Elbasanit, ky person është larguar nga Pika Kufitare e Qafë-Thanës, duke mos arritur të lokalizohet dhe verifikohet nga policia kriminale e Elbasanit.
Qysh prej muajit Janar 2018, Oklid El Ouejdi, ka regjistruar si biznes në Elbasan një pikë Import-Eksport dhe tregtim të automjeteve dhe dhënies me qira. Sipas verifikimeve ky biznes quhet auto “SOLEIL”.
Sipas burimeve “Kiço” është personi që 10 ditë para vrasjes së Mondi Mëhallës, është dhunuar nga ky i fundit. Dhunimi fizik ka ndodhur në ambientet e karburantit “Xhaxhi Oil” dhe sipas burimeve Oklid El Ouejdi, ka qenë i shoqëruar dhe me një person tjetër.
Shkak i konfliktit është bërë një marrëveshje tregtare me vlerë 700 mijë euro. Por në pamundësi për të përmbushur marrëveshjen me Mondi Mëhallën, Oklid El Ouejdi, ka ofruar si zgjidhje dhënien e 4 apartamenteve në Tiranë, të cilët kishin probleme me pronësinë.
Situata është nxehur deri në atë pikë sa biznesmeni Mondi Mëhalla ka ushtruar dhunë fizike ndaj Oklid El Ouejdi. Dhe më pas, 10 ditë më vonë ai dyshohet të ketë organizuar dhe financuar vrasjen e Mondi Mëhallës alias Hyka, që në Elbasan njihet si shok i ngushtë i Kei Piut.
Aktualisht Oklid El Ouejdi, nuk është arritur të lokalizohet dhe shoqërohet në polici për të dhënë shpjegime. Ai ka dalë në Maqedoninë e Veriut, vend në të cilin ka shumë njohje shoqërore mes të cilëve dhe Sheval Muharremin që në Maqedoni njihet si “Bosi i Gërçecit”.
Ndërkohë 8 ditë nga vrasja me 3 plumba e biznesmenit Mondi Mëhalla, aktualisht janë arrestuar dhe ndodhet në burg Nevzat alias Nevi Spaho nga Përrenjasi, i cili dyshohet se ka bërë rolin e shoferit nga zona e Mirakës, ku autori ka djegur makinën tip “Audi” në drejtim të zonës së Përrenjasit.
Në burg ndodhet dhe punonjësi i karburantit Kujtim Pisha se nuk ka telefonuar policinë për ngjarjen si dhe ortaku në biznes i Mondi Mëhallës, Xhino Ago, se nuk kishte ndryshuar pronësinë e makinës tip “Audi”. Ndërsa vijojnë në kërkim laçiani Armando Kola dhe Marselo Arani nga Elbasani.
Emrat e Armando Kolës, Nevzat Spahos dhe Marselo Aranit, kanë dalë nga Naldi Gjini, personi i parë që u shoqërua nga policia si njeriu që kishte përdorur makinën “Audi” disa ditë para vrasjes së Mondi Mëhallës.
Për shkak se Gjini ka bashkëpunuar, policia dhe prokuroria e Elbasanit nuk e kanë proceduar atë për asnjë vepër penale. Bashkëpunimi i Naldi Gjinit, ka qenë tek procedura për paraqitje për njohje të personave të dyshuar.
Naldi Gjini është përballur në polici me fotografitë e disa personave, ku mes tyre ai ka njohur Armando Kolën, Nevzat Spahon dhe Marselo Aranin, si tre njerëzit që kishin qenë së bashku kur ai i kishte lënë makinën.
Gjini ka vendosur gishtin tregues tek fotot e 3 personave, çka solli që policia kriminale e Elbasanit më pas të nisë kërkimet për gjetjen e tyre.
Marsel Arani është identifikuar edhe nga një kamerë e një garazhi në zonën e “21 Dhjetorit” në Tiranë, teksa përdorte makinën tip “Audi” që u përdor në vrasjen e Mondi Mëhallës.
Ndërsa pamjet filmike janë të qarta, policia gjatë këtyre ditëve nuk ka mundur të lokalizojë dhe arrestojë Marselo Aranin, i cili është zhdukur duke thyer edhe masën e sigurisë “arrest shtëpie” që kishte marrë nga gjykata e Elbasanit për akuzën e “Pastrimit të produkteve të veprës penale”.
Në kërkim vijon të jetë edhe laçiani Armando Kola. Kurse i vetmi person që ka identifikuar përmes fotografive Naldi Gjini dhe që tashmë është arrestuar nga policia, është Nevzat alias Nevi Spaho.