Shkrumbohet banesa në Fiershegan, dyshohet për zjarrvënie të qëllimshme

Foto ilustruese FIER- Një shtëpi e pabanuar është shkrumbuar plotësisht nga flakët në fshatin Kosovë e Vogël, njësia administrative Fiershegan. Në vendngjarje kanë mbërritur me urgjencë forcat zjarrfikëse të Lushnjes, si edhe efektivë të Policisë së Shtetit. Zjarrfikësit kanë arritur të vënë nën kontroll flakët, ndërsa policia po kryen veprimet procedurale, pasi dyshohet se zjarri mund të jetë i qëllimshëm. Banesa ishte në pronësi të shtetasit Fiqiri Nexha dhe prej vitesh ishte e pabanuar, pasi pronari nuk jetonte aty. Sipas burimeve, pronari i kishte lënë porosi një fqinji që të kujdesej për banesën, të cilën e vizitonte rrallë. Ka qenë pikërisht fqinji ai që, pasi ka konstatuar flakët, ka njoftuar menjëherë shërbimin zjarrfikës. Policia është duke vijuar hetimet në lidhje me ngjarjen.