Lajmidites.com

Tag: tuneli

  • Tuneli nën Detin Mesdhe, projekti që do të lidhë Europën dhe Afrikën

    Tuneli nën Detin Mesdhe, projekti që do të lidhë Europën dhe Afrikën

    Projekti gjigant për të lidhur Europën dhe Afrikën duket se po i afrohet realitetit, por sfidat për t’u kapërcyer janë po aq të mëdha. Tuneli nën Detin Mesdhe, një projekt i jashtëzakonshëm që do të lidhë dy kontinentet.

    Skeptikët dhe dyshuesit nuk është hera e parë që i vënë në diskutim projektet e mëdha të infrastrukturës, kështu ndodhi së fundmi edhe me projektin që do të “bashkojë” Italinë nëpërmjet urës mbi ngushticën e Messinës, e cila do ta lidhë atë me ishullin e Sicilisë.

    Projekti është miratuar përfundimisht, edhe pse nuk është përcaktuar koha për realizimin konkret të infrastrukturës.

    Ndërkohë një ide edhe më e madhe dhe po aq e ndërlikuar kthehet në vëmendjen publike. Bëhet fjalë për tunelin nën Detin Mesdhe, midis Marokut dhe Spanjës, me të cilin synohet objektivi ambicioz për të lidhur Europën dhe Afrikën dhe për të revolucionarizuar të gjithë sektorin e transportit.

    Qarkullimi i mallrave, lëvizja e turistëve, madje edhe emigracioni do të mundet të përfitojnë nga kjo lidhje nënujore, por sfidat për ta çuar projektin deri në fund janë ende të shumta.

    Sytë janë drejtuar nga viti 2030, i cili me Kupën e Botës së FIFA-s të organizuar pikërisht nga Maroku, Spanja dhe Portugalia do të ofronte rastin ideal për inaugurimin e tunelit.

    Megjithatë duket një afat utopik, pasi do të mund të duhen edhe 10 vjet më shumë deri në finalizimin e projektit.

    Nga ana tjetër, bashkëpunimi mes qeverive spanjolle dhe marokene, duke përfshirë këtu edhe investimet, është i fortë dhe i vendosur. Jo rastësisht studimet e projektimit kanë marrë një përshpejtim të madh, duke treguar përparime të konsiderueshme krahasuar me analizat e së kaluarës.

    Një tunel nën Detin Mesdhe apo një urë mbi Ngushticën e Gjibraltarit?

    Ura mbi ngushticën e Messinës në Itali vazhdon të jetë në qendër të debateve, pengesave dhe diskutimeve, por nisur nga kompleksiteti dhe optimizmi, projekti i ngjan shumë atij të Ngushticës së Gjibraltarit.

    Dallimi është se ura mbi Gjibraltar e studiuar prej dekadash, nuk mund të ndërtohet aktualisht për arsye strukturore dhe inxhinierike, karakteristikat e territorit nuk e lejojnë ndërtimin e një ure të sigurt, megjithëse distanca nuk është e madhe.

    Duhet mbuluar një distancë prej vetëm 14 kilometrash midis brigjeve spanjolle dhe atyre marokene, por është e pamundur të vendosen në mënyrë të sigurt pilastrat/këmbët e urës në një fund deti që arrin deri në 900 metra thellësi, duke pasur parasysh gjithashtu rrymat shumë të forta detare dhe nivelin e lartë të presionit.

    Nga idetë e para të urës deri më sot, teknologjia ka përparuar shumë dhe mjetet moderne mund të ofronin zgjidhje për këto probleme, përfshirë këtu edhe aktivitetin e lartë sizmik, por kjo zgjidhje kërkon një kosto të jashtëzakonshme financiare.

    Infrastruktura e nevojshme për të ndryshuar gjithë zonën detare do të ishte shumë më e gjatë, më komplekse dhe më e shtrenjtë se vetë ura, pa llogaritur dëmin e madh mbi ekosistemin detar dhe qarkullimin natyror përmes Ngushticës së Gjibraltarit.

    Prandaj më shumë se referimi te modeli i urës në Messinë, po punohet duke vlerësuar tunelin e Mançës, për të reduktuar një pjesë të vështirësive.

    Tuneli i Mançës është tuneli nën Detin e Veriut që lidh Britaninë e Madhe me Francën, me një gjatësi totale rreth 50 km, prej të cilave rreth 38 km janë nën ujë. Tuneli u hap në vitin 1994 dhe u deshën 6 vite për ta përfunduar.

    Lidhja midis Europës dhe Afrikës

    Ideja e një tuneli nën Ngushticën e Gjibraltarit nuk është e re, duke pasur periudha të ndryshme interesi që nga vitet ’30, derisa u arrit një pikë kthese në vitin 2023.

    Spanja dhe Maroku ndanë 2,3 milionë euro për analizat e reja gjeoteknike, ndërsa këtë vit, Spanja ka nisur një studim të ri fizibiliteti. Aktualisht, një komitet i përbashkët po punon për të përkufizuar projektin, duke përfshirë edhe ekspertë ndërkombëtarë.

    Me interes për lexuesin janë disa të dhëna teknike për tunelin Spanjë-Marok.

    Qeveritë e Spanjës dhe Marokut po zbatojnë një plan pune 3- vjeçar për përgatitjen e projektit, i cili ka filluar në vitin 2023.

    Njëherësh po projektohet të ndërtohet edhe një “tunel test” (exploratory gallery) për të verifikuar kushtet gjeologjike dhe presionet ujore. Sipas disa burimeve mediatike, të cilat nuk janë të konfirmuara teknikisht, gjatësia e përgjithshme e tunelit do të jetë rreth 60 km, ndërsa pjesa nën ujë, rreth 28 km. Thellësia nën fundin e detit, rreth 465 metra.

    Lidhur me koston financiare, një studim vlerëson që vetëm pjesa spanjolle mund të kushtojë rreth 9 miliardë euro, ndërsa vlerësime të tjera flasin për një kosto totale rreth 15 miliardë euro.

    Si do të funksionojë tuneli?

    Do të projektohen dy tunele hekurudhore, një për çdo drejtim, për transport pasagjerësh dhe mallrash, si dhe një galeri shërbimi dhe emergjence mes dy tuneleve.

    Gjithashtu do të ketë linja energjetike, fibra optike si infrastrukturë fikse midis dy kontinenteve. Zona ka kompleksitet tektonik, është pranë pllakave tektonike Eurazi-Afrikë, ka aktivitet sizmik, si dhe shtresa të vështira gjeologjike.

    Projektohet që tuneli të transportojë rreth 12.8 milionë pasagjerë në vit, si dhe të qarkullojnë nëpërmjet tij rreth 13 milionë tonë mallra. Pritet që fonde të vijnë jo vetëm nga Spanja dhe Maroku, por edhe nga Bashkimi Europian.

    Përveç aspektit ekonomik, projekti ka një rëndësi të madhe gjeopolitike, pasi do të lidhë dy kontinente dhe do të ndikojë në zhvillimin e bashkëpunimit ndërmjet tyre./MONITOR

  • Do të lidhë qytetet kryesore, Norvegjia nis ndërtimin e tunelit nëndetar më të gjatë dhe më të thellë në botë

    Do të lidhë qytetet kryesore, Norvegjia nis ndërtimin e tunelit nëndetar më të gjatë dhe më të thellë në botë

    Norvegjia po ndërton tunelin rrugor nëndetar më të gjatë dhe më të thellë në botë, Rogfast, me qëllim të shkurtimit të kohës së udhëtimit midis qyteteve kryesore dhe krijimin e një autostrade pa tragete përgjatë bregdetit perëndimor.

    Tuneli, me gjatësi 27 kilometra, mban emrin “Rogfast” — shkurtesë e “Rogaland fastforbindelse” — dhe do të arrijë në thellësi prej 392 metrash nën nivelin e detit.
    Ndërtimi i tunelit filloi në janar 2018, por u ndërpre në fund të vitit 2019 për shkak të kostove të parashikuara që tejkalonin buxhetin, duke çuar në anulimin e kontratave ekzistuese dhe ristrukturimin e projektit. Punimet u rifilluan në fund të vitit 2021, dhe përfundimi i tij pritet në vitin 2033, me një kosto prej rreth 25 miliardë krona norvegjeze (rreth 2.4 miliardë dollarë).
    Anne Brit Moen, menaxhere projekti nga Skanska, kompania që po ndërton pjesën veriore dhe më të thellë të tunelit (9 km), thekson se: “Tuneli do të përmirësojë ndjeshëm lidhjet përgjatë bregdetit perëndimor të Norvegjisë, duke krijuar një lidhje më të shpejtë dhe më të besueshme midis rajoneve të Stavanger dhe Haugesund.” Rogfast do të zëvendësojë lidhjet aktuale me tragete, duke reduktuar kohën e udhëtimit midis qyteteve Bergen dhe Stavanger me rreth 40 minuta.
    Tuneli do të përbëhet nga dy tunele të ndara, secili me dy korsi, ekskluzivisht për trafik rrugor. Rreth në mes, do të ketë një unazë të dyfishtë, 260 metra në thellësi, që lidhet me një tunel lidhës drejt ishullit Kvitsøy, komunës më të vogël të Norvegjisë.
    Ndërtimi i një tuneli kaq të gjatë nën det kërkon përdorimin e teknologjive më të avancuara. Punimet po kryhen nga të dyja skajet njëherësh, me qëllim që ekipet ndërtuese të takohen në mes me një gabim vetëm 5 centimetra. Kjo kërkon përdorimin e pajisjeve me lazer, duke krijuar një “binjak digjital” të tunelit që mund të krahasohet vazhdimisht me planet e projektit për të shmangur gabime. Burkhard Boeckem, shef teknologjie në Hexagon, shpjegon se respektimi i këtij standardi strikte kursen kohë, para dhe material, duke zvogëluar gabimet që do të kërkonin heqjen dhe shtimin e materialeve.
    Rogfast është pjesë e rindërtimit të autostradës E39, një rrugë 1,100 kilometra që lidh Trondheim në veri me Kristiansand në jug. Aktualisht, udhëtimi përshkon shtatë linja tragetesh dhe zgjat 21 orë. Qëllimi është ta bëjnë rrugën pa tragete, duke ndërtuar tunele dhe ura, duke reduktuar kohën e udhëtimit në gjysmë.
    Projekti është një ndër më ambiciozët dhe teknikisht më kërkuesit. Moen shpjegon: “Sfida kryesore deri tani ka qenë të gjejmë metoda të mjaftueshme për të siguruar mbushjen e shkëmbinjve dhe për të parandaluar rrjedhjen e ujit të kripur. Ne tashmë kemi arritur 300 metra nën nivelin e detit dhe kemi pasur rrjedhje të konsiderueshme uji, por po përqendrohemi për të ruajtur kushte pune të sigurta dhe efikase për të gjithë.”
    Tuneli gjithashtu do të ketë sistem ventilimi të gjatë, i kombinuar me ventilim të shtyllave që shtrihet deri në Kvitsøy, për të garantuar qarkullim të duhur të ajrit dhe siguri për drejtuesit. Një sistem paralajmërimi në kohë reale do të monitorojë ngjarjet si prishjet ose trafiku, ndërsa kamera dhe radar do të kontrollojnë automjetet.
    Megjithëse mbyllja e linjave të trageteve mund të sjellë humbje të disa vendeve të punës, Rogfast pritet të përmirësojë aksesin në punë, arsim dhe shërbime publike për komunitetet lokale dhe të ndikojë pozitivisht në ekonominë lokale, duke ulur kostot logjistike dhe duke mundësuar operimin e kompanive në një zonë më të gjerë.
    Aktualisht, titulli i tunelit më të gjatë me seksion nën det mbahet nga Seikan Tunnel në Japoni (53.85 km), i cili është vetëm për trenat. Channel Tunnel midis Anglisë dhe Francës është gjithashtu vetëm për hekurudhë dhe ka seksion nën det 37.9 km. Megjithatë, Rogfast do të jetë më i thellë se të dyja, duke arritur 392 metra nën nivelin e detit, krahasuar me 240 metra të Seikan dhe 115 metra të Channel Tunnel.

    Top Channel

  • “Të mjerët shqiptarë”, Lubonja paralajmëron katastrofë te tuneli i Llogarasë: Ka defekte serioze strukturore

    “Të mjerët shqiptarë”, Lubonja paralajmëron katastrofë te tuneli i Llogarasë: Ka defekte serioze strukturore

    Analisti Fatos Lubonja foli sonte në Studio24 mbi parregullësitë sipas tij me ndërtimin e Tunelit të Llogarasë.
    Lubonja renditi disa shkelje në ndërtim, duke filluar nga mungesa e hekurit në tunel, plasjet e shpeshta me eksploziv duke shkelur çdo procedurë.
    Ai shton se duhet një hetim shumë serioz pasi rrezikohen jetë njerëzish.
    Lubonja: Unë sigurisht nuk mundet të jem ekspert, mendoj se kam aftësinë të gjykojë dhe vlerësoj. Pashë që ishte një grek me një kompani që me marrëveshje me Ballukun dhe Berberin kishte supervizimin në tunel. Megjithëse ishte njeri i zgjedhur nga këta. Minimalisht i kanë bërë një nder, s’po i hyj.
    Si qytetar dhe si Fatos, meqë kam kaluar shpesh atje, më ka ngelur në mendje, i takon SPAK ta hetojë, në regjistrimet ishte dhe mungesa e hekurit, është serioze se mund të shembet një ditë dhe humbasin jetë njerëzish. Kishte pasur ca rrjedhje dhe kishin një ekspert italian dhe kishte thënë të mjerët shqiptarë për cilësinë e këtij tuneli. Duhet hetuar.
    Tuneli nuk është hapur siç duhen hapur tunelet moderne me një makineri që kanë shumë turjela, por është hapur me eksploziv. Metodë shumë e vjetër por primitive. Një nga gjërat e tjera, edhe eksplozivi ka rregullat e veta. Nuk mund të bësh dy plasje në 4 orë. Duhet zënë vend lëvizjet nga plasjet. Për të bërë sa më shpejt, kishin bërë plasje shumë më të shpeshta se procedura. Bëhet fjalë mungesë hekuri, mos përdorimi i makinerive, plasjet e shpejta. Mendoj se duke patur parasysh këta njerëz që është bërë ky tender, kërkon një hetim shumë serioz. Për të mos humbur jetë njerëzish.

  • Denoncimi i Erald Kaprit/ Rreth 1 miliard euro janë shpenzuar në vetëm 5 projekte të infrastrukturës

    Denoncimi i Erald Kaprit/ Rreth 1 miliard euro janë shpenzuar në vetëm 5 projekte të infrastrukturës

    Deputeti i Partisë Mundësia, përmes një postimi në rrjetet sociale ka denoncuar se si rreth 1 miliard euro janë shfrytëzuar në vetëm 5 projekte të infrastrukturës që janë vërtetuar nga SPAK si afera korruptive.
    Kapri përmendi Unazën e Madhe të Tiranës, aksin Qafë Plloçë-Qukës, rrugën Korçë-Ersekë, tunelin e Llogarasë dhe atë të Kardhiqit.
    Denoncimi i Erald Kaprit:
    Sot do të shpjegojmë sesi janë shfrytëzuar të paktën 500 mln euro në 5 projekte të infrastrukturës që janë vërtetuar nga SPAK-u dhe që janë afera korruptive. Fillojmë me të parën: Unazën e Madhe të Tiranës që ka kushtuar deri tani 500 mln euro për 27 km, duke e çuar koston në 18 mln euro/km. Loti i dytë që ka qenë segmenti i Astirit, u vërtetua me DH Albania që ishte një projekt korruptiv dhe u anulua, por në dosjen e re del që dhe Loti i tretë është përcaktuar fituesi, në dosjen e zv.kryeministres Balluku.
    Rruga Qafë Plloçë-Qukës që ka kushtuar 260 mln euro, për 43 km me një kosto rreth 6 mln euro/km. Kjo rrugë sot është e bllokuar, ka nisur që nga viti 2009 të ndërtohet dhe ende nuk ka përfunduar.
    Rruga Korçë-Ersekë ka kushtuar 80 mln euro për 35 km, me 2.2 mln euro/km. Kjo rrugë ka nisur të ndërtohet në vitin 2016, ende nuk ka mbaruar, ka rrëshqitur disa herë dhe sot ishin raportuar çarje në të.
    Tuneli i Llogarasë: 142 mln euro, për 6 km tunel, që shkon 23,6 mln euro/km për një tunel. Siç e kemi parë në dosjen e Prokurorisë, tuneli është ndërtuar me mangësi të shumta, duke e bërë të rrezikshëm. Dhe sot është i mbyllur dhe nuk mund të kalosh në të.
    Tuneli i Kardhiqit ka kushtuar 15 mln euro, për 1.3 km dhe pamjet tregojnë që tuneli ishte bllokuar për një pjesë të ditës sepse kishin rrëshkitur dhërat mbi të.
    Tani, këto projekte, të pesta, kanë kushtuar 997 mln euro, afërsisht 1 mld euro. Dhe nëse i referohemi standardit europian të ndërtimit të rrugëve, ne do të kishim kursyer të paktën 500 mln euro, nëse ato do të ishin tenderuar siç duhet. Sepse në Europë, ndërtimi i një rruge fushore kushton nga 1.2-3 mln euro/km. Një rrugë malore nga 3-6 mln/km euro, dhe një rrugë urbane nuk mund të kushtojë më shumë se 8 mln euro/km. Ndryshe nga Unaza e Madhe që ka kushtuar 18 mln euro/km.
    Tani, çfarë mund të bënim ne me 500 mln euro të kursyera? Mund të bënim shumë. Mund të ndërtonim 50 spitale të reja. Mund të zgjidhnim ilaçet tek Onkologjiku me 15 mln euro gjithsej. Por mund të zgjidhnim përfundimisht çështjen e pensioneve. Sepse me kaq para ne mund të garantonim një rritje me të paktën 10% në vit për çdo pensionist dhe të paktën për 150,000 prej tyre të kishin një pension minimal prej 300 eurosh në muaj.

  • Tuneli më i gjatë në botë që zhytet deri në 392 metra nën nivelin e detit

    Tuneli më i gjatë në botë që zhytet deri në 392 metra nën nivelin e detit

    Bota E Premte, 21 Nëntor 2025 17:48
    Norvegjia po ndërton një nga veprat më ambicioze të inxhinierisë moderne. Projekti Rogfast është në fazë të avancuar pune, dhe pritet të bëhet tuneli rrugor nën det më i gjatë dhe më i thellë në planet. Me një gjatësi prej 26.7 kilometrash dhe një pikë që zhytet deri në 392 metra nën nivelin e detit, tuneli do të lidhë zonat Randaberg dhe Bokn, duke eliminuar nevojën për lundrime me tragete në rajon.
    Rogfast është pjesë kyçe e autostradës së ardhshme E39, një korridor strategjik prej 1.100 kilometrash që synon të lidhë jugun me veriun e Norvegjisë pa ndërprerje detare. Përmes dy tubave të veçantë me qarkullim në një krah, udhëtimi aktual do të shkurtohet në rreth 35 minuta.

    Kostoja totale e projektit kap 20.6 miliardë korona norvegjeze (rreth 1.75 miliardë euro). Pas një pauze në vitin 2019 për shkak të mbi-kostove, punimet u rifilluan në vitin 2021 dhe vazhdojnë pa ndërprerje. Tuneli pritet të hapet për qarkullim në vitin 2031, ndërsa funksionimi i plotë mund të zgjasë deri në 2033.

  • Pezullimi i Ballukut “prek” Llogaranë/ Tuneli mbyllet përkohësisht, çfarë pritet të ndodhë më tej

    Pezullimi i Ballukut “prek” Llogaranë/ Tuneli mbyllet përkohësisht, çfarë pritet të ndodhë më tej

    Kalimi i mjeteve në Tunelin e Llogarasë vazhdon të jetë i ndaluar, pasi siç raportohet, për shkak të një defekti në traun e komandimit, autoritetet menaxhuese në bashkëpunim me shërbimet e Policisë Rrugore kanë devijuar qarkullimin në rrugën e vjetër.
    Sipas raportimeve nga mediat lokale në Vlorë, nga reshjet intensive të shiut që vazhdojnë prej një jave, sistemi i komandimit të traut ka dalë jashtë funksionit, për shkak të prezencës së ujit në pjesën elektronike të komandimit.
    Prania e ujit në kabujt elektrik dhe në sistemin qendror, ka bërë që mekanizmi të mos jetë aktiv dhe në këto kushte, autoriteti menaxhues nuk ka qenë në gjendje të përpunojë hyrje-daljet e mjeteve.
    Për shkak të kësaj situate, qarkullimi i mjeteve është devijuar përkohësisht në rrugën e vjetër, deri në rikthimin e plotë të funksionimit teknik të tunelit. Autoritetet po punojnë për të riparuar defektin dhe pritet që një njoftim i ri të bëhet sapo të normalizohet situata.
    Tuneli i Llogarasë u hap përkohësisht për sezon veror në korrik të 2024-ës dhe më pas u mbyll në nëntor po të vitit të shkuar. Pasi mbaruan të gjitha punimet, tuneli u hap përfundimisht në maj 2025, dhe deri më tani kalimi ka qenë pa pagesë, me qëllim që të lehtësohej kalimi gjatë sezonit turistik veror. Prej Tetorit, kanë hyrë në fuqi tarifat për kalimin e mjeteve.
    100 lekë- Mjetemotorike me karakteristika motoçiklete, motorcikletë me tre rrota dhe katerçikletë.
    250 lekë- Mjete motorike me dy boshte dhe lartësi 1.30 m, e matur te boshti i pare, përfshirë autobuzë, kamionë dhe mjete të ngjashme me rimorkio
    5000 lekë- Klasa IV;Mjete motorike me katër ose me shumë boshte dhe lartësi >1.30 m, e matur te boshti i parë, përfshirë autobuzë dhe kamione me shumë rimorkio

  • Jugu përfshihet nga moti i keq/ Përmbytje banesash, rrugë të bllokuara dhe probleme me energjinë në tunelin e Llogarasë

    Jugu përfshihet nga moti i keq/ Përmbytje banesash, rrugë të bllokuara dhe probleme me energjinë në tunelin e Llogarasë

    Reshjet e dendura të shiut kanë përfshirë zonën e jugut, duke krijuar probleme serioze në disa bashki të qarkut të Vlorës. Përmbytje banesash, rrugë të bllokuara dhe rrezik në argjinatura janë raportuar gjatë orëve të fundit, ndërsa pritet që edhe tuneli i Llogarasë të mbyllet përkohësisht për shkak të një defekti elektrik.
    Situata në qarkun e VlorësSipas njoftimeve zyrtare, problematikat kryesore janë këto:
    Sarandë / Konispol
    Në zonën Shkallë Qafë Botë dhe nga karburanti në qendër të Konispolit, rruga është plotësisht e bllokuar për shkak të inerteve që bien nga mali. Policia e Postës së Konispolit ndodhet në vendngjarje për menaxhimin e situatës.
    Ksamil
    Është përmbytur kati përdhe i banesës së shtetasit Qani Sinani. Zjarrfikësit kanë bërë të mundur largimin e ujit.
    Bashkia Finiq / Vrion
    Është përmbytur banesa e shtetasit Dilaver Hyraj. Zjarrfikësit raportojnë se largimi i ujit është i pamundur pasi niveli i ujit është i njëjtë me banesën, banorët janë evakuuar.
    Sarandë / Metoq
    Është përmbytur banesa e shtetasit Vaso Çipa, zjarrfikësit kanë bërë largimin e ujit.
    Aksi Sarandë–Shijan
    Rruga është bllokuar në fshatin Shelegar, pasi lumi Kalase ka dalë nga shtrati. Mjetet devijohen në aksin Vrio–Finiq–Shijan.
    Fshati Çukë
    Është dëmtuar argjinatura e lumit Bistricë, me ujin që është afruar pranë banesave. Nuk raportohen persona të lënduar.
    Tuneli i Llogarasë pritet të mbyllet përkohësishtProbleme të shumta janë shfaqur edhe në furnizimin me energji elektrike të tunelit të Llogarasë. Sipas inxhinierit të OST Fier, linja që furnizon tunelin nga nënstacioni i Tragjasit është me defekt. Tuneli aktualisht nuk furnizohet me energji dhe pritet mbyllja e tij derisa grupet e avarive të rikthejnë funksionalitetin.

  • Këlliçi: Tuneli i Llogarasë i pakolauduar, SPAK t’i vendosë shiritin

    Këlliçi: Tuneli i Llogarasë i pakolauduar, SPAK t’i vendosë shiritin

    Deputeti i Partisë Demokratike, Belind Këlliçi, ka ngritur shqetësimin për sigurinë e tunelit të Llogarasë, për të cilin ministrja Belinda Balluku është marrë e pandehur nga SPAK.

    Sipas Këlliçit, tuneli ende nuk është kolauduar dhe për këtë arsye përbën një rrezik potencial për jetën e qytetarëve që e përdorin.

    “Uroj që të jetë vetëm një hipotezë, por kam një arsye për ta ngritur këtë çështje. I kam drejtuar një pyetje përfaqësuesve të Ministrisë së Infrastrukturës në komision: A është kolauduar tuneli i Llogarasë?” deklaroi Këlliçi.

    Deputeti demokrat shtoi se nga përgjigjet e marra rezulton se nuk ekziston ende një akt zyrtar kolaudimi për tunelin, çka sipas tij duhet të kishte qenë një pikënisje hetimi për SPAK.
    “Nuk ka një akt kolaudimi për tunelin e Llogarasë dhe kjo duhet të ishte sinjal që aty të vendosej shiriti. Larg o Zot të ndodhë ndonjë tragjedi,” theksoi ai.
    Këlliçi e konsideroi këtë fakt si një tjetër dëshmi të mungesës së transparencës dhe përgjegjshmërisë nga ana e institucioneve që menaxhojnë projektet publike, duke kërkuar ndërhyrjen urgjente të autoriteteve kompetente për të garantuar sigurinë e qytetarëve.

  • “Jep llogari për korrupsionin”, Bardhi godet Ballukun: Dil nga tuneli ku je fshehur dhe jep dorëheqjen

    “Jep llogari për korrupsionin”, Bardhi godet Ballukun: Dil nga tuneli ku je fshehur dhe jep dorëheqjen

    Kreu i grupit parlamentar demokrat Gazment Bardhi me anë të një postimi në rrjetet sociale ka reaguar lidhur me mos paraqitjen e sotme të Belinda Ballukut në parlament edhe për interpelancën e kërkuar nga PD për marrjen si e pandehur nga SPAK.
    Bardhi i bën thirrje Ballukut të dalë nga tuneli ku është fshehur dhe të japë dorëheqjen.
    Gjithashtu demokrati i kërkon asaj të zbardhë mesazhet sms të Ramës dhe t’i bëjë publike duke e ftuar të pendohet që të zbulojë gjithashtu korrupsionin e kryeministrit.

  • “Zoti Balluku”! Peleshi ngatërron Këlliçin me zv.kryeministren, ironizon demokrati: E keni mendjen tek tuneli i Palloshit

    “Zoti Balluku”! Peleshi ngatërron Këlliçin me zv.kryeministren, ironizon demokrati: E keni mendjen tek tuneli i Palloshit

    Një lapsus i kryetarit të Kuvendit, Niko Peleshi ka shkaktuar të qeshura në sallën e Kuvendit pasi iu drejtua deputetit të PD-së, Belind Këlliçi, si Zoti Balluku, teksa i dha fjalën për procedurë.

    “Për procedurë z. Balluku, Këlliçi! Ndjesë për lapsusin”, u shpreh kryeparlamentari, ndërsa deputetët shpërthyen në të qeshura.

    “E di që e keni mendjen tek tuneli i Palloshit, nuk keni faj”, iu drejtua deputeti i PD-së.
    Belind Këlliçi ironizoi duke thënë se zv.kryeministrja Belinda Balluku, e cila është marrë e pandehur nga SPAK për tunelin e Llogarasë, ka një meritë pasi, sipas tij, ka shpikur mikrotoponim të ri.
    “Tuneli i Llogarasë nga sot quhet tuneli i Palloshit, ka meritë të madhe”, u shpreh ai.