Lajmidites.com

Tag: kërkimet

  • Humbi më shumë se një dekadë më parë/ Rifillojnë kërkimet për avionin e Malaysia Airlines, u zhduk me qindra pasagjerë në bord

    Humbi më shumë se një dekadë më parë/ Rifillojnë kërkimet për avionin e Malaysia Airlines, u zhduk me qindra pasagjerë në bord

    Kërkimet për rrënojat e fluturimit MH370 të Malaysia Airlines do të rifillojnë më 30 dhjetor, më shumë se një dekadë pasi avioni me 239 persona në bord u zhduk, thanë autoritetet malajziane.

    Ky kërkim i ri, i cili do të zgjasë 55 ditë, kishte filluar në mars , por u pezullua menjëherë pas kësaj për shkak të kushteve të këqija të motit.

    “Zhvillimi i fundit nënvizon angazhimin e [Malajzisë] për t’u dhënë një përmbyllje familjeve të prekura nga kjo tragjedi”, tha të mërkurën ministria e transportit, sipas mediave lokale.

    Fluturimi MH370, një Boeing 777, u zhduk në vitin 2014 ndërsa udhëtonte nga Kuala Lumpur në Pekin dhe shkaktoi kërkimin më të madh në historinë e aviacionit.

    Fluturimi MH370 humbi kontaktin me kontrollin e trafikut ajror më pak se një orë pas ngritjes më 8 mars 2014 dhe radari tregoi se kishte devijuar nga trajektorja e tij fillestare e fluturimit.

    Mbetet një nga misteret më të mëdha të aviacionit, i cili vazhdon të përndjekë familjet e personave në bord. Gjatë viteve, shumë njerëz kishin kërkuar një kërkim të ri , duke vënë në dukje vështirësitë e tyre për të gjetur zgjidhje.

    Incidenti ka dhënë gjithashtu shkas për një mori teorish konspirative, duke përfshirë spekulimet se piloti e kishte rrëzuar qëllimisht aeroplanin ose se ai ishte rrëmbyer.

    Një hetim në vitin 2018 zbuloi se kontrollet e aeroplanit ka të ngjarë të jenë manipuluar qëllimisht për ta nxjerrë atë nga kursi, por nuk nxori asnjë përfundim në lidhje me këtë.

    Hetuesit thanë në atë kohë se “përgjigjja mund të jetë përfundimtare vetëm nëse gjenden rrënojat”.

  • Moti i keq/ Ministri Vengu nga Gjirokastra: Rreziku ende s’ka kaluar, vijojnë kërkimet për 76-vjeçaren e zhdukur në Korçë

    Moti i keq/ Ministri Vengu nga Gjirokastra: Rreziku ende s’ka kaluar, vijojnë kërkimet për 76-vjeçaren e zhdukur në Korçë

    Rreziku nga reshjet e shumta të shiut dhe prurjet e lumenjve ende nuk ka kaluar. Kështu deklaroi nga Gjirokastra ministri i Mbrojtjes Pirro Vengu i cili ishte i pranishëm në mbledhjen e Komitetit të Emergjencave Civile në rang prefekture.
    Sipas tij në terren janë në gatishmëri dhe punojnë të gjitha forcat dhe strukturat e pushtetit vendor. Lidhur me rrezikun e urës së Glinës në Dropull Ministri Vengu tha se është mundësuar kalimi për banorët nëpërmjet një rrugë alternative dytësore.
    Ministri tha se lajmi i mire është që nuk kemi humbje jete, ndërsa vijojnë kërkimet për 76-vjeçaren e zhdukur në Korçë. Vengu theksoi se janë marrë masat që në rastet e nevojshme të gjithë qytetarët të furnizohen me medikamente, ushqime por edhe ndihmë financiare nëse do të konstatohen dëme.
    “Vijojnë kërkimet për 76-vjeçaren në Korçë, bëhet fjalë për një person në moshë me problematika të shëndetit mendor, nuk dihen arsyet e zhdukjes së saj. Gjirokastra, Delvina dhe Saranda ka njohur reshje masive, në 48 orët e fundit kanë pasur reshjet me intensive të këtyre ditëve në rang vendi.
    Rrëshqitje dherash në rrugët dytësore dhe në fshatra, rrezikohet për rrëshqitje dhe në vijim. Reparti i Gërhotit po funksionon si bazë mbështetëse për Emergjencat Civile për bashkitë e qarkut Gjirokastër, Delvinës e Sarandës. Po bëhen rehabilitime në nivelin e Qukës në mënyrë që të kufizohen pasojat e përmbytjes masive të orëve të para të mëngjesit Po verifikojmë edhe njëherë elementet e urave.
    Po mundohemi të gjejmë rrugë alternative deri sa të kemi rehabilitim të plotë të infrastrukturës. Kemi informuar popullin për motin e keq dhe identifikuam elementët e basenit të Vjosës për problematikat që ndodhën. Ura e Glinës dhe ura e Isues midis Libohovë dhe Dropullit janë dëmtuar. Për Glinën është gjetur aksesi alternativ nga mbrapa nga Nepravishta. Për pjesën e Isues duhet të bëjmë një investim rehabilitues është një dëmtim domethënës. Kemi marrë masat në komunitet për mbështetje ushqimore apo bazë materiale e financiare për banorët e zonës”, tha ministri Vengu.

  • Përmbytjet në Korçë/ Nisin kërkimet për gjetjen e një 75-vjeçare, dyshohet se…

    Përmbytjet në Korçë/ Nisin kërkimet për gjetjen e një 75-vjeçare, dyshohet se…

    Ditën e sotme që prej orëve të para të mëngjesit në Bashkinë Devoll, fshati Progër është përfshirë nga përmbytje.
    Rreth orës 08:30, në fshatin Progër është denoncuar nga familjarët se është larguar nga banesa shtetësja F. H., rreth 75 vjeçe, e cila dyshohet se vuan nga probleme të shëndetit mendor.
    Në terren që prej mëngjesit ndodhen forca të shumta policie, që vazhdojnë të vijnë në ndihmë të banorëve të zonës, si dhe vazhdojnë kërkimet për gjetjen e 75-vjeçares e cila dyshohet se mund të jetë marrë nga rrjedha e ujit

  • Korçë/ Përmbytjet marrin 76-vjeçaren, vazhdojnë kërkimet!

    Korçë/ Përmbytjet marrin 76-vjeçaren, vazhdojnë kërkimet!

    Kërkimet për Flora Hoxhën, 76 vjeç, vijojnë prej më shumë se 12 orësh në fshatin Progër të Korçës, pas zhdukjes së saj si pasojë e përmbytjeve të shkaktuara nga reshjet intensive.
    Situata në zonë mbetet e rënduar, ndërsa prurjet e larta në përroin që përshkon fshatin dyshohet se mund të kenë marrë të moshuarën me vete në momentin e përmbytjes.
    Forcat e kërkim-shpëtimit po kontrollojnë çdo segment të përmbytur dhe përgjatë shtratit të përroit, me shpresën për të gjetur gjurmë të 76-vjeçares. Deri më tani, pavarësisht kontrolleve intensive, nuk ka ende informacione të reja për vendndodhjen e saj.
    Kërkimet pritet të vijojnë deri në orët e vona, ndërsa autoritetet lokale bëjnë apel për kujdes maksimal në zonat e rrezikuara nga përmbytjet.

  • 17 ditë pa asnjë gjurmë të Florjan Tabakut, familja në ankth: Kërkimet janë ndërprerë!

    17 ditë pa asnjë gjurmë të Florjan Tabakut, familja në ankth: Kërkimet janë ndërprerë!

    Kanë kaluar plot 17 ditë nga zhdukja e 26-vjeçarit Florjan Tabaku, por ende asnjë gjurmë e tij. I riu nga Tropoja, i cili vuan nga probleme të shëndetit mendor dhe është me aftësi të kufizuara, humbi kontaktet me familjen më 21 tetor, ndërsa ndodhej në zonën Qafë-Morinë–Gjakovë për të mbledhur gështenja.
    Që prej asaj dite, familja e tij jeton në ankth, duke kërkuar çdo mundësi për ta gjetur. Kërkimet, të zhvilluara fillimisht në të dy anët e kufirit Shqipëri–Kosovë, janë ndërprerë prej ditësh, megjithëse ende nuk ka prova që Florjani të mos jetë në zonën malore.
    “Në mal janë ndërprerë kërkimet, edhe pse nuk na kanë siguruar që nuk është në mal,” – tha vëllai i tij.
    “Kanë kërkuar në të dyja anët, por më shumë mundësi është në territorin e Kosovës. Vetëm rajonet e policisë janë të njoftuara, nëse e shohin të lajmërohet. Me sa dimë, nuk po bëjnë kërkime të tjera,” – shtoi ai me dhimbje.
    Familja apelon për ndihmë nga qytetarët në të dyja anët e kufirit, që nëse dikush e ka parë ose ka ndonjë informacion.
    Florjani është zhdukur pa lënë asnjë gjurmë dhe çdo ditë që kalon, shpresa e familjes për ta gjetur të gjallë po venitet, ndërsa ata luten që ai të kthehet shëndoshë e mirë në shtëpi.
     

  • Doli me bagëti në mal dhe s’u kthye më… Humb 65-vjeçari në Tropojë, nisin kërkimet për gjetjen e tij

    Doli me bagëti në mal dhe s’u kthye më… Humb 65-vjeçari në Tropojë, nisin kërkimet për gjetjen e tij

    Një 65-vjeçar nga fshati Nikaj-Mërtur, Njësia Administrative Lekbibaj në Tropojë, është raportuar i zhdukur pasi ka humbur kontaktet me familjarët.

    Sipas informacionit të bërë publik nga përgjegjësi i emergjencave civile të Bashkisë Tropojë, shtetasi Pal Susaj, i cili mësohet se vuan nga probleme të shëndetit mendor, kishte dalë me bagëtitë në mal dhe nuk është kthyer më në banesë.

    Rreth orës 14:00 të ditës së sotme, vetë Susaj ka kontaktuar Policinë, duke deklaruar se nuk e dinte se ku ndodhej. Pas këtij komunikimi, familjarët nuk kanë mundur të lidhen më me të.

    Aktualisht, banorë të zonës dhe familjarë janë angazhuar në kërkime, ndërsa Policia e Shtetit ka nisur procedurat hetimore dhe veprimet për lokalizimin dhe gjetjen e 65-vjeçarit.

    Autoritetet lokale bëjnë me dije se vijojnë kërkimet dhe se do të ketë informacione të reja sapo të ketë zhvillime në terren.

  • I zhdukur prej 6 ditësh/ Ndërpriten kërkimet për të riun nga Viçidoli, u pa të hipte në autobus drejt Deçanit

    I zhdukur prej 6 ditësh/ Ndërpriten kërkimet për të riun nga Viçidoli, u pa të hipte në autobus drejt Deçanit

    Shoqata e Kërkim-Shpëtimit Malor të Kosovës ka ndërprerë operacionet e kërkimit në fshatrat pranë kufirit të gjelbër Shqipëri–Kosovë për 26-vjeçarin Florjan Tabaku nga fshati Viçidol i Tropojës, i shpallur i zhdukur më 20 tetor 2025 nga familjarët e tij. Vendimi është marrë pasi, sipas informacioneve të pranuara nga autoritetet kosovare, i riu është parë duke hipur në një autobus që udhëtonte drejt zonës së Rastavicës në Deçan të Kosovës.
    Këtë e ka konfirmuar për mediat Kosovare kryetari i ShKShMK-së, Deni Hameli. “Ai ka zbritur poshtë malit. Bazuar në pamjet e kamerave kemi arritur ta konstatojmë se bëhet fjalë për të njëjtin person. Prandaj, tani kjo është punë e policisë dhe hetuesisë që të merren me rastin”, deklaroi Hameli.
    Që nga momenti kur familjarët raportuan humbjen e 26-vjeçarit në Policinë e Tropojës, në kërkim janë angazhuar Shoqata e Kërkim-Shpëtimit, Bashkia Tropojë, Policia e Shtetit, vullnetarë të zonës, si edhe Policia e Kosovës.
    Operacioni i gjerë u zhvillua në terrenin malor mes fshatrave Mulliq, Kamenicë, Qafë-Morinë e deri në Kasaj të Tropojës, ku morën pjesë edhe Forcat e Armatosura të Shqipërisë dhe të Kosovës, përfshirë edhe një helikopter kërkim-shpëtimi.
    Nga ana tjetër, familja e Florjan Tabakut vijon të kërkojë për të riun, i cili, edhe pse dyshohet se ka zbritur poshtë malit, nuk është kthyer ende në shtëpi. Sipas familjarëve, ai është me aftësi të kufizuara dhe mund të ketë nevojë për ndihmë.
    Sipas të dhënave të Prefekturës së Kukësit, në kërkime nga Tropoja morën pjesë rreth 30 punonjës të Bashkisë Tropojë dhe rreth 20 familjarë e vullnetarë nga zonat përreth. Kërkimet janë përqendruar kryesisht në territorin shqiptar, në zonat malore ku dyshohej se mund të ishte ndalur i humburi.
    Ditët e fundit kërkimet janë zhvendosur në territorin e Kosovës, ku Policia e Kosovës po verifikon pamjet e kamerave të sigurisë në disa fshatra kufitare dhe përgjatë rrugës që lidh zonën e humbjes me drejtimin e Junikut e Gjakovës.
    Kërkimet janë zhvilluar në kushte të vështira për shkak të reshjeve të dendura të shiut dhe terrenit malor, por bashkëpunimi ndërinstitucional mes autoriteteve të dy shteteve ka vijuar me shpresën për gjetjen sa më shpejt të 26-vjeçarit.

  • Zhduket një vajzë 21-vjeçare në Sarandë, policia nis kërkimet

    Zhduket një vajzë 21-vjeçare në Sarandë, policia nis kërkimet

    Një 21-vjeçare me banim në Sarandë rezulton e zhdukur prej dy ditësh, duke shkaktuar shqetësim të madh tek familjarët e saj.
    Sipas informacioneve zyrtare, denoncimi është bërë nga e afërmja e të resë, e cila iu drejtua policisë së Fierit për të raportuar humbjen e kontakteve. Menjëherë pas denoncimit, forcat e rendit kanë nisur kërkimet për gjetjen e 21-vjeçares.
    Në njoftimin e policisë thuhet:
    “Dje, kallëzoi shtetasja T. M., 38 vjeçe, se ka humbur kontaktet që prej datës 20.09.2025, me mbesën e saj, shtetasen M. F., 21 vjeçe, banuese në Sarandë. Punohet për gjetjen e 21-vjeçares, si dhe për sqarimin e rrethanave të rastit.”
    Aktualisht, materialet procedurale i janë referuar Prokurorisë së Fierit për veprime të mëtejshme, ndërkohë që hetimet vazhdojnë.

  • Ende asnjë gjurmë nga turisti çek i humbur në Durrës disa ditë më parë, vijojnë kërkimet

    Ende asnjë gjurmë nga turisti çek i humbur në Durrës disa ditë më parë, vijojnë kërkimet

    Vijojnë pa rezultat kërkimet për turistin çek, Pavel Pospisil, 68 vjeç, i cili prej disa ditësh rezulton i zhdukur në zonën e plazhit të Durrësit. Sipas policisë, po kryhen kërkime intensive, ndërsa në ndihmë janë angazhuar që nga dita e parë dhe familjarët e tij.
    Një ditë më parë, ambasada çeke në Tiranë iu drejtua publikut me një thirrje për ndihmë, duke kërkuar bashkëpunimin e qytetarëve në gjetjen e Pospisil.
    Sipas familjes, ai u pa për herë të fundit më 12 shtator, të premten e kaluar, rreth orës 11:00, teksa largohej nga hoteli ku po qëndronte për një shëtitje. Por që prej atij momenti ka humbur çdo kontakt me bashkëshorten dhe vajzën e tij. Një ditë më pas, ai u shpall zyrtarisht i humbur dhe policia nisi kërkimet.
    Ambasada dhe familja ndërkaq i bëjnë thirrje qytetarëve që për çdo informacion të mundshëm të kontaktojnë menjëherë me policinë shqiptare, për të ndihmuar në gjetjen e 68-vjeçarit.

  • Ekspedita shkencore kthehet në tragjedi/ Gjeologu italian zhduket në Alaskë, autoritetet ndërpresin kërkimet dhe e shpallin të vdekur

    Ekspedita shkencore kthehet në tragjedi/ Gjeologu italian zhduket në Alaskë, autoritetet ndërpresin kërkimet dhe e shpallin të vdekur

    Një aksident i rëndë ka tronditur komunitetin shkencor ndërkombëtar. Riccardo Pozzobon, gjeolog 40-vjeçar nga Padova, humbi jetën gjatë një ekspedite kërkimore në Akullnajën Mendenhall në Alaska, pjesë e një projekti të financuar nga National Geographic Grants Program.

    Pozzobon kishte udhëtuar drejt SHBA më 26 gusht, së bashku me dy kolegë, për të studiuar thyerjet dhe morfologjitë e akullnajës nga një perspektivë planetare.
    Më 2 shtator, gjatë eksplorimeve, ai rrëshqiti në një rrjedhë uji të shkrirë dhe u thith nga një zgavër natyrore në akull, e njohur si “lavaman”.
    Përpjekjet e shpëtimtarëve vazhduan për ditë të tëra, por pa sukses, dhe autoritetet amerikane tashmë kanë pezulluar kërkimet.
    Pozzobon ishte një figurë e njohur në fushën e gjeologjisë planetare. Profesor në Universitetin e Padovës, ai kishte bashkëpunuar me Agjencinë Hapësinore Evropiane (ESA) dhe ishte instruktor i astronautëve, mes tyre edhe Luca Parmitano, për përgatitjet e misioneve në Hënë dhe Mars.
    Në vitin 2024 ai publikoi një studim të rëndësishëm në Nature, duke fituar njohje ndërkombëtare. Projekti i tij në Alaska, i quajtur Gemini, synonte të kombinonte gjeologjinë tokësore me teknikat e eksplorimit hapësinor për të analizuar ndryshimet e akullnajave.
    Tragjedia ka prekur thellë botën akademike. Shoqëria Gjeologjike Italiane e cilësoi humbjen një “lajm shkatërrues”, duke e kujtuar Pozzobonin si një njeri të jashtëzakonshëm dhe një studiues të shkëlqyer.
    Rektorja e Universitetit të Padovës, Daniela Mapelli, tha: “Riccardo humbi jetën duke ndjekur një nga pasionet e tij më të mëdha: kërkimin. Është një pikëllim i madh dhe një ndjenjë pafuqie, por edhe dëshirë për ta kujtuar dhe nderuar gjithmonë.”
    Pozzobon lë pas partneren e tij Claudia dhe një djalë të vogël. Për t’i ardhur në ndihmë familjes, Shoqëria Gjeologjike Italiane ka nisur një fond donacionesh.

    Top Channel