Lajmidites.com

Tag: kërkesat

  • Bllokada, kërkesa dhe plagosje policësh/ Fermerët zhvendosen në kryqëzimin e Stacionit Hekurudhor të Naousas

    Bllokada, kërkesa dhe plagosje policësh/ Fermerët zhvendosen në kryqëzimin e Stacionit Hekurudhor të Naousas

    Pamje të rënda dhune kanë ardhur këtë të hënë nga ishulli i Kretës, ku protesta e fermerëve grekë është përshkallëzuar në mënyrë të paprecedentë. Turma të mëdha protestuesish u përplasën me forcat policore pranë aeroporteve të Haniasë dhe Iraklios, në një valë përleshjesh që po trondit vendin prej javësh.

    Një bllokadë e re bujqësore u vendos të hënën (8/12) në kryqëzimin e Stacionit Hekurudhor të Naoussa-s , nga fermerët e Federatës së Bashkuar të Shoqatave Bujqësore të Imathisë, të cilët forcuan praninë e tyre në rrugë.

    Në mesditë, ata vazhduan me një bllokim simbolik të rrugës kombëtare Veria-Skydra, ndërsa një mobilizim i ngjashëm është planifikuar për nesër.

    Kërkesat e Federatës së Bashkuar të Shoqatave Bujqësore të Imathisë përfshijnë pagesën e të gjitha borxheve si dhe ndihmën bazë, vendosjen e çmimeve më të ulëta të garantuara që mbulojnë kostot e prodhimit dhe lënë një të ardhur të qëndrueshme për nevojat e jetesës dhe shpenzimet e kultivimit, një ulje të kostove të prodhimit, naftë pa taksa në pompë, një tavan për çmimin e energjisë elektrike bujqësore në 7 cent/Kwh, heqjen e Bursës së Energjisë, subvencionimin dhe heqjen e TVSH-së për mjetet dhe furnizimet, dhe ndryshimin e rregullores ELGA në mënyrë që ajo të sigurojë dhe kompensojë prodhimin dhe kapitalin në 100% kundër të gjitha rreziqeve natyrore dhe sëmundjeve, në të gjitha fazat e prodhimit, me financim të mjaftueshëm shtetëror.

    Lexo edhe: 

    Protestat/ Fermerët grekë nisin bllokimin e qyteteve, plagosen 8 policë nga përplasja me protestuesit

    Njëkohësisht, kërkesat përfshijnë zëvendësimin e të ardhurave të humbura për vitin 2025 në të gjitha produktet. Për blegtorinë, ngrihet çështja e lisë dhe kërkohet vaksinimi i kafshëve, kompensim i plotë për kafshët e vrara, zëvendësim i të ardhurave të humbura, rimbushje falas e kopeve, mbështetje për të gjitha kërkesat e tjera të fermerëve të blegtorisë dhe kompensim për sëmundjen e gjuhës blu.

    Lidhur me çështjen e OPEKEPE-s, kërkohet që paratë e vjedhura të kthehen dhe të shpërndahen tek përfituesit e vërtetë, të atribuohen përgjegjësitë politike dhe penale, si dhe të bëhen publike emrat e autorëve.

  • Putin dyfishon kërkesat për territorin e Ukrainës përpara bisedimeve me SHBA-në në Moskë

    Putin dyfishon kërkesat për territorin e Ukrainës përpara bisedimeve me SHBA-në në Moskë

    Presidenti Vladimir Putin i ka dyfishuar kërkesat e tij kryesore për t’i dhënë fund luftës në Ukrainë, duke deklaruar se Rusia do të lëshojë armët vetëm nëse trupat e Kievit tërhiqen nga territori i pretenduar nga Moska.

    Putini ka kohë që kërkon njohjen ligjore të territoreve ukrainase që Rusia i ka pushtuar me forcë.

    Ato përfshijnë gadishullin e Krimesë, të cilin e aneksoi ilegalisht në vitin 2014, dhe Donbasin, të përbërë nga Luhansku dhe Donetsku, pjesën më të madhe të të cilit Moska tani e ka të pushtuar.

    Për Kievin, i cili ka përjashtuar heqjen dorë nga pjesët e Donbasit që ende mban, shpërblimi i Rusisë për agresionin e saj është një gjë e papranueshme.

    Duke folur me gazetarët gjatë një udhëtimi në Kirgistan, Putin përsëriti pikëpamjen e tij se Rusia ka iniciativën në fushën e betejës dhe luftimet do të mbarojnë vetëm kur trupat ukrainase të tërhiqen nga territoret e sulmuara.

    “Nëse ata nuk tërhiqen, ne do ta arrijmë këtë me forcën e armëve”, tha ai.

    Komentet e së enjtes ishin hera e parë që Putini iu drejtua lëvizjeve të ngjeshura diplomatike të javës së kaluar, të cilat panë SHBA-në dhe Ukrainën të zhvillonin diskutime intensive mbi një plan paqeje që thuhet se u hartua në tetor nga zyrtarët amerikanë dhe rusë.

    Plani, i cili ishte shumë i anuar nga kërkesat e Moskës, u rishikua më pas. Megjithatë, mendohet se nuk e trajton çështjen e territoreve të pushtuara, e cila – së bashku me garancitë e sigurisë për Ukrainën – është pika më e madhe e mosmarrëveshjes midis Moskës dhe Kievit.

    Putin tha se një draft i ri plani i është treguar Rusisë dhe se ai mund të bëhet “baza” për një marrëveshje të ardhshme për t’i dhënë fund luftës.

    Megjithatë, ai shtoi se ishte “absolutisht e nevojshme” të diskutoheshin “disa pika specifike që duhet të shprehen në gjuhën diplomatike”.

    I pyetur për mundësinë që Krimea dhe Donbasi të njihen de facto si territore ruse, por jo ligjërisht, Putin tha: “Ky është qëllimi i diskutimit tonë me homologët tanë amerikanë”.

    Një delegacion amerikan, përfshirë të dërguarin special Steve Witkoff, pritej në Moskë në gjysmën e parë të javës së ardhshme, konfirmoi ai. Presidenti i SHBA-së Donald Trump u tha gazetarëve më parë këtë javë se Witkoff mund të bashkohet në Moskë me dhëndrin e presidentit, Jared Kushner.

    Ndërkohë, ndihmësi më i lartë presidencial i Ukrainës, Andriy Yermak, tha se Sekretari i Ushtrisë Amerikane, Dan Driscoll, do të vizitojë Kievin më vonë gjatë javës.

    Më herët këtë javë, Trump tha se kishin mbetur “vetëm disa pika mosmarrëveshjeje” midis Rusisë dhe Ukrainës, por tregoi se nuk do të takohej me Presidentin e Ukrainës, Volodymyr Zelensky, derisa këto pika të ishin sqaruar.

    Gjatë komenteve të tij për gazetarët, Putin shprehu përsëri përbuzjen e tij për udhëheqjen ukrainase, të cilën tha se e konsideronte të paligjshme dhe se për këtë arsye nuk kishte “kuptim” të nënshkruante dokumentet.

    Ukraina ka qenë nën gjendje ushtarake që nga fillimi i pushtimit në shkallë të plotë të Rusisë në shkurt 2022 dhe për këtë arsye nuk ka qenë në gjendje të mbajë zgjedhje të planifikuara – duke i bërë komentatorët pro-rusë të vënë në pikëpyetje legjitimitetin e udhëheqjes së Presidentit Zelensky.

    Putini gjithashtu hodhi poshtë paralajmërimet e udhëheqësve evropianë se Rusia mund të sulmojë kontinentin evropian brenda dekadave të ardhshme.

    «Kjo na duket qesharake, me të vërtetë», tha ai./BBC

  • Afera “Partizani” makthi i Berishës dhe Malltezit, GJKKO rrëzon kërkesat e kreut të PD dhe dhëndrit të tij,…

    Afera “Partizani” makthi i Berishës dhe Malltezit, GJKKO rrëzon kërkesat e kreut të PD dhe dhëndrit të tij,…

    Në Gjykatën e Posaçme (GJKKO) u mbajt seanca e radhës gjyqësore për aferën Partizani, me të pandehur ish-kryeministrin Sali Berisha, dhëndrin e tij Jamarbër Malltezi dhe 3 të tjerët. Në këtë seancë, prokurorja e SPAK Enkeleda Millonai lexoi kërkesën për gjykim të çështjes me akuzat respektive për të pandehurit, ndërsa i pranishëm ishte edhe prokurori Arben Kraja. Ndërkohë, GJKKO ka rrëzuar kërkesën e Berishës dhe të pandehurve të tjerë për pavlefshmëri të akteve dhe papërdorshmëri të provave që janë gjetur deri më tani nga SPAK, me argumentin se kërkesa është e pabazuar në ligj dhe në prova. Bëhet fjalë për vendimet e marra nga gjyqtarja e hetimeve paraprake Irena Gjoka, e cila prej kohësh është nën sulmet e ish-kryeministrit Berisha.
    Trupa gjykuese ka theksuar gjithashtu se pretendimet për tejkalim kompetencash nga SPAK nuk qëndrojnë, pasi janë po ashtu të pabazuara në ligj dhe në prova konkrete. GJKKO ka nënvizuar se të gjitha pretendimet që lidhen me masat e sigurimit janë shqyrtuar tashmë nga gjykatat, deri edhe nga Gjykata Kushtetuese, dhe për këtë arsye rrëzohet kërkesa për pavlefshmëri absolute. “Kërkesat e pabazuara në ligj dhe prova. Kërkesat e tjera për tejkalim të kompetencave nga SPAK të pabazuara në ligj e prova. Të gjitha pretendimet për masat e sigurimit i janë nënshtruar kontrollit gjyqësor deri në gjykatën kushtetuese”, ka thënë trupa gjykuese. Sa i takon pretendimeve për ekspertë të pa licencuar apo në konflikt interesi, gjykata vlerëson se këto raste nuk përbëjnë shkak për pavlefshmëri të akteve. Sipas GJKKO-së, arsyet e paraqitura nga mbrojtja janë thjesht deklarative, ndërsa ekspertët e Institutit të Policisë Shkencore kanë vepruar në përputhje me ligjin.
    Detajet
    Gjykata ka njoftuar se do të thërrasë një ekspert topograf për të dëshmuar mbi njohuritë dhe kualifikimet e tij, përpara se të shprehet mbi një nga kërkesat që lidhen me pavlefshmërinë absolute. Ndërkohë, GJKKO ka rrëzuar edhe pretendimin për sekuestrimin dhe ekspertimin e pajisjeve kompjuterike si të kundërligjshëm. Sipas GJKKO-së, sekuestrimet e kryera në “Studio Pustina” dhe të dhënat e marra nga shoqëria “Homeplan” janë të ligjshme, por gjykata ka konstatuar se të dhënat e përfituara nga pajisjet që u janë kthyer më pas të pandehurve janë të papërdorshme. “S’ka shkelje te afateve për ekspertimet. S’ka fakte qe ka patur paanshmëri te eksperteve apo janë ndikuar”, ka argumentuar GJKKO. Gjykata ka konstatuar se disa prej pretendimeve të ngritura nga mbrojtja nuk hyjnë në kategorinë e kërkesave paraprake, por duhet t’i nënshtrohen shqyrtimit gjyqësor gjatë procesit në themel.
    Një tjetër kërkesë që rrëzoi GJKKO ishte edhe ajo e kompanisë Kontakt, e cila kërkonte gjykim të shkurtuar dhe ndarjen e çështjes. Avokatët kërkuan shtyrjen e seancës për t’u konsultuar me klientët pas vendimit mbi kërkesën paraprake dhe seanca e radhës do të zhvillohet më 25 nëntor, në orën 11:00. Dosja për aferën Partizani kaloi për gjykim më 19 maj. Berisha do të gjykohet për akuzën e korrupsionit pasiv të zyrtarëve të lartë pasi akuzohet se, në cilësinë e kryeministrit, ka ndërmarrë veprime konkrete në miratim ligjesh dhe aktesh nënligjore, ku përfitues ishte edhe dhëndri i tij, Jamarbër Malltezi. Edhe Malltezi është nën akuzë për korrupsion por edhe për pastrim parash. Sipas SPAK, ai ka përfituar të ardhura në vlerën e 5.4 milionë eurove nga një biznes ndërtimi në mënyrë të parregullt falë vendimeve të qeverisë të marra nga vjehrri i tij. Fatmir Bektashi akuzohet për korrupsion dhe pastrim parash, ortaku i Malltezit dhe trashëgimtari i tokës Xhimi Begeja, dhe financierja Andia Pustina, që merrej me punët financiare dhe ligjore të kompanisë “Homeplan”, akuzohen për pastrim parash. Po ashtu, në gjyq për pastrim parash janë edhe tre kompanitë “Kontakt”, “Homeplan” dhe “Studio Pustina”.

  • SYRI TV/ Dosja ‘Partizani’, GJKKO pranon dy kërkesat e avokatëve

    SYRI TV/ Dosja ‘Partizani’, GJKKO pranon dy kërkesat e avokatëve

    Gjykata e Posaçme pranon dy nga kërkesat e avokatëve gjatë seancës për dosjen “Partizani” mbi ekstraktet e disa kompjuterëve të sekuestruar, që u konsideruan si masa antikushtetuese, si dhe mbi kërkesën e avokatëve të Berishës që të pyetet si dëshmitar një ekspert topograf. Mbrojtja gjithashtu kishte evidentuar konfliktin e interesit të ekspertëve shkencor në policinë që dikur drejtohej nga kallëzuesi i Berishës Taulant Balla, por togat e zeza e rrëzuan.

    Syri TV

    Gjykata e Posaçme pranoi kërkesën e avokatëve të të akuzuarve për dosjen “Patrtizani”, që të pyetet një ekspert topografik, dhe të thirret si dëshmitarë nëse ka plotësuar kushtet ose jo për të kryer këtë detyrë. Po ashtu GJKKO urdhëroi SPAK që të dhënat e ekstraktuara nga 3 pajisje kompjuterike të sekuestruara “Studio Pustina”, por që janë kthyer më pas, të mos përdoren dhe të konsiderohen të pavlefshme. Por teksa pranoi dy nga kërkesat, togat e zeza rrëzuan disa të tjera të depozituara nga mbrojtja e liderit të opozitës Sali Berisha dhe Jamarbër Malltezit. Ato kanë të bëjnë me ekspertët e policisë shkencore që të pandehurit pretendonin se kanë qenë në konflikt interesi pasi kanë kryer ekspertime ndërkohë që kallëzimi ishte kryer nga Taulant Balla, ish-ministër i Brendshëm. Avokatët kërkuan pavlefshmëri absolute të akteve hetimore të SPAK që lidhen me vendimet e marra gjatë hetimeve paraprake nga gjyqtarja Irena Gjoka. Në arsyetimin e GJKKO-së të gjitha pretendimet për masat e sigurimit i janë nënshtruar kontrollit gjyqësor deri në Gjykatën kushtetuese. GJKKO shton se shkaqet që parashtrohen nga kërkuesi mbeten deklarative, dhe se ekspertët e institutit të policisë shkencore kanë kryer detyrën bazuar në ligj. Por ndërkohë GJKKO do thërrasë një ekspert topograf të dëshmoje për njohuritë dhe kualifikimet e tij e më pas do shprehet për një nga kërkesat për pavlefshmëri absolute.

    GJKKO konstaton se disa nga pretendimet nuk përfshihen në kategorinë e kërkesave paraprake por duhet ti nënshtrohen shqyrtimit gjyqësor. Gjatë seancës së kësaj të hënë, Gjykata rrëzoi kërkesën e shoqërisë ‘Kontakt” për gjykim të shkurtuar ndërsa avokatët kërkuan kohë duke bërë që gjyqi të shtyhej për në datën 25 nëntor në orën 11.00

  • Afera “Partizani”, GJKKO rrëzon kërkesat e Berishës dhe Malltezit, pranohen provat e SPAK

    Afera “Partizani”, GJKKO rrëzon kërkesat e Berishës dhe Malltezit, pranohen provat e SPAK

    Gjykata e Posaçme kundër Korrupsionit dhe Krimit të Organizuar (GJKKO) ka rrëzuar këtë të hënë, më 10 nëntor, kërkesat paraprake të avokatëve mbrojtës të ish-kryeministrit Sali Berisha dhe dhëndrit të tij, Jamarbër Malltezi, lidhur me pavlefshmërinë e akteve të administruara gjatë hetimeve për dosjen “Partizani”.
    Sipas vendimit të gjykatës, pretendimet e mbrojtjes u vlerësuan si të pabazuara në ligj. Trupi gjykues theksoi se ndaj prokurores së çështjes, Irena Gjoka, nuk ekziston asnjë vendim që ndalon ushtrimin e detyrës së saj, ndërsa caktimi i ekspertëve është bërë në përputhje me procedurat ligjore.
    Gazetarja e Klan News, Glidona Daci, raportoi se gjatë seancës së sotme u lexua kërkesa për gjykim e Prokurorisë së Posaçme (SPAK). Seanca e radhës është planifikuar të mbahet më 25 nëntor, në orën 11:00, ku pritet që palët të paraqesin parashtrimet e tyre për provat.
    Kujtojmë se Berisha akuzohet për “korrupsion pasiv të zyrtarëve të lartë”, kryer në bashkëpunim, ndërsa Jamarbër Malltezi për korrupsion aktiv dhe pastrim parash.
    Dosja lidhet me privatizimin e ish-kompleksit sportiv “Partizani” në Tiranë, që dikur ishte pronë e Ministrisë së Mbrojtjes. Hetimet e SPAK pretendojnë se ky proces është zhvilluar në mënyrë të paligjshme dhe ka sjellë përfitime të padrejta për Jamarbër Malltezin, dhëndrin e ish-kryeministrit Sali Berisha.

  • Prej ditësh grevë e urie dhe protestash, ministrja Ibrahimaj ‘zgjohet’, fton naftëtarët e Marinzës në takim

    Prej ditësh grevë e urie dhe protestash, ministrja Ibrahimaj ‘zgjohet’, fton naftëtarët e Marinzës në takim

    Naftëtarët e Sindikatës Hidrokarbure në Marinzë kanë pezulluar për momentin grevën e urisë dhe protestën e tyre, por rezistenca ndaj politikave të qeverisë nuk do të ndalet pa u plotësuar kërkesat e tyre.

    Dritan Rrapushi, anëtar i kryesisë së sindikatës dhe një prej grevistëve më aktivë, njoftoi se protesta e fundit do të mbahet sot para zyrave të kompanisë Bankers në Fier, ku do të vendosen edhe strategjitë e mëtejshme të lëvizjes.

    Një telefonatë e papritur dje vonë i ka hapur rrugë një takimi të përfaqësuesve të sindikatës me një delegacion të qeverisë në Tiranë. Ky takim pritet të jetë vendimtar për fatin e protestës dhe për zgjidhjen e kërkesave të naftëtarëve.

    LEXO EDHE: ‘Dita e 14 e grevës së urisë’: Nga 10 grevistë kanë mbetur vetëm 7, qeveria indiferente, naftëtarët në rrezik për jetën

    Megjithatë, mosrespektimi i vazhdueshëm i problemit nga ana e ministrisë së Energjisë dhe qeverisë në përgjithësi ka nxitur pakënaqësi të thellë te punëtorët.

    Pavarësisht se janë në protestë prej disa ditësh, ministrja e sektorit, Delina Ibrahimaj, vetëm tani duket se po kujtohet t’i takojë ata, duke treguar mungesën e vullnetit real për t’i dëgjuar dhe për të gjetur zgjidhje.

    LEXO EDHE: ‘Kompania Bankers’ i merr tokën, e përdor për vete dhe refuzon të paguajë, Qytetari: Do bashkohem me grevën e urisë, kërkoj të drejtën time

    Kryesia e sindikatës do të marrë vendimin final pas takimit në Tiranë, duke bërë të qartë se nëse kërkesat nuk do të adresohen, lëvizja e tyre do të vijojë me hapa më të fuqishëm.

    Çfarë dihet deri më tani: 

    Situata e krijuar në Marinë ka tërhequr vëmendjen e mediave dhe institucioneve, duke rikujtuar tensionet që ekzistojnë në sektorin hidrokarburik dhe rëndësinë e dialogut konstruktiv midis punonjësve, kompanisë dhe shtetit.

    Kërkesat e naftëtarëve drejtuar kompanisë Bankers

    1- Rritja e fondit te pagave me 18% kjo shume te shpërndahet për punonjësit e fushës.

    2 – Arritja e trajtimit ushqimor nga 9 mijë lekë ne 13 e 200 lekë.

    3- Zbatimi i ligjit te statusit te naftëtarit.

    4- Drejtësi e barazi në shpërblime.

    5-  Meritokraci në rritje në detyrë e pronovime

  • Refuzohen kërkesat për hetime, Berisha paralajmëron reagimin e qytetarëve

    Refuzohen kërkesat për hetime, Berisha paralajmëron reagimin e qytetarëve

    Kryetari i Partisë Demokratike, Sali Berisha, reagoi sot jashtë sallës së Parlamentit pas refuzimit të mazhorancës për ngritjen e dy Komisioneve Hetimore Parlamentare – për skandalin “McGonigal” dhe për zgjedhjet e 11 Majit.
    Në prononcimin e tij, Berisha e cilësoi vendimin si “antikushtetues” dhe një mohim të së drejtës themelore të opozitës për të kërkuar hetime në parlament. Ai shtoi se kërkesat e PD-së ishin mbështetur mbi prova dhe dokumente konkrete, duke përfshirë raste të korrupsionit dhe ndikimeve të ish-shefit të FBI-së, McGonigal, në Shqipëri, si dhe lidhjet e mundshme të Edi Ramës me aktivitete të paligjshme.
    Berisha theksoi gjithashtu se zgjedhjet e 11 Majit janë cilësuar nga vëzhguesit ndërkombëtar si “të dhunuar dhe të manipuluara në masë”, ndërsa opozita disponon mijëra fakte që dëshmonin për këtë.
    Ai u shpreh se, për shkak të refuzimit të mazhorancës, hapësira e opozitës në parlament është “fiktive” dhe paralajmëroi se PD do të mobilizojë forumet dhe qytetarët për të kundërshtuar këtë situatë:

    “Në kushtet e një parlamenti që bllokon tërësisht hapësirën e opozitës, unë besoj se qytetarët do të jenë ata që do thonë fjalën e tyre,” – deklaroi Berisha.

    Ai përfundoi duke akuzuar mazhorancën për shmangie të detyrimeve parlamentare, duke mos marrë pjesë në interpelanca dhe duke refuzuar debatet mbi raportet ndërkombëtare, dhe paralajmëroi vazhdimin e përpjekjeve të opozitës për mbikëqyrje dhe hetim të çështjeve me interes publik.

  • Investime në rrugë dhe sheshe pallatesh. Rajoni nr. 6 vendosi përparësitë e vitit 2026

    Investime në rrugë dhe sheshe pallatesh. Rajoni nr. 6 vendosi përparësitë e vitit 2026

    Procesi i buxhetimit me pjesëmarrje u zhvillua në Rajonin Nr. 6, ku banorët e ardhur në takim patën mundësinë të shprehin kërkesat dhe pritshmëritë e tyre për investimet e ardhshme.Kryetarja e Këshillit të Qarkut, znj. Ermira Urupi, shprehu bindjen se të gjithë banorët pjesëmarrës në takim kanë ardhur për të shprehur kërkesat e tyre në këtë proces kaq të rëndësishëm për Elbasanin, i cili zhvillohet çdo muaj tetor për më shumë se një dekadë.
    “Unë mendoj se ju keni ardhur edhe për të falenderuar punën që është bërë në Rajonin Nr. 6. Bashkë me mua të gjithë e dini që punohet në të gjithë Shqipërinë, punohet në 7 bashkitë e qarkut, por unë them që më shumë punohet në Bashkinë e Elbasanit. Jam e bindur që kërkesat që ju keni do të gjeni dakordësinë e institucionit dhe kryetarit.”

    Kryetari i Bashkisë Elbasan, z. Gledian Llatja, u ndal tek investimet dhe projektet e realizuara, duke përmendur edhe banesat e riparuara për komunitetin rom dhe egjiptian.“Nga kërkesat tuaja të vazhdueshme kemi arritur të riparojmë pjesërisht 215 banesa individuale por edhe pallate kolektive në të gjithë Elbasanin.”

    Duke e vënë theksin tek investimet në rrugë, Llatja tha: “ kemi investuar në një sërë asfaltimesh. E nisëm me rrugën tek Koladuimi, pastaj me rrugët e brendshme, për të vazhduar me kërkesën e kahershme tuajën që është rruga “Arif Dardha”.Sot është shtuar një rrugë me standard fantastik.

    Kemi akoma shumë punë për të bërë dhe do t’i bëjmë, sepse për ne janë punët.Ashtu si ishin rrugët tek ura e sektorit, një sërë rrugësh në vazhdimësi të cilat tashmë janë zgjidhur, kanë ecur investimet, janë bërë punë.”
    Llatja foli më tej edhe për kanalizimet dhe përmirësimin e shesheve të pallateve.“Kemi bërë kanalizimet e ujrave të zeza, sistemimin e një pjese të përrroit. Po fillojmë tek “5 Maji”, ato sheshet e pallateve, që ne i kemi pasur përherë problematikë dhe na kanë dalë tek procesi i buxhetimit me pjesëmarrje dhe sot aty po investohet.”
    Pasi banorët dëgjuan investimet e kryera si edhe prioritetet e kryetarit të Bashkisë, ata vazhduan me votimin e kërkesave të tyre, të cilat janë përcaktuar si më prioritaret dhe do të kthehen në investime gjatë vitit të ardhshëm.

  • Greva e naftëtarëve hyn në ditën e 13, kërkojnë rritje page dhe respektim të statusit

    Greva e naftëtarëve hyn në ditën e 13, kërkojnë rritje page dhe respektim të statusit

    Në mbështetje të 9 kolegëve që këtë të hënë (27 tetor) kanë hyrë në ditën e 13 të grevës së urisë, një pjesë e naftëtarëve, vazhdojnë protestat në Marinzë.

    Kreu i Sindikatës Dritan Shahu, ka pohuar se në kushtet kur nuk ka zhvillime në bisedime me kompaninë lidhur me kërkesat e tyre, naftëtarët do të protestojnë para zyrave të shoqërisë Bankers Petroleum në Fier.

    Një ditë më parë, për shkak të gjendjes së rënduar shëndetësore, ekipi i urgjencës mjekësore nderhyri për t’u dhënë ndihme dy prej grevistëve.

    Sot një prej tyre i është rikthyer grevës ndërsa tjetri e ka patur të pamundur për shkak të problemeve shëndetësore.

    Kërkesat e naftëtarëve lidhen me rritjen e pagës, trajtimin ushqimore dhe statusin e naftëtarit. Nga ana tjetër kompania ka deklaruar se kërkesat e tyre janë të pabazuara në ligj ndërsa në tri vitet e fundit ka patur rishikime e rritje te vazhdueshme të pagave.

  • Marinëz, greva e urisë e naftëtarëve hyn në ditën e 13-të: Drejtësi për punën dhe dinjitetin

    Marinëz, greva e urisë e naftëtarëve hyn në ditën e 13-të: Drejtësi për punën dhe dinjitetin

    Greva e urisë e naftëtarëve të Sindikatës së Hidrokarbureve në Marinzë ka hyrë në ditën e 13-të. Nga dhjetë grevistët që nisën këtë qëndrim ekstrem, sot kanë mbetur tetë, pasi dy prej tyre u larguan për shkak të përkeqësimit të gjendjes shëndetësore. Megjithatë, ata vazhdojnë të mbështesin shpirtërisht shokët e tyre dhe vendosmërinë për të mos u tërhequr pa marrë përgjigje për kërkesat legjitime.

    LEXO EDHE: Vijon protesta e naftëtarëve në Marinzë: Kompania Bankers nuk ka gjendje financiare për të zgjidhur kërkesat

    “Edhe pse kemi përjetuar lodhje dhe rrezik për shëndetin, qëndrojmë të bashkuar për drejtësi. Qeveria duhet të dëgjojë zërin tonë,” shprehen grevistët, të vendosur për të mos ndalur derisa të marrin përgjigje konkrete.

    “Do të qëndrojmë këtu derisa kërkesat tona të trajtohen me seriozitet. Nuk kërkojmë më shumë sesa të drejtat tona të njohura ligjërisht.”

    Përveç mbështetjes nga bashkëpunëtorët lokalë, grevistët kanë fituar solidaritet edhe nga organizata ndërkombëtare. Përfaqësues të Olof Palme International Center dhe organizatës Drejtësi Sociale vizituan çadrat e grevës, duke shprehur mbështetje të plotë dhe duke bërë thirrje për presion ndaj qeverisë shqiptare.

    LEXO EDHE: Marinzë/ Dita e 12-të e grevës së urisë, përkeqësohet shëndeti i dy naftëtarëve, njëri prej tyre dërgohet në spital

    “Kemi vënë në dijeni instancat dhe organizmat ndërkombëtarë që të ushtrojnë presion për zgjidhjen e çështjes së naftëtarëve. Ata meritojnë përgjigje dhe respekt për punën dhe dinjitetin e tyre.”

    Në ditët e fundit, pranë grevistëve janë bashkuar edhe veteranë naftëtarë, të cilët nënvizojnë se pavarësisht mbështetjes së tyre për qeverinë, ata e pranojnë se naftëtarët kanë të drejtë në kërkesat e tyre. Veteranët kanë kërkuar që qeveria të ndërmarrë rol aktiv dhe të ulet në tryezën e negociatave.

    “Qeveria nuk mund të qëndrojë në heshtje. Këta punonjës kërkojnë vetëm të drejtën e tyre për kushtet dhe pagat që meritojnë.”

    LEXO EDHE: ‘Naftëtarët e Marinzës në ditën e 11-të të grevës’: Po mbijetojmë me shpirt ndër dhëmbë, kërkojnë zgjidhje urgjente nga shteti dhe kompania

    Grevistët kërkojnë përgjigje për kushtet e punës dhe sigurimin e të drejtave të tyre. Pavarësisht se ditët e grevës po shtohen dhe shëndeti i tyre po rrezikohet, ata qëndrojnë të bashkuar dhe besojnë se zëri i tyre po dëgjohet edhe përtej kufijve.

    “Ne kërkojmë drejtësi. Nuk është një kërkesë e tepruar; është ajo që na takon për punën dhe mundin tonë.”

    Kërkesat e naftëtarëve drejtuar kompanisë Bankers

    1- Rritja e fondit te pagave me 18% kjo shume te shpërndahet për punonjësit e fushës.

    2 – Arritja e trajtimit ushqimor nga 9 mijë lekë ne 13 e 200 lekë.

    3- Zbatimi i ligjit te statusit te naftëtarit.

    4- Drejtësi e barazi në shpërblime.

    5-  Meritokraci në rritje në detyrë e pronovime

    Në ditën e 13-të të grevës, mes dhimbjes dhe shpresës, fjala që përsëritet në çadrat e Marinzës është “drejtësi”  drejtësi për punën, mundin dhe dinjitetin e naftëtarëve. Ata shpresojnë që përmes solidaritetit të shoqërisë dhe mbështetjes ndërkombëtare, qeveria shqiptare të ndërmarrë veprime konkrete.

    FOTO GALERI: