Në Sanya u hap Festivali i 7-të Ndërkombëtar i Filmit i Ishullit Hainan, i organizuar së bashku nga Grupi Mediatik i Kinës dhe Qeveria Popullore e Provincës Hainan.
Guvernatori i Hainanit, Liu Xiaoming, mbajti një fjalim dhe njoftoi hapjen e festivalit të filmit. Liu deklaroi se Porti i Tregtisë së Lirë i Hainanit është gati të nisë zyrtarisht operacionin e tij të zhdoganimit në të gjithë ishullin dhe se Hainani po bëhet një kufi i ri për hapjen e Kinës, një vatër e re për bashkëpunim rajonal të dobishëm reciprokisht dhe një motor i ri për promovimin e globalizimit ekonomik. Në këtë moment të rëndësishëm – 130-vjetori i lindjes së kinemasë botërore dhe 120-vjetori i lindjes së kinemasë kineze – dhe ndërsa Porti i Tregtisë së Lirë i Hainanit është gati të nisë operacionin e tij të zhdoganimit në të gjithë ishullin, Hainani po përdor filmin si një medium për të festuar dhe përkujtuar këtë moment të rëndësishëm.
Në fjalën e saj, Xing Bo, Zëvendëskryetarja e Grupit Mediatik të Kinës, deklaroi se Festivali i 7-të Ndërkombëtar i Filmit në Ishullin Hainan jo vetëm që ndërtoi një platformë për shkëmbimin ndërkombëtar të filmave dhe mësimin e ndërsjellë midis qytetërimeve, por gjithashtu shfaqi një Hainan të gjallë dhe një Kinë inovative dhe të hapur ndaj botës. Grupi Mediatik i Kinës është i gatshëm ta shfrytëzojë këtë festival filmi si një mundësi për ta shfrytëzuar më tej avantazhet e platformës së tij të komunikimit ndërkombëtar, duke përfshirë 85 gjuhët e tij dhe 192 stacionet e huaja, për të thelluar bashkëpunimin me regjisorët në mbarë botën dhe për të eksploruar së bashku mundësi të reja për integrimin e thellë të artit të filmit dhe televizionit me kulturën, turizmin dhe teknologjinë.
Festivali i 7-të Ndërkombëtar i Filmit në Ishullin Hainan, me temë “Një mori jete detare, kinema pa kufij”, mori një rekord prej 4564 aplikimesh nga 119 vende dhe rajone. Juria për “Çmimin e Artë të Kokosit” të këtij viti përbëhet nga 13 profesionistë të njohur të filmit nga vendi dhe jashtë vendit, me regjisorin italian Marco Muller që shërben si president i jurisë.
Tag: festivali
-
Hapet Festivali i 7-të Ndërkombëtar i Filmit në Ishullin Hainan
-
Nis festivali i humorit në Shkodër, aktorët më të njohur bëhen bashkë në teatrin “Migjeni”
U rikhyen në Shkodër, shtëpinë e madhe të humorit shqiptar në festën më të madhe të të qeshurave në shqiptari, “Festivalin Mbarëkombëtar të Humorit”.
Trupa nga Shqipëria dhe artistë nga Kosova, janë bërë bashkë në skenën e teatrit “Migjeni”, për të sjellë të qeshura dhe argëtim për publikun përgjatë gjithë javës.
Ikonat e humorit shqiptar, Zyliha Miloti, Drande Xhaj, Sander Ruçi dhe Besnik Çinari mikpresin në qytetin e tyre, Parodistët e Vlorës, Agron LLakaj, Sevdai Radogoshi etj.Një festë që vjen nën drejtimin artistik të Arjan Çuliqit.
Festivali solli këngën dhe humorin, stand up komedi, si dhe elementë të tjerë që e bënë tejet të vecantë.
Çdo mbrëmje deri me 8 dhjetor, Shkodra dhe miqtë artistë nga trojet shqipfolëse, do të buzëqesh me humorin si dhe do të kujtojë disa prej emrave të medhenj që sot nuk jetojnë më./vizionplus.tv -
Nis Festivali i Letërsisë Evropiane në Tiranë, 12 autorë në edicionin e dytë, shkrimtarja Maja Haderlap e pranishme…
Nga Julia Vrapi
Letërsia në qendër, Festivali Evropian këto ditë dhjetori e kthen Tiranën në skenën e fjalës së shkruar. Edicioni i dytë i Festivalit të Letërsisë Evropiane rikthehet këtë vit me një program të pasur dhe me një rëndësi të dukshme në jetën kulturore të kryeqytetit. Ngjarja mbledh shkrimtarë, përkthyes, studiues dhe lexues, duke e shndërruar kryeqytetin në një hapësirë dialogu dhe shkëmbimi idesh. Festivali këtë vit sjell 12 autorë, të cilët përfaqësojnë 13 shtete anëtare të Bashkimit Evropian, si dhe do të zhvillohet deri më 6 dhjetor në vendin tonë . Festivali i Letërsisë Evropiane u çel të martën në Tiranë me një mbrëmje frymëzuese në Teatrin Kombëtar të Operës, Baletit, duke shënuar fillimin e pesë ditëve të letërsisë evropiane, bisedave, punëtorive dhe aktiviteteve shkollore në të gjithë qytetin. Në aktivitetin hapës, të organizuar me ambasadat e Austrisë, Gjermanisë dhe Sllovenisë , morën pjesë shkrimtarja Maja Haderlap, e cila foli për gjuhën, identitetin dhe kujtesën, së bashku me përkthyesen e saj në shqip Blerta Lazebeu.
“I moderuar nga Ana Kove, diskutimi theksoi se si letërsia dhe përkthimi mbartin histori personale dhe historinë e përbashkët të Evropës nëpër kultura”, thuhet në faqen e Delegacionit të Bashkimit Evropian, që ka ndarë dhe disa foto nga aktiviteti. Maja Haderlap ka lindur në Bad Eisenkappel / Železna Kapla (Kärnten) dhe ka studiuar teatrologji dhe gjuhë-letërsi gjermane. Ajo është vlerësuar me Çmimin Ingeborg Bachmann për romanin e saj të parë Engjëlli i harresës dhe ka fituar çmime të tjera prestigjioze si Çmimi Max Frisch dhe Çmimi Christine Lavant. Nachtfrauen është libri i saj i fundit, botuar nga Suhrkamp. Festivali që po vijon këtë vit në edicionin e dytë, përmes paneleve, leximeve publike dhe diskutimeve të hapura, nxit jo vetëm kulturën e debatit letrar, por edhe kuriozitetin e publikut për letërsinë bashkëkohore europiane. Gjithashtu edicioni i dytë e konsolidon më tej rolin e festivalit si një ngjarje që e vendos Tiranën në hartën kulturore europiane, duke promovuar vlerat e letërsisë dhe rëndësinë e saj në shoqërinë moderne.
Edicioni i dytë me një program të pasur
I organizuar nga BE në Shqipëri, në bashkëpunim me Institutin Italian të Kulturës dhe ambasadat e shteteve anëtare të BE-së në Shqipëri, FELT kthehet për edicionin e dytë me një program të pasur, duke mirëpritur shkrimtarë nga Irlanda, Austria, Gjermania, Sllovenia, Spanja, Holanda, Kroacia, Bullgaria, Republika Çeke, Franca, Greqia, Italia dhe Polonia. FELT2025 vazhdon sot me dy takime për të rinj: një diskutim rreth botimit komik të R.U.R. nga Karel Čapek në Shtëpinë e Evropës dhe një bisedë me nxënës mbi novelën grafike “Vincent” të Barbara Stock në Librarinë Babel. Në mbrëmje, në Vila 31 x Art Explora, vijohet me një bisedë mbi letërsinë e tranzicionit me Milena Selimi, një takim me Ena Katarina Haler dhe një performancë artistike që bashkon poezinë dhe muzikën. FELT 2025 vijon nesër më 5 dhjetor me një ditë të dedikuar lexuesve të rinj. Ndër aktivitetet, në gjimnazin e gjuhëve të huaja “Asim Vokshi”, Maja Haderlap dhe përkthyesja Blerta Lazebeu do të lexojnë fragmente dhe diskutojnë me nxënësit për rolin e letërsisë në kujtesë, ballafaqimin me të kaluarën dhe identitetin në një botë të globalizuar. Ndërsa në Fakultetin e Historisë dhe Filologjisë, Philippe Collin do të bashkëbisedojë me studentët e gazetarisë dhe komunikimit mbi podcast-et, median dhe historinë. Në vijim të veprimtarive, sipas materialit të bërë me dije më parë rreth festivalit nga njoftimi i Delegacionit të Bashkimit Evropian, mbrëmja e datës 5 dhjetor do të mbyllet në Qendrën Kulturore Tulla në Tiranë me një bisedë mbi veprën e Wisława Szymborska-s me Michał Rusinek dhe një diskutim me Christos Kythreotis mbi rininë, identitetin dhe migracionin në letërsinë bashkëkohore. -
Festivali i Letërsisë Europiane/ Organizohet nga BE, pjesëmarrës 12 autorë nga 13 vende anëtare të Unionit
Festivali i Letërsisë Evropiane, i organizuar nga Bashkimi Evropian në Shqipëri, rikthehet në edicionin e dytë, me pjesëmarrjen e 12 autorëve që përfaqësojnë 13 shtete anëtare të BE-së, të cilët do të lidhen me lexuesit shqiptarë dhe do të vizitojnë shkolla të mesme dhe universitete.
“Do të kemi një sërë bisedash për autorë të rinj që vijnë nga Bashkimi Europian në ndërveprim me shkrimtarë vendas. Këtë vit kemi përfshirë përkthyesit e autorëve, sepse mendoj se përkthimi është gjithmonë një proces jashtëzakonisht interesant për t’u analizuar. Do të kemi biseda në disa vende sepse dëshirojmë të arrijmë audienca të ndryshme”, u shpreh Silvio Gonzato.
Në ditën e parë të festivalit, Maja Haderlap, bisedoi me publikun mbi romanin “Engjëlli i harresës”, që bazohet në përvojat e familjes së saj dhe të pakicës sllovene në Austrinë jugore , shumë prej të cilëve luftuan si partizanë kundër nazistëve gjatë luftës së Dytë Botërore.
“E dëgjoj me vëmendje gjyshen kur tregon se për sa e sa njerëz gatuante në shtëpi asokohe kur kishin pasur çirakë, shërbyes dhe shumë fëmijë. Ajo tregon se më pas i është dashur të vidhte ndonjë gjë për të ngrënë për vete dhe për të tjerët. Kur lante kazanët rrëmonte për çdo lëkurë patateje apo çdo gjë që dukej e ngrënshme. E di se ishte fati i madh që rastisa në kuzhinë atje në kamp, thotë ajo”.
“Kam lindur në një periudhë kur nuk kishte kaluar ende shumë kohë nga Lufta e Dytë Botërore. Në fëmijërinë time në Kert unë kam përjetuar konfliktet e vjetra nga njëra anë, shihja familjen që përballej me një histori të tmerrshme të së shkuarës. Më vonë kuptova që pjesa tjetër e Austrisë nuk e njihte këtë histori. Doja ta paraqisja përmes këtij libri, ndaj dhe vendosa ta shkruaj në gjermanisht për të gjithë publikun”, u shpreh shkrimtarja Maja Haderlap
Por, si i flet “Engjëlli i harresës” lexuesit shqiptar?
Përkthyesja Blerta Lazebeu tha: “Mendoj se romani Engjëlli I Harresës është një dëshmi e gjallë e kujtesës kolektive europiane. Aty rrëfehet e një familjeje, më pas e një komuniteti pakice, por në fund edhe e një kombi, e një shteti. Aty gjithkush nga ne mund të identifikojë elementë të vendit dhe kulturës vetjake”.
Festivali Evropian i Letërsisë në Tiranë, që do të zhvillohet në disa vendndodhje, që nga Shtëpia e Evropës deri te Teatri i Operës dhe Baletit dhe Ansambli Popullor në Tiranë, Vila 31, Biblioteka Kombëtare dhe Teatri i Kukullave, i fton pjesëmarrësit të eksplorojnë ndikimin transformues të leximit dhe rrëfimit të historive në formësimin e një Evrope më të ndërlidhur dhe më empatike.Top Channel
-
Festivali i Filmit Shqiptar rikthehet pas më shumë se dhjetë vitesh mungesë, edicioni i 14 do të zhvillohet në 2026
Nga Julia Vrapi
Festivali Kombëtar i Filmit Shqiptar do të ketë një rikthim të tij pas më shumë se dhjetë vitesh mungesë. Festivali i Filmit Shqiptar i ka fillesat dekada më parë dhe u zhvillua prej vitesh, si një nga ngjarjet e rëndësishme në jetën artistike dhe kulturore në vend. Ai u zhvillua për herë të fundit në vitin 2012 në vendin tonë dhe për kineastët shqiptarë ishte një event i harruar nga institucionet që duhej të zhvillohej. Por projekti i miratuar nga bordi pranë Qendrës Kombëtare të Kinematografisë rikthen dhe festivalin, që pritet të zhvillohet për katër ditë në vendin tonë në vitin 2026. Qendra Kombëtare e Kinematografisë një ditë më parë bëri me dije projektet fituese në disa kategori. Në kategorinë e “Ditë, Javë ose Festival Filmi” u shpallën fitues projektet: “Festivali i 14-të i filmit shqiptar” nga Iceberg Communication, “Retro International Film Festival” nga Begolli Production, “International Students Film Festival in Tirana (ISFFT)” nga Element Studios, “Udhëtim i ëndërrt” nga Genc Përmeti. Sa i takon Festivalit të 14-të të Filmit Shqiptar, ai rikthen pas më shumë se dhjetë vitesh traditën më të rëndësishme kombëtare të kinemasë, duke sjellë në qendër të vëmendjes krijimtarinë dhe arritjet e kineastëve shqiptarë. Në shpjegimin e projektit publikuar nga QKK bëhet me dije se: “gjatë këtyre ditëve, festivali do të bashkojë regjisorë, aktorë, producentë, kritikë dhe publikun e gjerë në një program të pasur me shfaqje filmash, konferenca shtypi, podcaste live, aktivitete artistike dhe evente rrjetëzimi, të gjitha me hyrje të lirë”. Po sipas QKK, në kategorinë e “Filmit Artistik me metrazh të gjatë- vepër e parë”, projekti fitues u shpall “Unaza” nga Klajd Papadhimitri. Në kategorinë e “Botim ose Përkthim Libri Kinematografik” u shpall fitues “Shqipëria në artin filmik të Dhimitër Anagnostit” nga Elsa Demo, ndërsa në kategorinë “Pjesëmarrje në Konferenca, Seminare, Punëtori, ose Trajnim për Kineastë”, u shpall fitues “Crew rooms intensive – Punëtori krijuese për profesionet e reja në kinematografi” nga Filter Film.
Festivali i Filmit Shqiptar ndër vite
Festivali i Filmit Shqiptar prej vitesh mungoi në jetën artistike në vend, por tradita e tij ka nisur që në vitin 1976. Festivalet e filmit lindën në mesin e viteve ‘70-të, atëherë kur ish Kinostudioja “Shqipëria e re” në vendin tonë prodhonte 14 filma artistikë në vit, mbi 30 filma dokumentarë dhe disa filma vizatimorë. Festivali i parë u mbajt në vitin 1976, festivali i dytë u zhvillua në 1977 dhe sipas materialeve më parë deri në vitet ’90-të ato u zhvilluan çdo dy vjet. Festivali i dhjetë u organizua në maj 1995; Festivali i njëmbëdhjetë u organizua në prill të vitit 2000; Festivali në edicionin e 12-të pas 6 vitesh u zhvillua në vitin 2006. Festivali i 13-të i Filmit Shqiptar u zhvillua në vitin 2012 nga data 3 deri më 9 nëntor. Aktori Robert Ndrenika ishte president i festivalit, programi ishte parashikuar 15 filma artistikë, 19 të shkurtër, 17 dokumentarë dhe 12 vizatimorë. Shfaqja e kopjes së restauruar të filmit “Nëntori i dytë” çeli në kinema “Millenium”, Festivalin e 13-të të Filmit Shqiptar. -
Festivali i Letërsisë Evropiane nis në dhjetor në Tiranë, takime me autorë, lexime, biseda dhe aktivitete të ndryshme
Nga Julia Vrapi
Lexime, biseda rreth letërsisë dhe aktivitete të ndryshme janë pjesë e Festivalit të Letërsisë Evropiane. Festivali nis këtë vit në muajin dhjetor dhe vjen me një program të pasur me në vëmendje librat dhe autorët. Festivali i Letërsisë Evropiane është një festival që kremton letërsinë europiane, duke promovuar në Shqipëri autorë bashkëkohorë dhe vepra letrare nga e gjithë Evropa, me vëmendje atyre të përkthyera dhe botuara në vend. Delegacioni i Bashkimit Evropian sjell Festivalin e Letërsisë Evropiane në Tiranë, që nis më datë 2 dhjetor këtë vit, ku do të ketë takime me autorë, lexime, biseda dhe aktivitete për të gjithë.
“Nga datat 2-6 dhjetor takohemi për një maratonë leximesh, bisedash dhe aktivitete me autorë nga Evropa, në disa pika të qytetit”, thuhet në faqen e Delegacionit të Bashkimit Evropian për zhvillimin e këtij festivali, që muajin që vjen pasuron dhe kalendarin artistik të kryeqytetit. I organizuar nga Delegacioni i BE-së në Shqipëri, në bashkëpunim me Institutin Italian të Kulturës dhe ambasadat e shteteve anëtare të BE-së në Shqipëri, FELT kthehet për edicionin e dytë me një program edhe më të pasur, duke mirëpritur më shumë shkrimtarë nga Irlanda, Austria, Gjermania, Sllovenia, Spanja, Holanda, Kroacia, Bullgaria, Republika Çeke, Franca, Greqia, Italia dhe Polonia. Në njoftimin e festivalit thuhet se përmes leximeve, bisedave, performancave artistike dhe sesioneve interaktive, festivali vijon të nxisë dialogun mbi letërsinë bashkëkohore, duke vënë në pah temat e identitetit, historisë dhe ndryshimeve shoqërore.
Autorë pjesëmarrës në festival
Festivali i Letërsisë Evropiane këtë vit zhvillohet edicionin e dytë në vendin tonë, por më 2 dhjetor paradite sjell punëtorinë e shkrimit krijues nga Fighting Words dhe vazhdon në mbrëmje me hapjen e festivalit dhe performancën e kërcimit në Teatrin Kombëtar të Operës dhe Baletit. Në materialet informues rreth festivalit bëhet me dije se “Fighting Words” vjen në Tiranë për dy ditë plot histori, kreativitet dhe biseda me autorë të rinj. “Më 2 dhe 3 dhjetor, autorët irlandezë Djamel White, Hazel Hogan dhe Ciara Geraghty do të zhvillojnë dy punëtori mbi shkrimin krijues, ku nxënësit punojnë së bashku për të krijuar dhe përfunduar histori origjinale”, thuhet për këtë punëtori mbi shkrimin krijues. Tregimet përfundimtare do të mblidhen në një botim të posaçëm nga Ambasada e Irlandës. Në program është dhe një bisedë me shkrimtaren Maja Haderlap mbi shkrimin shumëgjuhësh, përkatësinë dhe përvojën e të jetuarit mes disa kulturave, në kuadër të FELT 2025.
Më 3 dhjetor, në gjimnazin e gjuhëve të huaja “Asim Vokshi”, nxënësit do të takojnë nga afër shkrimtaren spanjolle Begoña Oro, e cila do të lexojë fragmente nga veprat e saj dhe do të flasë me ta për tregimet, personazhet dhe fuqinë e imagjinatës. Në FELT 2025, me 4 dhjetor nxënës nga gjimnazet “Jordan Misja” dhe “Petro Nini Luarasi” do të marrin pjesë në një shkëmbim rreth botimit në formë komiku të R.U.R. (Rossum’s Universal Robots) të Karel Čapek, në Europe House. Një masterklas e shkrimit krijues “The Many Forms of Storytelling” me autorin italian Dario Voltolini zhvillohet nën kujdesin e Institutit Italian të Kulturës në Tiranë, pjesë e Festivalit të Letërsisë Evropiane. Pjesë e programit është dhe një bisedë me Milena Selimin mbi letërsinë e tranzicionit, identitetin dygjuhësh dhe përkthimin letrar. Festivali sjell dhe një mbrëmje, ku letërsia takohet me arkitekturën, kujtesën dhe muzikën live.
Biseda me shkrimtaren kroate Ena Katarina vijon në Vila 31 x Art Explora. Ndërsa autori polak Michał Rusinek vjen në Tiranë për të folur për veprën e Wisłaëa Szymborska-s dhe rolin e letërsisë në jetën e përditshme. Në vijim në festival shkrimtarja italiane Nadia Terranova vjen në Tiranë për një bisedë mbi mënyrën se si letërsia flet për plagët e heshtura dhe përballjen me të shkuarën. Në festival vjen dhe Annette Young nga Australia, që është autore dhe prezantuese e 51 për qind e programit që trajton çështjet më të rëndësishme që prekin gratë anembanë botës. Ajo do të drejtojë masterclass-in “Si të krijojmë përmbajtje tërheqëse mediatike mbi gratë dhe barazinë gjinore”, që do të zhvillohet në Tiranë. Ndër pjesëmarrësit në festival përmendim dhe shkrimtarin grek Christos Kythreotis që vjen në Tiranë për një bisedë mbi të rinjtë, përkatësinë dhe lëvizjen në letërsinë bashkëkohore. -
Festivali i Këngës në RTSH në edicionin e 64 nis më 17 dhjetor në Pallatin e Kongreseve
Festivali i Këngës në RTSH këtë vit do të nis mbrëmjen e datës 17 dhjetor për të vijuar dhe në datat 18, 19 dhe 20. Datat e edicionit të sivjetshëm të Festivalit të Këngës në Radio Televizionin Shqiptar që do të zhvillohet në Pallatin e Kongreseve në Tiranë u bënë me dije përmes një njoftimi në rrjetet sociale nga organizatorët. Festivali këtë vit vjen në edicioni e 64-t dhe pritet të sjellë në skenë edhe disa nga emrat e njohur të muzikës shqiptare. “Katër net magjike në Pallatin e Kongreseve! Më 17, 18, 19 dhe 20 dhjetor skena e Pallatit të Kongreseve do të ndizet nga emocionet, muzika dhe magjia e traditës. Zërat më të mirë dhe këngët më të reja do të bashkohen në edicionin e 64-të të këngës shqiptare”, shkruajnë organizatorët ndër të tjera.
Gjatë katër netëve radhazi, konkurrentët do të interpretojnë live këngët e tyre origjinale, ndërsa gara pritet të jetë e fortë. Këtë vit janë përzgjedhur 28 artistë, që do të jenë në konkurrim në Festivalin e Këngës në RTSH në edicionin e 64-t. Festivali i 64-t i Këngës në Radio Televizionin Shqiptar do të vijë për katër net me radhë për publikun, ku nata e parë dhe e dytë siç është bërë me dije më parë do të jenë netët konkurruese, nata e tretë do t’i kushtohet nostalgjisë, ndërsa nata e katërt do të jetë finalja e madhe. Festivali i Këngës në RTSH edhe pse përballet me kritika çdo vit nga krijues e artistë të ndryshëm është dhe një prej ngjarjeve muzikore kryesore në vend, por që prurjet muzikore kanë ngjallur jo pak diskutime. Fituesi i këtij edicioni do të përfaqësojë Shqipërinë në “Eurovision 2026”, që do të zhvillohet në maj të vitit të ardhshëm në Austri. -
Kush do ta prezantojë Festivalin e RTSH? Prapaskenat, preferencat dhe dilemat që po nxehin skenën
Festivali i RTSH, i cili pritet të hapë siparin shumë shpejt, duket se këtë vit po e nis me një tjetër skenë para skenës. Jo me muzikë, por me debatet për zgjedhjen e moderatorëve. Ndërsa publiku pret emrat, në korridoret e televizionit publik diskutimet janë ndezur.
Sipas burimeve të “Pamfleti”, Këshilli Drejtues i RTSH ka preferencë të qartë për Flori Gjinin dhe Fjodora Fjorën. Të dy janë pjesë e stafit të RTSH, një zgjedhje që do të ulte kostot në një periudhë ku televizioni publik po kalon vështirësi financiare. Por ky propozim nuk është pritur njësoj mirë nga bordi i Festivalit.
Drejtoresha artistike, Elhaida Dani, flitetse ka një dëshirë të fortë për ta sjellë Salsano Rrapin në skenë, duke i dhënë festivalit energjinë e tij të humorit dhe spontanitetit. Salsano, nga sa mësohet, e ka siguruar edhe miratimin e drejtuesve të TCH për të marrë pjesë.
Debati zgjerohet edhe më tej me emrin që do të prezantojë krah tij. Fillimisht u mendua Jondia Shehu, por duke qenë se Festivali synon një frymë më të re këtë vit, është hedhur në tavolinë edhe emri i Arilena Arës. Megjithatë, pjesëmarrja e saj është ende e paqartë, pasi kërkesat financiare mund të jenë të papërballueshme për RTSH, i cili prej pak kohësh është shpallur në faliment.
Mes dëshirave artistike dhe realiteteve financiare, Festivali i RTSH mbetet në udhëkryq. Vendimi përfundimtar pritet të merret shumë shpejt, ndërsa publiku vijon të hamendësojë se cilët do të jenë fytyrat që do të hapin netët magjike të festivalit. -
Sonte nis Okarina Fest 2025, edicioni i dytë i festivalit ndërkombëtar
Sonte nga ora 18:00 nis edicioni i dytë i festivalit ndërkombëtar “Okarina Fest 2025” ngjarje kulturore që synon promovimin e instrumenteve autoktone shqiptare, me theks të veçantë tek okarina e Runikut, një instrument që daton rreth 8 mijë vite sipas zbulimeve arkeologjike.
Drejtoresha e festivalit, Monika Duzhmani, në një intervistë për “Mirëmëngjesi Kosovë” në RTK tha se ky edicion është më i veçantë, pasi këtë vit festivali mirëpret artistë edhe nga Italia, mes tyre një grup i njohur që do të performojë në skenën e festivalit.
“Ideja dhe synimi ynë janë që Kosova të prezantohet në botë përmes instrumenteve tona tradicionale. Okarina e Runikut është një simbol kulturor i rëndësishëm, dhe përmes këtij festivali duam të ruajmë e promovojmë vlerat tona”, tha Duzhmani.
Ajo shtoi se festivali synon edhe krijimin e shkëmbimeve kulturore mes vendeve, pasi “muzika është ura më e fortë që lidh popujt”.
Nga ana tjetër, profesori italian Giovanni Battista Martini theksoi rëndësinë e këtij bashkëpunimi kulturor. “Është një përvojë shumë e bukur, sepse edhe për ne është me rëndësi të gjejmë një vend tjetër që përdor të njëjtat instrumente, edhe pse me disa dallime të vogla,” tha ai.
Ndërsa studenti italian Alberto Ciarroca u shpreh se okarina në Itali është shumë e njohur, prandaj edhe koncertet e tyre janë të shpeshta./rtk
ObserverKult
Lexo edhe:
NIS EDICIONI I TRETË I JAVËS SË FILMIT ETNOGRAFIK NË PRISHTINË
-
Festivali i Akuarelit në Pogradec, artistë nga më shumë se 30 vende të botës bashkohen në qytetin liqenor
Për herë të parë Pogradeci mirëpriti festivalin ndërkombëtar të Akuarelit, një event kulturor që bëri bashkë artistë nga më shumë se 30 vende të botës.
Sipas organizatorëve, Pogradeci është qyteti i duhur për realizimin e një festivali të tillë në përmasa të mëdha.
Pjesa më e madhe e artistëve të huaj e vizitonin për herë të parë qytetin.“E pëlqej këtë qytet, më tepër i zhvilluar se mendoja, sot pikturoja dhe kisha një pamje fantastike, ju betohem, një nga pamjet me të bukura që kam pikturuar ndonjëherë. Mendoj se ky event e ngre në një shkallë më lart këtë zonë. Ju duhen këto evente për të promovuar turizmin”, u shpreh Hamit Kappor, piktor indian.
“Kam ardhur disa herë në Pogradec, këtë herë jam kënaqur shumë. Ky është qyteti i artit, e mbështet dhe kur më ftuan të isha pjesë e këtij festivali u nderova. Di të them që ky qytet mund të bëhet qendër e artit në Shqipëri”, u shpreh Atanur Dogan, piktor turk.
“Është nder të jesh këtu në qytetin e bukur të Pogradecit, jemi entuziaste që akuareli erdhi këtu, ju jeni mikpritës, na jepni ngrohtësi dhe duam të bashkëpunojmë përherë me shqiptarët. Jemi të gjithë të kënaqur që erdhëm”, u shpreh Giovanni Balzarani, piktor Italian.
Një pjesë e punimeve të këtij festivali do i dhurohen fondit të galerisë së artit të Pogradecit ndërsa piktorët realizojnë punime në disa prej destinacioneve me interesante të zonës./vizionplus.tv