Lajmidites.com

Tag: brumi

  • Si të Përgatisni Bukë të Shijshme Fshati vetë në Shtëpi

    Si të Përgatisni Bukë të Shijshme Fshati vetë në Shtëpi

    Dashamirësit e puergatitjes së bukës në shtëpi janë gjithnjë në kërkim të recetave të reja dhe përditësimit të atyre aktuale për të sjellë në tryezë gatime sa më të mira e të shëndetshme.

    Buka e bërë vetë e mbush shtëpinë me aromë shumë të këndshme dhe bashkon të gjithë familjen.
    Në këtë recetë të AgroWeb.org do të mësoni se si të përgatisni bukën e fshatit në shtëpi në mënyrë të shëndetshme.
    Përbërësit 

    1 pako maja e thatë
    1 lugë çaji me sheqer
    3 filxhanë (çaji) me miell të bardhë
    1 gotë me ujë
    1 lugë e gjysmë çaji me kripë
    2-3 lugë gjelle me vaj ulliri
    Miell të bardhë shtesë për punimin e brumit.

    Përgatitja
    Merrni një tas të një madhësie mesatare dhe hidhni në të majanë, sheqerin, treçerek filxhan çaji me miell dhe ujin.
    Përziejini mirë së bashku duke përdorur një lugë druri.
    Në këtë pikë, brumi do të bëhet i hollë.
    Lejeni brumin në tas në një vend të ngrohtë dhe mos e mbuloni.
    Prisni deri sa brumi të jetë disi i shkumëzuar.
    Nëse dëshironi që buka të ketë shijen e brumit të ardhur, atëherë lëreni atë mënjanë për deri në 2 orë.
    Më pas përzieni pjesën e mbetur të miellit me kripën me një lugë druri dhe shtoni pjesën e brumit me maja.
    Kur brumi të lidhet fort, atëherë në banakun e pastër hidhni miell dhe punojeni brumin me dorë për rreth pesë minuta.
    Herë pas here shtoni sasi të vogla mielli deri sa brumi të jetë i butë por jo i ngjitshëm.
    Merrni një tepsi dhe lyejeni lehtë me vaj.
    Vendoseni brumin e bukës në qendër të tepsisë dhe sipërfaqen e sipërme të saj lyejeni me vaj.
    Tepsinë mbulojeni me një qese plastike dhe sipër saj vendosni një peshqir të pastër.
    Lëreni brumin të vijë për të paktën dy orë , në varësi të temperaturës së ambientit.
    Kthejeni brumin sërish në banakun e lyer me miell dhe punojeni me duar për 2 minuta.
    Në këtë pikë, brumi duhet të jetë shumë elastik.
    Jepini brumin formën rrethore ose atë që preferoni, lyejeni sipërfaqen me vaj ulliri dhe vendoseni mbi një letër pjekjeje.
    Lëreni mënjanë përreth 1 orë deri sa masa e brumit të dyfishohet.
    Kur buka të jetë gati për pjekje, ndizeni furrën në 200 °C.
    Lyejeni sipërfaqen e saj me pak ujë dhe futeni në furrë për ta pjekur për rreth 30 minuta.
    Hiqeni nga furra dhe spërkateni me pak ujë dhe më pas futeni sërish në furrë për t’u pjekur për 15 minuta të tjera.
    Hiqeni përfundimisht nga furra dhe lëreni të ftohet për 5 minuta përpara se ta prisni në feta./AgroWeb.org

  • Kek i Shpejtë dhe i Lehtë me Limon – Ëmbëlsi Magjike

    Kek i Shpejtë dhe i Lehtë me Limon – Ëmbëlsi Magjike

    Tradita shqiptare e përgatitjes së ëmbëlsirave është fantastike.

    Me shurup a me sherbet, me fruta të thata, a arra dhe bajame, a me mollë e me karrota, shije të ndryshme, të gjitha të mrekullueshme që të ndjellin e kënaqin oreksin e nepsin menjëherë.
    Por fantazia e amvisave në kuzhinë është magjike. Së fundmi, një recetë e ëmbël ka rrëmbyer zemrat e të gjithëve me shijen e saj marramendëse.
    Përgatitja e tij kërkon shumë pak kohë dhe përbërësit e tij gjenden patjetër në kuzhinën e çdo amvise shqiptare.
    Përbërësit për një tavë me diametër 22-24 cm

    120 g niseshte misri
    120 g miell gruri
    250 g gjalpë i zbutur në temperaturë ambienti
    250 g sheqer
    4 vezë mesatare
    Fryrës për ëmbëlsira ose sodë buke 16 g
    75 g lëng limoni
    Lëkura e dy limonëve
    Sheqer pluhur për spërkatje

    Përgatitja
    Si fillim presim gjalpin në kubikë të vegjël, dhe e hedhim në një tas të thellë.
    Shtoni aty gjysmën e dozës së sheqerit, pak nga pak, ndërkohë që e trazoni.
    Pasi kokrrizat e sheqerit të jenë shkrirë me gjalpin, dhe ngjyra e masës të jetë një e verdhë e lehtë, do të shtoni të verdhat e vezëve një nga një (ndërsa të bardhat e vezëve lërini mënjanë).
    Do ta trazoni këtë masë derisa të jetë e njëtrajtshme. Merrni dy limonë mesatarë dhe pasi t’i keni larë me ujë të bollshëm, me ndihmën e një rendeje grijmë lëkurën e tyre.
    Lëkurën e limonëve e shtojmë tek masa me vezët, gjalpin dhe sheqerin dhe e përziejmë përsëri.
    Në një tas tjetër trazojmë miellin, niseshtenë dhe sodën e bukës, më pas e shtojmë një lugë gjelle pas tjetrës tek sheqeri, gjalpi dhe vezët.
    AgroWeb.org ju këshillon të tregoni kujdes në mënyrë që tek brumi të mos krijohen kokrriza të pa tretura të miellit.
    Në një tas tjetër rrahim të bardhat e vezëve, më pas fillojmë dhe shtojmë pak nga pak sheqerin, duke u kujdesur që të mos lëshojnë ujë.
    Në fund shtojmë dhe lëngun e limonit dhe vazhdojmë t’i rrahim derisa të përfitojmë një masë kompakte dhe të lehtë.
    Hapi tjetër është bashkimi i vezëve të bardha tek brumi.
    AgroWeb.org ju sugjeron që të përdorni një lugë gjelle për të përzierë brumin, duke e trazuar nga poshtë lartë në formë rrethore.
    Marrim një tavë me diametër 22-24 cm, e lyejmë me pak gjalpë të shkrirë dhe e spërkatim me pak miell, në mënyrë që brumi të mos ngjitet.
    Hedhim brumin e përgatitur, dhe e vendosim në furrë të ngrohur më parë në 180 gradë.
    Për të kuptuar nëse keku është gati, me një thikë apo pirun shpoheni dhe nëse sipërfaqja e thikës del e pastër, brumi është pjekur plotësisht dhe brenda.
    Servirja
    Pasi keku të jetë ftohur pak, e kthejmë në një pjatë të madhe dhe e spërkatim sipër me sheqer pluhur.
    Ose nëse dëshironi merrni 5 lugë gjelle me sheqer pluhur dhe 2 lugë gjelle me leng limoni, rrihini derisa masa të bëhet kremoze dhe hidheni sipër kekut kur ai të jetë ftohur.
    Kjo ëmbëlsirë është ideale për t’u konsumuar në çdo kohë të ditës, e madje edhe në mëngjes me një gotë me qumësht.
    Fantastike për t’u shoqëruar me një filxhan kafe apo çaj, por edhe me lëngje frutash gjithashtu.
    Keku me limon shërben gjithashtu edhe si një gosti shijshme për ta përgatitur e shërbyer për mysafirë e të ftuar në raste festash e gëzimesh. /AgroWeb.org

  • Petulla Speciale me Qumësht – Të Buta, të Ngrohta, të Shijshme

    Petulla Speciale me Qumësht – Të Buta, të Ngrohta, të Shijshme

    Të ëmbla apo të kripura, petullat janë gjithmonë perfekte. Të dashura si për të rriturit dhe për fëmijët, ato shijohen në çdo periudhë të vitit.

    Recetat janë të shumta, nga petullat me kos e deri tek ato me ujë të gazuar, sot AgroWeb.org ju sjell një tjetër recetë që ia vlen të provohet.
    Një këshillë paraprake, përgatisni shumë pasi janë aq të shijshme sa duket sikur mbarohem sapo vendosen në tavolinë.
    Petullat me qumësht janë të lehta dhe të parezistueshme, sa nuk do të pushoni dot së ngrëni.
    Përbërësit
    (Me përbërësit e mëposhtëm mund të përgatisni një pjatë me petulla, nëse preferoni të përgatisni sasi më të mëdha, dyfishoni përbërësit)

    2 kokrra vezë
    Gjysmë luge çaji me limontos
    Gjysmë luge çaji me sodë buke
    Gjysmë luge çaji me sheqer dhe kripë
    100 ml qumësht
    Gjysmë gotë uji me miell

    Përgatitja
    Në një tas hidhni limontosin, sodën e bukës sheqerin dhe kripën e më pas shtoni qumështin dhe vezët të cilat i keni përzjerë më parë.
    Me ndihmën e një piruni apo teli kuzhine përzjejeni derisa përbërësit të jenë tretur plotësisht.
    Mund t’iu duhet rreth 5-7 minuta për të arritur masën e duhur.
    Më pas filloni të shtoni miellin, duke e ndarë masën në lugë gjelle.
    Pra hidhni lugën e parë, përzjejeni derisa mielli të jetë bashkuar plotësisht me përbërësit e tjerë, dhe më pas hidhni lugën tjetër.
    AgroWeb.org ju sugjeron që miellin ta kaloni në një sitë më parë, diçka e tillë do t’i bëj petullat më poroze dhe më buta.
    Brumi që do të formoni duhet të jetë më i trashë se brumi i krepave dhe më i hollë se ai i petullave të zakonshme.
    Nëse shikoni që brumi është shumë i lëngshëm mund t’i shtoni dhe pak miell.
    Kjo mënyrë përgatitjeje, nuk kërkon që brumi i petullave të lihet të pushojë por përgatiten menjëherë sapo vaji të ngrohet.
    Në zjarr vendosni një tenxhere të thellë dhe hidhni vaj për skuqje.
    Kur vaji të jetë nxehur, merrni me lugë çaji brumin dhe hidheni për ta skuqur.
    Pasi petullat të kenë marrë një ngjyrë të artë, hiqini nga tenxherja dhe vendosini në një pjatë ku më parë keni shtruar një letër kuzhine.
    Është e rëndësishme që të përdorni letër kuzhine pasi ajo do të përthithi vajin e tepërt dhe do të ndalojë skuqjen e tepërt të petullës.
    Pasi të jetë ftohur pak mjafton të zgjidhni se i doni të kripura apo të ëmbla.
    Kjo recetë është perfekte për çdo vakt, dhe shoqërohet me një shumëllojshmëri produktesh duke filluar nga mjalti, reçeli, djathi e deri tek sheqeri./AgroWeb.org