Lajmidites.com

Category: Sport

  • Curuçao shkruan historinë, vendi më pak i populluar do të luajë në Botëror

    Curuçao shkruan historinë, vendi më pak i populluar do të luajë në Botëror

    Kuraçao shkruan historinë e futbollit botëror. Ishulli me vetëm 156 mijë banorë është bërë kombi më i vogël ndonjëherë që siguron një vend në fazën finale të Kupës së Botës, pas barazimit pa gola në fushën e Xhamajkës, rezultat që i garantoi vendin e parë në Grupin B të kualifikimeve, pa asnjë humbje. Kuraçao rrëzon rekordin e Islandës si vendi më pak i populluar që ka marrë pjesë ndonjëherë në një Kupë Bote.
    Suksesi vjen edhe pse trajneri Dick Advocaat, 78 vjeç, mungoi për arsye familjare. Ai tashmë ka vendosur një rekord të ri: do të jetë trajneri më i moshuar që drejton një kombëtare në një Botëror.

    Në të njëjtën natë, biletën për Botëror e siguruan edhe Panama dhe Haiti, në kualifikueset e Amerikës Veriore dhe Qëndrore.

  • Kualifikim dramatik, Iraku në Play Off, falë një penalltie në min e 17-të të kohës shtesë

    Kualifikim dramatik, Iraku në Play Off, falë një penalltie në min e 17-të të kohës shtesë

    Në Irak, drama sportive arriti kulmin mbrëmjen e së martës. Kombëtarja irakiane fitoi 2-1 ndaj Emirateve të Bashkuara Arabe, falë një penalltie të realizuar në minutën e 17 minuta të kohës shtesë, duke siguruar kështu kualifikimin në playoff-in ndërkontinental me rezultatin e përgjithshëm 3-2.
    Atmosfera elektrizuese në stadiumin ndërkombëtar të Basrës shpërtheu kur Amir Al-Ammari shënoi golin vendimtar, që e mban ende gjallë ëndrrën e Irakut për Kupën e Botës – një kompeticion ku nuk ka marrë pjesë që nga viti 1986, në Botërorin e Meksikës.

    Ndeshja ndryshoi ritëm në pjesën e dytë: Emiratet kaluan të parat në epërsi me Caio Lucas, ndërsa vetëm pak minuta më vonë goditja e Gimenez u ndal nga traversa. Iraku u zgjua në minutën e 66-të, kur Mohanad Ali barazoi me kokë pas një goditjeje të lirë të Al-Ammarit.
    Pikërisht Ali ishte edhe në qendër të episodit që vendosi ndeshjen: goditja e tij me kokë u ndal me dorë nga Yahia Nader, dhe pas rishikimit në VAR arbitri dha penallti.
    Al-Ammari nuk gaboi, duke çuar portierin në krahun e gabuar dhe duke vulosur një fitore që u festua gjatë në Basra.
    Iraku tashmë kualifikohet për raundin e play off të marsit, ku gjashtë skuadra luftojnë për dy vendet e fundit drejt finaleve të Botërorit.

  • Shqipëria ëndërron Botërorin, Trump “ngroh” tifozët, prezanton “FIFA Pass”

    Shqipëria ëndërron Botërorin, Trump “ngroh” tifozët, prezanton “FIFA Pass”

    Shqipëria dhe Kosova ëndërrojnë të shkojnë së bashku në Botëror. Për të lehtësuar prezencën e tifozëve në stadiumet e Amerikës ku do të zhvillohet edhe Botërori “FIFA2026”, nga 11 qershori deri më 19 korrik, ka menduar presidenti Trump dhe kreu i FIFA-s, Gianni Infantino.
    Në zyrën Ovale, Trump dhe Infantino prezantuan programin e ri “FIFA Pass” që mundëson marrjen më të shpejtë të takimeve për vizë për personat që kanë blerë bileta zyrtare të eventit përmes FIFA-s.

    Presidenti Trump u bëri thirrje të gjithë udhëtarëve që planifikojnë të marrin pjesë në këtë kompeticion që të aplikojnë për vizë “sa më shpejt të jetë e mundur”.
    Ndërkohë, Sekretari i Shtetit, Marco Rubio, njoftoi se administrata ka shtuar mbi 400 oficerë konsullorë nëpër botë për të përballuar fluksin e kërkesave. Sipas tij, në rreth 80% të vendeve, aplikantët mund të sigurojnë një takim për vizë brenda 60 ditëve, por pasja e një bilete nuk e bën të sigurt edhe lejen për të udhëtuar në SHBA.
    ()

  • Leonardo “pa dorashka”: Champions-in e fitojnë klubet më të pasura, tek Interi vetëm prej Morattit

    Leonardo “pa dorashka”: Champions-in e fitojnë klubet më të pasura, tek Interi vetëm prej Morattit

    Leonardo, ish-drejtues sportiv i PSG dhe ish-trajner i Milanit e Interit, foli për “RMC Sport”, duke vlerësuar punën e Luis Enrique: “Lucho është perfekt, i ka transmetuar mentalitetin një skuadre të re. Për mua, Motta te PSG do të ishte gjenial: e njeh klubin, ka estetikë, do lojë të bukur, adhuron Parisin. Më vjen keq që Motta nuk u ul kurrë në stolin parizien”.
    Sa i përket triumfit të PSG në vitin e largimit të Mbappé, ai shtoi: “Nëse nuk shpenzon, nuk fiton. Champions-in e fitojnë klubet më të pasura”. Braziliani kujton edhe fillimet e projektit te PSG: “Për Ibrahimovic dhe Thiago Silva shpenzuam rreth 70 milionë euro”.
    Mbi epokën Messi–Neymar–Mbappé, Leonardo theksoi ndryshimin e futbollit dhe të komunikimit. Lojtarët sot fitojnë më shumë nga të drejtat e imazhit. Braziliani tregon se më 2021, Neymar dhe Mbappé donin të largoheshin dhe ai do t’i kishte lënë të iknin “me kushtet e duhura”.
    Për Serie A pranon: “S’më ka pëlqyer kurrë të jem trajner. Te Milani e bëra këtë rol sepse duhej përgatitur shitja e klubit. Tek Inter shkova vetëm prej Morattit”. Në fund e mbyll duke thënë se nuk ka ndërmend të kthehet në futboll, përveç një projekti shumë ambicioz, dhe se “ndoshta s’do të kisha hequr dorë nga Donnarumma”.

  • Ish-drejtori i Napolit për Conten: Deklaratat e tij ishin të nxituara, jo strategjike

    Ish-drejtori i Napolit për Conten: Deklaratat e tij ishin të nxituara, jo strategjike

    19 Nëntor 2025

    15:05

    Alfred Lleshi

    Kampionati italian rikthehet pas pushimit të kombëtareve. Në pritje të shortit të së enjtes për “play off”-et drejt Botërorit, afrohet edhe fundjava e Serie A. Gara në krye është tepër e ngushtë, me disa skuadra ende plotësisht në lojë për titull, të ndara vetëm nga pak pikë. Pierpaolo Marino, ish-drejtues te Napoli dhe Roma, foli për këtë situatë.
    Sa i përket Napolit dhe polemikave pas disa deklaratave të trajnerit Antonio Conte, ai nënvizoi: “Besoj se ato kanë qenë deklarata të dala nga stomaku, pra të nxituara, jo strategjike. E pashë ndeshjen dhe ishte vërtet e papashikueshme. Është e kuptueshme që një person me karakter si Conte, i cili pas ndeshjes shpesh thotë të vërtetën, të ketë folur lirshëm. Më goditi shumë kur tha ‘nuk dua të shoqëroj të vdekurin’. Një frazë shumë e fortë, që linte të nënkuptohej dorëheqja apo një largim.
    Personalisht nuk e shoh situatën aq të rëndë sa të kërkonte një votë besimi, sepse askush nuk e kishte vënë në dyshim Conten. Ambienti napolitan është shumë i lidhur me të, edhe komunikata e De Laurentiis ishte mëse sqaruese, e dobishme për të zbehur përshtypjen, për ne që punojmë në këtë fushë, se mund të kishte një largim”.

  • Një rinovim dhe një afrim, Barcelona me objektiva konkretë në merkato që kushtojnë 50 milionë euro

    Një rinovim dhe një afrim, Barcelona me objektiva konkretë në merkato që kushtojnë 50 milionë euro

    19 Nëntor 2025

    13:23

    Telesport

    Te Barcelona po punojnë që tani për të ndërtuar një ekip sa më kompetitiv, si për pjesën e dytë të sezonit ashtu dhe për të ardhmen (verën 2026). Mediat spanjolle konfirmojnë se klubi katalanas ka disa objektiva konkretë në sulm.
    Objektivi i parë është blerja e kartonit të Marcus Rashford, që ka realizuar 6 gola dhe 9 asist në 16 ndeshje zyrtare. Një lojtar që kishte përjetuar disa vështirësi serioze te Manchester United, nga ku ka ardhur i huazuar këtë verë.
    Anglezi duket se është rikuperuar, duke u bërë pjesë e dinamikës së Barcelonës së Flick. Blaugranët janë të vetëdijshëm për këtë dhe tani synojnë ta blejnë sulmuesin: klauzola e lirimit të lojtarit është rreth 35 milionë euro.
    Një shifër që klubi spanjoll synon ta ulë për të lehtësuar suksesin e marrëveshjes, ndoshta duke shfrytëzuar edhe dëshirën e lojtarit për të qëndruar te Barça.
    Ndërkohë, Barcelona i ka vënë syrin sulmuesit Alejandro Grimaldo, një lojtar që luan në krahun e majtë. Nëse mbërrin një ofertë nga La Liga, skuadra e Bayer Leverkusen mund ta lirojë 30-vjeçarin për 15 milionë euro.
    Në nëntë ndeshje të Bundesligës të luajtura deri më tani, Grimaldo ka grumbulluar katër gola dhe tre asiste.

  • Ter Stegen kthehet në dhjetor, Barcelona merr ofertë e parë zyrtare për të

    Ter Stegen kthehet në dhjetor, Barcelona merr ofertë e parë zyrtare për të

    19 Nëntor 2025

    13:35

    Alfred Lleshi

    Situata e Marc-André ter Stegen te Barcelona po bëhet vendimtare me afrimin e merkatos dimërore. Portieri 33-vjeçar, në rikuperim pas një operacioni në shpinë, mund të lejohet të largohet në janar, vetëm nëse vjen një ofertë bindëse. Sipas “Sport”, oferta e parë zyrtare ka ardhur nga Besiktas.
    Turqit ofrojnë huazim që mbulon të gjithë pagën deri në fund të sezonit, me opsion blerjeje prej 8 milionë euro. Besiktas ka nevojë për një portier, pasi ka vështirësi me veteranin Mert Günok. Drejtori sportiv Eduard Graf, ish-i Borussia Dortmundit, po tenton ta bindë Ter Stegen se klubi turk është ideal për të luajtur rregullisht dhe rimarrë rolin e liderit në kombëtaren gjermane.
    Kontrata e portierit me katalanasit skadon më 2028, por hapësira tek ekipi i Flick është e kufizuar. Rikthimi në stërvitje parashikohet në mes të dhjetorit, ndërsa largimi i mundshëm do t’i siguronte vazhdimësi loje dhe shanse për të qenë pjesë e Botërorit 2026.

  • Chiellini për rinovimin e Yildiz: Ka vullnet nga të gjithë, me qetësi do ta bëjmë

    Chiellini për rinovimin e Yildiz: Ka vullnet nga të gjithë, me qetësi do ta bëjmë

    19 Nëntor 2025

    13:44

    Alfred Lleshi

    “Rinovimi i Yildiz? Me qetësi, kërkon kohë, por ka vullnet nga të gjithë për ta bërë. Me ekuilibër dhe qetësi bëhet çdo gjë”. Kështu u shpreh Giorgio Chiellini, drejtori i strategjisë së futbollit te Juventusi, gjatë “Social Football Summit” në “Allianz Stadium”.
    Ai shtoi se klubit i mungon ende një pjesë e fundit e organigramës, drejtori sportive: “Kur të vijë, do të kemi një strukturë të plotë me Comolli në krye të klubit dhe të sektorit sportiv, pastaj do të jem unë, drejtori sportiv dhe Modesto si drejtor teknik. Ky është grupi që do të marrë vendimet”.
    Mesazhi i Chiellinit është i qartë: për Kenan Yildiz ekziston dëshira e ndërsjellë për rinovim, gjithçka do të mbyllet në mënyrë të rregullt dhe të kontrolluar.

  • Ronaldo në Shtëpinë e Bardhë, merr pjesë në darkën që Trump shtron për nder të Princit saudit

    Ronaldo në Shtëpinë e Bardhë, merr pjesë në darkën që Trump shtron për nder të Princit saudit

    Cristiano Ronaldo u shfaq të martën në Shtëpinë e Bardhë, ku mori pjesë në një darkë zyrtare të organizuar nga Presidenti amerikan Donald Trump në nder të princit të kurorës saudite, Mohammed bin Salman.. Ylli portugez i futbollit ishte i shoqëruar nga e fejuara e tij, Georgina Rodriguez, në eventin e mbushur me personalitete të politikës, sportit dhe biznesit botëror.
    Gjatë mbrëmjes, Ronaldo realizoi një selfie që u bë virale, ku shfaqen personalitete të njohura si Elon Musk, investitori David Sacks, presidenti i FIFA-s Gianni Infantino, sekretari amerikan i Tregtisë Hoëard Lutnick dhe vetë Georgina Rodriguez.
    Donald Trump, në fjalën e mbajtur gjatë darkës, përshëndeti Cristiano Ronaldon dhe e vlerësoi si një nga personalitetet më të mëdha sportive në botë. Ai zbuloi se djali i tij, Barron Trump, u takua me futbollistin dhe se kjo e kishte emocionuar shumë.
    Kjo ishte hera e parë që portugezi shfaqej publikisht në SHBA që prej vitit 2017, kur u akuzua nga një shtetase amerikane për dhunim, akuzë të cilën futbollisti e ka mohuar vazhdimisht dhe që më vonë u hodh poshtë nga një gjykatë amerikane në vitin 2022.
    Ronaldo është pjesë e delegacionit saudit dhe aktualisht luan për Al-Nassr në kampionatin e Arabisë Saudite. Ai shpreson të luajë në Kupën e Botës 2026, e cila do të zhvillohet kryesisht në Shtetet e Bashkuara dhe që, sipas asaj që ka deklaruar vetë, do të jetë e fundit për të.

  • 78-vjeçari Dick Advocaat do të jetë trajneri më i moshuar në Botërorin 2026

    78-vjeçari Dick Advocaat do të jetë trajneri më i moshuar në Botërorin 2026

    19 Nëntor 2025

    12:31

    Alfred Lleshi

    Në moshën 78 vjeç, Dick Advocaat do të bëhet trajneri më i moshuar që drejton një Botëror, pasi Curaçao e tij siguroi kualifikimin për herë të parë në finalet e një kompeticioni të tillë, pas barazimit dramatik 0-0 me Xhamajkën. Advocaat, i cili ka drejtuar 7 kombëtare të tjera, përfshirë Holandën në tri periudha, arriti në çerekfinalen e Botërorit 1994, por kualifikimi me Curaçao konsiderohet arritja më e madhe e tij.
    Curaçao, një ishull autonom me pak më shumë se 150.000 banorë, është vendi më i vogël që do të luajë në fazën finale të një Botërori. Advocaat e mori drejtimin e kësaj kombëtareje në janar të vitit të kaluar, por nuk ishte fizikisht gjatë ndeshjes ndaj Xhamajkës për shkak problemesh familjare: “Ishte një vendim shumë i vështirë t’i lija lojtarët këtu në ndeshje dhe të largohesha. E mora këtë vendim me keqardhje, por familja është më e rëndësishme se futbolli”, – tha ai.
    Advocaat e ndoqi ndeshjen nga Holanda, duke komunikuar me stafin teknik për udhëzime gjatë pushimit mes dy pjesëve