Irani zbulon dy kërkesat kryesore për t’i dhënë fund konfliktit me SHBA

Irani kërkon dëmshpërblimet e luftës dhe kontrollin mbi Ngushticën e Hormuzit, si kërkesat kryesore për arritjen e një marrëveshjeje përfundimtare, ka deklaruar zëvendëspresidenti i parë, Reza Aref. Sipas tij, gjatë bisedimeve të zhvilluara në Islamabad, të cilat përfunduan pa marrëveshje, Teherani ka kërkuar njohjen nga Shtetet e Bashkuara të autoritetit iranian mbi tranzitin në këtë korridor jetik detar. Aref theksoi se sigurimi i “autoritetit në Ngushticën e Hormuzit” dhe ndjekja e dëmshpërblimeve për dëmet e shkaktuara nga sulmet amerikane dhe izraelite janë, sipas tij, “të drejta të popullit iranian”. Në një reagim në rrjetet sociale, ai shtoi se këto kërkesa përfaqësojnë një angazhim të palëkundur për forcimin e Iranit.