Pedri nuk është aktualisht me përfaqësuesen e Spanjës, pasi po rikuperohet nga një dëmtim në bicepsin femoral të këmbës së majtë, të cilin e pësoi në fund të tetorit, gjatë “El Clásico”. Mesfushori nga Kanaria, figurë kyçe për Hansi Flick, analizoi për mediat e Barcelonës rrugëtimin e tij, të tashmen dhe ambiciet personale e kolektive me klubin e zemrës.
Rritja dhe lidershipi – “Që kur erdha këtu kam përjetuar shumë ndryshime. Duken sikur kanë kaluar pak vite, por kanë kaluar mbi 5. Kam mësuar shumë nga shokët e ekipit dhe kapitenët që kam pasur. Tani ndihem në një pozicion udhëheqës brenda ekipit”.
Gjaku “culé” – “Kur linda, më vunë menjëherë fanellën e Barcelonës. Gjyshi dhe babai ishin ‘culér’ të flaktë dhe këtë ma kanë trashëguar. Jam një tifoz i Barcelonës, që ka fatin të luajë për ekipin e vet. Jetoj një ëndërr dhe e kuptoj këtë çdo ditë kur zgjohem”.
Për trajnerët – “Koeman-it do t’i jem gjithmonë mirënjohës, sepse më dha mundësinë të debutoj kur askush nuk më njihte. Xavi na ndihmoi të rikthenim emocionet, duke fituar një La Liga që askush s’e priste. Ai është legjendë e klubit, besoi shumë te të rinjtë. Me Flick kemi bërë një hap më shumë në aspektin konkurrues. Ai ka seriozitetin tipik gjerman, është i rreptë kur duhet, por di edhe të na bëjë të qeshim. Zakonisht është i qetë, por më mirë të mos e zemërosh”.
Loja me De Jong – “Tani luajmë shumë më afër njëri-tjetrit dhe kjo ndjehet. Nga jashtë ndoshta nuk kuptohet sa i mirë është Frenkie, por ai ka cilësi të jashtëzakonshme dhe forcë për të kaluar linjat. Jam shumë i lumtur që e kam pranë”.
Forma e mirë e Eric García – “Po, dhe gëzohem shumë, sepse është mik i imi. Që kur nënshkroi këtu, e dija nivelin e tij. Është ndër më të mirët në botë në daljen me topin, mund të luajë si qendërmbrojtës, anësor apo mesfushor-mbrojtës. Është i zgjuar dhe pozicionohet gjithmonë saktë. Kishte një periudhë kur tifozët humbën besimin tek ai, por tani e kanë kuptuar vlerën e tij”.
Lamine Yamal – “Lamine është një lojtar i jashtëzakonshëm. Në moshën e tij, shumë pak janë në gjendje të bëjnë atë që bën ai. Është shumë i pjekur dhe, pavarësisht se flitet për jetën e tij private, e di mirë çfarë bën. E përballon presionin me shumë natyrshmëri, edhe pse është vetëm 18 vjeç”.
Vendi i 11-të për “Topin e Artë” – “Ky ishte rezultati pas votimeve. E pranoj dhe do të përpiqem të renditem më lart vitin e ardhshëm. Ta fitoj ‘Topin e Artë’? Do të doja shumë. Të gjithë futbollistët ëndërrojnë ta fitojnë. Kush thotë të kundërtën, gënjen. Është e vështirë, por kurrë nuk i dihet…”
Liga e Kampionëve – “Preferoj më shumë një trofe kolektiv sesa çmim individual. Dua më shumë që Barça të fitojë, sesa unë vetë të marr një çmim. Këtë sezon e shoh ekipin më të përgatitur për Champions. Sezonin e kaluar u ndalëm në prag të finales; kësaj here do të japim gjithçka, sepse është kompeticioni që të gjithë duam ta fitojmë”.
Premtim në rast fitoreje të Champions League – “Nuk do të rruhem tullac, sepse mamaja nuk më lejon. Më thotë: Lëri budallallëqet (qesh). Nuk e di çfarë mund të premtoj…, por një gjë është e sigurt, unë dhe shokët e mi do të japim gjithçka për ta fituar”.
