A do të jetë Sunderland një tjetër rast Leicester në Premier League? Ekipi që në sezonet e fundit luftonte për mbijetesë, sot po përjeton një moment magjik. Sunderland i dirigjuar nga Granit Xhaka ka mundur Chelsean në transfertë në shifrat 1-2.
Chelsea vinte pas një fitore 5-1 me Ajax në shtëpi dhe sot ka humbur ndaj Sunderland. Ekipi i Maresca shënoi i pari me anë të Granacho në minutën e 4, duke krijuar idenë e një fitore të thellë. Megjithatë Isidor barazoi në të 22, ndërsa në minutën e fundit të takimit, Taibi përmbysi takimin. Pas kësaj fitore, Sunderlandi merr vendin e 2 në renditje pas Arsenalit, me dy pikë më pak. /Sport Ekspres/
Author: Sportekspres.com
-
A do të jetë Sunderlandi rasti i Leicester për të fituar Premier League? Befasi nga ekipi i Granit Xhakës, mundin Chelsea në transfertë
-
Yamal tha se Real Madridi vetëm vjedh me arbitra, Xabi Alonso e shmang me klas: Ia lëmë fushës nesër të flas…
Përpara një tjetër klasike në Santiago Bernabeu, Xabi Alonso u shfaq në një konferencë për shtyp. Për ish-lojtarin e Realit, kjo do të jetë El Clasico e parë si trajner. “El Clasico është gjithmonë i veçantë dhe do të jetë për shumë vite që do të vijnë. Kjo është e para për këtë projekt të ri. Ne kemi nevojë që stadiumi të gjenerojë energjinë që merrni në ndeshjet e mëdha, të vibrojë dhe të na çojë përpara, në mënyrë që në fund të mund të festojmë me tifozët tanë”, tha Alonso.
Megjithatë, trajneri pati një pyetje të pashmangshme në lidhje me Lamine Yamal, pra me deklaratën e spanjollit nga radhët e Barcelonës, i cili tha se Reali “vjedh”. “Siç thashë, kjo është një ndeshje e rëndësishme në shumë elementë. Ne duam të luajmë mirë, të kënaqemi dhe kjo është ajo që na emocionon më shumë. Ky është nxitja më e madhe”, tha shkurt Xabi, ndërsa gazetarët u përpoqën të nxirrnin një fjalë tjetër për këtë.
“Nuk do të komentoj. Ka shumë deklarata nga njerëz nga Barcelona dhe nuk mund t’i vlerësoj të gjitha. Fusha është ajo që është e rëndësishme. Çfarë na pret dhe si duam ta luajmë ndeshjen. Kjo është ajo që më shqetëson më shumë dhe për çfarë kemi punuar”, tha Alonso. /Elio Hajdari-Sport Ekspres/ -
I çmendur! Goli i parë në Serinë A dhe ishte “anormal”, Medon Berisha shënon nga goditja e dënimit (VIDEO)
Medon Berisha është duke kaluar një formë fantastike te Lecce në Serinë A, përkundër aktivizimit të pakët në Kombëtare. Mesfushori shqiptar e nisi si titullar takimin e sotëm mes Udineses dhe Lecce, duke ndarë mesfushën së bashku me Ylber Ramadanin.
Teksa Udineze po kryesonte në shifrat 2-0, Berisha ka shënuar një gol fantastik nga goditja e dënimit në minutën e 59. Një distancë e madhe, por asnjë problem për lojtarin e Shqipërisë që gjeti cepin e rrjetës. Ky ishte goli i parë për Medonin në Serinë A dhe do t’i jap më shumë besim në të ardhmen, ndërsa ndeshja nuk ka përfunduar ende. /Sport Ekspres/ -
Shqipëria duhet të nxitojë! Talenti i Kombëtares po bën namin në Angli, Armend Muslika shënon golin e 7 në 8 ndeshje
Një prej talenteve më të mëdhenj të Shqipërisë në Angli, në ekipet e moshave, është Armend Muslika. Ky futbollist i ka dhuruar fitoren Totenhemit U-18 edhe në ditën e sotme, teksa ia kanë dalë 2-0 ndaj Leicester.
Goli i Armend Muslikës erdhi në minutën e 6 të takimit, ndërsa ishte goli i 7 i tij në 8 ndeshjet e para të kampionatit. Për më tepër, kjo merr vlerë të madhe pasi roli i tij nuk është qendër sulmues, por mesfushor organizator që vjen pas sulmuesit. Futbollisti 16-vjeçar ka luajtur vetëm 1 ndeshje me Shqipërinë U-17, por tani është momenti për t’i besuar të paktën një vend te Shqipëria U-21 duke parë potencialin e tij. /Sport Ekspres/ -
Kategoria e Parë/ Kukësi dhe Kastrioti ngecin në zonën e ftohtë, Laçi dhe Pogradeci “tregojnë dhëmbët”
Para pak minutash janë mbyllur tre sfida shumë të rëndësishme në Kategorinë e Parë. Kukësi nuk arrin dot që të dalë nga zona e ftohtë, por i vetmi sinjal pozitiv është fakti se pas disa humbjesh radhazi, këtë herë dalin të paktën me një pikë. Kukësi barazoi 2-2 ndaj Luftëtarit, ndërsa në krahun tjetër ishte Laçi që tregoi dhëmbët me Burrelin. Një fitore e thëllë në shifrat 4-0, po ashtu si edhe Pogradeci që nga krahu tjetër po me të njëjtat shifra, fitoi kundër Kastriotit. /Sport Ekspres/
Kukësi 2 – 2 Luftëtari (Sadiq 44′, Dragoshi 45+4′ / Nyanguila 11′, Isteri 45+3′)
Laçi 4 – 0 Burreli (Traore 36′, 66′, Jiakponna 61′, Kalaj 82′)
Pogradeci 4 – 0 Kastrioti (Greca 11′, Pius 55′, Babatunde 62′, Santi 89′) -
FSHF uron Besën për 100-vjetorin e themelimit, Presidenti Duka merr pjesë sot në eventin festiv në Kavajë
Sot shënohet një moment historik për futbollin shqiptar. Besa e Kavajës feston 100 vjet nga themelimi i saj, një shekull pasioni dhe kontributi për zhvillimin e futbollit në vend.
Federata Shqiptare e Futbollit uron klubin dhe qytetin e Kavajës për këtë jubile të madh dhe i uron suksese të mëtejshme në vitet që vijnë.
Në kuadër të festimeve, sot në Bulevardin “Josif Budo” në Kavajë do të zhvillohet eventi “100 vjet Besa”, ku do të marrin pjesë Presidenti i FSHF, Armand Duka, kryetari i Bashkisë Kavajë, Fisnik Qosja, ish-lojtarë të klubit, personalitete dhe miq të futbollit. Eventi do të nisë në orën 18:00. -
Milani i shpëton turpit kundër Pizës, një gol në minutat shtesë shmang humbjen në “San Siro”
Milani ka hedhur një hap të gabuar mbrëmjen e sotme. Kuqezinjtë kanë humbur pikë me skuadrën e ngjitur këtë sezon në Serinë A, me Pizën. Të besuarit e Alegrit kaluan të parët në epërsi me anë të golit të shënuar nga Leao në minutën e 7 të takimit. Me golin e shënuar kaq herët, pritej një fitore e lehtë për Milanin, por e kundërta ndodhi.
Piza përmbysi shifrat në pjesën e dytë të lojës. Kuadradoja barazoi nga pika e bardhë e penalltisë në minutën 60, ndërsa në të 86-n Nzola shënoi golin e dytë për Pizën. Ndërkohë, ishte Atekame ai që shpëtoi kuqezinjtë nga turpi falë golit të shënuar në minutën e 93-të. Sfida përfundoi me rezultatin e barabartë 2-2, me skuadrat që u larguan me nga një pikë secila nga stadiumi “San Siro”./Sport Ekspres/ -
Vllaznia i shënon 3 gola Tiranës në klasiken e futbollit shqiptar, Elbasani nuk gabon ndaj Bylisit
Klasikja e futbollit shqiptar ka përfunduar me fitoren e Vllaznisë. Shkodranët kanë mundur me shifrat 3-1 Tiranën në “Loro Boriçi”. Tabeku zhbllokoi shifrat në minutën e 9 për bardhekaltrit, por përmbysja nuk vonoi shumë.
Jago ktheu sërish baraspeshën në minutën e 14, ndërsa Bekim Balaj i dha epërsinë kuqebluve në minutën e 20. Ndërkohë në minutën e 78 ishte Kastrati ai që vulosi shifrat përfundimtare të ndeshjes nga pika e bardhë e penalltisë.
Në krahun tjetër, Elbasani ka marrë tre pikët ndaj Bylisit. Verdheblutë kanë fituar me rezultatin 2-1 dhe tashmë shkojnë në kuotën e 14 pikëve. Elbasani ngjitet në vendin e dytë, duke ndjekur Vllazninë kryesuese, e cila numëron 19 pikë në këto 8 javë kampionat./Sport Ekspres/ -
Si mund të bëhet lojtar i madh? Yamal e tepron me deklaratën: Real Madrid vjedh, mashtron dhe pastaj ankohet
Cilësisht, është lojtari i dytë më i mirë në botë aktualisht dhe për shumëkënd, i pari. Por Lamine Yamal duket se nuk do të jetë kurrë një lojtar i madh, i një kalibri të Cristiano Ronaldo apo Lionel Messi.
Arroganca e tij e madhe dhe sjelljet fëmijnore i prishin jo pak hijeshinë spektaklit që ai ofron në fushën e blertë. Një tjetër deklaratë e tepruar ka ardhur nga Yamal, këtë herë teksa ishte i ftuar në një ndeshje të ish-mbrojtësit të Barcelonës, Gerard Pique, në King League.
I pyetur në lidhje me akuzat e Barcelonës ndaj Real Madrid se madrilenët favorizohen nga arbitrat, Yamal jo vetëm që nuk diti të mbante diplomaci, por shkoi edhe një hap më tej duke thënë: “Sigurisht, ata vjedhin, ankohen, mashtrojnë dhe i bëjnë të gjitha këto gjërat”. /Elio Hajdari-Sport Ekspres/ -
100 minuta pa shënuar dot gol! Andrea Pirlo trondit Rei Manajn, e eleminon me ekipin e Kategorisë së Parë
Një tronditje e madhe për Rei Manajn në Emiratet e Bashkuara Arabe. Pas golit të shënuar me Serbinë dhe rikthimit në kampionat, sulmuesi shqiptar nuk po kalon kohë të bukura me ekipin. Një humbje 0-5 në Champions League e Azisë ndaj Tractor të Regi Lushkjes dhe një eleminim sot nga Kupa. Eleminimi erdhi nga United FC, një ekip që ndodhej në Kategorinë e Parë, ndërsa Al Sharjah i Rei Manaj gjendet në elitë.
Një kategori ishte diferenca mes tyre, por e ulur ndjeshëm nga Andrea Pirlo. Andrea Pirlo është trajneri i United FC dhe diti fare mirë sesi ta bllokonte Rei Manajn. Pasi koha e rregullt u mbyll 1-1, u luajtën edhe 30 minutat e shtesës. Trajneri i Al Sharjah e largoi Manajn në minutën e 97 të takimit pasi e kishte nisur si titullar, ndërsa në fund takimi përfundoi me penallti dhe atje United FC i shkaktoi eleminimin e turpshëm Al Sharjah. /Elio Hajdari-Sport Ekspres/