Një arsenal armësh dhe municion luftarak janë zbuluar dhe sekuestruar në fshatin Labovë të Kryqit në Gjirokastër.
Përmes një njoftimi, Policia bën të ditur se armët dhe municioni luftarak u gjetën në një nga banesat e një prej të arrestuarve në Greqi, të dyshuar si vrasës me pagesë.
Po ashtu bëhet e ditur se janë sekuestruar 3 armë zjarri automatike, 200 fishekë kallashnikovi, 18 pako me fishekë pistolete dhe 5 krehra.
Në njoftimin e Policisë bëhet e ditur gjithashtu se në kuadër të këtij grupi criminal, kanë qenë 4 persona të cilët po hetohen dhe që dyshohet të jenë vrasës me pagesë. Ata janë Dhimitër Meci, Andrea Brokeri, Fatjon Prendi dhe Petro Theohari.
Ndërkohë Policia në bashkëpunim me Prokurorinë dhe homologët grekë po vijojnë hetime të thelluara, për zbardhjen e plotë të rrethanave të këtij rasti.
Njoftimi i Policisë:
Policia e Shtetit-Finalizohet operacioni policor i koduar “Provat”.
Bashkëpunimi mes Policisë së Shtetit dhe Policisë Greke çoi në zbulimin dhe sekuestrimin të një arsenali armësh zjarri dhe municioni luftarak.
Sekuestrohen 3 armë zjarri automatike, 200 fishekë kallashnikovi, 18 pako me fishekë pistolete dhe 5 krehra.
Armët dhe municioni luftarak u gjetën në një nga banesat e një prej të arrestuarve në Greqi, të dyshuar si vrasës me pagesë.
Në kuadër të bashkëpunimit mes Policisë shqiptare dhe Policisë greke, pas shkëmbimit të informacionit për kapjen e disa shtetasve shqiptarë në Greqi, të dyshuar si vrasës me pagesë, strukturat e Policisë së Shtetit në Gjirokastër, Vlorë dhe Lezhë, në kuadër të operacionit policor të koduar “Provat”, zhvilluan kontrolle në banesat e këtyre shtetasve.
Si rezultat i kontrollit në fshatin Labovë e Kryqit, shërbimet e Drejtorisë Vendore të Policisë Gjirokastër gjetën të fshehura, në banesën e shtetasit Dh. M., 45 vjeç, 2 kallashnikovë dhe një armë zjarri automatike, të dyshuar të trafikuar dhe qindra fishekë të kalibrave të ndryshëm.
Armët e zjarrit, që u gjetën në banesën e 45-vjeçarit, i ndaluar 2 ditë më parë në Greqi, mbi akuza për vrasje dhe pjesëmarrje në grup kriminal që posedonte armë zjarri, do të dërgohen tek Instituti i Policisë Shkencore për ekspertim teknik.
Me qëllim dokumentimin e plotë të veprimtarisë kriminale të shtetasve shqiptarë Dh. M., 45 vjeç, banues në Labovën e Kryqit Gjirokastër; A. B., 32 vjeç, banues në Kudhës Himarë; F. P., 39 vjeç, banues në Lezhë; dhe P. Th., 31 vjeç, banues në Muzinë Sarandë, të dyshuar si vrasës me pagesë, strukturat e Departamentit të Policisë Kriminale, ato të DVP Gjirokastër, Vlorë e Lezhë, në bashkëpunim me Prokurorinë, po vijojnë hetimet e thelluara duke koordinuar dhe bashkëpunuar ngushtësisht me homologët grekë.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme, për veprat penale “Trafikimi i armëve dhe i municionit” dhe “Mbajtja pa leje dhe prodhimi i armëve, armëve shpërthyese dhe i municionit”.
Author: Opinion.al
-
Gjendet arsenal armësh në Gjirokastër, 4 të dyshuar si vrasës me pagesë
-
Sekuestrimi i anijes me naftë, Maduro: Amerikanët janë Piratët e Karaibeve
“Don’t worry, be happy”! Kështu Nicolas Maduro, lideri i Venezuelës, këndon dhe kërcen ndërsa ushtria amerikane i afrohet gjithnjë e më shumë tokës së vendit të tij.
“Nga Venezuela, ne kërkojmë dhe urdhërojmë që t’i jepet fund ndërhyrjes së paligjshme dhe brutale të qeverisë së Shteteve të Bashkuara”,deklaroi Maduro.
Deklarata e tij vjen pasi forcat amerikane sekuestruan një anije çisternë në brigjet e Venezuelës. Presidenti Donald Trump e konfirmoi një gjë të tillë, duke pohuar se madhësia e mjetit lundrues ishte e konsiderueshme dhe paralajmëroi veprime të tjera.
“Po ndodhin edhe gjëra të tjera. Do t’i shikoni pak më vonë. Do të flasim për veprime të tjera më vonë dhe disa njerëz të tjerë”, tha Trump.
Kjo shënon një përshkallëzim në tensionet mes Uashingtonit dhe Karakasit, ndërsa administrata Trump sinjalizon gjithnjë e më shumë se po kërkojnë rrëzimin e regjimit të Maduros. Pasi publikoi imazhet e operacionit të sekuestrimit, prokurorja e përgjithshme amerikane, Pam Bondi, e quajti anijen “një çisternë nafte të sanksionuar që përdoret për të transportuar karburant nga Venezuela për në Iran”.
Qeveria në Karakas ka dënuar veprimin, duke e konsideruar një akt “piraterie ndërkombëtare”. Presidenti Maduro, më herët theksoi se Venezuela nuk do të bëhet kurrë një “koloni nafte”.
Administrata Trump e akuzon atë si drejtues të një karteli droge dhe për nxitjen e trafikut të lëndëve narkotike përmes anijeve në det. Për këtë janë bërë disa operacione dhe hedhur në erë dhjetëra mjete lundruese. Gjithashtu SHBA ka pozicionuar në Karaibe një fuqi të madhe luftuese, me avionë, luftanije dhe trupa ushtarake. -
Kroacia do të blejë tanke nga Gjermania
Kroacia nënshkroi një marrëveshje sot me Gjermaninë për të blerë 44 tanke Leopard 2A8 gjatë vizitës së kryeministrit kroat Andrej Plenkoviq në Berlin.
Pas ceremonisë së nënshkrimit, kancelari Friedrich Merz shprehu mirënjohje për vendimin e Kroacisë.
“Ju falënderoj sinqerisht për këtë besim. Kjo forcon forcat tona të armatosura si aleatë të NATO-s dhe i integron ato pa probleme dhe në mënyrë efikase përmes sistemeve tona. Kjo nuk ka qenë kurrë më e rëndësishme se sot”, tha ai, raporton KosovaPress.
“Kjo tregon se ne qëndrojmë së bashku në BE dhe në NATO. Por gjithashtu tregon se kemi mjetet për t’iu përgjigjur kërcënimeve aktuale nga Rusia dhe të tjerët ndaj sigurisë dhe integritetit tonë,” shtoi Merz.
Ndërsa kryeministri kroat Andrej Plenkoviq theksoi rëndësinë e blerjes së tankeve të përparuara Leopard për vendin e tij, duke vënë në dukje se Kroacia do të vazhdojë të modernizojë forcat e saj të armatosura, duke përfituar nga programet e mbrojtjes të sapokrijuara të BE-së dhe duke kontribuar në përpjekjet e përbashkëta të mbrojtjes.
“Ky është një hap i rëndësishëm kur bëhet fjalë për transferimin e teknologjisë në Kroaci, për kalimin në teknologjinë perëndimore, ku mund të vazhdojmë të forcojmë bashkëpunimin në fushën e mbrojtjes dhe sigurisë”, tha ai, transmeton Anadollu. ( -
Trump prezanton “vizat e arta” në vlerë të 1 milion dollarëve
Presidenti amerikan, Donald Trump e ka prezantuar një skemë që mundëson sigurimin e vizës amerikane për periudhë afatgjatë për të pasurit që mund të paguajnë të paktën 1 milion dollarë.
Trump ka thënë përmes postimeve në rrjete sociale se viza do t’iu mundësojë blerësve të vizës “hyrjen direkte në rrugën për shtetësi për të gjithë personat e kualifikuar dhe verifikuar”.
“Sa emocionuese! Kompanitë tona të mrekullueshme amerikane më në fund do ta mbajnë talentin e tyre të çmuar”.
E ashtuquajtura Karta e Artë Trump, është prezantuar për herë të parë më herët gjatë këtij viti, dhe atë mund ta blejnë ata që dëshmojnë se do t’iu ofrojnë Shteteve të Bashkuara “përfitime domethënëse”.
Skema e re premton sigurimin e lejes së qëndrimit në SHBA në “kohë rekord” dhe kushton 1 milion dollarë për të vërtetuar se një individ do të kontribuojë shumë për SHBA-në, sipas faqes zyrtare të programit.
Bizneset që i sponsorojnë vizat për punëtorët e huaj duhet të paguajnë 2 milionë dollarë, pa përfshirë tarifat shtesë.
Një version tjetër i vizës që parasheh edhe kushte shumë të favorshme për taksa, është thënë se do të jetë e qasshme shumë shpejt për 5 milionë dollarë.
Tarifat shtesë qeveritare mund të ndryshojnë varësisht se kush aplikon, kanë bërë të ditur autoritetet.
Kur Trump e ka prezantuar planin për herë të parë, ai i ka përshkruar vizat të ngjashme me ato ekzistuese në kuadër të programit të njohur si “karta e gjelbër”, e cila u mundëson imigrantëve me të ardhura të ndryshme që të jetojnë dhe punojnë përgjithmonë në Shtetet e Bashkuara.
Poseduesit e këtij lloji të lejes së qëndrimit mund të aplikojnë për shtetësi pas pesë vjetësh. Mirëpo, Trump ka thënë se programi i ri është specifik për profesionistë “të nivelit të lartë”. “Ne duam njerëz që janë produktivë”, ka deklaruar mes tjerash ai./rel -
I arrestuar për aferën e inceneratorit të Fierit, lirohet nga burgu Lefer Koka
Gjykata e Posaçme Antikorrupsion (GJKKO) ka liruar nga qelia ish-ministrin e Mjedisit Lefter Koka pasi kanë kaluar afatet e paraburgimit.
Koka u arretua qe prej dhjetorit 2021 i akuzuar shpërdorim detyre, korrupsion dhe pastrim parash lidhur me aferat korruptive për Inceneratorin e Fierit. Sipas akuzave të SPAK, për inceneratorin e Fierit u paguan 4 milionë euro për punë që nuk u kryen asnjëherë, ndërsa 60 milionë lekë është dëmi i shkaktuar në buxhetin e shtetit në skemën e mashtrimit.
GJKKO ka shuar dhe masën e sigurisë “arrest me burg” për Inceneratorin e Fierit, ndërsa çështja është kthyer për rigjykim në Apelin e Posaçëm nga Gjykata e Lartë.
Në korrik të këtij viti, Koka fitoi të drejtën e lirimit me kusht nga Gjykata e Durrësit për inceneratorin e Elbasanit, ku u dënua me 6 vite e 8 muaj burg me gjykim të shkurtuar.
Për inceneratorin e Fierit, Koka është dënuar në shkallë të parë me 6.8 vite, ndërsa për të Tiranës u dënua me dy vite. Për Tiranën, mori shuarje të masës së sigurisë arrest në burg pasi dënimi i marrë me 2 vite burg për “shpërdorim detyre” në shkallë të parë është ezauruar me paraburgim. -
Makina përplaset me autobusin, përfundon në kanal
Një aksident ka ndodhur mëngjesin e sotëm në aksin Fier-Levan, në vendin e quajtur “Kthesa e Azotikut”.
Paraprakisht mësohet se një autobus që udhëtonte drejt Vlorës është përplasur me një automjet tip “Audi”, i cili më pas ka përfunduar në kanalin anësor të rrugës. Fatmirësisht, nga ngjarja nuk ka persona të lënduar.
Në vendngjarje kanë mbërritur menjëherë shërbimet e policisë dhe grupi hetimor, të cilët po punojnë për sqarimin e rrethanave dhe përcaktimin e shkaqeve të aksidentit.