Kreu i Partisë Demokratike, Sali Berisha, mbajti sot një tjetër fjalim para protestuesve të mbledhur përballë Kryeministrisë, ku akuzoi kryeministrin Edi Rama për korrupsion, pasuri të paligjshme dhe përdorim abuziv të fondeve publike.
Ai deklaroi se beteja politike ka hyrë në fazën e saj vendimtare dhe se opozita nuk do të tërhiqet nga rruga e protestave.
Në vijim, Berisha tha se “kupa është mbushur dhe po derdhet”, duke paralajmëruar se opozita do të ashpërsojë qëndrimin e saj ndaj qeverisë.
“Ne sheshin nuk e lëshojmë dhe jemi në betejën përfundimtare. Me Edi Ramën nuk shkojmë më kurrë në zgjedhje. Zgjedhjet dhe votën nuk ia falim kurrë,” nënvizoi ai, duke shtuar se fitorja, sipas tij, “është e opozitës”.
Berisha paralajmëroi se protestat do të vazhdojnë me ritëm të përjavshëm dhe do të shndërrohen në një presion të pandërprerë ndaj qeverisë.
Të hënën tjetër, përsëri këtu. Dhe çdo të hënë do ta nisim javën me betejë kundër kryehajdutit të kombit. Ky është fati i javës,” deklaroi ai para mbështetësve.
Author: Javanews.al
-
Berisha i prerë para demokratëve: Nuk e lëshojmë sheshin! Me Edi Ramën nuk shkojmë më kurrë në zgjedhje!
-
“Foltorja 2”, përfundon protesta e opozitës/ Mbështetësit largohen nga sheshi pranë Kryeministrisë
“Foltorja 2” është mbyllur pas më shumë se 1 orë tubim. Protestuesit e opozitës janë larguar nga sheshi pranë kryeministrisë, pasi kanë dëgjuar fjalimin e fundit të mbajtur nga kreu i PD, Sali Berisha, në foltoren e improvizur.
Kryetari i Partisë Demokratike të Shqipërisë, Sali Berisha, duke folur në ‘Foltoren-Kuvendi i qytetarëve dhe deputetëve’, ka lëshuar akuza të forta ndaj Edi Ramës, lidhur me aferën korruptive të tunelit të Llogarasë.
Në fjalën e tij, Berisha u shpreh se, reagimet publike të Kryeministrit ndaj procesit në Gjykatën Kushtetuese dhe ndaj akuzave për vjedhje të fondeve publike përbëjnë, sipas tij, një pranim të përgjegjësisë politike dhe morale. Ai e paraqiti situatën si pjesë të një krize më të gjerë qeverisëse, të cilën e konsideroi si kulmin e degradimit institucional dhe ekonomik të vendit gjatë dekadës së fundit.
-
VIDEO- Protesta e opozitës në javën e 3-të, vetëm militantët nuk e braktisin Berishën
Edhe në javën e 3-të të, në bulevardin “Dëshmorët e Kombit” janë mbledhur vetëm militantët demokratë për të marrë pjesën në protestën e çdo jave të thirrur nga Partia Demokratike.
Numri i pjesëmarrësve bijon të jetë i ulët nga java në javë ndërsa në foltoren e vendosur përpara kryeministrisë fjalën e marrin deputetë dhe anëtarë të PD-së. -
LIVE- “Foltore 2”, opozita proteston sërish para Kryeministrisë, flet kreu i PD Berisha
Sot Partia Demokratike zhvillon foltoren e saj të radhës përballë Kryeministrisë, si pjesë e aksionit të ri protestues të nisur dy javë më parë nga kreu i PD-së, Sali Berisha. Protestuesit e parë janë mbledhur para Kryeministrisë ndërsa pritet një fjalim nga kryedemokrati Sali Berisha për ta konsideruar zyrtare nisjen e protestës.
Dy tubimet e para, të mbajtura më 17 dhe 24 nëntor, kanë kaluar të qeta dhe pa incidente, ndërsa formati i ri i protestës synon krijimin e një hapësire publike ku opozita, aleatët e saj dhe qytetarët të shprehin shqetësimet dhe akuzat ndaj qeverisë.
Berisha ka deklaruar se qëllimi i këtyre protestave nuk është pjesëmarrja masive, por garantimi i një tribune ku opozita të ketë zërin e saj të plotë, duke akuzuar shumicën qeverisëse se kufizon të drejtën e fjalës në Kuvend. Foltorja e përjavshme zhvillohet çdo të hënë, ndërsa PD po shqyrton mundësinë që ta shtrijë këtë format edhe në qytete të tjera të vendit, si dhe organizimin e një proteste të madhe kombëtare, megjithëse pa një datë të caktuar.
Policia ka marrë masat për mbarëvajtjen e protestës, përfshirë ndalimin e parkimit pranë Kryeministrisë dhe ruajtjen e perimetrit të sigurisë, ndërsa numri i efektivëve pritet të jetë më i ulët se në protestat e mëparshme. Foltorja e sotme pritet të fokusohet te denoncimet e opozitës në drejtim të qeverisë dhe te akuzat ndaj kryeministrit Edi Rama. -
Protestat e PD/ Çupi: Segmente të drejtësisë po tentojnë të sabotojnë integrimin
Analisti Frrok Çupi shprehet se segmente të caktuara brenda radhëve të drejtësisë shqiptare po tentojnë të sabotojnë integrimin e Shqipërisë në Bashkimin Evropian.
Duke folur për “Foltoren” e PD, e cila sërish konfirmoi pjesëmarrjen e papërfillshme të njerëzve, Çupi theksoi se kjo parti tenton t’u japë shpresë grupimeve brenda radhëve të drejtësisë, që mund të mbajnë shpresë tek ajo.
Ai theksoi në “Tirana Live” se Partia Demokratike është inekzistente dhe kjo dëshmohet me pjesëmarrjen e njerëzve në bulevard.
“Segmente të drejtësisë po sabotojnë integrimin. Kjo lloj opozite nuk është dobi për vendin, por krijon amulli dhe jep shpresa dhe grupimeve të drejtësisë që e kemi shpresën te një gjë e pajetë, te një gjë e vdekur. PD ka anëtarë dhe me vlera padyshim, por që janë të rrallë dhe janë të strukur dhe nuk ua dëgjon njeri fjalën.
Ajo është në situatën e saj inekzistente. Nuk ia vlen të investohesh për të folur për këtë parti. PD e ka mbyllur jetën e vet dhe nuk mund të ringjallet më, me këto metoda dhe me këtë njerëz nuk mund ta ngjallësh. Partia nuk bëhet në bulevard, partia bëhet në popull.”, tha ai. -
Salianji dhe Alimehmeti në kafe me më të votuarit/ Korreshi: Ne jemi ndryshe nga partitë hermetike, edhe unë ulem shpesh me kolegët
Para Kryeministrisë po zhvillohet sot protesta e Partisë Demokratike, e cila sipas deputetit Saimir Korreshi do të vazhdojë me të njëjtën formë, duke i dhënë qytetarëve mundësinë të flasin në vetën e parë për problemet e tyre. Sipas tij, opozita nuk ka hapësirë në parlament për të shprehur çdo ditë shqetësimet e qytetarëve, ndaj protesta shërben si tribunë publike.
Në lidhje me “kafen e famshme” mes Ervin Salianjit, Ilir Alimehmetit dhe disa kandidatësh të primareve, Korreshi e minimizoi situatën duke thënë se “nuk është çdo kafe lëvizje kundër PD-së”. Ai shtoi me ironi se gazetarët më shpesh marrin vesh lëvizjet e grupit parlamentar më shpejt se vetë deputetët. Për të, PD është parti e hapur dhe dinamike, ndryshe nga “partitë hermetike”, ndaj debatet e brendshme nuk duhen parë si përçarje, tha Korreshi për A2 CNN.
Si jurist, Korreshi deklaroi se masa e pezullimit ndaj Ballukut është plotësisht e ligjshme, pasi kryeministri nuk ka kompetencë ta pezullojë apo ta rikthejë në detyrë. Ai parashikoi se nesër Gjykata Kushtetuese do ta konfirmojë vendimin e SPAK, dhe madje shtoi se nëse do të ndodhte e kundërta, do t’i hapej rrugë kërkesës për arrestim nga Këshilli i Mandateve.
Protesta u shoqërua edhe me një koreografi simbolike me uniforma burgu, që tërhoqi vëmendjen e qytetarëve dhe mediave. -
VIDEO- Flakët përfshijnë një shtëpi 2-katëshe në Gramsh, shkrumbohet banesa
Një banesë dy katëshe është përfshirë nga flakët pasditen e sotme, rreth orës 15:00, në fshatin Kukur të Gramshit.
Zjarri, i cili ka nisur ende në rrethana të paqarta, ka përfshirë me shpejtësi të gjithë godinën.
Banesa, e cila në katin e parë shfrytëzohej edhe si njësi shërbimi, ka pësuar dëme të konsiderueshme materiale.
Në vendngjarje kanë mbërritur menjëherë shërbimet zjarrfikëse të Gramshit, të cilat po punojnë për shuarjen e flakëve dhe parandalimin e përhapjes së tyre në banesat përreth.
Deri tani nuk raportohet për persona të lënduar, ndërsa autoritetet po hetojnë shkaqet që çuan në përfshirjen e objektit nga zjarri. -
Skandali kibernetik, 120 mijë kamera shtëpish dhe biznesesh në sulmin e hakerave/ Në internet publikohen pamjet me përmbajtje s*ksuale
Një skandal i ri kibernetik ka plasur, ndërsa janë hakuar 120 mijë kamera sigurie shtëpish, duke publikuar pamjet private apo intime të tyre, në rrjet dhe faqe online.
Katër persona janë arrestuar në Korenë e Jugut me akuzën e hakimit të më shumë se 120,000 kamerave në shtëpi dhe biznese, duke shfrytëzuar dobësitë e sigurisë dhe fjalëkalimet e thjeshta, për të krijuar dhe shpërndarë materiale me përmbajtje seksuale eksplicite në një faqe interneti të huaj të paligjshme.
Sipas autoriteteve, personat e arrestuar dyshohet se kanë shfrytëzuar dobësitë në kamerat e shtëpisë, të cilat janë të lidhura me rrjetet e shtëpisë dhe shpesh përdoren për arsye sigurie, ose për të monitoruar fëmijët dhe kafshët shtëpiake. Vendet ku u gjetën kamerat e hakuara përfshijnë shtëpi, dhoma karaoke, studio Pilates dhe një klinikë gjinekologjike.
Sipas BBC-së, policia sqaroi se katër të dyshuarit duket se kanë vepruar në mënyrë të pavarur nga njëri-tjetri, pa bashkëpunuar. Njëri prej tyre akuzohet për hakimin e 63,000 kamerave dhe prodhimin e 545 videove me shfrytëzim seksual, të cilat dyshohet se i shiti për 12,235 dollarë në asete virtuale.
Një i dyshuar i dytë dyshohet se ka hakuar 70,000 kamera dhe ka shpërndarë 648 video, duke fituar 18 milionë won.
Këta dy autorë dyshohet se janë përgjegjës për rreth 62% të materialit të paligjshëm të postuar vitin e kaluar në një faqe interneti që shpërndan ilegalisht video nga kamerat IP të hakuara.
Autoritetet tani po lëvizin për të bllokuar dhe mbyllur faqen e internetit, ndërsa po bashkëpunojnë me agjencitë e huaja për të identifikuar dhe hetuar administratorin.
Në të njëjtën kohë, tre persona janë arrestuar për dyshimin e blerjes ose shikimit të materialeve përmes kësaj platforme. -
Presidenti i Francës Emmanuel Macron do ta vizitojë Kinën nga 3 deri në 5 dhjetor
Me ftesë të homologut kinez Xi Jinping, presidenti francez Emmanuel Macron do të zhvillojë një vizitë shtetërore në Kinë në datat 3-5 dhjetor, njoftoi të hënën një zëdhënës i Ministrisë së Jashtme të Kinës.
Lajmin e bëri të ditur zëdhënësi Lin Jian në një konferencë rutinë për shtyp, duke thënë se kjo do të jetë vizita e katërt shtetërore e presidentit Macron në Kinë. Gjithashtu është një vizitë shtetërore reciproke, pas vizitës së vjetshme në Francë të presidentit Xi, në kuadër të 60-vjetorit të vendosjes së marrëdhënieve diplomatike Kinë-Francë, shtoi Lin.
Gjatë vizitës, Xi do të zhvillojë bisedime me kreun e shtetit të Francës, për të udhëhequr së bashku zhvillimin e marrëdhënieve dypalëshe në rrethanat e reja, tha Lin, duke shtuar se të dy presidentët do të kenë gjithashtu një shkëmbim të thelluar mendimesh mbi çështjet e rëndësishme ndërkombëtare dhe rajonale.
Krerët e dy shteteve në një bisedime gjatë vizitës zyrtare të presidentit Xi në Francë, Paris, 6 maj 2024/Foto nga Xinhua
Kryeministri i Kinës Li Qiang dhe Zhao Leji, kryeparlamentari i vendit, do të takohen gjithashtu me presidentin francez, sipas zëdhënësit.
Franca ishte vendi i parë i madh perëndimor, i cili krijoi marrëdhënie zyrtare diplomatike me Kinën e Re. Marrëdhëniet dypalëshe kanë një histori që ia vlen të çmohet, me vlera unike dhe që mbartin misione të rëndësishme, tha Lin.
Në një situatë ndërkombëtare plot luhatje, Kina është e gatshme të punojë me Francën për ta shfrytëzuar vizitën si një mundësi për forcimin e komunikimit strategjik, për thellimin e bashkëpunimin pragmatik, për të çuar përpara një koordinim më të ngushtë shumëpalësh, si dhe për të punuar për përparime të reja në partneritetin strategjik gjithëpërfshirës Kinë-Francë, tha Lin.
Presidenti kinez Xi Jinping dhe bashkëshortja Peng Liyuan në një vizitë në Francë nën shoqërimin e çiftit presidencial francez, 2024/Foto nga Xinhua
Nëpërmjet këtyre, të dy vendet do të kontribuojnë më shumë në promovimin e zhvillimit të shëndetshëm dhe të qëndrueshëm të marrëdhënieve Kinë-BE, duke mbështetur multilateralizmin dhe duke ruajtur paqen, stabilitetin dhe prosperitetin botëror. -
Kiev, skandal i madh korrupsioni/ Njerëz të afërt me Zelensky-n nën hetim! Përgjimet zbulojnë një “sistem kriminal” me kontrata…
Përgjimet telefonike të publikuara nga Agjencia Kundër Korrupsionit në Ukrainë kanë zbuluar një skemë të gjerë korrupsioni që përfshinte zyrtarë të lartë të qeverisë, biznesmenë të fuqishëm dhe persona të afërt me presidentin Volodymyr Zelensky.
Në qendër të skandalit ndodhet një “sistem kriminal” që dyshohet se kërkonte 10–15% ryshfet nga të gjitha kontratat e kompanisë shtetërore të energjisë bërthamore Enerhoatom, me një dëm të vlerësuar nga 75 deri në 100 milionë euro, shkruan Corriere della Sera.Në një prej përgjimeve, biznesmeni Timor Mindich – i konsideruar si një nga korrupsionuesit kryesorë – tregohet duke përshkruar se si transportonte 1.6 milionë dollarë në një kuti me dorezë “si kutitë e laptopëve”, duke e mbajtur në dorë nëpër rrugët e Kievit.
Dialogët telefonikë mes Mindich dhe ministrit të Energjisë, Herman Halushchenko, tregojnë një nivel të lartë mosndëshkueshmërie. Të dy qeshin, flasin me siguri të plotë dhe madje përmendin edhe presidentin Zelensky, pa e ditur se po përgjohej nga ekipi i Inspektores Olena Shcherban.
“Këtë herë e kemi kapur. Kemi arritur deri te rrethi i ngushtë, ‘familja’ e presidentit”, deklaroi Shcherban, duke përshkruar momentin kur hetuesit konfirmuan se skema përfshinte njerëz shumë afër Zelensky-t.
Sipas sipërmarrësve të sektorit të energjisë, pagesat nuk bëheshin gjithmonë me para në dorë. Shpesh përdorej një firmë konsulence për të “legalizuar” ryshfetet. Në raste të tjera, zyrtarët dërgonin kontroll tatimor ndaj një kompanie, dhe gjoba e vendosur ishte dukshëm më e lartë se minimumi, duke u përdorur si mjet presioni për pagesë.
Në një rast tjetër, një donacion humanitar prej 1 milion eurosh për Kishën u shpërdor pothuajse tërësisht në “shpenzime përfaqësimi dhe komunikimi”.
Në qendër të strategjive politike dhe financiare dyshohet të ketë qenë Andriy Yermak, shefi i kabinetit të Zelensky-t dhe një nga njerëzit më të besuar të presidentit. Prokuroria pretendon se Yermak hartonte taktikat e biznesit, ndërsa Mindich zbatonte tarifat dhe ndërmjetësimet.
Rrethi i tyre i pushtetit mbështetej në dy faktorë:
Ligji i emergjencës së luftës, i cili rriti ndjeshëm kompetencat e ekzekutivit;
Shumica absolute parlamentare prej 254 vendesh, një fuqi politike që asnjë paraardhës i Zelensky-t nuk e kishte pasur.
Shumë figura të larta shtetërore që dyshohet se sfiduan skemën, u zëvendësuan ose u larguan:
Yulia Svyrdenko, kryeministre – në konflikt të hapur me Yermakun.
Gjeneral Valery Zaluzhny, i transferuar në Londër.
Dmytro Kuleba, Ministri i Jashtëm – shkarkuar për “pavarësi të tepruar”.
Oleksandr Kubrakov, ish-zv.kryeministër – i larguar për lidhjet me administratën Biden.
Mykhailo Fedorov, që kërkonte transparencë në biznesin e dronëve – u izolua politikisht.
Në listën e hetuarve përfshihet edhe Rustem Umerov, shefi i Këshillit të Sigurisë Kombëtare dhe ish-Ministër i Mbrojtjes.
Një deputet i Radës deklaroi për mediat: “Faji i Zelensky-t ishte se nuk i dëgjoi ata që panë vjedhjet dhe dhanë alarmin.”
Në qershor, zëvendëskryeministri i atëhershëm Oleksy Chernishov u arrestua dhe u lirua me garanci prej 2.9 milionë dollarësh për shitje të tokës publike tek miq të tij. Hetuesit zbuluan se ai merrte para në dorë – në zyrë, në zarfe për t’i dhënë gruas, madje edhe teksa kurohej në një klinikë.
Ironikisht, Chernishov kishte nofkën “Che Guevara”, dhe motoja e tij ishte: “Ia vlen të luftosh vetëm për ato gjëra pa të cilat jeta nuk ia vlen të jetohet.”
Agjencia shënon se në rastin e tij, objekt i “luftës” rezultonin të ishin prokurimet publike, jo idealet.