Nancy Pelosi, gruaja e parë dhe e vetme që ka shërbyer si Kryetare e Dhomës së Përfaqësuesve të Shteteve të Bashkuara dhe një nga figurat më të fuqishme të Partisë Demokratike për dekada me radhë, ka njoftuar se nuk do të kandidojë për rizgjedhje në vitin 2027.
Në një video disa minutëshe të publikuar të enjten pasdite, 85-vjeçarja Pelosi deklaroi: “Ka qenë nderi më i madh për mua të qëndroj në sallën e Dhomës së Përfaqësuesve dhe të them: ‘Unë flas për popullin e San Franciskos’. E kam dashur me shpirt shërbimin tim në Kongres dhe gjithmonë e kam respektuar himnin e Shën Françeskut – ‘Zot, më bëj një instrument të paqes sate’. Për këtë arsye dua që ju, bashkëqytetarët e mi të San Franciskos, të jeni të parët që e dini: unë nuk do të kandidoj për rizgjedhje në Kongres.”
Pelosi theksoi se pret “me mirënjohje” vitin e fundit të mandatit të saj, duke i bërë thirrje qytetarëve të San Franciskos të vazhdojnë të jenë aktivë në mbrojtjen e demokracisë dhe idealeve amerikane. “Ne kemi bërë histori, kemi përparuar dhe kemi udhëhequr rrugën. Ne duhet të vazhdojmë ta bëjmë këtë, duke marrë pjesë aktive në demokracinë tonë dhe duke mbrojtur idealet e Amerikës,” tha ajo.
Njoftimi i saj i dha fund javëve të spekulimeve për një dorëheqje pas 38 vitesh në Kongres. Pelosi u zgjodh për herë të parë në vitin 1987 dhe në vitin 2007 u bë gruaja e parë në histori që mbajti postin e Kryetares së Dhomës së Përfaqësuesve — një rol që e rifitoi pas zgjedhjeve të vitit 2018. Ajo mbetet e vetmja grua që ka mbajtur ndonjëherë “çekiçin” e drejtimit të Dhomës.
Njoftimi vjen vetëm dy ditë pas një prej fitoreve më të mëdha politike të demokratëve, të cilën partia ia atribuon drejtpërdrejt Pelosi-t — një fitore dërrmuese në një referendum në Kaliforni që riformësoi hartën zgjedhore në favor të demokratëve përpara zgjedhjeve të mesit të mandatit të vitit 2026. Sipas bashkëpunëtorëve të saj, Pelosi ka mbledhur dhjetëra miliona dollarë për fushatën në mbështetje të kësaj mase.
Në vitet e fundit, ajo është përqendruar kryesisht në qëndrimin kundër presidentit Donald Trump, me të cilin është përplasur në mënyrë të përsëritur. Gjatë drejtimit të saj, Dhoma e Përfaqësuesve zhvilloi dy procese shkarkimi ndaj Trump-it, ndërsa Pelosi u bë e njohur ndërkombëtarisht pas momentit simbolik kur grisi publikisht tekstin e fjalimit të tij për Gjendjen e Kombit në vitin 2020.
Author: Javanews.al
-
Nancy Pelosi “doreza e vjetër” e demokratëve në Kongres, njofton fundin e saj në politikë: S’do të kandidoj për rizgjedhje
-
“Ngecje në përparim për negociatat”/ Mickoski e “lexon” ndryshe raportin e KE: Jemi para Shqipërisë
“Progres i kufizuar në fushën e drejtësisë, ngecje e theksuar në luftën kundër korrupsionit dhe mosrealizimi i ndryshimit të kushtetutës”-ishin disa nga kritikat në raportin e KE-së për Maqedoninë e Veriut, por që kryeministri i Hrisijan Mickoski i lexon ndryshe.
Në raport theksohej se Maqedonia e Veriut nuk ka ndërmarrë hapa vendimtarë për të përparuar në negociatat brenda këtij viti në union, ndërsa Mickoski shprehet se nëse realizohen ndryshimet kushtetuese, “do të jemi më të mirët, kampionët dhe do të marrim veto të re”.
Përveç ndryshimeve kushtetuese, Mickoski thotë se është jashtëzakonisht i kënaqur me vërejtjet në Raport sepse, siç thotë ai, vendi nuk po shkon prapa.
“Ka ngecje në disa fusha, të gjithë e dimë se cilat janë, që është sundimi i ligjit, lufta kundër krimit dhe korrupsionit. Vazhdoj të them se nevojiten ndryshime në Këshillin Gjyqësor dhe në Prokurori. Tani, pas zgjedhjeve, do të merremi me këtë temë shumë më seriozisht. Në të gjitha fushat e tjera, ka pasur përparim të vogël ose të rëndësishëm, kështu që në përgjithësi mund ta vlerësoj Raportin si të mirë”, thotë Mickoski.
Sipas tij, vendi është shumë përpara Shqipërisë në tetë fusha, megjithëse, siç thotë ai, disa nga komisionerët evropianë bëjnë deklarata të tilla.
“Kur analizohet situata dhe gatishmëria e vendeve – vlerësimi objektiv është se Mali i Zi është i pari, në vendin e dytë jemi ne dhe Serbia, dhe pastaj vijnë Shqipëria, Bosnja dhe Hercegovina, Kosova. Por ne duhet të punojmë dhe do të punojmë. Unë jam absolutisht i përqendruar në reforma, kjo qeveri është reformiste dhe jam i inkurajuar nga mesazhet për reformat në fushën e ekonomisë, luftën kundër pastrimit të parave, futjen e një sistemi të përbashkët pagesash, doganat, roaming-un e lirë. Do të zbatohet në një mënyrë të tillë që ka shumë gjëra për t’u lavdëruar dhe kjo më inkurajon”, shtoi kryeministri. -
CIIE – ekspozitë importi me impakt global
CIIE-ja po mbahet nga datat 5 – 10 nëntor në Shangai të Kinës Lindore. Pjesëmarrja e përfaqësuesve nga 155 vende, rajone e organizata ndërkombëtare dhe prania e 290 ndër 500 kompanitë më të fuqishme botërore, rekorde të reja në sipërfaqen e ekspozimit dhe numrin e përgjithshëm të ekspozuesve, fakti që kompanitë amerikane zënë vendin e parë për shtatë vjet radhazi për sa i përket zonës së ekspozimit … dërgojnë sinjale të forta për bashkëpunimin e hapur dhe me përfitime të ndërsjella, thuhet në një koment të CMG-së.
CIIE-ja është ekspozita e parë në nivel kombëtar në botë me temën e importeve.Mes një peizazhi të ndërlikuar, ekspozita është bërë një ngjarje gjithnjë e më e shumëpritur për kompanitë ndërkombëtare, duke reflektuar kontributin e Kinës në stabilizimin e zhvillimit global, vijon komenti i CMG-së.
Sipas “Raportit të hapjes botërore 2025”, të publikuar të mërkurën në Forumin e 8-të Ekonomik Ndërkombëtar “Hongqiao”, një veprimtari paralele me CIIE-në, treguesi i hapjes botërore për vitin 2024 ishte 0.7545, me një rënie prej 0.05 % krahasuar me një vit më parë. Në të kundërt, treguesi i hapjes së Kinës u rrit me 0.5 % për të njëjtën periudhë. -
Tronditet Gjermania/ Svastika me gjak në makina e mure banesash, policia heton incidentin misterioz në Frankfurt
50 automjete të lyera në dukje me gjak njeriu, kanë vënë në lëvizje autoritetet gjermane.
Incidenti ndodhi në qytetin e Hanau pranë Frankfurtit, thotë policia, që pohoi në një deklaratë se svastika me gjak janë shfaqur nëpër makina, por edhe në mure banesash e në kuti postare. Ishte një burrë që njoftoi fillimisht se një makinë në lagjen e tij ishte lyer me një lëng në formë të kuqerremtë në formë svastike.
Por efektivët shkuan në vendngjarje të kontrollonin, gjetën dhe shumë automjetete të tjera dhe fasada banesash të lyera në zonën përreth. Svastikat janë të ndaluara në Gjermani në bazë të ligjeve që ndalojnë rreptësisht përdorimin e simboleve naziste. Policia e pohoi se teste paraprake dëshmuan se më shumë gjasë, lënda e përdorur është gjak njeriu. “Ende nuk ka asnjë të dhënë se nga është marrë ai; zyrtarët nuk janë ende në dijeni të ndonjë lëndimi në lidhje me incidentin,” nënvizuan drejtues të saj.
Autoritetet lokale thanë se po përpiqeshin “të zgjidhnin misterin” dhe i kanë bërë thirrje publikut për informacion. Zëvendëspresidenti i Bundestagut, Omid Nouripour, tha se episodi i mistershëm e ka shokuar, dhe kërkoi që ai të zgjidhet sa më shpejt. “Një akt i tillë në zemër të Hanau-t, rihap plagët e sulmit terrorist të ekstremit të djathtë pesë vjet më pare atje”, shkroi ai në platformën X, duke iu referuar vrasjes së nëntë personave nga një person i armatosur që shënjestronte emigrante ne shkurt të vitit 2020. Svastika konsiderohet një simbol i urrejtjes që evokon tmerret e Gjermanisë naziste dhe traumën e Holokaustit. -
Lirimi i hapësirave publike, Rama: Vijojmë punën për të liruar trotuaret e rrugët (VIDEO)
Lirimi i hapësirave publike nga ndërtimet e paligjshme i paraprin zbatimit të programit “Rilindja Urbane 2.0”, i cili synon të kthejë ligjshmërinë në territor duke sjellë zhvillim për komunitetet.
Kryeministri Edi Rama publikoi sot në rrjetet sociale të tjera pamje nga ndërhyrjet për çmontimin e strukturave metalike të vendosura në shkelje të ligjit nga subjektet private.
“Vijojmë punën për të liruar trotuaret, rrugët dhe hapësirat publike të zaptuara”, shkruan Rama në rrjetet sociale.
Lirimi i hapësirave publike ka nisur si një aksion kombëtar që prej muajit korrik. Të gjithë bizneset apo lokalet që padrejtësisht kanë zaptuar hapësirat publike me rrethimet metalike, struktura prej xhami apo me karrige e tavolina, do të prishen.
-
VIDEO-Tabela kundër kullës 35 katëshe në Shkodër përplas Myftininë me policinë bashkiake. Ja mesazhi që përmbante…
Përfaqësues të Myftinisë Shkodër dhe të bashkisë janë përplasur ditën e sotme lidhur me një tabelë të vendosur nga Myftinia në qendër të qytetit.
Policia bashkiake e hoqi atë tabelë me pretendimin se është vendosur pa leje dhe zë hapësirën publike.
Në tabelën përballë punimeve për kullën me 35 kate tabela shkruante: “Kush grabit padrejtësisht qoftë edhe një pëllëmbë tokë në ditën e Kiametit, Allahu ka për t’i varur në qafë edhe shtatë palë tokë”.
Myftinia pretendon se toka ku po ndërtohet kulla me 35 kate tek hotel “Turizmi” është pronë e saj, Kishës Ortodokse dhe familjes Laçej dhe e ka quajtur një grabitje që po i bëhet.
Myftinia vendosi edhe tabelën përballë kullës, ndërsa bashkia Shkodër menjëherë ka ndërhyrë duke bërë të mundur heqjen e saj.
Përfaqësuesit e Myftinisë u shprehën se kjo tabelë ka shumë vite që qëndron aty duke vendosur thënie të ndryshme të Pejgamberit Muhamed apo edhe hadithe siç ishte ky i fundit për grabitjen e tokës, por tabela u hoq pavarësisht kundërshtisë së Myftinisë.
-
‘Inspektorët në terren fikin kamerat dhe GPS’/ Braçe denoncon Tatimet për gjoba arbitrare: KLSH të kontrollojë Drejtorinë e VIP-ave dhe..
Deputeti socialist Erion Braçe ka ngritur shqetësimin në Kuvend për abuzimet që po ndodhin nga administrata tatimore dhe ajo doganore. Ai denoncoi një rast konkret ku një biznes u gjobit me 8.2 milionë lekë të vjetra vetëm për 15 kilogramë gjizë që i gjetën pa faturë tatimore, duke e cilësuar këtë veprim si shembulli tipik i arbitraritetit dhe mungesës së drejtësisë në institucionet fiskale.
Braçe lexoi dokumentin e gjobës nga tatimorët, ndaj këtij biznesi, ndërsa denoncoi se inspektorët kur dalin në terren fikin kamerat dhe GPS-in.
Ai kërkoi nga KLSH që të auditojë drejtorinë Tatimore VIP dhe atë të Tiranës. Socialisti kërkoi ndërhyrje urgjente nga qeveria për të ndaluar praktika të tilla që, sipas tij, dëmtojnë bizneset e vogla dhe ndershme. Me ironi, deputeti i PS tha se inspektorët sillen egër me të dobëtit, por para të fortëve tërhiqen.
Erion Braçe: Shqetësim është ligjshmëria në fushën e të ardhurave dhe KLSH sjell në vëmendje dy elementë: E para, klientizimin që funksionon ende në Dogana, veçanërisht në metodat për vlerësimin e transaksioneve se nuk sjell vetëm evasion fiskal, por cenon edhe konkurrueshmërinë në treg. E njëjta gjë vlen edhe për Tatimet por ajo që vjen në evidencë ka të bëjë me borxhin sepse do të kemi një ligj.
KLSH sjell në vemendje që borxhi i akumuluar po rritet më shpejt sesa masa e arkëtimit të këtij borxhi në harkun e një viti.
Por më i madh bëhet shqetësimi kur inspektorët dalin jashtë sistemit elektronik të inspektimit, fikin kamerat e GPS dhe kjo evidentohet në raportin e KLSH. Ky është një problem shumë i madh. Jam i vetmi që po flas për rendin e ditës (i drejtohet Peleshit pasi i kërkoi të mbyllte fjalën)…
Organet fiskale e kanë këtë qasje dhe sjellje, që sillen egër me të dobëtin dhe mungojnë në kontrolle në dy drejtoritë më të rëndësishme edhe në Tatim paguesit e mëdhenj dhe në të Tiranës.
Dhe nuk kam se si të mos sjell në vëmendje këtë akt konstatimi apo gjobe, vendosur në një biznes në Tiranë, në periferi dhe dua t’ua lexoj se me thënë të drejtën më ka bërë përshtypje.
-
VIDEO-Gogu i kujton Nokës vilën 760 mijë euro te Gjiri i Lalzit: Na duhet një përgjigje për akuzën që të bëri shoku i bankës
Raportimi i KLSH përplasi PD me PS në Kuvend, ku opozita hodhi akuza se në raport flitet për 900 milionë euro të vjedhura nga qeveria në dy vite. Deputeti Flamur Noka hodhi edhe akuza ndaj ministrit Toni Gogu duke thënë se “pastori ka misionin e tij në librat e shenjtë, të ndalojë djallin duke tundur temjanin, por nuk ka padrejtësi më të madhe se kur pastori kthen temjanin nga djalli”.
Por, ministri i Shtetit për Marrëdhëniet me Parlamentin iu përgjigj duke i kujtuar Nokës akuzat që ka bërë ndaj tij Gazment Bardhi për vilën 760 mijë euro në Gjirin e Lalzit. Gogu i tha Nokës se ka detyrimin që të sqarohet në Kuvend mbi akuzat për vilat.
“I dashur Flamur, jam ulur këtu si shërbëtor i Republikës i zgjedhur nga kuvendi dhe i dekretuar nga Presidenti i Republikës dhe jam Ministri i Shtetit për Marrëdhëniet me Parlamentin, dhe ndaj rri dëgjoj edhe pavërtetësira, e them pavërtetësira me delikatesë se në fakt janë gënjeshtra kokë e këmbë. E dyta, e shikoj që ti je intriguar për standardin e jetesës time, megjithatë të ftoj të më ndjekësh nga mbrapa dhe të shikosh se si i jetoj unë bindjet e mia.
Detyrën time e çmon ti patjetër, por bindjet e mia, të ftoj që t’i shikosh, të vish nga mbrapa. Për sa i përket akuzave personale, të lutem, kësaj salle ti i detyrohesh një përgjigje ndaj një akuze që ta ka bërë shoku i bankës për disa vila të bëra me veprimtari të paligjshme, dhe kam përshtypjen që duhet të jenë në ndonjë organ ligjor. Se më duket se i çoi dhe atje.
Pra, ju keni thënë kaq shumë gjëra për njëri-tjetrin dhe keni lozur, kështu si quhet ajo loja me top, kur gjuhet me top me të pavërteta me njëri-tjetrin, sa që çfarëdo lloj gjëje që ju thoni është kaq e tmerrshme dhe ju kujtoni se populli rri në televizor t’ju dëgjojë gënjeshtrat tuaja. Populli është në punë bashkë me ministrat”, tha Gogu.
Gogu ka sjellë në kujtesë një akuzë që Bardhi bëri ndaj Nokës në vitin 2022, kur kishte nisur edhe përplasja brenda PD-së.
-
“Ke marrë një armë poshtë mbikalimit ku ndodhi vrasja e..?”/ Ish-shefi policisë, Nazmi Shuli përgënjeshtron në gjyq deklarimet e Nuredin Dumanit
Ish-shefi policisë, Nazmi Shuli gjatë fjalës së tij në gjyq ka përgënjeshtruar deklarimet e të penduarit të drejtësisë, Nuredin Dumani. Sipas deklarimeve të mëparshme të Dumanit, Shuli ka marrë një armë zjarri poshtë mbikalimit pas vrasjes së Elvis Dedjas.
I pyetur nëse ka marrë një armë poshtë mbikalimit ku ndodhi vrasja, ai tha se jo dhe se është zbatues i ligjit. Ai shtoi se nuk ka lidhje me këto. Ish-polici ka theksuar se Festimin dhe Petrit Qolin i njeh.
Sipas Prokurorisë Shuli ka bërë komunikim telefonik me Festim Qolin një ditë përpara se të ndodhte ngjarja. Ka komunikuar me Petrit Qolin ditën e ngjarjes. Shuli ka pohuar se ka komunikuar disa herë më ta por s’ka folur për vrasjet.
“Në qershor 2012 kam qenë i punësuar në qarkun e Elbasanit, pjesë e policisë së shtetit. Festimin dhe Petrit Qolin i kam njerëzit e mi dhe kam komunikuar në telefon me të. Numrin e telefonit që nga 2012 e kam ndryshuar. Festim Qoli ka pasur një karburant, një sallë dasmash dhe market. Te karburanti ka qenë me një ortak tjetër. Unë e kam njohur si “Loshi” ortakun e Festimit, ishin shokë dhe miq bashkë.
E kam marrë vesh në media për vrasjen e Loshit, vonë. Me Festim Qolin kam folur në telefon, bashkë me një kolegun tim oficer policie pimë kafe me të te karburanti. Për vrasjen e Elvis Dedja nuk diskutuam fare me Festimin për këtë fakt. Agron Qolin e kam djalë daje, kemi patur raport të shkëlqyer. Agroni raportet me Festimin dhe Petritin i ka patur të mira.
Pas vrasjes së Elvis Dedjas, pas shumë kohësh e kam takuar Festimin. Nuk tentova ta marr në telefon gjatë as periudhe, as Petritin. Me Festimin bëra biseda normale, ai kishte qenë jashtë shteti. Nuredin Dumanin nuk e njihja, vetëm të atin. Pas vrasjes së Fatmira Deda jam takuar me Festimin, nuk më ka shprehur shqetësime për të. Kam qenë shef komisariati në Peqin kohën kur ndodhi vrasja e Elvis Loshit. Në Durrës kam qenë shef komisariati në vitin 2011.
Nga 11 janari deri në dhjetor 2011 kam qenë shef komisariat Durrës, pastaj u transferova në Peqin. Ndodhesha në shtëpi në Shkozet në momentin që mora vesh për ngjarjen. Rrallë shkoja te karburanti, pija kafe me njerëzit e mi. Me Petrit Qolin dhe Agron Qolin takoja aty kur na binte rasti, edhe me Festimin. Elvisin ma patën prezantuar si shok i Festimit. Festimi kishte aksione në pikën e karburantit”, tha ai. -
Thirrja e Trump për rifillimin e testeve të armëve bërthamore/SHBA lëshon raketën balistike ndërkontinentale
SHBA-të lëshuan një raketë balistike ndërkontinentale (ICBM) Minuteman III herët të mërkurën, pasi Presidenti Trump bëri thirrje për rifillimin e testeve të armëve bërthamore.
Sipas mediave të huaja, Komanda Globale e Sulmit të Forcave Ajrore lëshoi raketën GT 254, të aftë për të transportuar armë bërthamore nga Baza e Forcave Hapësinore Vandenberg në Kaliforni, me testin që shkoi pa probleme.
Raketa e paarmatosur ra pranë vendit të testimit të mbrojtjes nga raketat balistike ‘Ronald Reagan’ të ushtrisë në Ishujt Marshall.
Testi, i cili ishte planifikuar muaj më parë, ka tërhequr vëmendjen pasi Trump urdhëroi ushtrinë javën e kaluar të fillojë testimin e armëve bërthamore të Amerikës, për herë të parë në më shumë se tre dekada.