SPAK ka kërkuar zyrtarisht ekstradimin e ish-zv.kryeministrit Arben Ahmetaj nga Zvicra, i shpallur në kërkim për çështjen e inceneratorit të Tiranës.
Ky fakt u bë me dije gjatë relatimit te fakteve në procesin në themel për dosjen “Buka” ku u vendos të vijojë procesi në mungesë për ish-nr 2 te qeverisë.
Avokati i Ahmetajt, Henrik Ligori: Për këtë dosje për Ahmetaj nuk ka asnjë mase sigurie. Masa është për efekt te nje procedimi tjetër.
Për dosjen “Buka” , Ahmetaj akuzohet për shpërdorim detyre me dëm ekonomik 7 miliardë lekë.
Palët nuk kanë asnjë kërkesë paraprake. Prokurori i SPAK Elvin Gokaj lexon kërkesën për gjykim.
Author: Javanews.al
-
Inceneratori i Tiranës, SPAK kërkon ekstradimin e ish-zv.kryeministrit Ahmetajt nga Zvicra
-
SPAK konfirmon thirrjen e Berishës për ‘21 Janarin’: Ia komunikuam sot teksa…
SPAK konfirmon thirrjen e kreut të PD, Sali Berisha për ta pyetur për dosjen e ’21 Janarin’ , ku humbën jetën katër protestues.
Në një njoftim publik, Prokuroria e Posaçme bën me dije se Berisha ka nënshkruar urdhër-thirrje teksa zbatoi sot masën e sigurisë ‘detyrim paraqitje’.
“Sot më datë 17.11.2025, gjatë zbatimit të masës “detyrim paraqitje” në Prokurorinë e Posaçme, z. Sali Berisha është njohur dhe ka nënshkruar urdhër-thirrjen lidhur me procedimin penal nr.138 të vitit 2024 (çështja e 21 Janarit), përmes të cilës, i kërkohet të paraqitet në Prokurorinë e Posaçme, në datën dhe orën e caktuar”, thotë SPAK. -
Kili drejt një përplasjeje historike: Komunistja Jara dhe ultrakonservatori Kast në balotazh
Kili do të zgjedhë presidentin e ri më 14 dhjetor, ku në balotazh do të përballen kandidatja e Partisë Komuniste, Jeannette Jara, dhe udhëheqësi ultrakonservator i Partisë Republikane, José Antonio Kast. Me 40% të votave të numëruara, përparësia e tyre në raundin e parë konsiderohet tashmë “e pakthyeshme”, sipas rezultateve zyrtare të Servel.
Jara kryeson me 26,45%, e ndjekur nga Kast me 24,46%, ndërsa në vend të tretë, me surprizë, renditet populisti Franco Parisi me 18,62%. Gati 16 milionë kilianë votuan jo vetëm për presidentin e ri, por edhe për të rinovuar Dhomën e Deputetëve dhe gjysmën e Senatit, në një proces ku dominuan çështjet e sigurisë, emigracionit, ekonomisë dhe pakënaqësia ndaj klasës politike.
Zgjedhjet u zhvilluan në një klimë të fortë polarizimi, në sfondin e një rritjeje të ndikimit amerikan në Amerikën Latine. Tetë kandidatë garuan për postin më të lartë të shtetit. Në të majtë, koalicioni “Unidad por Chile” u rreshtua rreth Jeannette Jara-s, 51 vjeç, ish-ministre e Punës, që fillimisht projektohej deri në 33%. E djathta, ndërkohë, hyri e përçarë në garë me katër kandidatura kryesore, çka e bëri të vështirë parashikimin të rezultateve.
Në kampin konservator, José Antonio Kast dhe Evelyn Matthei shfaqeshin të barabartë në projeksionet fillestare me rreth 20% secili. Kast, i mundur nga Gabriel Boric në vitin 2021, konsiderohet si përfaqësues i krahut më konservator dhe nostalgjik ndaj epokës së Pinochet, megjithëse deklaron besnikëri ndaj institucioneve demokratike.
Ai, admirues i Donald Trump, bëri thirrje për unitet të djathtës, duke deklaruar se vazhdimësia e qeverisjes aktuale “nuk i bën mirë vendit” dhe se Partia Komuniste ka një “ideologji të ngurtë” që frenon liritë. Matthei, figurë tradicionale e së djathtës, mbeti pas në renditje. Më në ekstrem, ultra-libertariani Johannes Kaiser, i krahasuar me Bolsonaro-n dhe Milei-n, mori rreth 13%, ndërsa italo-amerikani Parisi, i renditur i treti, fragmentoi më tej votat e djathta. Tani, Kast pritet të kërkojë bashkimin e të gjithë votuesve konservatorë rreth tij, me një program ekonomik ultra-liberal që parashikon ulje të forta të shpenzimeve publike.
Nga ana tjetër, Jeannette Jara mbron një vijë të afërt me politikat e qeverisë së majtë në largim, megjithëse kohët e fundit është distancuar nga presidenti Gabriel Boric, i cili përgjatë vitit 2025 ka pasur popullaritet nën 30%.
“Kili nuk po shkatërrohet. Është një vend i madh, me një të ardhme të madhe”, deklaroi ajo në mitingun e fundit, duke shtuar se do të largohej nga Partia Komuniste nëse zgjidhet presidente. Pavarësisht kritikave ndaj qeverisë, Jara ka firmosur si ministre disa nga reformat e saj të pakta të suksesshme, si rritja e pagës minimale.
Ndërkohë, bilanci i mandatit të Boric është më i zbehtë. Katër vjet pas protestave të 2019-s, që krijuan pritshmëri për një transformim të thellë, dy përpjekjet për të miratuar një Kushtetutë të re dështuan, fillimisht varianti progresist dhe më pas ai i propozuar nga e djathta. Në vend të reformave, dolën në pah probleme të tjera: kriminaliteti është rritur ndjeshëm, emigracioni nga Venezuela ka arritur nivele rekord dhe sot Kili ka rreth 2 milionë të huaj në një popullsi prej 19 milionësh.
Edhe ekonomia mbetet e brishtë: në tremujorin e dytë të vitit 2025 rritja ishte 3,1%, por 45% e familjeve thonë se mezi arrijnë në fund të muajit, 72% janë futur në borxhe dhe papunësia qëndron në 8%. Shteti është gjithashtu i varur nga eksportet drejt Kinës, që përthith rreth 40% të prodhimeve kiliane. -
Izraeli përshkallëzon tensionet: Nuk do të ketë shtet palestinez në perëndim të Jordanit
Qeveria izraelite ka deklaruar se nuk do të pranojë kurrë krijimin e një shteti palestinez në asnjë territor në perëndim të lumit Jordan, duke rritur edhe më tej tensionet rajonale në një moment kur situata në kufirin me Libanin mbetet jashtëzakonisht e brishtë.
Tensionet u rritën pas incidentit kur forcat e UNIFIL-it u qëlluan gabimisht nga një tank izraelit Merkava në veri të Metulës. Paqeruajtësit, që po lëviznin në këmbë, u ngatërruan me elementë “të dyshimtë” për shkak të motit të keq, sipas shpjegimit të ushtrisë izraelite. Plumbat ranë vetëm pesë metra larg trupave të UNIFIL-it, pa shkaktuar të plagosur, por incidenti konfirmoi tensionin e lartë në kufi dhe dobësinë e armëpushimit, i cili parashikon tërheqjen e IDF-së nga jugu i Libanit në këmbim të çmilitarizimit të Hezbollahut.
Sipas mediave izraelite, IDF-ja ka marrë nën kontroll të paktën pesë pozicione të tjera në territorin libanez dhe vijon goditjet e përditshme në Libanin jugor dhe Luginën Bekaa. Javën e kaluar, ushtria kreu disa inkursione gjatë natës për të penguar riarmatimin e Hezbollahut; në Aitaroun u shkatërruan ndërtesa që, sipas IDF-së, përdoreshin nga grupi. Në një tjetër operacion në Ramyeh, trupat izraelite sekuestruan dhe shkatërruan armë, ndërsa forcat ajrore kryen pesë sulme ku u vranë tre anëtarë të Hezbollahut.
Edhe pse shiu ka pushuar së rëni në Rripin e Gazës pas përmbytjeve të rënda, shpresat për mbajtjen e armëpushimit mbeten të pakta. Shefi i Shtabit të IDF-së, Eyal Zamir, deklaroi se forcat izraelite janë të gatshme të avancojnë përtej vijave aktuale të ndalimit të zjarrit nëse kërkohet, “për të çmontuar Hamasin dhe për të çmilitarizuar Gazën, me marrëveshje ose me mjete ushtarake”.
Në këtë klimë tensioni, Arabia Saudite, vetëm pak orë para vizitës së Mohammed bin Salman në Shtëpinë e Bardhë, të parës që nga viti 2018, nënvizoi se normalizimi i marrëdhënieve me Izraelin është i mundur vetëm nëse ekziston një propozim i qartë për krijimin e një shteti palestinez.
Riadi shtoi se kjo nuk mund të ndodhë me qeverinë aktuale të Benjamin Netanyahut, të cilën e konsideron të papranueshme për shkak të ministrave si Smotrich dhe Ben Gvir. Kjo qëndron në kontrast të plotë me deklaratat e Netanyahut, i cili përsëriti se Izraeli kundërshton “çdo shtet palestinez në çdo territor në perëndim të Jordanit”, linjë e mbështetur edhe nga ministri i Mbrojtjes, Israel Katz.
Tensionet politike nuk kanë kursyer as Jeruzalemin. Opozita ka kritikuar vendimin e qeverisë për të ngritur një hetim të brendshëm mbi dështimet e 7 tetorit 2023, në vend të krijimit të një komisioni të pavarur. Lideri i opozitës, Yair Lapid, akuzoi qeverinë se “po përpiqet të fshehë të vërtetën dhe të shmangë përgjegjësitë”, ndërsa Yair Golan deklaroi se “ata që hetohen nuk mund të zgjedhin vetë hetuesit e tyre”, duke premtuar se ngjarjet e 7 tetorit do të hetohen nga një komision shtetëror i pavarur. -
Alarm kombëtar për reshjet deri më 22 nëntor! Mobilizim sidomos në Fier, Lezhë e Shkodër
Zëvendëskryeministrja, njëherësh Ministre e Infrastrukturës dhe Energjisë, Belinda Balluku mbajti një takim koordinues sot, 17 nëntor, në Agjencinë Kombëtare të Mbrojtjes Civile, në kuadër të masave për përballimin e situatës që pritet të krijohet nga moti i keq.
Haki Çako, kreu i Emergjencave Civile, tha se deri në datën 22 nëntor është parashikuar mot i keq në vend.
“Pjesa veriore kryesisht, ose e baseneve të Komanit dhe Vaut të Dejës do të kenë intensitet reshjesh mesatare dhe të larta, që do të ndikojë në pjesën e poshtme të Shkodrës dhe Lezhës, ku derdhen lumenjtë kryesorë”, deklaroi ai.
Tha se “sot të gjitha bashkitë dhe prefekturat në nivel kombëtar janë mobilizuar totalisht”.
“Data 18 mund të ketë intensitet të shtuar dhe reshjet të jenë të pranishme në të gjithë territorin”, nënvizoi Çako.
Ndërsa ministri i Mbrojtjes, Pirro Vengu tha se “është bërë një shpërndarje e mjeteve që ndihmojnë bashkitë përmes bordeve të kullimit, qoftë për krijimin e pritave që ujërat të jenë sa më të kontrolluara”.
“Kam kërkuar edhe nga Shtabi i Përgjithshëm i Forcave të Armatosura, të dislokohen që sot në terren, veçanërisht në Vaun e Dejës“, shtoi ai.
“Nuk do lëmë asnjë bashki vetëm kundrejt këtij rreziku”, theksoi Vengu.
“20 specialistë janë ndarë në grupe dhe janë kryer të gjitha shërbimet e mirëmbajtjes. 80 teknikë do të mbajnë nën kontroll të gjithë rrjetin kullues, 80 eskavatorë në Lezhë e Shkodër që do jenë në gatishmëri për ndërhyrjet e vazhdueshme. Edhe në Fier janë vënë 16 eskavatorë”, tha Ministri i Bujqësisë, Andis Salla.
-
“Kërkesa pa fund nga opozita”, Balla: Protestojnë sa herë që kanë hesape me drejtësinë
Kreu i Grupit Parlamentar të Partisë Socialiste, Taulant Balla, foli për mediat sot më 17 nëntor, pas Konferencës së Kryetarëve, duke vënë në dukje, ritmin e lartë të kërkesave të opozitës për mocione me debat.
“Nga grupet parlamentare të opozitës ka ardhur një numër kërkesash për mocione me debat më shumë se në katër vitet e fundit. Sot na u kërkua mocion me debat për buxhetin e shtetit”.
Ai theksoi se ky buxhet është historik për vendin.“Kërkohet mocion me debat, ndërkohë që ky është buxheti më i madh në histori, që ka brenda vetes 1.8 miliard euro për politika të natyrës sociale. Ky është buxheti që parashikon rritje pagash dhe pensionesh më të madhen ndonjëherë, si dhe rritje të rimbursimeve të ilaçeve”.
Balla gjithashtu u shpreh se kërkesat janë rend dite për PD-në dhe jo për parlamentin. “Kërkesat janë rend dite i Foltores dhe jo i parlamentit. Ne rend dite në parlament këto kërkesa nuk i bëjmë”.
Ai kujtoi gjithashtu protestat e mëparshme të Partisë Demokratike. “Më 1998, kur Kuvendi i hiqte imunitetin Berishës, janë thirrur protesta. Kur Berishës i hiqej viza amerikane, PD bëri protesta. Kur drejtësia shqiptare sot e thërret si person që ka dijeni dhe kur zihet ngushtë, Berisha proteston”.
Debati për buxhetin u miratua me konsensus. -
Si do jetë moti sot e në vijim? Ministria e Mbrojtjes: Reshje intensive në disa qarqe
Ministria e Mbrojtjes njofton qytetarët sot më 17 nëntor për reshjet që priten në vend gjatë dy ditëve të ardhshme, duke apeluar për kujdes dhe vëmendje të shtuar, veçanërisht në qarqet më të prekura.
Sipas informacionit të përditësuar nga Instituti i Gjeoshkencave (IGJEO) dhe Shërbimi Meteorologjik Ushtarak (SHMU), sot, ditë e hënë, 17 nëntor 2025, priten reshje mesatare deri lokalisht intensive në qarqet Shkodër, Lezhë dhe Vlorë.
Në qarqet Kukës, Dibër, Durrës, Tiranë dhe Gjirokastër reshjet do të jenë të dobëta deri mesatare, të shoqëruara me shtrëngata, ndërsa në qarqet e tjera parashikohen reshje të dobëta. Intensiteti pritet të rritet në orët e pasdites.
Ministria e Mbrojtjes bën me dije se “Agjencia Kombëtare e Mbrojtjes Civile është e angazhuar në monitorimin, koordinimin e masave parandaluese dhe reagimin në kohë në rast të përshkallëzimit të situatës”.
Për ditën e martë, 18 nëntor 2025, parashikohen reshje të shtuara në të gjithë territorin e vendit: Shkodër, Kukës, Vlorë dhe Gjirokastër do të përfshihen nga reshje intensive deri lokalisht shumë intensive.
Në Lezhë priten reshje intensive. Në Dibër, Durrës dhe Tiranë reshjet do të jenë mesatare deri lokalisht intensive.
Në qarqet e tjera priten reshje të dobëta deri mesatare.
Reshjet do të shoqërohen me shtrëngata në të gjithë vendin, duke rritur nevojën për kujdes në rrugë, zona të ulëta dhe përgjatë lumenjve.
Ministria e Mbrojtjes apelon për kujdes maksimal nga qytetarët, për shkak të reshjeve intensive.
-
“Pse u fshinë serverat e 21 Janarit?”, Berisha ‘ia ngec’ Gardës: Ç’punë ka Kryeministria?!
Kreu i PD-së, Sali Berisha u zu ngushtë nga pyetjet për refuzimin e fletëthirrjeve të SPAK për krimin shtetëror të “21 Janarit”.
I pyetur se përse u fshinë serverat e kryeministrisë nga ku dolën plumbat që vranë 4 protestuesit më 21 janar 2011, Berisha ia faturoi fajin Gardës, teksa tha se kryeministria nuk ka pasur asnjë server për vëzhgimin por garda.
Pyetje: Pse u fshinë serverat?
Berisha: Kush? Asnjë dijeni për këtë. Kryeministria nuk ka patur, si kryeministri asnjë lloj server për vëzhgimin dhe nëse Garda ka patur serverin aty është punë tjetër. Garda kudo ka një zyrë të veten, çfarë mbajnë aty është punë e tyre dhe jo e të tjerëve. Çfarë ka ndodhur është hetuar, është hetim i plotë dhe i bërë vite dhe ka dënime përkatëse. Kështu që unë nuk jam thirrur asnjëherë. Edhe unë do të jap çfarë di unë. -
PD proteston para Kryeministrisë, Policia njofton planin e masave: Ja rrugët që do të bllokohen
Partia Demokratike do të zhvillojë protestë këtë të hënë, 17 nëntor, para Kryeministrisë, nga ora 18:00 deri në orën 20:00.
Për tubimin ka një njoftim edhe nga Policia e Tiranës, e cila ka vendosur bllokime dhe devijime të trafikut në disa akse kryesore.
Nga ora 14:00, nuk do të lejohet parkimi në: bulevardin “Dëshmorët e Kombit”, sheshin “Nënë Tereza”, rrugën “Ismail Qemali” (nga kryqëzimi me rrugën “Ibrahim Rugova”), rrugën “Papa Gjon Pali II”, bulevardin “Zhan D’Ark” dhe bulevardin “Bajram Curri”.
Nga ora 15:00 deri në përfundim të tubimit, do të ketë bllokim të lëvizjes së automjeteve në: bulevardin “Dëshmorët e Kombit” (nga Ministria e Brendshme deri te sheshi “Nënë Tereza”), rrugët “Ukraina e Lirë”, “Papa Gjon Pali II” dhe “Ismail Qemali”.
Policia njofton se, në varësi të zhvillimit të tubimit, mund të ketë bllokime edhe në rrugë të tjera.
Qytetarët këshillohen të shmangin qendrën e Tiranës dhe të përdorin rrugë alternative për të mos penguar lëvizjen e pjesëmarrësve në tubim.
Kujtojmë se kryedemokrati Sali Berisha ka paralajmëruar më herët nisjen e analizës dhe turit të dëgjesave me qytetarët. “Analiza do fillojë menjëherë dhe turi im do fillojë menjëherë“, tha ai më 15 nëntor.
Sipas tij, para godinës së Kryeministrisë, do të ngrihet një platformë parlamentaro-qytetare, duke e cilësuar “betejë pa kthim”. -
Nuk u paraqit në SPAK për “21 Janarin”, Berisha: Kishin frikë nga dëshmia ime, prandaj…
Kreu i PD Sali Berisha ishte sot në SPAK ku u paraqit në zbatim të masës së sigurisë “Detyrim paraqitje” për dosjen “Partizani”.
Ai ka sqaruar se nuk u paraqit për thirrjen e prokurorëve të posaçëm në lidhje me “21 janarin” pasi nuk ka marrë asnjë njoftim.
Sali Berisha: Njoftim quhet kur një person merr përsipër ta njoftojë ose kur njoftohet direkt personi. Asnjë person nuk më ka ardhur të më thotë orë dhe datë e të më dorëzojë një letër.Asnjë person nuk ka marrë asnjë letër në emrin tim. Kam dy posta elektonike. Një timen dhe një të Parlamentit që e kam përdorur vetëm një herë. Në bisedat e mia në Whats App apo sinjal, nuk më ka ardhur asgjë. Nuk më kanë thirrur asnjë herë sepse kanë pasur frikë nga dëshmia ime.