Një studim i ri ka zbuluar një mënyrë të re për të përcaktuar sasinë e ushqimeve ultra të përpunuara që konsumon një person, duke analizuar mostrat e gjakut dhe urinës. Studiuesit nga Instituti Kombëtar i Kancerit në SHBA, të udhëhequr nga Erikka Loftfield, kanë identifikuar për herë të parë shënjues biologjikë që lidhen me nivelin e konsumit të këtyre ushqimeve, të cilat mjekësia i lidh prej kohësh me një sërë problemesh shëndetësore.
Ushqimet ultra të përpunuara përfshijnë produkte si drithërat me sheqer, pijet e gazuara, picat e ngrira dhe patatinat, të cilat përmbajnë aditivë dhe përbërës artificialë që mungojnë në gatimet tradicionale. Megjithatë, për shkencëtarët ka qenë sfidë të matin me saktësi se sa nga këto produkte konsumohen në të vërtetë nga individët.
Për të kapërcyer këtë pengesë, ekipi hulumtues analizoi të dhëna nga mbi 1,000 të rritur të moshuar në SHBA, ku më shumë se 700 prej tyre kishin dhënë mostra gjaku dhe urine si dhe raportime të detajuara për ushqimet e konsumuara. Nga kjo analizë, studiuesit identifikuan qindra metabolitë që korrespondojnë me sasinë e energjisë të marrë nga ushqimet ultra të përpunuara.
Rezultatet nxorën në pah 28 shënjues gjaku dhe 33 shënjues urine që parashikojnë me saktësi konsumin e ushqimeve ultra të përpunuara. Disa prej këtyre shënuesve, përfshirë dy aminoacide dhe një karbohidrat, u shfaqën me frekuencë të lartë dhe njëri prej tyre tregoi lidhje të mundshme me diabetin e tipit 2.
Ekspertët e fushës e kanë vlerësuar këtë studim si një hap të rëndësishëm në kuptimin e ndikimit të ushqimeve të përpunuara në shëndet. “Ky është një përparim i madh shkencor,” tha Dr. Dariush Mozaffarian nga Universiteti Tufts, i cili shtoi se me më shumë kërkime, këto nënshkrime metabolike mund të ndihmojnë në identifikimin e mënyrës sesi UPF ndikon në trupin e njeriut.
Studiuesit shpresojnë që këta tregues të përdoren në të ardhmen për të analizuar lidhjen midis konsumit të ushqimeve ultra të përpunuara dhe sëmundjeve të ndryshme, përfshirë kancerin. “Ka interes të madh shkencor dhe publik për të kuptuar nëse dhe si këto ushqime ndikojnë në shëndet,” përfundoi Loftfield.