foto ilustrim: Ilir proda-arrestimi i ilir metes
TIRANË- Drejtori i Përgjithshëm i Policisë së Shtetit, Ilir Proda u pyet në Komisionin për Çështjet e Brendshme për arrestimin e Ilir Metës. Deputeti demokrat, Klevis Balliu, e quati arrestimin e Metës si të ishte “një terrorist”, ndërsa Proda iu përgjigj se çështja është nën hetim.
“Arrestuat Ilir Metën si terrorist, ndërsa bandat i paralajmëroni. Ilir Metën e arrestuat si terrorist. Ndërsa bandave u tregoni paraprakisht kur do vijë policia t’i arrestojë”, iu drejtua Balliu.
Proda pranoi se është përdorur forcë me ish presidentin e Republikës, por duke thekuar se nuk është shkelur ligji, duke argumentuar se Meta ka bërë rezistencë. Po ashtu, Proda sqaron se Policia e Shtetit përdor forcë të nevojshme kur bëhet rezistencë, që në rastin e Metës sipas tij, ishte proporcionale ne raport me situatën.
“Policia nuk ka shkelur ligjin. Çështja është nën hetim, sa i takon opinionit tim nuk kemi të bëjmë veprim arbitrar, por kemi të bëjmë me përdorimin e forcës në rastet kur ka rezistencë ndaj arrestimit. Policia e shtetit kur bëhet rezistencë përdor forcë të nevojshme që besoj ka qenë proporcionale ne raport me situatën. I takon individit të sillet sipas detyrës që ka mbajtur”, u përgjigj Proda.
Kreu i PL-së, Ilir Meta ndodhet në paraburgim që prej 21 tetorit të vitit të kaluar, pasi akuzohet nga SPAK për “korrupsion”, “shpërdorim të detyrës” dhe “fshehje e mosdeklarim të pasurisë”. SPAK mbylli hetimet më 28 korrik, ndërsa dosjen e kaloi për gjykim në fund të gushtit, e cila përfshiu tre hetime në një aferën CEZ-DIA, lobimin e LSI në SHBA dhe hetimin pasuror.
Ish-presidenti Meta dhe ish-bashkëshortja e tij, Monika Kryemadhi janë marrë të pandehur nga SPAK për korrupsion, pastrim parash dhe mosdeklarim të pasurisë. Ilir Meta ndodhet në burg që prej 21 tetorit të kaluar, ndërsa Monika Kryemadhi është në masën e sigurisë “detyrim paraqitje”. Çifti tashmë i divorcuar ligjërisht akuzohet se kanë ushtruar pushtetin e tyre ndër vite për të përfituar pasuri në mënyrë të paligjshme, si dhe për fshehjen e burimit të këtyre pasurive, duke përfshirë edhe familjarët në skemat e dyshuara./ZËRI