Të varura në çatitë e makinave dhe me gjithçka të mbetur ngjeshur brenda, dhjetëra familje palestineze u larguan me ngut të martën nga kampi i refugjatëve Nur Shams në Bregun Perëndimor të pushtuar, përpara një vale të re prishjesh të planifikuara nga forcat izraelite.
Sipas Nihad al Shawish, kreut të komitetit në kamp, deri tani janë shkatërruar 120 shtëpi, ndërsa 20 të tjera janë shënjestruar në operacionin e fundit ushtarak. Ofensiva ka zhvendosur dhjetëra mijëra njerëz, duke prekur rëndë komunitete të themeluara prej kohësh si ato në Tulkarem dhe vetë kampin Nur Shams.
Ndërkohë, në Masafer Yatta, buldozerët izraelitë shembën një fshat beduin me arsyetimin e ndërtimeve të paligjshme në një zonë të shpallur ushtarake. Prishjet ndodhën në një territor ku kolonët radikalë po zgjerojnë rrjetin e tyre të post-vendbanimeve, në një klimë që palestinezët e përshkruajnë si të mbështetur nga shteti izraelit.
Sipas banorëve dhe grupeve të të drejtave të njeriut, kolonët shpesh veprojnë me mbështetjen ose pëlqimin e heshtur të autoriteteve izraelite, të cilat rrallë i ndjekin penalisht për aktet e dhunës ndaj popullsisë palestineze./ Euronews – Syri.Net