Një implant i ri me teknologji të avancuar ka treguar “premtime” në luftimin e disa prej formave më vdekjeprurëse të kancerit.
Pajisja e re kundër kancerit aktivizon në mënyrë të sigurt reagime “të fuqishme” imunitare kundër kancereve të vështira për t’u trajtuar, përfshirë melanomën metastatike, si dhe tumoret pankreatike dhe kolorektale, sipas shkencëtarëve amerikanë.
Një ekip kërkimor nga Rice Biotech Launch Pad në Universitetin Rice në Houston ka zhvilluar një “fabrikë citokinash” të implantueshme.
Ata shpjegojnë se një pajisje imunombrojtëse e vendosur pranë mikroambientit të tumorit, që përmban qeliza të modifikuara për të lëshuar në mënyrë lokale proteinën interleukin-12 (IL-12), arrin të nxisë me sukses rekrutimin e qelizave imune të specializuara të quajtura Tpex.
Ky rekrutim çon në krijimin e një popullate të madhe dhe afatgjatë të qelizave T që synojnë tumoret, sipas një studimi të publikuar në The Journal of ImmunoTherapy of Cancer.
Kombinimi i këtyre “fabrikave” të IL-12 me inhibitorët e pikave të kontrollit rezultoi në eliminimin e tumoreve si ato lokale ashtu edhe ato të largëta në modele paraklinike të melanomës metastatike dhe të kancereve kolorektale dhe pankreatike.
Sipas gjetjeve, teknologjia e fabrikës së IL-12 u demonstrua e sigurt si te minjtë, ashtu edhe te primatët jo-njerëzorë.
Ekipi kërkimor tha se ky studim do të shërbejë si bazë për një aplikim për ilaç të ri eksperimental (IND) pranë FDA-së së SHBA në fillim të vitit 2026.
Ata gjithashtu kanë në plan të themelojnë një kompani bioteknologjike të re bazuar mbi këtë teknologji premtuese të fabrikës së IL-12.
Profesori Omid Veiseh, autor kryesor i studimit dhe drejtor i Rice Biotech Launch Pad, tha: “Ne e dizenjuam fabrikën e IL-12 për të përforcuar qasjet e imunoterapisë duke minimizuar toksicitetin, një nevojë kritike në trajtimin e kancereve agresivë.
IL-12 është e fuqishme krahasuar me citokinat e tjera, pasi kërkimet tona tregojnë se këto të fundit zakonisht rekrutojnë një popullatë homogjene të qelizave T dhe humbasin efektivitetin me kohën, ndërsa IL-12 gjeneron një reagim më të fortë antitumoral duke rekrutuar një spektër më të gjerë dhe më të qëndrueshëm të qelizave T që synojnë tumorin.
Ne jemi optimistë që kjo teknologji do të ketë një ndikim të madh në jetën e pacientëve me kancer duke përmirësuar ndjeshëm efikasitetin e imunoterapisë në klinikë.”
Dr. Nathan Reticker-Flynn, nga Universiteti i Stanfordit, shtoi: “Përdorimi i sistemit imunitar qelizor për të luftuar tumoret solide është një qasje e zakonshme por shpesh problematike, pasi sfida për të arritur një trajtim efektiv pa toksicitet është ende e pazgjidhur.
Studimi ynë tregon jo vetëm efektshmërinë e kësaj teknologjie në modele paraklinike, por edhe profilin e saj të sigurisë, një aspekt kyç ndërsa i afrohemi provave klinike.”
Ai përfundoi: “Ky kërkim përfaqëson një hap të rëndësishëm përpara në përpjekjen për të ofruar trajtime më efektive për pacientët që luftojnë me kanceret metastatike.” / KTBS – Syri.net