zelensky-trump-putin
SHBA- Presidenti Donald Trump tha të martën se i ka udhëzuar të dërguarit të posaçëm Steve Witkoff të takohet me Presidentin rus Vladimir Putin në Moskë, me “vetëm disa pika mosmarrëveshjeje të mbetura” midis rusëve dhe ukrainasve.
Në të njëjtën kohë, tha Trump, Sekretari i Ushtrisë Dan Driscoll do të takohet me ukrainasit, pas së cilës presidenti shpreson të takohet me Putinin dhe Presidentin ukrainas Volodymyr Zelensky, por jo derisa të finalizohet një marrëveshje.
Takimet do të zhvillohen “me shpresën e finalizimit” të marrëveshjes së paqes midis Rusisë dhe Ukrainës, shkruan presidenti amerikan. Më herët gjatë ditës, Trump tha që një marrëveshje për paqe në Ukrainë është shumë afër dhe se negociatat e ditëve të fundit sollën përparim të madh mes palëve.
“Javën e kaluar, ekipi im bëri përparim të jashtëzakonshëm në përfundimin e luftës midis Rusisë dhe Ukrainës (një luftë që NUK do të kishte filluar KURRË nëse unë do të kisha qenë President!). Muajin e kaluar, 25,000 ushtarë humbën jetën.
Plani origjinal i paqes me 28 pika, i hartuar nga Shtetet e Bashkuara, është rafinuar, me kontribut shtesë nga të dyja palët, dhe kanë mbetur vetëm disa pika mosmarrëveshjeje. Me shpresën e finalizimit të këtij plani paqeje, kam udhëzuar të dërguarin tim të posaçëm, Steve Witkoff, të takohet me Presidentin Putin në Moskë, dhe, në të njëjtën kohë, Nënsekretari i Mbrojtjes për Ushtrinë, Dan Driscoll, do të takohet me ukrainasit.
Do të informohem për të gjitha zhvillimet, së bashku me Zëvendëspresidentin J.D. Vance, Sekretarin e Shtetit Marco Rubio, Sekretarin e Luftës Pete Hegseth dhe Shefen e Shtabit të Shtëpisë së Bardhë Susie Wiles.
Pres me padurim të takohem me Presidentin Zelensky dhe Presidentin Putin së shpejti, por VETËM kur marrëveshja për t’i dhënë fund kësaj lufte të jetë PËRFUNDIMTARE ose në fazat e saj përfundimtare. Faleminderit për vëmendjen tuaj. për këtë çështje shumë të rëndësishme dhe le të shpresojmë të gjithë që PAQJA të arrihet sa më shpejt të jetë e mundur!”, shkroi Trump.
Nga ana tjetër, presidenti ukrainas Volodymyr Zelenskiy tha të martën se Ukraina ishte gati të avanconte një kornizë të mbështetur nga SHBA-të për t’i dhënë fund luftës me Rusinë dhe të diskutonte pikat e diskutueshme me Presidentin e SHBA-së Donald Trump në bisedime që ai tha se duhet të përfshijnë aleatët evropianë.
Në një fjalim para asaj që njihet si koalicioni i aleatëve të gatshëm, një kopje e të cilit u pa nga Reuters, Zelenskiy u bëri thirrje udhëheqësve evropianë të hartojnë një kornizë për vendosjen e një “force sigurie” në Ukrainë dhe të vazhdojnë të mbështesin Kievin për aq kohë sa Moska nuk tregonte dëshirë për t’i dhënë fund luftës së saj./ZËRI