Një shqiptar u dënua me 15 vite burg në Republikën Domenikane. Ai u kap në aeroportin e kryeqytetit Santa Domingo duke u përpjekur të trafikojë 40 kg me kokainë me destinacion Spanjën
Nga Javier Peguero, BARRIGA VERDE
Duke iu përgjigjur kërkesës së Prokurorisë Publike, një gjykatë në Santo Domingo dënoi një person me kombësi shqiptare, i cili në vitin 2024 kishte tentuar të nxirrte nga Aeroporti Ndërkombëtar “Las Américas” 40 pako me kokainë, me destinacion Madridin në Spanjë.
Prokurorët Evelyn Peña dhe Alexis Casado paraqitën përpara gjykatës mjaftueshëm prova për të dëshmuar fajësinë e shtetasit shqiptar Sejdin Kote.
Dosja, e përgatitur nga prokurori hetues César Augusto Veloz, shpjegon se mbrëmjen e 16 nëntorit 2024, ndërsa anëtarët e Qendrës së Informacionit dhe Koordinimit të Përbashkët të Drejtorisë Kombëtare për Kontrollin e Drogave (CIÇ-DNCD) po kryenin shërbim në makinerinë e rrezeve X në terminalin ajror, vunë re imazhe të dyshimta në valixhet e të pandehurit.
Gjatë kontrollit, brenda valixheve, të ndara në dy tufa, u gjetën 40 pako me kokainë, me peshë totale 39.13 kilogramë.
Me vendimin e Gjykatës së Parë Kolegjiale të Santo Domingo Este, e përbërë nga gjyqtarët Elizabeth Esperanza Rodríguez Espinal, Flor E. Batista Polo dhe José Leonel Asencio Quezada, i dënuari do ta vuajë dënimin në Qendrën e Korrektimit dhe Rehabilitimit (ÇR) Najayo Hombres, në provincën San Cristóbal.