Corriere Adriatico
Katër shqiptarë mbeten në burgun e Montacutos në Itali.
Ata konsiderohen autorë të vjedhjeve në Montemarciano dhe Marina, natën mes të premtes dhe të shtunës së kaluar, si dhe të disa bastisjeve të tjera në Osimo.
Gjyqtari Giovanni Manzoni ka konfirmuar masën e arrestit të katër shqiptarëve, të cilët kanë zgjedhur të mos përgjigjen gjatë marrjes në pyetje.
Të akuzuarit për vjedhje, fshehje të sendeve të vjedhura dhe rezistencë ndaj punonjësve të policisë, janë të moshës nga 27 deri në 36 vjeç.
Dy prej tyre, 27 dhe 30 vjeç, punojnë në bujqësi në jug të Italisë dhe mbrohen nga avokati Gianluca Di Cola; 34-vjeçari, që mbrohet nga avokati Giovanni Galeota, rezulton të jetë banues në Parma, ndërsa i fundit, 36 vjeç, mbrohet nga avokatja Sara Di Medio.
Të katër u arrestuan në strehën e tyre në Porto Recanati, pasi kishin kryer vjedhje në katër banesa në Montemarciano.
Rreth orës 2:30 të natës, karabinierët e njësisë së lëvizshme të Osimo-s, të cilët po e ndiqnin bandën prej ditësh, ndërhynë në një apartament në Via Giusti, në qendër të Porto Recanati-t, dhe u vunë prangat.
Të katër shqiptarët, të specializuar në vjedhje banesash, kishin grabitur stoli dhe sende me vlerë — varëse, unaza dhe byzylykë prej ari — gjatë mbrëmjes së së premtes, pak orë përpara arrestimit.
Ata udhëtonin me një Alfa Romeo Tonale dhe planifikonin me kujdes çdo vjedhje në zonë: kalonin ditën duke u përpjekur të mos binin në sy dhe prisnin orët e natës për të kryer grabitjet. Ata kishin marrë me qira apartamentin në Porto Recanati, që e përdornin si bazë për bastisjet, dhe pas çdo goditjeje, e braktisnin për t’u kthyer në vendet ku banonin zakonisht.
Gjatë operacionit, karabinierët kontrolluan edhe një Fiat 500, që ishte në përdorim nga katër shqiptarët dhe ishte parkuar pranë shtëpisë në Via Giusti: brenda makinës ata zbuluan një orë “Patek Philippe”, që mund të vlejë deri në 100 mijë euro. Ende nuk është e sigurt nëse ajo është vjedhur në ndonjërën nga banesat e Montemarciano-s që u goditën nga hajdutët.
Karabinierët po mbledhin të gjitha denoncimet e atyre që kanë pësuar vjedhje ditët e fundit dhe do të angazhojnë ekspertë për të verifikuar origjinën dhe autenticitetin e orës së çmuar.
Dyshohet se hajdutët kishin bashkëpunëtorë për shitjen e sendeve të vjedhura, të cilëve do t’ua dorëzonin mallin brenda pak orësh, pasi nuk është gjetur ende pjesa tjetër e sendeve të vjedhura gjatë grabitjeve të fundit në zonën e Osimo-s.