Një reliev i rrallë prej guri gëlqeror 4 mijëvjeçar që përshkruan stinët e kalendarit të lashtë egjiptian mungon nga nekropoli i famshëm i Egjiptit, Saqqara.
Vjedhja u raportua nga Ministria e Turizmit dhe Antikiteteve të Egjiptit të dielën.
Një mision britanik kishte punuar në varrin e Dinastisë së Pestë, i cili daton midis viteve 2500 dhe 2350 p.e.s., në Saqqara.
Varri i përkiste Khenti Ka, një zyrtar i lartë që mbante tituj duke përfshirë Priftin e Perëndeshës Maat dhe Mbikëqyrësin e Pallatit Mbretëror, transmeton KosovaPress.
Relievi i zhdukur përshkruan tri stinët e lashta egjiptiane Akhet (përmbytje), Peret (rritje) dhe Shemu (korrje). Ai duket se është prerë nga muri i varrit me një sharrë elektrike, sipas mediave lokale.
“Nuk është thjesht një artefakt dekorativ, por një që mbart një kuptim të thellë simbolik që lidhet me ciklin e jetës, bujqësinë dhe pjellorinë në besimin e lashtë egjiptian, gjë që sugjeron se kushdo që e vodhi e kuptoi vlerën e tij të vërtetë dhe rëndësinë shkencore”, tha arkeologu Abu Deshish për CBS News.
Sipas ministrisë, janë marrë të gjitha masat e nevojshme ligjore dhe e gjithë çështja i është referuar Prokurorisë Publike për hetim.
Kompleksi i varreve në stilin mastaba u zbulua fillimisht në vitet 1950, por ishte vulosur dhe u përdor si hapësirë magazinimi derisa u rihap në vitin 2019. Humbja vjen pas një vjedhjeje tjetër një javë më parë, ku një punonjës në Muzeun në Kajro vodhi një byzylyk ari 3000-vjeçar që dikur i përkiste një faraoni. U zbulua se ishte shkrirë dhe shitur për vetëm 4000 dollarë.